************************************************************
* IzAnazivagurudeva paddhati  
* of IzAnaziva gurudeva
* Vol. –I
* Edited by  T. GaNapati zAstrI  
* University of Trivandrum  1920
* Data entered by the staff of Muktabodha
* under the supervision of Mark S.G. Dyczkowski
* Transliteration Harvard-Kyoto
* Revision 0 January 28, 2007
************************************************************



zrIH 

IzAnazivagurudevapaddhatiH 

zrImadIzAnazivagurudevamizraviracitA |

(prathamaH sAmAnyapAdaH)


vAgIzvaraM taM girizaM giraM tAM gaurIM gaNezaM ca mataGgajAsyam |
dUrgAM ca durgArtiharAM viriJcaM lakSmIM ca lakSmIzamapi prapadye || 1-1 ||

gurUnalaM gauravato garIyasaH samAhitaH sarvasamAn mahIyasaH |
mahAmahimnA mihirAnivoditAMstamomahAmohaharAn nato'smyaham || 1-2 ||

vistRtAni viziSTAni tantrANi vividhAnyaham |
yAvatsAmarthyamAlocya kariSye tantrapaddhatim || 1-3 ||

ananyatantrasApekSasvArthasandohasaGgatim |
RddhairvidhAnamantrArthairvedyAM zrutimivAparAm || 1-4 ||

prasannAM nAtikuTilAM nAtisaMkSepavistarAm |
citrAM bahuguNAM viSNoH zayyAM bhogavatImiva || 1-5 ||

vividhacchandasaM nAnAvRttAlaGkAravarNakAm |
sevyAM kAmijanasyeSTAM lalitAM pramadAmiva || 1-6 ||

viSagrahAmayAdInAM prazamopAyadarzinIm |
mantrabimbauSadhidhyAnairvidyAM saJjIvinImiva || 1-7 ||

asuhRnnigrahoccATavidveSastambhamohanaiH |
utsAdamAraNopAyairdaNDanItimivAparAm || 1-8 ||

pUtanAnarakAriSTadamanAdau vicakSaNAm |
satyabhAmAsamAzliSTAM yathA mUrtiM muradviSaH || 1-9 ||

manubhirbahubhiryuktAM daivataizcApi tatsamam |
kRtatretAdikalpaizca zaradaM brahmaNo yathA || 1-10 ||

nijasaGketamArgajJairadhigamyAM pRthagvidhaiH |
yantrairdUrIkRtAnarthAM durgabhUmimivAparAm || 1-11 ||

nirgatadvAparAM dharmatanayasvargayogataH |
kaliprasaGgakaTukAM kAlasyeha gatiryathA || 1-12 ||

pAdaizcaturbhirnAtyarthaM bhinnArthaprasavairyutAm |
caturyugakramAyattAM vaidhasImiva kalpanAm || 1-13 ||

ekAmapi pRthaglakSyapUrvArdhAparalakSaNAm |
mUrtiM vinAyakasyeva gajavaktrAM narAkRtim || 1-14 ||

mahendrajAlavijJAnaprapaJcajananIM yathA |
tadvidAM pratyayAvedyAM muktidAM zaktimaizvarIm || 1-15 ||

* * * * * * ka * * * ma * vibhAgataH |
mokSaprasAdhanIM tattatkramAvedyAM trayImiva || 1-16 ||

saprayogA hi manavaH sAGgadaivapuraskriyAH |
sacchandomunidigbandhAH sadhyAnAH saprayojanAH || 1-17 ||

savidhAnAzca lakSyante mantrAste syuzcaturvidhAH |
bIjAni bIjamantrAzca mantrA mAlAkhyamantrakAH || 1-18 ||

nAnAkSarANAM saMyogAd bIjaM syAdvaikamakSaram |
bIjamantrA dazArNAdho mantrAH syurviMzateradhaH || 1-19 ||

viMzatyarNAdhikA ye tu mAlAmantrA bhavanti te |
prAyeNa bAlye bIjAni siddhiM yacchanti bhUyasIm || 1-20 ||

bIjamantrAstu kaumAre mantrA yauvanasiddhidAH |
vArddhake'pi ca sidhyanti mAlAmantrAH sadaiva hi || 1-21 ||

zraddhAbhaktisamabhyAsAt sarve sidhyanti sarvadA |
mananatrANadharmitvaM vAcake daivatasya tu || 1-22 ||

yatra tanmantrasaMjJaM syAnna tad bIjeSu vA bhavet |


atra ratnatraye –

mananAt sarvabhUtAnAM trANAt saMsArasAgarAt |
mantrarUpA hi tacchaktirmananatrANadharmiNI || iti ||


vAcyavAcakayoraikyamadhigamya gurAvapi || 1-23 ||

tad daivatasamAM bhaktiM vidadhItAtmasiddhaye |
lipirvai sarvamantrANAM zabdAnAM caiva mAtRkA || 1-24 ||

sA tu zakteH samutpannA zaktibIjAtmikA matA |
nirvikalpAtmakaM bra(hma) yannityAnandavigraham || 1-25 ||

zivaM tadacalaM vizvasvabhAvaM bhAsakaM param |
susUkSmaM cirddhanaM vyApi sarvagaM tadaNoraNu || 1-26 ||

mahato'pi mahacchuddhamicchAjJAnakriyodayam |
Adisargamukhe jJAnacikIrSAyatnadhAraNAt || 1-27 ||

svazaktivyaktimAdhatte pradIpaH svaprabhAmiva |
sattvaM rajastamazcaitacchuklaraktAsitaprabham || 1-28 ||

zaktirbhavatyajA hyekA vizvodbhavavidhAyinI |
sA zaktirbindutAmeti binduH so'pi tridhA bhavet || 1-29 ||

bindurnAdo ravazceti sa ravo'vyaktamiSyate |
avyaktAduditaM tattvaM mahAnnAma tribhedakam || 1-30 ||

mahatazcApyahaGkArastredhA sa ca nigadyate |
vaikArikastaijasazca bhUtAdiriti cAparaH || 1-31 ||

tasmAcchAktAdahaGkArAddhakAro ghoSavAnabhUt |


atra zrIkAlottare –

nAdAkhyaM yat paraM bIjaM sarvabhUteSvavasthitam |
muktidaM paramaM divyaM sarvasiddhipradAyakam ||

sAntaM sarvagataM zUnyaM mAtrAdvAdazabhiH sthitam |
hrasvA brahma samAkhyAtA dIrghA hyaGgAni SaNmukha || iti ||

ratnatraye'pi –

sa tu zabdazcaturdhA vAgvaikharyAdivibhedataH |
jAyate bindusaMkSobhAdanantasyArthasiddhaye || iti |


zaktirnAdo mahAmAyA vyometi ca caturvidham || 1-32 ||

bindorevAsya tu punazcatasro vRttayaH smRtAH |
vaikharI madhyamA caiva pazyantI cApi sUkSmayA || 1-33 ||

vyutkrameNa bhavantyetAH kuNDalinyAditaH kramAt |
sUkSmA kuNDalinImadhye jyotirmAtrAtyaNIyasI || 1-34 ||

azrotraviSayA tasmAdudgacchantyUrdhvagAminI |
svayaM prakAzA pazyantI suSumnAmAzritA bhavet || 1-35 ||

saiva hRtpaGkajaM prApya madhyamA nAdarUpiNI |
antaHsaJjalpamAtrA syAdavibhaktordhvagAminI || 1-36 ||

saivoraHkaNThatAlusthA ziroghrANadvijopagA |
jihvAmUloSThaniSTyUtA kRtavarNaparigrahA || 1-37 ||

zabdaprapaJcajananI zrotragrAhyA tu vaikharI |
hakAraH savikAro'tha repheNa samayujyata || 1-38 ||

IkAramabhajat tasmAd bindunAdavibhUSitaH |
zaktibIjaM hi tadyogAt prapaJcotpattikAraNam || 1-39 ||

haratvAcca haritvAcca puMprakRtyostu yuktayoH |
zliSToccAritayoH zAbdaM rUpaM tadbIjamIritam || 1-40 ||

hakArastu bhavet prANo repho vahnirudAhRtaH |
IkArastu bhavenmAyA bindurIzvara ucyate || 1-41 ||

nAdaH sadAzivo jJeyo nAdAntastu zivaH svayam |
hakAro vyaktimApanno hArdaghoSavivakSitaH || 1-42 ||

akAratAM gatastasya bhedo hyakSarasaGgatiH |
UkArAntAnyakArAdInyakSarANi SaDasya tu || 1-43 ||

vikRtiH syAd vizeSeNa rephasya tu R RR lR lRR |
IkArabhedatastvAsannekArAdyakSarANi SaT || 1-44 ||

itthaM SoDazadhotpannAH svarAkhyAH zaktibIjataH |
zaktyaGgatvAt kalAste syuramRtAMzukalAtmakAH || 1-45 ||

hrasvAH svarA binduyutAH pumAMso'gnyarkarUpiNaH |
dIrghasvarA visargAntAH strIliGgAH somarUpiNaH || 1-46 ||

RRRlRlRRcatuSkaM tu saumyAgneyaM napuMsakam |
svarANAmudayAdyaM tu purastAdiha likhyate || 1-47 ||

iti svarAdhikAraH |

hakAraH zabdaguNavAnakAramasRjat puraH |
vyomnaH sparzaguNo vAyuH sparzAkhyAH kAdayo'bhavan || 1-48 ||

paJcapaJcAkSarAste syuH paJcavargAstvinAtmakAH |
yAdyakSaracatuSkaM tu vAyvagnikSmAmbhasAM tanuH || 1-49 ||

sparzo rUpaM tathA gandho rasAkhyastadguNAH kramAt |
zeSAstu vyApakAH zAdyAH sAgnISomAH svaraspRzaH || 1-50 ||

itthaM paJcAzadutpannA varNAH zaktiprabhedataH |
kAdayaH paJcaviMzArNA yAdayaH zAdayastathA || 1-51 ||

sthAnaprayatnabhedena jAyante khalvakArataH |
akArAdisvarairyuktahalAM yogAnmitho'pi ca || 1-52 ||

zabdaprapaJcaH sarvo'pi vicitraM jAyate sphuTam |

halAmadhikAraH |

saiva zaktirdvidhA bhUtA tAro vAgbhavamityapi || 1-53 ||

akArazcApyukAro'tha makAro bindunAdavAn |
tArAkhyaH praNavo hyeSa zabdabrahmAtmako mataH || 1-54 ||

a-ImabindunAdADhyaM vAgbhavaM bIjamIritam |
vizvavAgbhUtidaM tattu vAgIzvaryAstanurbhavet || 1-55 ||

praNavastu zivaH sAkSAd vAgbhavaM zaktiraizvarI |
zaktibIjaM tathA tAro vAgbhavaM ca tataH param || 1-56 ||

akArAdIni paJcAzadakSarANyanupUrvazaH |
tadbhedajAzca yA vAco dezabhAjA vilakSaNAH || 1-57 ||

vedAH sAGgAH purANAni zAstrANi vividhAni ca |
AkAzAdIni bhUtAni tanmAtrANIndriyANi ca || 1-58 ||

mano buddhirahaGkAro rAgaH kAlaH kalAstathA |
bahunA kiM pralApena yaH zabdArthAtmako'khilaH || 1-59 ||

prapaJcaH zaktijo hyeSa zaktistasmAttu mAtRkA |
asyAM tu mAtRkAkhyAyAM lipitvaM likhyate yataH || 1-60 ||

akSaratvaM kSarAbhAvAd varNatvaM varNasaGgrahAt |
arNatvamamRtAtmatvAdarNo'mbhaH kathyate yataH || 1-61 ||

khAnilAgnyabdharitryAkhyA hayarephA valAvapi |
upAdAnAni vizvAtmamAtRkAyAstu paJca vai || 1-62 ||

avargo'syA mukhaM sAGgaM kacavargau bhujadvayam |
Tatavargau tathA pAdau pArzvayugmaM paphau matau || 1-63 ||

pRSThaM bakAro nAbhistu bhakAro hRnmakArataH |
tvagasRGmAMsamedosthimajjAzuklAni yAdayaH || 1-64 ||

dhAtavaH sapta varNAH syurhakAraH prANa iSyate |
sphUrtiH kSakAraH sakrodho vizvalokamayI tanuH || 1-65 ||

bhUrAdyAH sapta ye lokAH pAtAlAni ca sapta vai |
brahmAdistambaparyantaM mAtRkAyAM vyavasthitam || 1-66 ||

sUryAdyAstu grahAH sapta vargebhyaH pRthagudgatAH |
avargAdudgataH sUryaH kavargAdapi bhUsutaH || 1-67 ||

cavargAd bhArgavo jJastu TavargAd tA(li?di)kAd guruH |
pavargAcca zanizcandro yavargAdabhavad vibhuH || 1-68 ||

nakSatrANyAzvinAdIni meSAdyA rAzayastathA |
mAtRkAkSarasambhedAt kathyante parato'tra vai || 1-69 ||

paJcAzadakSarebhyastu paJcAzad rudramUrtayaH |
samudgatAstathA rudrazaktayastatprasaMkhyayA || 1-70 ||

viSNumUrtivizeSAzca tAvatyo viSNuzaktayaH |
oSadhyazcApi paJcAzadaSTatriMzat kalAstathA || 1-71 ||

tArAt paJcaprabhedAt tu paJcAzadabhavan kalAH |
evaM hi mAtRkotpattirAgamoktA pradarzitA || 1-72 ||

prapaJcasArakathitA yathAvadiha saGgrahAt |
atroddhriyante bIjAni bIjamantrAH samantrakAH || 1-73 ||

uddhAravyatyayAdi syAnmAlAmantreSu kalpanA |
tataH paraM yathApAThaM vijJeyA nipuNaiH sphuTam || 1-74 ||

huMphaT vaSaT namo vauSaDaGgAni parivArakAH |
yathAvadatra likhyante bhagavacchabdasaMyutAH || 1-75 ||

yuktAkSarANi ca spaSTaM svAhAkAre ca Thadvayam |
daNDArdhendurbhaved binduH sargo bindudvaye mataH || 1-76 ||

mantrAstu mAnavaH khyAtAH vakAro brahmasaMjJitaH |
viSakAlau makAraH syAd dhAtavo yAdayo matAH || 1-77 ||

ta eva marudagnIlAmbhAMsi vAntA bhavanti hi |
khaH prANabhuvanezAkhyo hakAraH zivasaMjJitaH || 1-78 ||

kacavargau Tatau tadvad vyatyastau hi parasparam |
paphabAzca bhamakSAzca vyatyayaM te trayastrayaH || 1-79 ||

yazavargau mithastadvad vedyau vyatyastavarNakau |
svareSu vyatyayo neSTastadvad yuktAkSareSvapi || 1-80 ||

zrIkaNThAdyAzca ye rudrA nyAsasthAnAni vA lipeH |
tattadakSaravijJaptyai saGketAya bhavanti hi || 1-81 ||

saMkhyAstRtagaNo devA bhUtAni bhuvanAni ca |
yathAsaGkhyaM tathA vidyAt svarAH sapta dizo daza || 1-82 ||

bANAstu paJca vai sapta samudrA munayastathA |
vedAzcatvAra eva syustrayo rAmAztrayo'gnayaH || 1-83 ||

nandAstu nava catvAro yugA vedyA rasAzca SaT |
uktAtyuktA tathA madhyA pratiSThA supratiSThitA || 1-84 ||

gAyatryuSNiganuSTup ca bRhatI paGktireva ca |
tRSTup ca jagatI tadvat tato'tijagatI matA || 1-85 ||

zakvarI cAtizakvaryA hyaSTiratyaSTireva ca |
dhRtizcAtidhRtizcaiva kRtiH prakRtirAkRtiH || 1-86 ||

vikRtiH saMkRtizcaiva proktAbhikRtirutkRtiH |
etAsAM chandasAM saMkhyA kvacidatra vidhIyate || 1-87 ||

tattvasaMkhyA bhaved yatra grAhyaM SaTtriMzadeva hi |
tathA SaTtriMzadeva syuH zaive tattvAni saMkhyayA || 1-88 ||

kaTapAyacaturvargA naJasandhisvarairmRtaiH |
navabhirnavapaJcASTavarNaiH saMkhyAtra vA bhavet || 1-89 ||

saGketAdhikAraH |

ityayaM vastunirdezo granthe'smin vidito yathA |
sukhAvabodho hyarthAnAM bhavatyeveSTasiddhaye || 1-90 ||

zabdabrahma yadekamakSaramajaM caitanyamAtraM yato 
vizvotpattivinAzapAlanavidhau nityotthitA mUrtayaH |

yasmAdakSaravigrahA bhagavatI jAtA svayaM mAtRkA 
tacchAktaM praNavAkhyabIjamakhilaM nyagrodhabIjaM viduH || 1-91 ||


iti zrImadIzAnazivagurudevamizraviracite tantrasArapaddhatau vastunirdezamAtRkopapattinirNayo nAma prathamaH paTalaH ||

atha dvitIyaH paTalaH 

zrIkaNTho'nantasUkSmau ca trimUrtiramarezvaraH |
azvIzo bhArabhUtizca tithIzaH sthANuko haraH || 2- 1 ||

jhaNTIzo bhautikaH sadyojAtazcAnugrahezvaraH |
akrUrazca mahAsenaH SoDazaite svarezvarAH || 2-2 ||

atha krodhezacaNDezapaJcAntakazivottamAH |
ekarudrazca kUrmaikanetrau ca caturAnanaH || 2-3 ||

ajezazarmasomezAstrayo lAGgalidArukau |
ardhanArIzvarazcomAkAntazcASaDiDiNDinau || 2-4 ||

atrimInau ca meSazca lohito'tha zikhI tathA |
chagalaNDo dviraNDazca mahAkAlo'tha pAlinA || 2-5 ||

bhujaGgazca pinAkI ca khaDgIzo baka eva ca |
tataH zveto bhRguzcaiva tathaiva lakulIzvaraH || 2-6 ||

antyaH saMvartakAkhyaH syAd rudrAH paJcAzadIritAH |

rudrAdhikAraH |

pUrNodarI ca virajA tRtIyA zAlmalI bhavet || 2-7 ||

lolA ca vartulAkSI ca dIrghaghoNA tato bhavet |
sudIrghamukhigomukhyau dIrghajihvA tato bhavet || 2-8 ||

kuNDodarI cordhvakezI tathaiva vikRtAnanA |
tato jvAlAmukhI colkAmukhI zrImukhyatho bhavet || 2-9 ||

vidyAmukhI ca kathitAH SoDaza svarazaktayaH |
mahAkAlIsarasvatyau sarvasiddhAdyagauryathA || 2-10 ||

tatastrailokyavidyA syAd mantrazaktyAtmazaktike |
bhUtamAtA bhavet pazcAt khyAtA lambodarI tataH || 2-11 ||

drAviNI nagarA caiva khecarI cApi maJjarI |
rUpiNI vIriNI caiva koTarI pUtanA tathA || 2-12 ||

bhadrakAlI gominI ca zaGkhinI garjinI tataH |
kAlarAtrIkapardinyau parataH karSaNI matA || 2-13 ||

mahAjJAnA jayA caiva sumukhA revatI tataH |
mAdhavI vAruNI caiva vAyavI  prarato bhavet || 2-14 ||

rakSovadhAriNI cAnyA tatastu sahajA bhavet |
lakSmIrmAyA ca paJcAzadetA vai rudrazaktayaH || 2-15 ||

rudrazaktayaH |

kezavaH prathamA mUrtistato nArAyaNAhvayaH |
mAdhavastvatha govindo viSNuzca madhusUdanaH || 2-16 ||

trivikramo vAmanazca zrIdharAkhyo hRSikarAT |
padmanAbho dAmodaro vAsudevastato bhavet || 2-17 ||

saGkarSaNazca pradyumno'niruddhazca svarAdhipAH |
tatazcakrI gadI zArGgI khaDgI zaGkhI halI tathA || 2-18 ||

musalI zUlinA pAzI tathA syAdaGkuzI tataH |
mukundo nandajo nandI naro narakajiddhariH || 2-19 ||

kRSNaH sattvaH sAttvatazca zauriH sUro janArdanaH |
bhUdharo vizvamUrtizca vaikuNThapuruSottamau || 2-20 ||

balI balAnujo bAlo vRSaghnazca vRSastathA |
haMso varAho vijJeyA nRsiMhazceti viSNavaH || 2-21 ||

viSNumUrtyadhikAraH

kIrttiH kAntistuSTipuSTI dhRtiH zAntiH kriyA (tathA?dayA ) |
medhA ca harSiNI zraddhA lajjA lakSmIH sarasvatI || 2-22 ||

prItiratyau svarANAM tu zaktayaH syurimAH kramAt |
jayA durgA prabhA satyA caNDA vANI vilAsinI || 2-23 ||

vijayA virajA vizvA vimadA nandanA smRtiH |
RddhiH samRddhiH siddhizca buddhirbhaktirmatiH kSamA || 2-24 ||

ramomA kledinI klinnA vasudA vasudhA parA |
parA parAyaNA sUkSmA sandhyA prajJA prabhA nizA || 2-25 ||

amoghA ceti paJcAzadvarNoktA viSNuzaktayaH |

viSNuzaktyadhikAraH 

oSadhyo'pyatha candanadvayalaghUkarpUrakauzIraMru-
gdhrIberANi takolajAtisahitA mAMsImuraM corakam |
granthI bhAskaravartinI ca kathitA hyazvatthabilvau guhA -
raktazcApi lavaGgakumbhisahitA vandinyathodumbaraH || 2-26 ||

kArSmaryambudazaGkhapuSpizikhinIplakSAgnimanthAstathA
siMhIdarbhakuzAparAjitayutaH syAd rohiNo DuNDukaH |
khyAtA syAd bRhatI ca pATalataraM caitrAtulasyAvapA-
mArgaH zakralatAmadhuvrataharikrAntAmusalyo'pi ca || 2-27 ||

syAd bhItA haritAlikA harivadhUstadvat sahA zrIlatA 
bhadrA ceti yathAkrameNa tu liperoSadhya uktAstvimAH |
yAbhiH syAd gulikAkaSAyabhasitairAlepanasnApanA-
llakSmIrvAgvibhavo'pamRtyuvijayo rakSAkaraM pAvanam || 2-28 ||

lipyoSadhyadhikAraH |

amRtA mAnadA pUSA tuSTipuSTyau ratirdhRtiH || 2-29 ||

zazinI candrikA kAntirjyotsnA zrIH prItiraGganA |
pUrNA pUrNAmRtA ceti kalAH syuH svarasambhavAH || 2-30 ||

tapanI tApanI dhUmrA marIcirjvAlinI ruciH |
suSumnA bhogadA vizvA bodhanI dhAraNI kSamA || 2-31 ||

kAdidvAdazavarNAnAM ThAntAnAM kramazaH kalAH |
dhUmrArcirUSmA jvalinI jvAlinI viSphuliGginI || 2-32 ||

suzrIH surUpA kapilA havyakavyavahe tathA |
yAdyarNayuktAH kathitA dazaitAstu kalAH kramAt || 2-33 ||

aSTatriMzatkalAdhikAraH |

paJcabhedasya tArasya paJcAzadabhavan kalAH |
sRSTizcarddhiH smRtirmedhA kAntirlakSmIrdhRtiH sthirA || 2-34 ||

sthitiH siddhirakArotthAH kalA daza samIritAH |
RgvedabrahmasRSTyarthAH prapaJce kathitaM yathA || 2-35 ||

jarA ca pAlinI zAntiraizvarI ratikAmike |
varadAhlAdinI prItirdIrghA cokArajAH kalAH || 2-36 ||

yajurviSNusamAyuktA jagataH sthitihetavaH |
tIkSNA raudrA bhayA nidrA tandrI kSut krodhanI kriyA || 2-37 ||

utkArikA ca mRtyuzca makAraprabhavAH kalAH |
sarudrasAmavedAstAH khyAtAH saMhRtaye kalAH || 2-38 ||

pItA zvetAruNA gaurI baindavAH sUryadevatAH |
catasraM sAtharvavedAH sezvarAH sarvakAmadAH || 2-39 ||

nivRttizca pratiSThA ca vidyA zAntistathaiva ca |
indhikA dIpikA caiva recikA mocikA tataH || 2-40 ||

sUkSmAsUkSAmRtAjJAnA mRtA cApyAyanI tataH |
vyApinI vyomarUpA ca nanantA cApi nAdajAH || 2-41 ||

kalAH SoDaza saMkhyAtA bhuktimuktipradAyikAH |
sadAzivAtmikAstvetAH sAmAnyena vyavasthitAH || 2-42 ||

iti praNavakalAdhikAraH |

kezAnte mukhavRtte'kSNoH zrotrayorghrANayorapi |
gaNDayoroSThayordantapaGktyormUrdhAsyayoH svarAn || 2-43 ||

kavargaM dakSiNe haste cavargamitare bhuje |
Tatavargau tathA padbhyAM paphau pArzvadvaye nyaset || 2-44 ||

pRSThe nAbhau ca hRdaye nyased babhamasaMjJitAn |
tvagasRGmAMsamedosthimajjAzuklAsupaGkaje || 2-45 ||

hRtsthe tatpatragAn yAdInaSTArNAnAtmani nyaset |
kSakAraM karNikAyAM tu sarvazaH saMsmaran nyaset || 2-46 ||

lipinyAsasthAnAdhikAraH |

sthAnAnyuktAnyakArAdivarNAnAM kramazo'dhunA |
lipernyAsavizeSAstu likhyante sAGgadaivatam || 2-47 ||

lipyarNaireva bindvantairnyAsaH zuddhalipeH smRtaH |


saJjIvani! Urdhvakezini! jvalitazikhizikhe! trailokyarUpiNi! sahasraparivartini! oM hrIM sauM netratrayAya vauSaT mArutavAruNi!


kAdyaiH SaDvargakairyuktAnyAdAvaGgAni SaD lipeH || 2-48 ||

prAyaH sarvAGgamantrANAH hRdayaM syAnnamontakam |
ziraH svAhAntamuddiSTaM vaSaDantaM zikhA bhavet || 2-49 ||

ante huM kavacasya syAt phaDantaM cAstramiSyate |
vauSaDantaM tathA netraM netrAntaM tvevamIritam || 2-50 ||

astrAntAGgavidhiH kvApi tatrAstrAntaM tu vinyaset |
SaDaGgasyaiva mantrasya kathyate netrakalpanA || 2-51 ||

paJcAGgasya manostasya netramantro na vidyate |
prAgaGgamantramuccArya tato'GgaM sacaturthikam || 2-52 ||

namaHsvAhAdikaM pazcAd yojayedaGgamudrayA |
prasAritAGgulirhastatalaM tu hRdaye nyaset || 2-53 ||

kuJcitAgrAGgulirmuktAGguSThaM zirasi tat punaH |
baddhamuSTinisRSTena tvaGguSThAgreNa vai zikhAm || 2-54 ||

vapuH svamaspRzannUrdhvamutkSipya tu karadvayam |
AkuJcitAGgulottAnatalaM dakSiNavAmayoH || 2-55 ||

pArzvayorAnayed rakSAmAnAbheH kavacaM tu tat |
tAvevAkaNThamutkSipya karau saGkucitAGgulI || 2-56 ||

jyeSThAgrakrAntatarjAgrAcchoTikotsarjanAt pRthak |
astraM syAnnetramudrA tu dakSiNAnmuSTibandhanAt || 2-57 ||

utsRSTAnAmikAmadhyAtarjAbhiH sahasAgrataH |
netratrayasparzanena bhavennetradvayaM yadi || 2-58 ||

tatra tarjanikAmadhyAyogAnnetradvayaM spRzet |
zuklaM pItaM jvalajjyotirvidyudvarNam hutAzabham || 2-59 ||

raktaM cApyaGgaSaTkaM ca sAmAnyena pRthak kramAt |

aGkAdhikAraH |

mudrArthasphaTikAkSasUtrakalazAMzcAbibhratI pustakaM 
hastairdakSiNapUrvakaistriNayanA zuklasragAlepanA |
kundAbhAkSaravigrahA zazikalAM maulau prasannAnanA 
dhatte yA lipidevatAmbujagatA muktAbharAlaGkRtA || 2-60 ||

paJcAzadvarNamUrtiM tAmevaM dhyAtvA svavigrahe || 2-61 ||

sthAneSu kramazo nyasya pUrvokteSu japellipim |
paJcAzatsaMkhyayA nityaM yAvallakSaM prapUryate || 2-62 ||

tilaistrimadhurAktaistu hutvA zaktyanurUpataH |
vAgvizuddhimasau vindet kavitA cAsya jAyate || 2-63 ||

grantha tattvArthavid vidvAn prAjJo nIrogavigrahaH |
saMsAdhyaivaM lipi devIM siddhasarvamanurbhavet || 2-64 ||

zuddhalipiH |

sarudrAMstu japed varNAn prAgvad vinyasya tu kramAt |
nyAsaH zrIkaNThapUrvo'sau kSudrarogAdizAntidaH || 2-65 ||

maM maM aM aM AM AM ka va ca iM ra kSa

hRllekhAvyomasaupUrvamamUnyaGgAni SaT kramAt |

zrIkaNThAdi |

lipyarNAni sabindUni rudrazaktivibhaktihRt || 2-66 ||

yuktAni vinyasedeSa zrIkaNThAdiH sazaktikaH |
aGgAni prAktanAnyeva tulyAnyasyApi kalpayet || 2-67 ||

nyAsayoranayozchando virADityabhidhIyate |
zrIbrahmA muniruddiSTo vAgdevI daivataM bhavet || 2-68 ||

dvitIyasyArdhanArIzo nyAsasyetyapi kecana |

sAkSasrakvalazordhvabAhuyugalAM cAdhaH samudrAbhayaM 
hastaM dakSiNamanyataH savarade yasyAH kare pustakam |
dhyAyet tAM zazikhaNDamaNDitajaTAM devIM trinetrAM sitAM 
zrIkaNThAdyadhidevatAM ca dhavalairAkalpakairbhUSitAm  || 2-69 ||

sindUrahemobhayabhAgavarNaM tvardhAmbikaM sAGkuzapAzahastam |
sAkSAvaliM sveSTadapANimIzaM zrIkaNThapUrvaM smaratu svasiddhyai || 2-70 ||

sazaktizrIkaNThanyAsaH |

tAraM sazaktilipyarNairajapA so'hameva ca || 2-71 ||

prapaJcayAganyAso'yaM nyAsajapyAdineSTadaH |
lakulI bindumAn sargI bhRguzcApyajapAmanuH || 2-72 ||

RSirbrahmAsya gAyatrI chandaH syAd devatApi ca |
paramAtmA paraM jyotirdhyeyaH svahRdayAmbuje || 2-73 ||

sazaktiThadvayaM hRt syAcchiraH so'hamihocyate |
ajapA tu zikhA jJeyA varmaiva kavacaM smRtam || 2-74 ||

tAra eva tu netrANi harIzArNAvihAstrakam |
karNastu haribIjaM syAd viSamIzAkSaraM viduH || 2-75 ||

dhyeyA syAdabhayAkSasUtraMzukadhRg yA pustakaM bibhratI 
devI pANDurapuNDarIkapaTalasvacchendukundadyutiH |
hRdyAGgI maNikuNDalA trinayanA koTIrabhArojjvalA 
sArdhenduH sitamAlyagandhavasanA brAhmI prapaJcezvarI || 2-76 ||

prapaJcayAganyAsaH |

zaktyAdyairvA lipervarNaiH zaktiH zrIpUrvakaistu vA |
zaktiH zrImanmathAdyairvA momAnaGgAdikaistu vA || 2-77 ||

nyAsAH samRddhikAstvRddhyai munireSAM prajApatiH |
chandastu daivI gAyatrI momAnaGgAstu devatAH || 2-78 ||

svAdibIjairyathAliGgaM SaDaGgAni bhavanti hi |
umAdidevatAH smRtvA nyAse dhyeyA sarasvatI || 2-79 ||

mandAradAmakalitendujaTAkirITA
sindUrarocirabhirAmavapustrinetrA |
kundAvadAtavasanAGkuzapAzavidyA-
sandohapaGkajakarAvatu bhAratI vaH || 2-80 ||

samRddhinyAsaH

kalAsanastho lakulI vAmAkSArdhazazAGkavAn |
lipyarNobhayago nyastaH kSobhaNInyAsa IritaH || 2-81 ||

kAmArUDhastu laMkulI prAgvad dIrghasvarairyutaH |
yathAliGgaM SaDaGgAni chando gAyatrameva hi || 2-82 ||

vAmadevo muniH kAmo daivataM cAkSarezvarI |
sindUrAruNasundarAGgarucirA raktAmbarAlepanA 
mandArAvRtakuntalA smitamukhI gaNDollasatkuNDalA |
dhyeyA syAd dadhatI karaiH sarasijaM pAzAGkuze pustakaM 
bimboSThI maNibhUSaNA bhagavatI saMkSobhaNI bhUtaye || 2-83 ||

kSobhaNInyAsaH |

pAzazrIzaktimadanairlipyarNamadanA ramA || 2-84 ||

lakSmyaGkuzakalAhRdbhiryukto nyAsastu mAlinI |
ananto bindumAn pAzaH zrIbindvantAH svayaM manuH || 2-85 ||

brahmA samAMsavAmAkSadaNDo bIjaM tu mAnmatham |
zaktiH khyAtA tu kaH sAgnidantabindustathAGkuzam || 2-86 ||

kalAstvakSarajA grAhyAH paJcAzat praNavoditAH |
vIpsitAni svabIjAni sargI saMvartakazca SaT || 2-87 ||

aGgAnyamUni mAlinyAzchandazcoSNigRSirguhaH |
devatAsya jaganmAtA devI tripurabhairavI || 2-88 ||

nyAsazcAnena homazca madhuraiH sarvasiddhidaH |
japadhyAnAdinA sadyaH sarvAnAkarSayedapi || 2-89 ||

bandhUkAruNavigrahAM trinayanAM raktAmbarAlepanAM 
caJcatkAJcanakuNDalAM savaradAM pAzAGkuze bibhratIm |
nIhArAmalahArakuGkumarasairAtAmrakamrastanIM 
dhyAyet tAM tu kapardacandrazakalAM savyAbhayAM mAlinIm || 2-90 ||

mAlinInyAsaH |

pAzAGkuzAbhyAM puTitairlipyarNaiH karSaNI bhavet |
nyAsastu kAdiSaDvargaiH pAzAGkuzapuTairyathA || 2-91 ||

SaDaGgAni bhavantyasyacchando'nuSTup prajApatiH |
RSirvAgvAdinI daivaM nyAsAdyaiH sarvasiddhidaH || 2-92 ||

dhyeyA syAd rocanAmbhodrutakanakavapurvallakIpustakAbhyAM 
yA sA pAzaGkuzADhyA maNigaNarucirairbhUSaNairbhUSitAGgI |
koTIrAbaddhamaulau dhRtazazizakalA raktagandhAmbarAdyA 
svaikyaM vAgvAdinIyaM tribhirapi nayanairbhrUvilAsasmitAsyA || 2-93 ||

vAgvAdinInyAsaH |

lipyarNAni sabindUni kezavAdyAzca viSNavaH |
tacchaktayazca kramazo nyastavyA syurnamontakam || 2-94 ||

kezavAdyairbhavennyAso viSNumantreSu siddhidaH |
aSTAkSaratanurviSNurdevatA tamapi smaran || 2-95 ||

nyasecchandastu gAyatrI nArado'sya munirbhavet |

devI kundendugaurI sphuradamRtakalAhArihArAbhirAmA 
dhyeyA mAleyahRdyaM vapurapi dadhatI lekhanIM cAkSasUtram |
saudhaM kumbhaM ca vidyAnidhimapi jalajaM jATajUTAhitendu 
ryA sA kSaumAmbarADhyA tribhuvananamitA SaTbhujA satriNetrA || 2-96 ||

kezavAdinyAsaH |

evaMprakArA gaditA lipernyAsAstu siddhidAH || 2-97 ||

eSAmekataraM nyAsamAzrayedeva sAdhakaH |
nyastalipyarNadehastu japahomArcanAdikam || 2-98 ||

kuryAnmantrAtmarakSArthaM tathA tatkarmasiddhaye |
nyastAM lipiM tato dhyAtvA pUjayenmAtRkAmbuje || 2-99 ||

saptavargAntyayugmASTadikpatraM sitapaGkajam |
bindau madagniruddhAntyakarNikaM svarakesaram || 2-100 ||

saptArNavaiH parivRtaM pRthvIbimbena veSTitam |
mAtRkAvarNapadmAkhyaM viSamRtyujarApaham || 2-101 ||

cintitaM tacchirasyeva mRtyukSvelarujo haret |
dhyAtvA dugdhAbdhimadhyasthaM divyasphaTikamaNDapam || 2-102 ||

tatra pIThAmbuje hyAsmin zaktayo'Stau dalAgrataH |
medhA prajJA prabhA vidyA dhIrdhRtismRtibuddhayaH || 2-103 ||

vidyezvarI ca madhyasthA zuklA zuklAmbarAdikAH |
kRtAJjalIdvayakarAstathaivordhvakaradvaye || 2-104 ||

dadhatyaH pustakaM kumbhaM zAntAH sundaramUrtayaH |
vidikSvaGgAni dikSvastraM daleSu nayanaM puraH || 2-105 ||

tataH svarAzca tatsaMkhyakalAbhiramRtAdibhiH |
amRtA mAnasI tuSTiH puSTiprItiratizriyaH || 2-106 ||

zAntiH sudhA tathA kAntirjyotsnA haimavatI tataH |
chAyA ca pUraNI vAmApyamA cendukalAstvimAH || 2-107 ||

amRtAsAravarSiNyo dvandvazo dalagAH smaret |
tato vargAkSarANi syustato brAhmyAdimAtaH || 2-108 ||

brAhmI mAhezvarI caiva kaumArI vaiSNavI tathA |
vArAhyaindrI ca cAmuNDI mahAlakSmIzca dikkramAt || 2-109 ||

tato daza digIzAH syurindro'gniryama eva ca |
nirRtirvaruNo vAyurdhanadezAnakau tataH || 2-110 ||

prAgAdidikSu te'STau syurathendrezAnamadhyagaH |
brahmA sa cordhvalokezo'nanto varuNarakSasoH || 2-111 ||

adholokezvarastvetAn SaDAvaraNagAn yajet |
madhye'bjakarNikAsaMsthAM cetanAtmatayA lipim || 2-112 ||

svanyAsoktAkRtiM dhyAyedupacArairyathoditaiH |
AsanAvAhanArghANi pAdyaM cAcamanIyakam || 2-113 ||

sAGgopAGgaM tathA snAnaM vasanAbharaNAni ca |
gandhapuSpe tathA dhUpo dIpazcarunivedanam || 2-114 ||

agnikAryaM namaskAro rAjapUjAsamarpaNam |

SoDazopacAraH 

evaM sthaNDilagAmiSTvA manasA vA samarcayet || 2-115 ||

RSyAdInapi vighnezaM guruM cApyuttare yajet |
tato'STapuSpikAM kuryAt sA cAhiMsA kSamA dayA || 2-116 ||

tathendriyANAM niyamo jJAnaM bhAvavizuddhatA |
akrodho dhyAnamityaSTau bhAvapuSpANyanukramAt || 2-117 ||

AsanaM caiva tanmUrttirdevatA cAGgapaJcakam |
ityaSTau pUjayenmantraiH syAdevaM cASTapuSpikA || 2-118 ||

siddhaye sAdhakendrANAM devatAnAM prasAdane |
pracetavyAni mantrANAM sphuraNAya vizeSataH || 2-119 ||

kSamasveti tato devIM parivAraizca taiH saha |
niraJjane layaM gaccha zirontaM manunAmunA || 2-120 ||

dvAdazAntAmbujasthendau yojayeccetanAtmikAm |

lipipUjAvidhiH |

pUjAkramoditaM cakrabhUrjahemAdike likhet || 2-121 ||

taddhAraNena sarvArthAH siddhyantyasyApyayatnataH |
prAtastrivAramanayA japitvAmbhaH pibet sudhIH || 2-122 ||

saMvatsarAd bhavet prajJA kavitA cAsya jAyate |
aSTottarasahasraM tajjapAd brAhmIrasaM pibet || 2-123 ||

ahorAtramavicchinnamathavApyuparAgayoH |
palaM zvetavacAcUrNaM karSaM turagagandhinI || 2-124 ||

kRSNA haridrA sindhUtthaM dhAtrI rug vizvabheSajam |
pratiniSkaM tu saJcUrNya ghRtaprasthe vinikSipet || 2-125 ||

brAhmIrasacatuSprasthe pacenmRdvagnipAkavit |
brAhmIghRtamidaM prAjJamanayAyutamantritam || 2-126 ||

pibet sUryoparAge tu sarvajJatvamavApnuyAt |
dinAdau vA lihennityaM paJcAzadabhimantritam || 2-127 ||

saMvatsarAd bhavet prAjJaH kavirvidvatsusammataH |
madhye tu mAtRkApadme lipyoSadhyambupUritam || 2-128 ||

kalazaM vidhivannityaM japed dazazataM tataH |
tenAbhiSikto mAsena vAgAyuHkAntikIrttibhiH || 2-129 ||

arogI yujyate lakSmyA bandhyA sUte sutaM zubham |
AdhArazaktibindUtthAM prabhAM sauSumnamArgagAm || 2-130 ||

dvAdazAntendugAM dhyAtvA tasyAM kSAdyakSaraM likhet |
bahnisomAbhisaMprotAd rogAnmucyeta pAtayan || 2-131 ||

lipimiti viditArthAM vinyasedekamArgAM
gurumukhasamavAptAM tAM japeccApi lakSam |
sitakusumatilAjyaistaddazAzena hutvA 
vazayati jagadiSTaM prAptavAgIzvaro'sau || 2-132 ||

graharipuviSarogAn voplavAn hanti cAnyAn 
nijavapuSi pare vA nyAsataH svArNasaMkhyam |
jagati nikhilamantrAH sAdhitAH syurna nUnaM 
na hi lipirabhirAddhA sAdhayet sarvakAmAn || 2-133 ||

iti zrImadIzAnazivagurudevapaddhatau tantrasAre zrIkaNThAdipaTalo dvitIyaH |

atha tRtIyaH paTalaH

atha sakalamanUnAM mAtRkAM janmabhUmi-
stadadhikRtavizeSA vargavargAdiyuktyA |
pRthagiha paripATyA likhyate ca svarANA-
mudayavihRtivarNaizcAptirAzyAtmaliGgaiH || 3-1 ||

aviditamanuvarNaprakriyAkAryarUpaH
kathamiha phalalipsustajjapAdau pravRttaH |
gaNaviSayavibhAgAnauSadhAnAmajAnan 
kubhiSagiva cikitsAlaulupo bAlizo'sau || 3-2 ||

aviditagajazikSazcAsRNirvAdhirohe-
daviralamadadhArAH saMsravantaM gajendram |
agaNitaparizuddhirmantratattvAnabhijJaH
sa patati khalu mUrkho dezikaH sAdhako vA || 3-3 ||

iti lipimanucakravyAkriyArthastvato'smin
prakaTitabahumantro dezikairveditavyaH |
akacaTatapayAkhyAH sapta zAkhyazca varga-
stviha ravizazivarNaH syAdavargaH svarAtmA || 3-4 ||

puruSayuvatibhedA raudrasaumyAH svarAste
nahi pRthagudayAH syuhasvadIrghAH krameNa |
udayati ravivarNe hrasvake dakSiNasthe 
zazini ca khalu dIrghe vAmanAsApuTe'rNe || 3-5 ||

nasi puTayugale'sminnUrdhvamagnistu tiryaG
marududakamaghastAnmadhyakuNDyaM dharitrI |
suSiramiha hi yat svaM paJca bhUtAni caivaM
savitari ca zazAGke te svarAstUdayante || 3-6 ||

ubhayamapi ca vidyAd yatra nizvAsavAyuH 
prasarati samakAye svasthadehendriyasya |
vadatu ca paripRSTaH kAryasiddhiM ca hAniM
svaramuditamavekSya svasya vAnyasya yuktyA || 3-7 ||

kapilavakuzarAmAH kAmanimne nizAjJaH 
pazuraNiyamagAvaH kiM vanaM saMkhyanADyaH |
kramapaThitayugArNA rAzayo dvAdaza syu-
rdinarajanivibhAgastaistu SaDbhizca SaDbhiH || 3-8 ||

ajavRSamithunAkhyAH karkiharyakSakanyAH
samatulamalicApe nakrakumbhAhvamatsyAH |
caranacarayugAste rAzayastrikramAH syuH 
saha khalu lipivarNaiH zvAsavedyodayAdyAH || 3-9 ||

udayati cararAzirdakSiNaghrANasUrye
maruti hi zazisaMjJe vAmake sthAsnurAziH |
ubhayapuTanisRSTaM codayed yugmarAziH
sakalabhuvanakAlajJApakaH zvAsacAraH || 3-10 ||

ubhayamaruti jIvaH saumyavAyau jale vA 
zazidahanadharaNyo mAruto dhAtuzaMsI |
ubhayadharaNisUrye cApsu mUlaM zazAGke 
payasi ca phalasiddhiH sUryabhUmyapsu na syAt || 3-11 ||

kujamubhayagavahnau sUryavahnau mRtiH syAt 
savitRviyati naSTaM syAnmRtaM vAlpamAyuH |
vadatu maruti candre dIrghamAyustadadbhiH
sukhamapi zazibhUmau cAlpasiddhistu tatsve || 3-12 ||

ubhayadharaNiriSTaM sAdhayed dIrghakAlA-
dubhayamaruti kiJcitkAlapAke sa siddhyet |
ubhayagaganavahnyornaiva siddhirna hAni-
rmarudubhayajalasthaH kSipramalpeSTadaH syAt || 3-13 ||

zazijaladharaNisthe zAntikaM pauSTikaM vA 
zazimarudanavAbhyAM(?) vazyamAkarSaNaM ca |
dinakarabhuvi kuryAt stambhanaM tvarkatoye 
rujaminamarutA sve bhrAmaNoccATanAbhyAm || 3-14 ||

dinakaraviyati syAnmohanaM cArkavahnau
drutataramarivargAn mArayet sAdayecca |
iti japahutavidyAH sAdhayan vai yathAvat 
svaramuditamapekSya tvArabhetAzu siddhyai || 3-15 ||

svarodayAdhikAraH |

kacaTatapasamAkhyAH paJcavargAstu dhAtrI-
marudanalakhatoyaiH saMyutAstatra vedyAH |
aniladahanapRthvyo vAri cApyatra yAdyA-
striguNagaganavarNAH zAdayo'ntyastu rAgaH || 3-16 ||

kanakarugamalasragvastragandho'StabAhu-
strizikhavaragadAdhRtk kUrmavAho'STanetraH |
zazadharacaturAsyo vRttapIThe kapardI
kuvalayasamagandho mandarAbho hyakAraH || 3-17 ||

dhavalarucirathAbje sUpaviSTA dvibAhu-
rgajavaramadhirUDhA sAGkuzA pAzahastA |
tuhinavimalahArairbhUSitA SaSTidIrghA
tridazavitatirAkhyA yojanAnAM purandhrI || 3-18 ||

kulizadhRgatipItaM kUrmavAhaM kubimbe
dvibhujamalasagandhaM yojanadvandvadIrgham |
smaratu vividhamAyaM vistRtaM dairghyato'rdhaM
ripuduritagadaghnaM stambhanaM sUkSmasaMjJam || 3-19 ||

kanakaphalakarA strI paJcagabyUtivRtA
sitaruciramRtArdrA hArihArAbhirAmA |
dviguNadharaNibimbe haMsagA yojanAnAM
dazapariNatamUrtiH puSTidA syAt trimUrtiH || 3-20 ||

dvizataracitadairghyaM vistRtaM yojanAnAM
zatamatikaTugandhaM kAkavAhaM dvihastam |
analabhavanasaMsthaM tAmravarNaM sazUlaM
sagadamakhilarakSAM(?)syAdayugmaM tu SaNDam || 3-21 ||

dvibhujamaruNamagnermaNDalasthoSTravAhaM
dazazatavitataM taddvandvadIrghaM triyugmam |
bhujagabhujagavargairbhUSitaM duSTagandhaM
smaratu viSavighAte SaNDakaM zaktipAzam || 3-22 ||

kulizadharamudagraM haMsavAhaM sapAzaM
dvilapanamatipItaM pArthivAbje sugandham |
zatavitatiluyugmaM triMzadAyAmi SaNDaM
smaratu ripugaNaghnaM stambhanaM svarNacUDam || 3-23 ||

rathacaraNaphalAsyaM SaNDakaM zaGkhapadma-
sphuritabhujacatuSkaM candrakIkaNThanIlam |
sumukhamamalahAraM padmagandhaM kapardi
smaratu nikhilavazyaM jhaNDinaM cakravAke || 3-24 ||

dvibhujagaruDavAhAM bhUSitAM vahnibimbe 
trizikhakulizahastAM zuklavarNAM sugandhAm |
smaratu vimalahArAM bhautikIM vA prasUtyai
pravitatazatakoTiM yoSitaM tAM tathoccAm || 3-25 ||

akhilabhuvanamadhyavyApakaM pItavarNaM 
dazazatabhujayugmaM dyotamAnaM triNetram |
dviguNadahanabimbe govRSe bhUSitAGgaM
puruSayuvatidehaM muktidaM dhyehi sadyam || 3-26 ||

sitakusumasugandhiH zuklavAsAH suvarNa-
dyutirapi kusumAbho vajrapAzau ca bibhrat |
dharaNikamalabimbe yojanAnAM sahasraM
tatatanuriha cintyaH pauSTike'nugrahezaH || 3-27 ||

ghusRNaruciranekairbhUSaNaizcitritAGgo
yugalayugalajADyAH sveSTadaH padmahastaH |
sarasijamadhitiSThan zrIkaro'krUravarNaH 
sakaladuritamuktyai cintanIyo'vatAnnaH || 3-28 ||

dahanapuragatastatSaNDakaM yugmahastaM 
karagatamapi kRSNairvastragandhaistriNetram |
trizikhakulizahastaM kSudravidveSadakSaM
dazazataparimANaM cintayecca svarAntyam || 3-29 ||

svaramUrtyadhikAraH |

kulizamusalahasto bhUmibimbe'jagandhaH
kanakarugibhasaMstho brahmazakrAdhidevaH |
dvibhujapuruSaveSo vazyakRt kaH kapardI
dazazataparivRttaH pAtu nAstaddviruccaH || 3-30 ||

zatamakhamaNinIlaH sarpayajJopavIto 
dhavalavadanaraudraH pAtu vaH piGgapAdaH |
jvalanakamalameSe pAvanaH stambhanaH svo
dazazataparimANastomarI zaktipANiH || 3-31 ||

phaNini vikacapadme raktavarNe niviSTaH
zatavitatiranugraH puSTidastAvaduccaH |
gaNapatidhanadezo haMsavAhaH sugandho-
'vatu bhujadhRtapAzaH sAGkuzo vo gakAraH || 3-32 ||

dazazataparivRttaM tadvimAnoccaSaNDaM 
kulizavaragadADhyaM dhyeyamuSTrAdhirUDham |
dvibhujamasitayAmyadveSaNoccATakRtyaiH
smaratu ca ghamudagraM yanmukholUkhalastham || 3-33 ||

trizikhamusalaTaGkaiH zaktidaNDAhihastaM
yamapatimatikRSNaM SaDbhujaH kAkavAham |
smaratu bhujagarUDhaM koTidIrghArdhavRttaM
zvayathucaraNagAtraM dveSaNeSvekarudram || 3-34 ||

sitarucirarizaGkhau cAmbujaM mAtuluGgaM
dadhadaruNasugandhasragvibhUSaH kapardI |
jagati nikhilabhUtyai pAtu vo guhyakezo
dharaNikamalasaMsthaH koTimAnastu kUrmaH || 3-35 ||

makarakamalarUDhaH sUryakAntiH sa vo'vyA-
darijalajagadAbjAnyAdadhad divyagandhaH |
dhavalavasanagandhaH sragdharaH koTimAno
vimalamaNivibhUSo vazyadastvekanetraH || 3-36 ||

sitakamalazazAGkodudgatAvinduvarNau
saphalakulizapAzau saudhakumbhau dadhAnau |
dazazataparimANau vo'vatAM zAntavarNau 
palitamRtigadaghnau kSvelazAntipradhAnau || 3-37 ||

asitamazubhaSaNDaM durmatiM kAkavAhaM
yamapuruSamanekairAyasairbhUSitAGgam |
trizikhaparazuhastaM dveSakRtyeSu vidyAd
dazazataparimANaM zarmasaMjJaM tu varNam || 3-38 ||

jaladhisamaninAdaH sadgado vajrapANi-
rbhujagabhujaganaddho yugmabAhuH sutIvraH |
prathamaripurujAnAM dhvaMsanaH krauJcavAhaH
kapilarucirudAro vaH sa somezvaro'vyAt || 3-39 ||

amalazazinikAzaH zaGkhagokSIragauro
vimalamaNivicitrairbhUSito hArajAlaiH |
dharaNipavanapadme padmahasto gajo'vyAt 
sakalaviSaharo vo lAGgalI lakSamAnaH || 3-40 ||

turagakuvalayasthaH pakvarambhAdyutirvaH
kanakamaNivicitrasturyavaktro'STabAhuH |
dazazataparimANaH padmapAzAGkuzAbjA-
nyabhayavaradazUlairAdadhad dAruko'vyAt || 3-41 ||

analapuragameSe vahnidevaH sa vo'vyAt
kulizavarabhusRNThIbhiNDipAleSupAzAn |
parazumapi rathAGgaM kArmukaM cAdadhAno
dazapariNatiruccairardhanArIzvarArNaH || 3-42 ||

trizikhaparazuhastaM vyAghravAhaM sudhUmraM
trimukhamahitarogAn dhvaMsayantaM kubimbe |
arikulizabhusRNThIpAzadaNDadhvajADhyaM
smaratu dazazatoccaM cApyumAkAntavarNam || 3-43 ||

dvipavaramadhirUDhaM zaGkhaTaGkAbjapAzAn
dadhadalasamagandho vaH sahasrapramANaH |
zatamakhavaruNezo vazyado bhUSitAGgaH
kaTakamakuTaniSkairASaDhIpATalo'vyAt || 3-44 ||

vRSagatazitivarNasturyavaktro'STabAhu-
rmarudanalapatirvaH koTimAnastrizUlI |
musalaparazuzaktIstomaraM bhiNDipAlaM
dadhadavatu ca daNDaM prAsamapyeSa diNDI || 3-45 ||

asitamatha yamezaM SaDbhujaM vastrivaktraM
bhujagavalayahAraM zUlaTaGkAsidaNDAn |
kulizamapi bhusRNThiM SaNDamavyAd dadhad ya-
nmahiSagatakaroTau koTimAno'trisaMjJam(?) || 3-46 ||

mRgavaramadhirUDho yaH sa sarpopavIto
nirRtipatirudagraH khaDgapAzo bhusRNDhIm |
dadhadatikapizo'vyAnmudgarI bo'bjapIThe
pratibhayaripubhedI yazcaturlakSamAnaH || 3-47 ||
dvibhujamasitavarNaM vyAghracarmottarIyaM
Damarukamapi zUlaM bibhradAraktanetram |
ciramavatu pizaGgairambarAdyairyutaM vo
dazazatatati nAkhyaM kAkavAhaM ca SaNDam || 3-48 ||

garuDamadhigato'bje sarpayajJopavItI
dazavadanasitAGgo viMzatiM yo bhujAnAm |
dadhadapi maNicitraH pAtu koTipramANo
vividhaviSaharo'sau brAhmaNo lohitArNaH || 3-49 ||

parazurathapadADhyaH siMhapadmAdhirUDhaH
pravitatadazakoTiryugmabAhurdvijanmA |
haratu bhavadariSTaM mauktikabrahmasUtra-
staDidanalapizaGgo yaH zikhI rakSaNeSTaH || 3-50 ||

kuvalayaviniviSTo haMsavAha SaDAsyo
dhanapatipatirabjaM zaGkhamapyAdadhAnaH |
dhavalavasanagandho bandhujIvAruNo vaH
pravitatadazakoTiH zrIkaro'vyAd bakAraH || 3-51 ||

trimukhanayanaraudraM piGgakezaM tarakSo-
ruparidahanabimbe dhUmravarNaM trihastam |
rathacaraNagadADhyaM SaNDakaM zUli vo'vyAt 
pravitatadazalakSaM yaddviraNDezasaMjJam || 3-52 ||

uditamihirakAntiH kalpavahniprakAzo
jaTilazirasi candraM muNDamAlAM ca bibhrat |
trizikhaparazunAgAMzcAnalaM bhUtaye vo 
viSamayavapurabje syAnmahAkAlavarNaH || 3-53 ||

mRgagatiratidhrUmro vAyubimbe sa pAyAd
dhvamusalagadAgnInAdadhad vAyavIyaH |
sakalabhuvanamAnazcATanaH kSudrakRtye -
SvaruNavasanagandhairbhUSito vo yakAraH || 3-54 ||

jvaladanalanikAzo bahnibimbe'mbujasthaH
sakalabhuvanamAno meSavAhaH prasannaH |
abhayavaradazaktisvastikAnAdadhAnaH
sitavasanasugandhiH pAtu yuSmAn bhujaGgaH || 3-55 ||

kamalagatakarIndre yoSidApItavarNA
kalamakanakavallIvajrapAzAn dadhAnA |
dizatu dharaNibimbe bhUSitA sarvapItA
dharaNivitatiriSTaM dhAriNI stambhinI vaH || 3-56 ||

amRtakiraNagaurI nakrapaGkeruho vo 
dhavalakamalapAzau bibhratI vAribimbe |
vividhaviSarujArtiM dhvaMsayantI vibhUtyai
bhuvanavitatirastu kSIrapIyUSamUrtiH || 3-57 ||

dhavalakamalahastA puNDarIkopaviSTA
vimalavasanagandhairbhUSitA hemavarNA |
dazazataparimANA hAridhammillabhArA
pradizatu bakavarNAsyAkRtirvo vibhUtim || 3-58 ||

zatamakhamaNinIlaH kUrmavAho dvibAhuH
kapizavasanagandho vajrapAzau ca bibhrat |
dazazataparimANaH kSobhaNo vo'stu lakSmyai
prahasitavadanenduH zvetasaMjJaH pramattaH || 3-59 ||

zazadhararucigauro vajrapadmAbjapAzAn 
nidhikalazakaraNDe cakramapyAdadhAnaH |
sarasijagatahaMse bhUSitaH koTimAno
dhanadapatirabhIStaM yo bhRgurvastanotu || 3-60 ||

dhavalavasanagandhasrag jaTI candramauli-
rhara iva lakulIzo bhUrigaurastriNetraH |
hariNaparazuzUlaizcAnvito vizvamAnaH 
zivagiritanayena prANasvAtmAvatAdvaH || 3-61 ||

surapatibhavanAbje zaGkhavajrAripAzAn
sRNimusalabhusRNThIkhaDgaghaNTAkapAlam |
dadhadavatu gajasthaH kSetrapAlendradevo
bhuvanavitatapItastrIkSaNo'ntyo dvidaMSTraH || 3-62 ||

dhavalaruciravarNA brAhmaNAste'tha raktAH
kSitibhuja iha pItA ye vizo ye'pi kRSNAH |
vRSalakulasajAtA hyakSarAzca svaliGgaiH
puruSayuvatiSaNDAste pratizlokavedyAH || 3-63 ||

pratyakSaramUrtyadhikAraH

gurava iha hi dIrghA bindusargAbhiyuktA-
stadupari viniviSTo yuktavarNo'pi yasya |
sa ca gururiti vedyaH zeSito'smAllaghuH syA-
llaghurayugalamAtraH syAd guruzca dvimAtraH || 3-64 ||

mayarasatajabhAkhyA nastathASTau gaNAste 
pRthagiha khalu halbhiste tribhiH syustribhizca |
sakalagurumasaMjJo yo gaNaH so'vaniH syAt
prathamalaghuyasaMjJaH syAd gaNastoyamUrtiH || 3-65 ||

ragaNamiti lamadhyaM vahnidaivaM tu vidyAt 
sagaNamapi ca vAyuM so'ntagurvakSarADhyaH |
tagaNamapi khamAhustasya cAnte laghusyA-
jjagaNamapi ca madhye syAd guruH sUryadaivam || 3-66 ||

prathamagurubhasaMjJaH syAd gaNaH somadevaH
sakalalaghugaNo dyaurnAbhidheyo'STamaH syAt |
iti gurulaghubhinnairaSTabhirvyAptavizvai-
rlipiparipaThitArNaiH syAd gaNaiH zabdasUtiH || 3-67 ||

analasalilavarNA ye gaNAH zatravaste
pavanadahanakhArNA mitramanyonyamuktAH |
saliladharaNisaMjJAste'pi mitraM mithaH syuH
salilapavanakhAkhyA ye gaNAste'tra madhyAH || 3-68 ||

puruSayuvatiSaNDAH snehinaH SaNDamadhyAH
puruSapurSayoSidyoSito'nyonyaduSTAH |
suhRdi suhRdamarNaM vA gaNaM madhyamaM vA
ghaTayatu sa tu mantro vAcako devatAyAH || 3-69 ||

manurapi vidhinaikaH sAdhito yena devaH
sa bhavati sagaNAnAM siddhibhAk tanmanUnAm |
kimu bahuvidhamantrAn vetti yaH sAdhayed vA 
sa bhavati zivatulyastatphalAnAM nidhAnam || 3-70 ||

priyaphalakaTiramyA zrIpriyA rAtriranyA
khagakulakaTakastrIpAtragarbhArNasaMjJA |
abhihitalipivarNAnazvinAdyeSu bheSu
svarapariNatiyugmaM pauSNabhe syAnniyojyam || 3-71 ||

lakArazca |

kuruvRSadadhisaMkhyAH zobhanAstArakAH syu-
rbhayamRtigadaduHkhaM gomitho'saMkhyabhaiH syAt |
kRtamiha khalu yat syAnnAma mAtApitRbhyAM
jananabhamapi yat syAt taddvayasyAnukUlam || 3-72 ||

phalagurururuzANAH zarmazarvAstvajAdyA
nigaditalipivarNA rAzayaH zAdayaH stryAm |
jananabhanijanAmnastvAdivarNAbhiyogA-
dabhimatamanubhenApyAdivarNena zodhyam || 3-73 ||

zuddhAyAmavanau sagomayajalairAlipya tatrAlikhe-
ccakraM SoDazakoSThakaM tu paritaH paGktyaikayA rAzayaH |
vighnakSetrapavAstuvezavidhayaH koSTheSu madhye sthitAM-
stAniSTvA lipivarNarAzighaTanAM mantrAtmanAmnornayet || 3-74 ||

eko vApyatha paJcamo'pi navamo rAzeH svakAd bAndhavo
rAziH syAd dazamadvitIyasahitaH SaSTho bhavet sevakaH |
rudrAgnisvarasaMkhyayA yadi matastantreSvayaM poSakaH
syAd yo dvAdazamo'STamaH zrutimito mantraH smRto ghAtakaH || 3-75 ||

yo bandhurbhavati manuH sa rakSatImaM 
sarvArthAnapi vitanoti sevakAkhyaH |
puSTizrIvibhavayazAMsi poSakAtmA 
prANArthAnapi ca nihanti ghAtakAkhyaH || 3-76 ||

IzAdyaM tu catuzcatuSpadalipau svAkhyAdivarNe pade
ye siddhAH khalu te dvitIyapadagAH sAdhyAH susiddhAH pare |
varNA ye'pyarayazcaturthapadagAste mRtyuduHkhapradAH
ziSTAste tvacirAccirAjjapahutaiH sidhyanti pAThAdapi || 3-77 ||

prAk sAdhyAkhyAM sAdhakAkhyAM ca pazcAd 
dhRtvASTAbhistatra zeSAdRNaM syAt |
svAkhyAvarNairvardhitaiH sAdhyavarNair-
hRtvASTAbhistadvilomAdRNaM vA || 3-78 ||

sAdhakAhvayavarNAnAM saha mantrAkSaraistu yat |
siddhAdyairgaNanAM kRtvA jJeyo mantrAMzakastvayam || 3-79 ||

pazcimAt prAggataM lekhyaM paGktyordakSiNavAmayoH |
mantranAmnoryathA varNAn pRthak tadvyaJjanasvaraiH || 3-80 ||

nAmnormantrasya vA varNA viSamAH syuryadA tadA |
tattadakSaramAlekhya samaM yAvat prapUrayet || 3-81 ||

tataH siddhAdibhirhRtvA jJeyaM prAgvat phalAdikam |

paGktau likhet sAdhakasAdhyanAmno vargAn svaravyaJjanabhedabhinnAn |
hRtvA tribhiH zAtravamitramadhyAn vidyAcca zatruryadi taM prajaMhyAt || 3-82 ||

saMhitoccAraNAt prAptaM zodhaneSvakSaraM tyajet || 3-83 ||

adhikaM cApyanusvAraM jihvAmUlaM visargakam |
tyaktvaivaM sodhayenmantrAn yathoktaM tattvasAgare || 3-84 ||

yathaivAdyAkSare zuddhiM tathA sarvAGgazodhanam |
kRtvA kiyantaH siddhAdyA mantre'sminniti cAGkayet || 3-85 ||

siddhArNAzcaturo yasmin mantro'sau siddhanAmabhAk |
siddhahInastu sAdhyAkhyaH susiddho ripuvarjitaH || 3-86 ||

susiddhahInaH zatruH syAccaturdhaivaM prakalpayet |
susiddhamantraH syAdante siddhaye sa hi kAmadhuk || 3-87 ||

azatrurAdisiddho yaH susiddhArNAdiko manuH |
arivarNavihInazca sarvakAmaprado hyasau || 3-88 ||

yasyAdyantagataH sAdhyaH kRcchrasAdhyaH sa vai manuH |
AdAvante'thavAdyante yasyArirna tamabhyaset || 3-89 ||

svabhyasto'pi hinastyevaM janmAntarazatairapi |
susiddho yasya cAdyante so'sya cintAmaNirmanuH || 3-90 ||

evaM vizodhayenmantrAn yathoktaM tattvasAgare || 3-90 1/2 ||

pratyakSaraM tu kathitaM khalu mAtRkAyAM 
rUpAdikaM tadabhiyuktajapAdinArthAH |
sidhyanti mantranikurumbaviziSTavarNai-
ryuktaistu yad bhavati tacca samastamUhyam || 3-91 1/2 ||

itthaM vizodhya bahudhA prathamAkSaraM tan-
mantrasya ziSTamapi varNagaNaM vicArya |
zuddhAkSarAdikamanuM talinetarArNaM 
dadyAd gurustadadhikArivizeSayuktyA || 3-92 1/2 ||

iti zrImadIzAnagurudevapaddhatau tantrasAre svarodayamAtRkApratyakSararUpAdikathanaM nAma tRtIyaH paTalaH ||

atha caturthaH paTalaH

mantrAstredhA strIpumAMsazca SaNDAH 
svAhAntAH syuryoSito ye namontAH |
te SaNDAkhyAH ziSTamantrAH pumAMsaH 
proktaM mantravyApRtau gautamena || 4-1 ||
 
puMbhiH kuryAccATavazye viSaghnaM 
strIbhirmohaM cAntyayotsAdanAdyam |
zeSaM sarvaM karmajAtaM tu SaNDair
mantraiH kuryAdAzu tattatphalAptyai || 4-2 ||

tArAkAzAvantyavAyvagnivarNA 
hyAgneyAH syuH saumyamantrAstvato'nye |
Agneyo'pi syAt sasaumyo namontaH 
saumyo'pi syAdagnimantraH phaDantaH || 4-3 ||

syAdAgneyaiH krUrakAryaprasiddhiH 
saumyaiH saumyaM karma kuryAd yathAvat |
saumyAgneyAstUbhayairlakSaNaiH syuH 
kuryAt sarvaM karma taiH krUrasaumyam || 4-4 ||

svApodbodhau tadvadabhyAsakAlaM 
vidyAdeSAM tvAsanaM cArabhedAt |
saumyAnAM syAt saumayato'bhyAsakAlas
tvAgneyAnAM saurato'bhyAsa uktaH || 4-5 ||

saumyaH svApaH sUryacAre'tha saumye 
tvAgneyAnAM svApa ukto'tha bodhaH |
dviSThazcArastulya evobhayoH syAt 
supto'bhyAse buddhamAtro'pi neSTaH || 4-6 ||

jApaM kuryAduktakAle manUnAmudbandhAn vA japyahomakriyAdau |
ArabhyaitAn pUrvamabhyAsakAle madhye svApaH karmaNAM naiva duSyet || 4-7 ||

mantraliGgAdhikAraH |

SaDaGgo yo mantraH sa bhavati sanetro hyanayano 
manuH paJcAGgaH syAt khalu yadubhayoraGgamanavaH |
pRthak te syurno cet kvacidapi ca mUle navadaza-
svaraiH kuryAd dIrghairanRNayugalairaGgaracanAm || 4-8 ||

svairarcirbhiryadvadevApradhRSyaH 
sUryo vAgnistejasAgryaH samarthaH |
tadvat sAGgairmantramUrtistadAtmA 
tadyuktAGgaiH syAt samartho'pradhRSyaH || 4-9 ||

hRd buddhigamyaM hRadayastha AtmA 
syAccetanAvAn hRdayena mantraH |
yad buddhipUrvaM kriyate namo'smai 
mukhyaM hRdaGgaM tata eva vedyam || 4-10 ||

zirastu mUrtasya manoH pradhAnamaGgaM hi sarvezaguNArthatuGgam |
svato hi tasmAd viSayApahAre svAheti yuktaM ziraso'Ggamuktam || 4-11 ||

zikhA tu karmAGgatayA manUnAM 
yato vaSaDvyuSTikaraM tadaGgam |
adhRSyatejAH zikhayA yadagnir-
vaSaTzikhAyAM viniyujyate'taH || 4-12 ||

kacagrahArthagrahaNAt tu dhAtoH 
saGgRhya dehaM kavacaM manUnAm |
tejastu huM sarvamariSTajAtaM 
nivArayet tatkavacAya yuktam || 4-13 ||

netreNa sarvaM paripazyatIha 
mantraH sphuTaM yaM dRzi darzanAya |
vauSaD bhavedaGgamatastu netraM 
netre tu siddhyai dRzi vauSaDuktam || 4-14 ||

asUnadaH pAlayatItyato'straM 
dhAtorasukSepaNavAcakArthAt |
aniSTamAkSipya tu pAti mantraM 
traiGpAlane'strAyaphaDityato'stram || 4-15 ||

pUrvaM gururyo'sya manorvidhAnaM 
vijJAya saMsAdhitavAnRSiH syAt |
icchApradhAnArthakathAM tu yogAc-
chando bhaved varNagataM yathAvat || 4-16 ||

dadAtyabhISTAnavatIha duHkhAd 
yA devatA daivatabhAvadAnAt |
sA devatAkhyA manuvAcyavastu-
svarUpiNI yat kathitaM prapaJce || 4-17 ||

mantrAtmikAyAstvatha devatAyA 
mUrtirhi sarvo manuvarNapUgaH |
zaktistu tatpUrtikarI citiH syAd 
bIjAkhyamasyaiva tu jIvabhUtam || 4-18 ||

tacchando munirahitaM japed yadAsau 
tucchaM vai dizati phalaM tu bIjazaktyoH |
ajJAnAd vrajati manurjaDatvamaGgair-
anyastairasuragaNA haranti japyam || 4-19 ||

zuddho viSNuryena kena svareNa spRSTo vahnirhomasaMvartako vA |
ThopovomA (?) so'pi vAmAkSayukto bIjaM khaDgI sAmarezo'pi mantre || 4-20 ||

sAnanto vA vAmapArzvaM bhujAdirvAmAkSADhyo vAtha meSodhisUkSmau |
sAmAnyAH syuH sarvamantreSu bIjAnyetAnyevaM yatra noktaM tu bIjam || 4-21 ||

ekAkSarasya tu manorna paraM tu devabIjaM vadanti yadataH parataH puroktam |
zaktizca nAdasamabinduranizcitA ced bIjAdajaH parataraH khalu zaktiruktA || 4-22 ||

rAzestathA sAdhakasAdhyanAmnornakSatrayoH sarvamihAnukUlam |
yo mantra uktena sidhyet sidhyenna mantro'pi cireNa vAnyaH || 4-23 ||

nAmarkSarAzyAdikamAnukUlyaM mantreSu saptasvanapekSyameSu |
haMsASTapaJcAkSaravahnitAraiH sAvitrisaJjIvanagopakeSu || 4-24 ||

lipyarNAnAM saMvibhAgena yoktA 
nakSatrANAM viMzatiH saptayuktA |
tatsaMkhyAH syurdevatAzcApi vRkSAs-
tAn na chindyAd yat svamantrarkSavRkSam || 4-25 ||

svAyurvRddhyai vardhayet taM tu rakSed 
vandedenaM siddhaye mantravRkSam |
mantrarkSezAM devatAM cArcayet tAM 
ye vargotthAstAn grahAMzca svavAre || 4-26 ||

dasro yamo'tha dahanaH kathitaH prajezaH 
somaH zivAditisureDyabhujaGgamAzca |
pitraryamAkhyabhagabhAskaravizvakarma-
prANA mahendradahanAvatha mitrasaMjJAH || 4-27 ||

indrastathApi nirRtiH salilaM ca vizve 
cakrAyudho'tha vasavo varuNo'pyajAGghriH |
khyAto'hipUrvapadabundhiratho'tra pUSA 
khyAtA krameNa bhagaNasya tu devatAmI (?) || 4-28 ||

kAraskarAmalakapUrvamudumbarAkhyA 
jambUstathaiva khadirApyatha kRSNavaMzau |
sAsvatthanAgatarurohiNakAH palAzAH 
plakSastatastvamitipUrvakabaSThasaMjJaH || 4-29 ||

bilvArjunAvapi vikaGkatakesarAkhyA 
vRkSAstathA zabarasarjakavaJjulAhnAH |
uktAH krameNa panasArkazamIkadambA 
bhAnAM tu cUtatarunimbamadhUkasaMjJAH || 4-30 ||

ebhyaH sadevatAbhyastu nakSatrebhyaH samudgatAH |
tithayaH pratipatpUrvAH pakSayoH zuklakRSNayoH || 4-31 ||

somavRddhikSayavazAd dvidhA syustithayastu tAH |
tithInAM kramazastvAsAM devatAH prabhavanti yAH || 4-32 ||

agnirdasrAvambikAvighnanAgAH 
skandaH sUryo mAtarazcApi durgA |
AzA zrIdazcAtha vaikuNThadharmau 
rudrazcandrazcAtha pitryA kuhUH syAt || 4-33 ||

sarAzitArAllipyarNatithibhyaH zaktijRmbhitAt |
karaNAnyabhavan sapta bavAdIni tu pakSayoH || 4-34 ||

bavaM ca bAlavaM caiva kaulavaM taitilaM tathA |
garajaM vaNijAkhyaM ca viSTizcaiva tu saptamI || 4-35 ||

pazavaH sapta siMhAdyA bavAdInAM tu yonayaH | 
siMhavyAghravarAhAzca svarebhacchAgakukkurAH || 4-36 ||

devatAH sapta zakrAjamitrAryamadharAzriyaH |
yamazca karaNAnAM syuH pUjyAstatkaraNeSu te || 4-37 ||

evaM hi mAtRkAvarNavivRtiH saMprakIrtitA |
gautamIye yathA proktaM mantravyAkaraNeSu ca || 4-38 ||

prapaJcasAre ca yathA yathodaggArgyabhASitam |
mAtRkAvarNavitatirvizvametaditi sphuTam || 4-39 ||

vindoragre ravo'bhUdatha ravajanitAH SoDazAdau svarAH syuH 
kAdyarNAH paJca vargAstvatha khalu yamukhA dhAtubhiH paJcabhUtaiH |
tanmAtrAbhistathAkSaiH prakRtiratha guNairvizvarUpA nasaMjJA 
zaktirvAgIzvarIyaM nanu jagadakhilaM yat prapaJcAbhidheyam || 4-40 ||


iti zrImadIzAnagurudevapaddhatau tantrasAre mantraliGgAdikaM nAma caturthaH paTalaH ||

atha paJcamaH paTalaH

atha mantrajapArcanAhutAdyairvivividhAnAmapi karmaNAM tu yuktyA |
pRthagatra hitAya sAdhakAnAM kathayiSye  nikhilena sAdhanAdyam || 5-1 ||

kathitAH khalu tattvasAgarAdau vidhayaH pallavayogarodhanAdyAH |
haritazca sadezakAlayuktyA vividhadravyadinAsanAdikuNDaiH || 5-2 ||

api pallavayogarodhanAni grathanaM saMpuTakaM vidarbhaNaM ca |
iti karmasu yojanaM hi SoDhA manuvarNaiH saha sAdhakArNayuktyA || 5-3 ||

manurantaniviSTasAdhakAkhyaH kathitaH pallavamAditastu yogaH |
ubhayatra manostu nAmaraudhau grathane'rNAntaritaM dvayoH krameNa || 5-4 ||

ubhayatra tu sAdhakasya mantro viniviSTo yadi saMpuTaM tadAhuH |
manuvarNayugena sAdhakArNaM yadi caikaM kramazo vidarbhaNaM syAt || 5-5 ||

grahabhUtapizAcanigrahAdau viSasaMhAravinAzamAraNeSu |
aricATanasAdaneSu teSAmapi vidveSavidhau ca pallavaM syAt || 5-6 ||

paramohanakarmaNAM tu rodhaH parasaMstambhanakeSu yogamAhuH |
janazIlanakeSu saMpuTaM syAd vazakRcchAntikapuSTido vidarbhaH || 5-7 ||

pallavAdyadhikAraH 

vRSazAntikapauSTikeSu pUrvA tvanalAzA khalu cATane jvare ca |
nanu mAraNamohayoryamAzA kathitA dveSaNakeSu rAkSasAzA || 5-8 ||

jaladig jalavRSTidAhazAntyAM bhramaNastambhanayozca mArutAzA |
zivavAgyajaneSu vazyakRtye dhanadAzA kathitezadig vimuktyai || 5-9 ||

zivadakSiNamUrtipazcimAzA mukhazarvAlayagoSThapuNyanadyaH |
paradevahutAzavipragehairvanazailAH khalu zAntikeSu dezAH || 5-10 ||

vaTapippalabilvamUladezAH prathamoktAH zubhapauSTikeSu zastAH |
api karSaNavazyakarmaNoste khalu zastAH svagRhAdikaM ca ramyam || 5-11 ||

parizodhya bhuvaM tu zalyahInAM gataloSTAtmamaSItuSAdidoSAm |
sikatAsamamRtsnayAbhipUrNAM mukurAbhAmudagindradikplavAntAm || 5-12 ||

abhipUjitavAstupadhidaivAM surabheH sUtakarogavarjitAyAH |
gaganAttanavena gomayenApyupalipyAmbaragAlitaizca toyaiH || 5-13 ||

prakRtAnuguNaM tu tatra kuryAt parizuddheSTakadArubalbajAdyaiH |
api yajJiyasAdhanairyatheSTaM maThazAlAdikamiSTadaNDamAnam || 5-14 ||

paramANurajaH kacazca likSAH sahayUkAzca yavAH kramASTasaMkhyAH |
yavakoTarakoSThakaM tu tiryak khalu mAnAGgulamiSyate sma tantre || 5-15 ||
pravadanti vitastikA dviSaTkairiti mAnAGgulakairvitastiyugmam |
kathayanti hi kiSkusaMjJahastaM nipuNA hastacatuSTayaM ca daNDam || 5-16 ||

dhanurityapi daNDa eva teSAM dhanuSAmaSTakamucyate hi rajjuH |
muratArasurAGulaiH prajezaM sadhanurmuSTi dhanurgRhe ca vidyAt || 5-17 ||

RjumadhyamaparvamadhyamAyAstviha mAtrAGgulamiSyate tadAnyat |
bhavanAdiSu pUrvamaGgulaM syAt khaluM mAtrAGgulameva sAdhaneSu || 5-18 ||

gRhavistRtidairghyadaNDapUgaM triguNaM tadvasubhaktaziSTadaNDAH |
kramazo dhvajadhUmakesarizvavRSabhAH syuH svarahastivAyasAkhyAH || 5-19 ||

dhvajasiMhavRSebhalakSaNAH prAgyamanIrezadhanezadikSu zAlAH |
api madhyagRhe same ca vRtte samametacchubhadaNDameva kuryAt || 5-20 ||

api cATanamAraNAdikAnAmazubhAnAmiha karmaNAM prayoge |
nanu vAyasagardabhazvadhUmairadhidaNDaM bhavanadikAM vidheyam || 5-21 ||

viSavRkSaparetabhUmikASThairazubhaiH kaNTakibhizca tatra zAlAH |
yamavahninizATadikplavA bhUrnikhilakSudravidhau vizeSaraudrAH || 5-22 ||

vipinAni citA svayaMbhuvaikaM zivaliGgaM bhavanaM karAlikAyAH |
mahiSAsuramardinInivAso'pyabhicAreSu nirAlayAzca zastAH || 5-23 ||

acalAzca viviktanirjalA ye musalastrIzizuzabdavarjitAH syuH |
azubheSu zubheSu cApi dezAH parihINAntyajarAsabhAzvazUrpAH || 5-24 ||

kRkavAkuvilAlajuSTadeze japahomAdi kRtaM phalAya na syAt |
vidhavA vikalAzca pApino vApyRtumatyazca nihanti karma sarvam || 5-25 ||

zubhakarmasu kanyakAzca satyaH zubhalakSmaprabarAGganAzca viprAH |
dhvanayo'pi gavAzvakuJjarANAM phaladAH syuH saha zaGkhavAdyagItaiH || 5-26 ||

abhicAravidhau tu kanyakAdyA vidhavAdyAzca gavAzvavedaghoSAH |
apahanyurime prayogazaktiM sutarAM mAGgalikAni tatpradeze || 5-27 ||

vijaneSu vizeSato'bhigupte'natidUrAd vividhAptarakSivargaiH |
vipinAdipuroktalakSaNe'nyairyadadRSTe vidadhAtu mAraNAdyam || 5-28 ||

hradinInadasahyavindhyazailAstvapi ratnAkaragA viziSTanadyaH |
udadheH salilaM ca hanyurete yadi madhye syuralaM prayogazaktim || 5-29 ||

prakRtArthavizeSakarmaNAmapyabhirUpe suvicAritapradeze |
yadasau vidadhAti bIjamuptaM nanu dezAnuguNaM phalAya rohet || 5-30 ||

dezAdhikAraH |

vidadhIta vazIkaraM vasanta paravidveSaNakaM nidAghakAle |
varSAsvaricATanaprayogaM zizire mAraNakarma cet karotu || 5-31 ||

zaradeva hi zAntike prazastA khalu hemantakRtAni pauSTikAni |
nanu zAntikapauSTike hime vA madhumAse'pi tathA pare vadanti || 5-32 ||

udayAt parato ravestu yAmAviha hemantavasantakau kramoktau |
praharAvadhi pazcimau nidAghAhvayamAsAvuditau dinAvasAnAt || 5-33 ||

mihirAstamayAt tu viMzatiH syAd ghaTikAH zAradakAlasaMjJito'sau |
parato ghaTikAstu zaiziraH syAdudayAt prAgiti tattvasAgaroktam || 5-34 ||

kAlAdhikAraH |

sitataNDulabhaktapaJcagavyaistilapuSpAkSatazuklagandhayogaiH |
nanu nityavidhau palAzadUrvAyavazAlipramukhAzca dhAnyavargAH || 5-35 ||

atha zAntikakarmaNAM viziSTe havanAdau ca yathoditaM samidbhiH |
vidadhIta zamIvaTAmranityAkhadirodumbaramArgabodhibilvaiH || 5-36 ||

dadhimAkSikadugdhapAyasAjyaizcaravo bilvatilAzca zAlibhedAH |
phalamodakazarkaroktapuSpaiH samidhaH syurvividhAzca pauSTikeSTAH || 5-37 ||

lavaNastilasarSapau yathoktAH samidhaH puSpaphalAni puttalIkAH |
madhurANi sajanmavRkSahemaiH syuramI candanarocane ca vazye || 5-38 ||

madhupendralate sahA ca bhItA haripatnI harilaGghitAsubhadrAH |
musalI girikarNimohanIkAH suratAlyutpalamAdalAbjadUrvAH || 5-39 ||

gajadAnazile sitArkamUlaM kanakaM kSIranagAH svadehajAni |
uditAni hi vazyakarSaNArthaM jatubhUrjAdi ca tatra tantragItam || 5-40 ||

tuSasarSapakAkakAkavairicchadadaNDIviSanimbamAtuluGgaiH |
mahiSAzca jale'pyalaktasAraM nanu vidveSaNakarmavastu gItam || 5-41 ||

phaNisUraNacitraloNapiNDaiH kanakAmbhogRhadhUmrakoSaNairyat |
paripiSTamidaM viSaM vadanti dviSatAM dveSaNamAraNakriyeSTam || 5-42 ||

picumandatarusthakAkanIDaM vasanAGgAramRdaH zmazAnalabdhAH |
nagadArukamarkaTIkadaNDInRkacAsthyAdi ca vastu cATane syAt || 5-43 ||

bhramaNe ca pizAcavRkSanimbAvasistonmattakalAGgalIzaNaizca |
rujicitrakadaNDizAlmalAdyairviSabhallAtavibhItakaizca kuryAt || 5-44 ||

viSavRkSaviSAjasarpiSo'hIn nRkapAlAsthi phalAni caityakASThaiH |
vasanAnyasitAni sarSapAadyaM nakhakezAGghrirajAMsi sAdhyajAni || 5-45 ||

dvikazAtnavakAkaraktapItaiH kusumairlohitapuSparaktagandhaiH |
api janmanagAdiputtalIbhiH kaTukoSNairapi mAraNaM vidheyam || 5-46 ||

busasarSapapItagandhapuSpaiH kaTukoSNAmbunizAjamAhiSANi |
kupaTaccarakokilAkSacakrImRditi stambhanakRtyasAdhanAni || 5-47 ||

dravyAdhikAraH |

tapanAhinagAtmabhAzvinInAM tithayoM'zA divasAH zubhagrahANAm |
haradasraharIndrasUryapUSAditidaivAni ca bhAni zAntikesyuH || 5-48 ||

tithayo mahiSArivighnayAmyAH zazijIvAMzadinodayAdikaM ca |
guruviSNuzazAGkabhairbhagarkSaM kathitaM pauSTikasiddhidaM yathAvat || 5-49 ||

navamI harimAtRdigguhAnAM tithayaH zukrakujArkavAsarAzca |
ravitiSyayutAzca siddhayogAH kathitAH saMvananeSu karSaNe ca || 5-50 ||

navamI zazimAtRvahnidaivAstithayaH zukrakujArkavAsarAdyam |
yamavahniharAhidaivapUrvAH khalu vidveSaNakarmasiddhidAH syuH || 5-51 ||

asitAhani cAsitapradoSo'pyasitASTamyatha taccaturdazI ca |
haravahniyamAhivAyutArAstvakhiloccATanakarmasiddhidAH syuH || 5-52 ||

asitAtha caturdazI kuhUrapyasitASTamyasitArkabhaumavAraiH |
kulikasthavire yamAmbubhe vA kujamandAbhyudayAzca mAraNe syuH || 5-53 ||

dviSato'STamarAzinaidhanarkSeSvatha vainAzikamArgasaMkhyamAni |
kujamandadinodayAdiyogairabhicaryAsu bhavanti siddhidAni || 5-54 ||

kujazukrabudhendusUryasaumyA bhRgujArau gurumandasaurijIvAH |
kramazo'zvayujAdibhAGghripAste khalu meSAdikarAzipAzca te syuH || 5-55 ||

kujamAskarajIvamandazukrAH budhazukrArkajasaumyacandrabhaumAH |
dhiSaNo'pyadhipAstvajAdi siMhAdyapi cApAdiSu rAziSu tridhaiyam || 5-56 ||

gurumandadine'tha jIvamandAMzakanakSatratadaMzake sarikte |
sthavirAkhyamudAharanti zastaM ripurogArNavinAzanaprayoge || 5-57 ||

divasaM pravibhajya cASTadhAntyaprathamau mokSyati taddinagrahAMzau |
praharArdhabhujau grahAH SaDanye kramazo'so guliko'tra yaH zaneH syAt || 5-58 ||

jananarkSakatoM'zakAdazIteradhiko yasya tu yo'StamoM'za uktaH |
sa vinAzakasaMjJako vinAzI nijabhAt saptamabhaM tu naidhanAkhyam || 5-59 ||

nijabhAdravitodadhigrasaMkhyAH zubhatArAH zubhakarmaNAM prazastAH |
zubhakarma karotu rAgadhAmA sadhanaikAdazasaMkhyayA svarAzeH || 5-60 ||

dinAdhikAraH |

na ca yAnagato na vAhanastho na ca yantrasthalago na vAzuciH san |
viSayeSvabhiSaktamAnaso vA japahomAdikRtaM phalaM labhet || 5-61 ||

atinIcamapIha nocchritaM vA na ca zuddhetaracarmakambalADhyam |
azubhAGghripajaM ca bhinnadagdhaM nRjalocchiSTamalAktamAsanaM syAt || 5-62 ||

kuzadarbhakRtAH zubhAzca bRsyaH phalakAH puNyarUdbhavA vizAlAH |
sakaSAyatarakSucarma caiNaM tvapi zastAni sulohadantajAni || 5-63 ||

sitazuddhavidhautavAsasA + samavAstIrNavizaGkaTAsanAni |
prabhavanti hi saumyakarmasiddhyai viSavRkSAdikRtAnyasaumyakRtye || 5-64 ||

upavizya tu viSTare'tha jAnvorvivare'GguSThanipIDanaM vidhAya |
RjumadhyagalekSaNAgrakAyo bhavati svastikamAsanaM niviSTam || 5-65 ||

caraNAgrayugaM tvathopariSTAdadhiropyoruyugasya mUladeze |
upavizya pureva padmasaMjJaM kathitaM tadviparItatastu bhadram || 5-66 ||

adhiropya tu dakSiNAGghrimUrAvatha savye caraNe tu dakSiNorum |
adhiropya pureva sUpaviSTo yadi yogAsanamiSTadaM tadAhuH || 5-67 ||

vRSaNe tu nigRhya vAmajaGghApadagulphe tvadhirUDhasasphigUruH |
uparisthitadakSiNorujAnuH khalu yogI sa tu gomukhAsanasthaH || 5-68 ||

vinivezitajihmadakSiNAGghriH phalakAdAvupavizya vAmapAdam |
avanau vinidhAya cordhvajaGghaM nanu tat svastikamardhapUrvamAhuH || 5-69 ||

upavizya tathAsane tu pAdau bhuvi saMsthApya mitho nibaddhajaGghau |
samatoraNajAnurUDhahasto yadi vIrAsanayogapaTTanaddhaH || 5-70 ||

sthita eva padadvayena bhUmau phalakAdyaM ca vinA sa cenniviSTaH |
samatoraNavat sthitorujaGgho bhavatIhotpuTikaM ca kukkuTaM tat || 5-71 ||

marutAM vijaye tathendriyANAM bhavamuktau ca sudhAraNe samAdhau |
kamalAsanamiSTamatra bhadraM hitamuktaM khalu nityapauSTikAdau || 5-72 ||

kathitaM khalu zAntikeSu karmasvakhilaM svastikameva cAbhiSeke |
api zAntikajapyahomapUjAsvathavA svastikamardhapUrvamiSTam || 5-73 ||

sakalIkaraNe nijaikyadeveSvabhijapyeSu samAdhihaMsayoge |
paramArthanirUpaNeSu ceSTaM khalu yogAsanamagrato guruzcet || 5-74 ||

pRtanAvijaye ca tannirodheSvapi saMstambhanabhUtanigrahAdau |
api saMvananeSu karSaNe vA nanu vIrAsanamuktamAzusiddhyai || 5-75 ||

kathitaM khalu kukkuTaM ripUNAM rucividveSaNacATanabhrameSu |
atha mAraNakeSu pArSNisaMjJaM viditaM vAsanamardhakukkuTaM tat || 5-76 ||

vijaye marutAM svadoSazAntyai pRtanAstambhavidhau ca gomukhaM vA |
pramadAjanakarSaNeSu cAbjaM vijitaM yad viditaM gurupadiSTam || 5-77 ||

vijayena yathaivamAsanAnAM phalamekAgratayA manaHprasAdaH |
mana eva hi sarvakAraNaM tat svavazaM ced vijitaM hi kiM na sarvam || 5-78 ||

ApyaM maNDalamucyate'tra purato yat tatra zAntyAdikaM 
bhaumaM vAkhilanityapauSTikavidhau zastaM tvatho mArutam |
dveSoccATanakeSu saMvananake'pyAgneyamAkarSaNe 
saMstambhe khalu bhaumamaindramathavA syAcchAntike pauSTike || 5-79 ||

mAraNaM tu vidadhIta vAyunA veSTitAni kulizAGkamaNDale |
vahnisaMpuTaSaDazrake'thavA zAntikAnyapi vazIkarANyapi || 5-80 ||

AsanAdyadhikAraH |

vijJAyaitadazeSameva bidhinA vidyAviziSTAd guro-
stattat karma samAdadhIta niyataM saMsiddhamantrAtmavAn |
yad yat svArthaparArthakAraNatayA kRtyaM bhavet sAdhakaH 
kRtvA tat phalamaznute sma bhuvane saMjAtatatpratyayaH || 5-81 ||

iti zrImadIzanazivagurudevapaddhatau tantrasAre sAdhanapaTalaH paJcamaH |

atha SaSThaH paTalaH

atrAgnikuNDAni ca maNDalAni pratyekazastAnyatha teSu teSu |
tantreSu yAni prathitAni samyak saMkSipya vakSyAmi yathApradhAnam || 6-1 ||

vedAzrakaM zAntikapauSTikAdau vRttaM ca yonipratimaM hi vazye |
AkRSTaye'zvatthadalaM tu kuNDaM stambhe'STakoNaM bhamaNe SaDazram || 6-2 ||

vajrAGkakoNatriSaDazrakuNDe syAtAM dviSanmAraNacATanAdau |
sarvANi kuNDAni haritsu kuryAlliGgapratiSThAsu ca devatAnAm || 6-3 ||

prasAde maNDape vApi gRhe vA yatra karma tat |
kriyate tatra saMzuddhe sthale gavyopalepite || 6-4 ||

madhye'tra sUtraM varuNendradIrghaM nivezya cAsphAlya tu tasya madhye |
binduM vidhAyAparapUrvayostadathAGkayet  sUtravazAt samAnam || 6-5 ||

punaste sUtrakhaNDe tu samaM bhittvAGkayedapi |
bindostu pUrvAparamadhyamAGkairmitena sUtreNa tadAhitena |
bindoH sayAmyottaradiksamAGkabhramaiH samAlikhya tu matsyayugmam || 6-6 ||

tayornidhAya sUtraM syAd dakSiNenodagAyatam || 6-7 ||

itthaM brahmAhvayaM sUtramudaksUtraM ca sAdhayet |
kSetrArdhamAnena tu bindusaMsthazcaturdizaM sUtravazAd yatheSTam |
aGkAn vidhAyAtha tadaGkayugmAt sUtradvayAt syuH khalu koNamatsyAH || 6-8 ||

teSu matsyeSu parito dikSu sUtrairnipAtitaiH || 6-9 ||

caturazraM  bhavet kSetraM catuSkoSThaM samaM zubham |
sarvamaNDalakuNDAdeH sAmAnyotpattikAraNam || 6-10 ||

caturazrasAdhanam |

kuNDaM prazastaM caturazramAdAvazvatthapatraM ca tathArdhacandram |
tadvat trikoNaM tvapi vartulaM syAt SaTkoNakaM padmamathASTakoNam || 6-11 ||

ratnimAtraM zAtArdhe syAcchatahome tvaratnikam |
sahasre hastamAnaM syAdyute ca dvihastakam || 6-12 ||

lakSe catuSkaraM kuNDaM dazalakSe tu SaTakaram |
koTihome'STahastaM syAd yathA bhojendrapaddhatau || 6-13 ||

sarvANi kuNDAni yathoktamAnAdAyAmavistArasamAni tAni |
svAtaM tu vistArasamaM vidheyaM tisraH kramAccopari mekhalAH syuH || 6-14 ||

samaM syAt sarvataH khAtaM khAtopari caturdizam |
ekAGgulaM parityajya kuryAt tisro'tha mekhalAH || 6-15 ||

stnipramANe khalu mekhalA syAdAdyAGgulAbhyAmaparAGgulena |
ardhAGgulAdyA tvathavA tvaratnau tridvyekamAtrAGgulakairvidheyA || 6-16 ||


atra bhojarAjaH –

kuNDahastapramANasyAdyA dvyaGgulA dvitIyAGgulenArdhAGgulena ca
tRtIyA aratnipramANasya tryaGguladvyaGgulAGgulamAnA iti |


hastakuNDe mekhalAH syuzcatustridvyaGgulAH kramAt |
SaTcatustryaGgulaiH kuryAd dvihaste'pi yathAkramam || 6-17 ||

catuSkare tvaSTakaSaTcatuSkaiH SaDDhastake cApi dazASTaSaDbhiH |
syuraGgulairaSTakare'pi kuNDe tAH SoDazadvAdazakASTasaMkhyaiH || 6-18 ||

sarvAH sarveSu kuNDeSu vistArocchrayataH samAH |
paritaH svasamAyAmA nimnonnatavivarjitAH || 6-19 ||


atra bhojarAjaH –

krameNa sarvakuNDeSu tisro mekhalAH kuNDAnurUpeNa vidhAtavyAH iti |


kuNDasya pazcime yoniM kuryAd dakSiNato'pi vA |
madhyato mekhalAnAM tu sarvAsAmupari sthitAH || 6-20 ||

sUryAGgulAyAmavatI tu yonirAmUlato'grAd vasuvedadasraiH |
vistArataH syAt kramazo'GguloccA drAGnirgatAgrApi ca ratnikuNDe || 6-21 ||

aratnyAdiSu kuNDeSu dvyaGgulaM dvyaGgulaM pRthak |
kramAdAyAmavistAravRddhyA yonirvidhIyate || 6-22 ||


atra bhojarAjaH –

evaM prathamakuNDasya | zeSANAM dvyaGgulavRddhyA yonirvidhAtavye ti |

maJjaryAM ca hastamAtrakuNDasya –

tAlAyatA jalapaterdizi saMsthitA syA-
dazvatthapatrasadRzI kramazo'tha nimnA |
nAbhirdazaGgulaSaDaGgulataH krameNa 
vistAratazca caturaGgulagolakAgrAH || iti ca |


caturazraM tu vA vRttaM kuNDaM nitye ca zAntike |
sArvakAmikamityanye caturazraM ca vartulam || 6-23 ||

zrutyekAMzaM tu sImno bahirapi purato'thAGkayitvAmbunAthe
tanmAnAt sUtramantarnihitamubhayataH koSThayorbhrAmayitvA |
madhyAdyanyasya karNAntikamapi parataH koNayoH pUrvacihne 
sUtre tvAsphAlya yonipratimamapi bhavet kuNDamazvatthapatram || 6-24 ||

caturazraM yugAMzAMzaM kRtvAntyaM cottare tyajet |
bhAgaM tvanena prAkpratyagbahiraGkau nidhAya tu || 6-25 ||

tadvad dakSiNato madhyasthitasUtrabhramAd dvayoH |
ardhacandrasamAkAraM kuNDaM bhavati zobhanam || 6-26 ||

vedAzre caturaMzake bhujamite prAgaMzamApyAd bahiH 
kSiptvA madhyamavAruNAGkanihite sUtre dvidhA bhrAmite |
syAtAM dvau zapharau tayozca puratazcAGke'tha sUtratrayaM
kSiptvA tatsamakhAtato bhavati tat kuNDaM trikoNAhvayam || 6-27 ||

SaSThAMzaM pUrvanihitaM gRhItvA nairRtasthitam |
vAyavyAnte ca sUtre dve kSiptvA vA syAt trikoNakam || 6-28 ||

madhyabindusthitaM sUtraM prAgbhujAd dvyaGgulaM bahiH |
paribhramya bhavet kuNDaM vartulaM tat suzobhanam || 6-29 ||

bAhyasthaM SaSThamaMzaM zatamakhavaruNAzAzritaM vedakoNe 
madhye saMsthApya sUtraM samamiha tu tayorbhrAmayitvA tu bAhye |
catvArastatra matsyAstadanu dhanadadigdakSiNasthe ca sUtre 
tatrastheSveSu cihneSvatha samapatitaiH syAt SaDazraM hi kuNDam || 6-30 ||

vRttakuNDe'bjapatrANi kuryAt tanmekhalopari |
kuNDArdhamAyatAnyaSTau madhye tatkarNikA bhavet || 6-31 ||

padmoktalakSaNenaivaM kRtvA syAt padmasaMsthitiH |

AdityAGgAMzamantarbahiriha parito dikSu sambhrAmya tAbhyAM 
dvAbhyAM matsyau bhavetAM dizi dizi patitaisteSu sUtrairyathAvat |
kuNDaM syAdaSTakoNaM suruciramathavApyardhadiksUtrakoNA-
cchiSTApyaindrAccharAMzAt kRtazapharayugAjjAtamInASTakairvA || 6-32 ||

kSetre tripaJcAGgulamAtravRttaM tribhistribhizcAGgulakairvibhajya |
rekhAMzakAn paJcadazAtra kuryAt koNAntarANi tribhiraMzakaiH syuH || 6-33 ||

sthitvA tu bindAvatha paJcadhAsmin sUtrANi sUryAGgulamAyatAni |
dattvAzrimadhyena samaM vibhaktaiH sUtrairhi koNadvayasandhayaH syuH || 6-34 ||

bindostu koNAntagasUtramAnAt saMbhrAmya tatkSetracaturthabhAgAt |
bindusthasUtrabhramaNaM vidhAya syuH sandhayaH paJca tathAtra sUtraiH || 6-35 ||

paJcakoNakuNDAdhikAraH |

caturazraM tu saMsAdhya dvyaSTadhA vibhajet punaH |
SaTpaJcAzacca koSThAnAM dvizataM cAtra vai bhavet || 6-36 ||

SaNNAM SaDbhistu koSThairlikhatu sarasijaM madhyadeze'sya bAhye
paGktyA pIThaM ca pIThAd bahirapi paritaH paGktiyugmena vIthIm |
tadbAhye paGktiyugme dizi vidizi tathA dvArakaNThopakaNThAd 
gaNDAMzcaivopagaNDAn rajanicaramarudvahnizarveSu koNAn || 6-37 ||


kaNThopakaNThAt kapolopakapolAt zobhopazobhA iti kecidAhuH |


padmakSetrasthadiksUtre saMsthApyAnyad vimRjya tu |
bahirdvAdazakaM bhAgaM tyaktvAnyat parivartayet || 6-38 ||

kSetraM caturdhA vibhajet tu vRttaM sUtraM paribhrAmya samaM krameNa |
tatkarNikAkesarapatrasandhicchadAvasAnAni bhavanti tAni || 6-39 ||

pUrvaM dvAdazakAMzaM yat tyaktaM tad bhramayed bahiH |
paJcamaM tad bhavet kSetraM vyomAkhyaM tad dalAgrakam || 6-40 ||

prasArya koNasUtre dve koNadiGmadhyamena tu |
catvAri sUtrANyAsphAlya sUtraSoDazakaM bhavet || 6-41 ||

dalAntasiddhyai dalasandhimadhye nidhAya sUtraM tu dalAntamAnam |
dalAntarAladvayasaMbhramotthaiH zazAGkakhaNDaistu dalaM prasidhyet || 6-42 ||

padmaSoDazasUtrANAM madhyaM sUtrairvibhajya tu |
dvAtriMzat khaNDasUtrANi syurdalAgravRtau samam || 6-43 ||

dalAgrasUtrodayapArzvasUtrayoraMgrasthitaM sUtramathAsya mUlataH |
dalAgrasUtrAntamupAnayellikhannevaM dalAgraM tu bhavenmanoharam || 6-44 ||

syAcchAlipiSTaM sitacUrNamiSTaM hAridramISatsitayuksupItam |
kausumbhasindUrakadhAturaktaM dagdhairyavAdyairapi nIlacUrNam || 6-45 ||

zamyabjabilvAdidalairyajJiyaiH zyAmalaM smRtam |
tattadvarNaistu vA dhAnyaiH pUrayenmaNDalAni vai || 6-46 ||

zaktastu vAJched yadi siddhimagryAM tadvarNaratnairhiha maNDalAni |
ApUrayenmauktikapuSyarAgairmANikyanIlairharitaizca ratnaiH || 6-47 ||

evaMvidheSu cUrNeSu siddhikAmo muktAvidrumAdikaistadevaM kuryAd iti bhojarAjaH |

rekhAstu sarvAH sarvatra zuklAH syurmadhyamAmitAH |
dvihaste'GguSTamAtrA vA haste cAnAmikAsamAH |
dvihaste'GguSThamAtrAH syurhaste madhyamayA mitAH ||

ityanye |


madhye supItA khalu karNikA syAt tasyAM tu bIjAni navAsitAni |
dve dve pRthak kesarake dalAnAM madhyeSu lekhye kuTilAgramISat || 6-48 ||

mUle tanUnyApItAni madhye sthUlAruNAnyapi |
ante drAk tanupItAni tadante'lpasitAni vai || 6-49 ||


mUlamadhyAgreSu pItaraktazuklaM kesarajAlami ti bhojarAjaH |


zuklAni tAnyaSTadalAni kuryAt samAni tuGgAgramanoramANi |
bhuktyai tathA prAJjalikAni muktyai smarAdiyAgeSu zitAgravanti || 6-50 ||

atrAjite–

dalAgrANyapi sarvANi raktavarNAni kArayedi ti |


gaurIsarasvatyAdInAM dalAnyazvatthapatravat |
vidyezAnAM grahANAM ca gokarNAgrANi kArayet || 6-51 ||

dikpAlakAnAmadharAgrakANi syuzcApi nandyAdigaNezvarANAm |
vighnezapadmodbhavaviSNusUryaskandAdikAnAM ca yathA zivasya || 6-52 ||

zlakSNazyAmena rajasA dalasandhIstu pUrayet |
pIThAntarAlakoNAni saMraktAnyeva kArayet || 6-53 ||

pIThaM tu zuklAruNapItakRSNaiH pAdaistathA nIlakakIlazobham |
gAtraizcaturbhistu vicitravarNaiH kuryAd yatheSTaM tvathavApi varNaiH || 6-54 ||


atra tattvasAgare –

pIThaM koSThadvayaM dikSu lopyaM, tathA koNe trINi trINi vilopayed iti |


vIthIM latAvitAnAdyaiH patrakaizcopazobhayet |
tadbAhye dikSu zuklena caturdvArANi pUrayet || 6-55 ||

diksUtrakANAmubhayatra koSThe dvArArthamabhyantarapaGktisaMsthe |
tadbAhyapaGktau dvitayadvayaM tat SaTkoSThamitthaM vimRzed dizAsu || 6-56 ||

koSThatrayaM trayaM cAntardvArANAM pArzvayordvayoH |
aikyena zobhAsiddhyarthamekaikaM vimRjed bahiH || 6-57 ||

evaM pRthakkoSThacatuSkavantaH kaNThopakaNThAH prabhavanti cASTau |
tatpArzvatastadviparItavaktrAstadvat kapolopakapolakAH syuH || 6-58 ||

tataH koNeSu ziSTAni SaTkoSThAni pRthak pRthak |
vimuktyai koNasiddhyarthaM vRSabhAneSu vA likhet || 6-59 ||

nIlenAcchAdya koNAMstAJchAkhAn zuklena vA likhet || 6-60 ||

kaNThopakaNThAn raktena kapolopakapolakAn |
pItenAcchAdayedabhau(?) yathA bhUmirna dRzyate || 6-61 ||

bahirguNAd vai paritaH kramoktAllikhet tataH sattvarajastamAMsi |
rajobhiraGguSThamitAMstu zuklAruNAsitAn madhyayavAntarAMstAn || 6-62 ||

bhadrakAdhikAraH |

caturazre'STadhA bhakte catuHSaSTipade kRte |
madhye koSThacatuSkeNa padmaM pIThaM ca saMlikhet || 6-63 ||

tadbAhyapaGktyA khalu vIthikA syAt tadbAhyapaGktidvayadikcatuSke |
dvArANi koSThaiH khalu vedasaMkhyaiH saMmRjya zuklAni samAni kuryAt || 6-64 ||

dvArANAM pArzvayorbAhyapaGktAvekaikakoSThakam |
dvAreNAyojya vimRjet syAtAM kaNThopakaNThakau || 6-65 ||

saMsthApya koNeSvatha koSThamekaM ziSTaiH pRthak koSThakapaJcakaiH syuH |
ekIkRtairvedakapolakAste tAvanta evopakapolakAzca || 6-66 ||


atrAjite –

kapAlaM tu bhavet teSu padaM pUrvAparAyatam |
dakSiNottaragaM cApi bhavedupakapolakam  || iti |


prAguktamArgeNa tu karNikAdyaM cApUrya vIthiM ca yathoktavarNaiH |
dvArANi zuklena kapolakAste raktAstathA patiruco'dha ca syuH || 6-67 ||


atrAjite bRhatkAlottare ca –

kapolopakapolAstu vahnikoNAdiSu kramAt |
raktaM pItaM tathA zyAmaM zvetaM ca parikalpayet || iti


vahnyAdikoNakoSThAni pItazyAmAsitAruNaiH |
pUrayed vAtha sarvANi kRSNena paripUrayet || 6-68 ||

bAhye tu zuklAruNakRSNavarNaiH prAgvat samAlikhya guNatrayaM tat |
syAt sarvatobhadramidaM tu koNe SaTkoSThakaikIkaraNena bhadram || 6-69 ||

maNDaleSvapi sarveSu zuklAnyabjadalAni tu |
dvArANi cAtha vIthI syAllatAdyairavizeSite || 6-70 ||

sarvatobhadrAdhikAraH |

dvAtriMzadaMze caturazrake'smin sahasrakaM saGkRtisaMkhyakaM ca |
koSThAni tanmadhyagatattvasaMkhyaiH koSThaiH sarojaM tu likhet purovat || 6-71 ||

tadvAhyapaGktyA pIThaM syAt tadbAhye saptapaGktibhiH |
liGgASTakaM tu vilikhed diksUtrobhayapArzvayoH || 6-72 ||

RtuvedAkSivedartukoSThaiH syAt tiryagAyataiH |
pIThaM sakaNThaM brahmAdijalapAdAntaka zubham || 6-73 ||

pIThopariSTAt khalu madhyapaGktyoryugmasthatatkoSThacatuSTayena |
liGgaM bhavet tadgatamadhyasUtrAnmadhyAntasaMvartitamastakaM vA || 6-74 ||

antarmukhAni liGgAni bubhukSUNAM samAlikhet |
viparItaM mumukSUNAmantaHpIThAni kArayet || 6-75 ||

tatkaNThapIThobhayapArzvasaMsthe bhadre catuSkoSThavazAd bhavetAm |
liGgAntarAleSvapi paJcaviMzaiH koSThaistu koNeSu latA vidheyAH || 6-76 ||

gomUtrikAvat saMspRSTA rekhAstatkoSThagA yathA |
tathAnyarekhAlopena latAH syurvidigAyatAH || 6-77 ||

azryantareSu vallInAM patrANyapyathavA likhet |
vallyAdau saktamUlAni kuTilAgrAdikAnyapi || 6-78 ||

tadbAhye paGktiyugmena vIthIM prAgvat tu mArjayet |

vIthIM tathA kalpalatAvizeSairAbhUSya tadbAhyavRtitraye'pi |
koSThAni vedartuvasuprasaMkhyaM dvArArthamantaH prabhRtIha lumpet || 6-79 ||

zobhopazobhe'pi syAtAM dvicatuSSaDvilopataH |
triHsaptakoSThAni pRthak koNe koNe tu mArjayet || 6-80 ||

padmAdikaM bhadrakavat tu sarvamAbhUSayet paJcavidhaistu cUrNaiH |
liGgASTakaM paJcamukhoktavarNairicchAnurUpaM paripUrayed vA || 6-81 ||

itIdaM pArvatIkAntamuktaM prAsAdamaNDalam |
aSTaliGgalatApadmavIthIprAkAramaNDitam || 6-82 ||

pArvatIkAntaprAsAdAdhikAraH |

caturazraM caturhastaM kSetraM viMzatibhAgikam |
syAccatuHzatakoSThaM tanmadhye'bjaM tattvakoSThakaiH || 6-83 ||

paGktyaikayA pIThamathaikayA syAd bIthI tataH paGkticatuSTayena |
taddvAraliGgaiH parito latAH syustadbAhyapaGktyApi ca bAhyavIthI || 6-84 ||

kuryAd bhadrakavat padmapIThabIthIryathAvidhi |
pratipaGktidvikoSThASTakoSThairdvArANi dikSvapi || 6-85 ||

vIthyantarA dvAranibaddhakoSThatrayeNa bhUpIThamathaikakoSTham |
syAt kaNThapIThaM tvatha toyapaTTaM koSThaistribhirliGgamathaikakoSTham || 6-86 ||

adhazcordhvaM ca tatkoSThAt pIThakoSThacatuSTaye |
koSThAntaH koNagaM sUtraM koSThasUtrArdhamAnataH || 6-87 ||

bhramayitvA tyajed bAhye khaNDitAzricatuSTayam |
pIThamevaM bhaved ramyaM dvAdazAzrairalaGkRtam || 6-88 ||

prAgvat samApUrya tu varNacUrNaiH padmAdivIthyantamazeSabimbam |
khyAtaM latAliGgasamudbhavAkhyaM tanmaNDalaM zaGkaravallabhaM yat || 6-89 ||

latAliGgodbhavAdhikAraH |

kSetre SoDazadhAbhaktacaturazre caturdizam |
pArvatIkAntavat koSThaiH kuryAlliGgacatuSTayam || 6-90 ||

madhye viziSTairapi vedakoSThairliGgAntarAleSvapi tatprasaMkhyaiH |
caturdalAbjaM khayameva taiH syAlliGgeSu saMvartitamastakeSu || 6-91 ||

bhadrASTakaM syAt kaNTheSu latAH koNeSu pUrvavat |
likhitvA maNDalaM tat syAt paJcabrahmAbhidhAnakam || 6-92 ||

madhye'mbuje vartulakarNikA syAt pItA ca raktA tanukesarAlI |
Izastu madhye puruSAdayo'pi khavarNadigliGgagatA bhavanti || 6-93 ||

asyaiva tu latAsthAneSvAlikhya svastikAni tu |
koNArdhapaGktyorvIthI syAd gaurItilakamaNDale || 6-94 ||

nAbheH samIpe prathamaM tu koSThaM vakrAyataM dve'tha punarvilumpet |
taddakSiNAvartacatuSpathAGkaM syAt svastikaM cAntaravIthiyuktam || 6-95 ||

zyAmapItAsitAraktairmArgAnAbhUSayet kramAt |
khaNDavIthIstu zuklena liGgAdanyena bhadrake || 6-96 ||

paJcabrahmamaNDalagaurItilakAdhikAraH |

kSetre tathASTAdazadhA vibhakte koSThAni cAsmin trizataM ca vedaiH |
viMzatyapi syAt khalu tattvasaMkhyairmadhye sarojaM vilikhet purovat || 6-97 ||

aSTAzAsvapi SaTtriMzatkoSThaiH syuH svastikAnyapi |
ekaM trINi tataH paJca koSThalopakramaH smRtaH || 6-98 ||

etat khalu svastikamaNDalAbjaM kSetre'thavA dvAdazabhAgite'smin |
madhye'mbujaM SoDazakoSThakaiH syAt syuH svastikAnyaSTadizAsu tadvat || 6-99 ||

svastikAnyapi padmaM ca prAgvadApUrya varNakaiH |
svastyarthaM svastikaM zastaM sarvadevAbhinandanam || 6-100 ||

svastikAbjadvayAdhikAraH |

kSetre tathASTAdazabhAgike'smin tanmadhyagaH svastikanAbhimAdau |
saGkalpya lumpet tu catuSpathAbhaM samantataH koSThakapaJcakAni || 6-101 ||

koSThamAtrAyatA rekhAH kuTilAH svastikAkRtau |
parasparapayodhinyaH sthApyAH syuH zeSalopataH || 6-102 ||

paJcAzadasmin khalu saptakaM ca syAt svastikAnAM saha cArkabhadraiH |
madhye dvipaJcAzadapi dvayaM ca syAt sarvatobhadracatuSpathAnAm || 6-103 ||

koNeSu caikakoSThAni ziSTAnyAbhUSayet sitaiH |
nIlapItAruNazyAmairbhadrANyapi catuSpathAn || 6-104 ||

etaddhi sarvatobhadrasvastikaM nAma maNDalam |
sarvasvastikamityete prAhuryacchivayoH priyam  || 6-105 ||

kSetre'thavA SoDazadhA vibhakte manvarkadRgvasvRtubhedite vA |
prAgvad vilomAt khalu maNDalAni syuH sarvataH svastikabhadravanti || 6-106 ||

svastikasarvatobhadrANi |

caturazre dvihaste tu cakrAbjaM pIThavarjitam |
syAdekanAbhaM tallakSma bhavenmAnAGgulakramAt || 6-107 ||

nidhAya sUtraM tvatha madhyabindau padmArdhamAnena navAGgulena |
tribhizca vasvabdhimitairbhramaistaiH saroruhaM nAbhyaranemayaH syuH || 6-108 ||

padmaM purovadAlikhya nAbhiM pItena pUrayet |
dalatulyArake cakre dalarekhAH prasArya tu || 6-109 ||

likhet tatasteSvarakAn yathAvad dalAd dvisaMkhyeSvarakeSu tadvat |
dalAgrasUtrairdalasandhisUtraiH prasAritaistAvadihArakAH syuH || 6-110 ||

vibhajyArabhuvaM tredhA dvAbhyAmantarathAGkayet |
matsyavat teSvathAsphAlya sUtrANyeSu likhedarAn || 6-111 ||

indIvarAzvatthadalopamA vA te mAtuluGgAkRtayo'thavA syuH |
abjacchadAbhAzca yavodarA vA madhyaiH kRzairvAtha pipIlikAbhAH || 6-112 ||

arakAstvaruNAH zyAmAste syurekAntarAH kramAt |
ante gorocanAbhAH syuH pItAH syurarasandhayaH || 6-113 ||

nemiM tridhA saMpravibhajya kuryAcchuklena madhye tvasitena bAhye |
pItena cAntaH paripUrya koNAn kRSNena sasvastikacihnaramyAn || 6-114 ||

arasandhyantarAlastho bahirnemeH paribhramet |
arasandhestu madhyastho bhramayedaramUlakam || 6-115 ||

madhye'rakANAM sthitvA tu bhramayedaramadhyakam |
mAtuluGgaphalAkArA evaM sidhyantyarAH kramAt || 6-116 ||

arAgrasaMsthastvarasandhimUlAt sUtraM tathArobhayapArzvasaMstham |
pRthak samAsphAlya tathArakAH syurvistAritendIvarapatrakalpAH || 6-117 ||

aramadhyasthito'rAgraM kiJcit tyaktvAbjapatravat |
arasandherbhramAccAgrabhramAdabjadalArakAH || 6-118 ||

zAntAgramUlAH pRthavastu madhye kAryAstRtIyAMzatayArasandheH |
antaH praviSTAstu yavodarAkhyAH sidhyanti te syuH kramazaH zitAgrAH || 6-119 ||

tridhA vibhajyArakSetraM dvitIyaprathamAMzayoH |
madhye sthitvA paribhramya tRtIyAMze dalAgravat || 6-120 ||

ardhacandrAbharekhAbhyAM patrAgraM ca samAlikhet |
itthamazvatthapatrAbhAstatrArAH saMbhavanti hi || 6-121 ||

sthitvArasandheratha madhyamAMze tiryagbhramAccobhayato'rakArghAt |
rekhAdvayAntaH kRzamadhyakAH syuH pipIlikAkroDasamAhvayArAH || 6-122 ||

arasandhyantarA puSpairvicitrairabhibhUSya tu |
bimbabAhye'thavA lipte puSpAlIbhirvibhUSayet || 6-123 ||

uktaM tu cakrAmbujamekanAbhaM priyaM zivAryAharibhAskarANAm |
anyAni ca syurnavanAbhakAntAnyUhyAni cakrAmbujamaNDalAni || 6-124 ||

cakrAbjAdhikAraH |

karNikArdhapramANena prAksthasUtrabhramakramAt |
tadrekhApArzvayogena matsyadvAdazakaM bhavet || 6-125 ||

sUtreSu teSvApatitairyathAvat sandhisthasUtrairdinakRcchatAbjam |
aSTacchadAbjasya samaprabhedAt syadambujaM SoDazapatrazobham || 6-126 ||

kesaravyomarekhAntasUtrAt tatkesarAgragAt |
matsyavallAJchayitvA syAt paJcapatraM tu paGkajam || 6-127 ||

karNikAdalasandhibhyAM prAgvat SaTpatrasiddhaye |
vyomarekhAkarNikAbhyAM dalAgrasthaM tu saptake || 6-128 ||

dalasandhikarNikAbhyAM dalasandhau nyasya matsyacihnena |
navadalakaM syAt sUtraiH paJcabhirAsphAlya paGktipatraM syAt || 6-129 ||

kesarAkAzayormadhyaM vyomni vinyasya lAJchayet |
ekAdazacchadaM tvevaM padmaM syAt sUtrapAtataH || 6-130 ||

patrAgrapatrasandhibhyAM patrAgre nyasya lAJchite |
AsphAlya teSu sUtrANi tat syAdabhikRticchadam || 6-131 ||

ataH paraM ced dalavRddhimicched dizAnayaivAtra yathAkrameNa |
tadUhato madhyavazena sUtrairlikhet sarojAni yathAbhilASam || 6-132 ||

dalabhedalakSaNam |

ardhacandrAdikuNDAnAM lakSmaNA sUtrapAtataH |
ardhacandrAdibimbAni kuryAt kAmAnusArataH  || 6-133 ||

vedAzrike digvidigantare syurdvyaSTasUtraiH patitaistu dIrghaiH |
dvAtriMzadaMzAH parito'tha teSu kSetrANi paJca bhramaNAd bhavanti || 6-134 ||

aSTAGgulaiH syAt kamalArdhamAdau tribhistu pIThaM tribhireva nAbhiH |
vIthIzcaturbhistu SaDaGgulaiH syurdvArANi zobhAstvapi copazobhAH || 6-135 ||

prAgvat sarojaM tviha vRttapIThaM nAbhirguNairhaMsazarAbjazaGkhaiH |
vIthirbhaved vAracatuSTayADhyaM varNakramAd bhadrakavad vidheyam || 6-136 ||

dvArAdiSu vizeSo'tra syAt tatkSetraM dvidhA bhramAt |
antarvedAMzakairbAhyairdvArANi syuH SaDaMzakaiH || 6-137 ||

prAgvac zobhopazobhe stAM koNalakSmApi kathyate |
antarmukhAste kalazAstu koNA vedAMzavaktrA dvitayAMzakaNThAH |
tatkoNapArzvAntavivartane syuH pRthUdarAvartitaviSTarAntAH || 6-138 ||

mAyAcakrAhvayaM tvevaM zaktInAM maNDalaM smRtam || 6-139 ||

mAyAcakrAdhikAraH |

vakSye'tha bimbaM tripurAbhidhAnaM kSetraM tu kuryAccaturazradIrgham |
yuktyA purovacca paraizca sUtraiH syAd dvitrihastAyatavistRtaM tat || 6-140 ||

prAgAyataM trayastriMzatsUtrANyatra nipAtayet |
yAmyodagAyataM saptacatvAriMzacca saMkhyayA || 6-141 ||

koSThAni cAsminnathavarya(?)saMkhyaM 
madhye'sya koSThairapi tattvasaMkhyaiH |
syAt paGkajaM tatparitastu paGktiM 
tyaktvAsya pUrvAparato'mbuje stAm || 6-142 ||

parito'bjatrayasyAtra paGktimekAM vilopayet |
caturazrAkRtirdIrghA sA cAntarvIthisaMjJitA || 6-143 ||

tadbAhyapaGktyA paritastu pIThaM koSThaistathA paJcabhirasya koNAt |
kuryAcca pUrvAparadakSiNodaggAtrANi vasvaSTacatuSkavedaiH || 6-144 ||

koNAgAtrakamadhyeSu paJca koSThAni lopayet |
pIThamekaM tripadmAnAM syAd dIrghacaturazrakam || 6-145 ||

tadvAhyayAmyottarapUrvapazcAlliGgAni SaTsaptakakoSThakaiH syuH |
tiryagrasaistaddizi saptapAGktaiH koSThairyathoktaM caturazrakeSu || 6-146 ||

liGgAnAM pArzvayordvandve caturazre vilopayet |
pRthakpRthagvai SaTtriMzatkoSThaistAni bhavanti hi || 6-147 ||

tadvat koNacatuSkeSu SaTtriMzatsaMkhyakoSThakaiH |
dIrgheSu caturazreSu nRtyaddhaMsAn samAlikhet || 6-148 ||

raktAni padmacchadanAni lakSmIjayArthasaubhAgyakarANi kuryAt |
zuklAni vidyAkavitAdisiddhyai zeSaM purovat khalu karNikAdyam || 6-149 ||

antarvIthIM tu pItena caturazreSvathASTasu |
zaGkhau cakre ca saMlikhya catvAryabjAni cAlikhet || 6-150 ||

vIthyAM latA syAt pariziSTapaGktitrayeNa digdvAracatuSTayAdyam |
lumpet SaDaSTau daza koSThakAni dvAradvaye dakSiNatazca saumye || 6-151 ||

zobhopazobhAsiddhyarthaM koSThAnyuttarayAmyayoH |
catuHSaDaSTau prAgApye dve catuHSaT ca lopayet || 6-152 ||

dvAre prAkpazcime syAtAM vedartuvasukoSThakaiH |
trisaptakoSThaiH koNAH syustatpAdAzcartukoSThakaiH || 6-153 ||

tripurAmaNDalAdhikAraH |

kSetre viMzatidhA dvidhA punaridaM nirbhidya vedAzrakaM 
koSThAnAM khalu SaTzataM dazazataM cAtrAsti tanmadhyataH |
SaTtriMzatkacatuSTayena tu bhavelliGgaM sapIThaM mahat 
tattriMzaddvayanAgaSoDazamitaiH koSThaistu pIThAdikam || 6-154 ||

paGktiM tatparito vimRjya tu bahiHpaGktyA ca pIThaM bhavet 
tadbAhye munipaGktitattvagaNanAkoSThaiH pRthak pUrvavat |
padmAni kramazo'STadikSu vilikhelliGge ca tatpArzvayoH 
SaDbhirviMzatikoSThakaizca paritaH paGktidvayAd  vIthikAH || 6-155 ||

IzAnAdibrahmavarNAni cAsmin liGgAni syuH ziSTaliGgAni padmAt |
vyastairvarNaiH zuklaraktAccharaktaiH prAgAdyabje saMlikheduktamArgAn || 6-156 ||

saMyuktAn kramazaH pradakSiNamatho vIthyAM tu zaGkhAllikhe-
cchuklAbhAn yadi maNDalaM bhavati tadyacchaGkhamAlAhvayam |
haMsAzcediha haMsamAlamRtubhiH syAdaSTadiksaMsthitai-
rdvArANi trizarAMzca koSThavihitAH zobhAzca paGktitraye || 6-157 ||

koNAH syuH saptaviMzatyA koSThAnAM tattripaGktiSu |
kRSNenAcchAdya tatrApi svastikAbjAdikaM likhet || 6-158 ||

liGgodarazaGkhamAlAdyadhikAraH |

cakrAbjAditarANi zaktizivayoH pUjAsu dIkSAdike 
zastAnyatra pavitrakAdiSu tathA sasvastiliGgAnyapi |
cakrAbjAnyapi bhadrakANi saviturviSNozca lakSmyA vidheH 
zaktInAM tripurAkhyazaGkhakalazA mAyAmbujaM coditam || 6-159 ||

yathoditastu zaktinAM tathendrasmarabhoginAm |
vighnezAnalaSaDvaktrAH pUjyAH syuH svastikeSviha || 6-160 ||

sarve sarveSu vA pUjyAstattatkarmAnusArataH |

iti kuNDamaNDalavidhiH pradhAnataH kathitaH zivAdisurapUjanocitaH |
bahudhA nirUpya vividhAn zivAgamAniha sAdhakendramAnasAM priyaGkaraH || 6-161 ||



iti zrImadIzAnazivagurudevapaddhatau tantrasAre kuNDamaNDalavidhiH SaSThaH paTalaH |
atha saptamaH paTalaH

vakSye sruksruvayozca lakSaNamatho srugghastamAtrAyatA
pAlAzI khadirodbhavApi ca tathA syAcchAmilI zobhanA |
vedAzraM tu mukhaM svarAGgulamitaM zreSThaM rasairvA zarai-
rmadhyaM cApyadhamaM ca nimnamiha tanmadhye tribhAgAstRtam || 7-1 ||

vistAreNa samaM hi khAtamapi tad vRttaM bahirmekhalA -
srisraH syuH kamalaM tathaiva paritastAsAM tu bAhye bhavet |
kaNTho golakavistRtAGgulamito dairghyeNa tasyordhvataH 
syAdagraM caturaGgulAyatamatho vistAratastatsamam || 7-2 ||

kaNThasyApyatha madhyavarti suSiraM tad vai trikoNAyataM
nirgaccheddhi yathAyataM tadavaTaM yAvat kaniSThA vizet |
tatpRSThaM kamalAGkitaM khalu mukhaM sarvaM gajoSThopamaM
ziSTaM vartuladaNDamasya tu bhavedagraM sarojAGkitam || 7-3 ||

daNDAgraM pariNAhataH sarasijasyAdho yathartvaGgulaM
sthUlo'sau kramazaH prakoSThamiva tanmUlaM ca vasvaGgulam |
tatra syAd vRSabho'thavA sarasijaM zlakSNAkRtiH sarvato
nirdoSaH zubhadezajAn kSitiruhAJchitvA srucaM kArayet || 7-4 ||

srugjAtistu bhavet sruvaM suvihitaM tAladvayAyAmakaM
kuryAd vartulamaGgulena vadanaM tasyAvaTe'rdhAGgule |
bhittirmadhyagatA smRtA yavamitA tadgartayoH zlakSNayoH
karSAjyasthiti goSpadAkRti ca tatpRSThe yavAbhyAM sphijau || 7-5 ||

sphiGmadhyena yavapramANavihitA rekhA ca vaktrAdadhaH 
kaNThaH paGkajalakSaNastu tadadho daNDaH suvRttaH samaH |
daNDAgraM pariNAhato'GgulamitaM mUlaM tato'dhyardhataH
syAd gopucchanibhaM galAt prabhRti tat sthUlaM hi mUlaM yathA || 7-6 ||


bAhumAtriyo'ratnimAtriyo vA sruca ityanye |

sruksruvAdhikAraH |

bhittvA zobhanazAkhikAM yadi bhavecchamyudgatAzvatthajA
no cet kevalapippalAt tadaraNirbhAnvaGgulairAyatA |
nAho'syAstu SaDaGgulena tu ziro mUle'Gghriragre smRto 
yonirmadhyagatAGgulaiH zrutimitairmanthAnayogyA bhavet || 7-7 ||

azvatthena tathottarAraNirapi syAt SaDbhirevAGgulaiH
kuryAd bhrAmakamasya khAdiramRjaM netraM ca rajjuM dRDhAm |
tatrAgniM janayet tathendhanamapi tvagvarjitaM sAravad 
bhinnaM zastatarUdbhavaM dhamanamapyagnerdhavitrAdinA || 7-8 ||

araNyAdividhiH |

vakrAH zIrNadalAH kRzAH kRmihatA bhinnAstvazastrAhRtA
hrasvAH sthUlagatatvaco'pyupahatA dIrghAgnidagdhAdayaH |
varjyAH syuH samidhaH zucisthalabhuvaH zeSAH samaM cheditA
madhyAnAmiakayostu nAhasadRzAH zastAH kaniSThAdhamAH || 7-9 ||

tAlAyatAstu samidhaH khalu zAntikAdau 
saptAGgulA bhramaNacATanakeSu zastAH |
vidveSasAdhanavidhau caturaGgulAstA 
vakrAH SaDaGgulamitA api mAraNeSu || 7-10 ||

AkRSTivazyaviSayeSu zarAGgulAH syuH 
prAdezamAtrasamidho'pyavizeSakRtye |
kSudreSu pRSThamanale juhuyAt tathAgraM 
cAgnau juhoti hi zubheSu yathopadezam || 7-11 ||

idhmo'STAdazabhiH samidbhiruditaH prAdezamAtro'thavA
ratnyAyAmamitaH kvacit paridhayo hastAyatAH syusrayaH |
dIrgho dakSiNatastu pazcimazayaH sthUlastanurhrasvakaH
saumye kauzikajAzca pAlakakuzAH zreSThA hi darbhAH kramAt || 7-12 ||

vyagrA hastanakhAhRtAH kRmihatAH karmAntarAyojitAH
yAmyA vyAghravilaGghanAdyupahatA dhUmrordhvazuSkAdayaH |
varjyAH zyAmalakomalAH pratinavAlUnArdrazuSkAstathA
darbhAH syuryadihAgnikAryapaTale veNyAdikaM coditam || 7-13 ||


tatra triMzaddarbhadalakRtA veNiH | aSTyatyaSTidhRtyatidhRtisaMkhyA vA darbhAH paristaraNe syuH | tattvasaMkhyAdarbhairbaddhaM kUrcaM jJAnakhaDgaH | darbhadvayena sAmAnyam | darbhapaJcakena vizeSakUrcamiti saMhitATIkAyAm |


paJcabhiH paJcabhirdarbhaiH praNItAprokSaNIvidhau |
kUrcadvayaM bhavet saptadazabhirbrahmakUrcakam || 7-14 ||

dvAdazAGgulakaM daNDaM brahmagranthyekamaGgulam |
tadagraM tryaGgulAyAmaM kUrcAnAM tu prakalpayet || 7-15 ||

madhyena grathitaM tu darbhayugalaM prAdezamAtraM bhavet 
saMskAre tu pavitrakaM smRtamatha dvandvaM ca vidyotane |
sruksammArjanake tvatuSTayamiha syAd vai kuzAnAM ghRte 
darbhAgradvayamaGgulAyatamathAtrArkAGgulaM prastare || 7-16 ||

tAlAyatAbhyAM darbhAbhyAM grathitaM caturaGgulam |
pavitraM syAd dvijAtInAM tribhiH kSudreSu hastayoH || 7-17 ||

brahmagranthirdvijAtInAM smRto hastapavitrake |
kevalazcAnulomAnAM dUrvaiva strIcaturthayoH || 7-18 ||
dazottarazataM tvevaM darbhAH syuH prastAraM vinA |


iti baudhAyanamatam |


idhmavarhiSAM vidhiH |

bhUmiH sthaNDilasaMjJitA sapadi yA gogomayAlepitA
gokarNASTakamAtrakaM SaDatha vA gocarmamAtraM smRtam |
nadyAdeH sikatAH zubhAstu dhavalAH prasthairmitAH paJcabhiH
sAmAnyena tadAha homaviSaye bodhAyanaH sthaNDile || 7-19 ||

sthAlyAjyasya bhaveccharAvasadRzI vistArato'STAGgulA
vistArArdhasamucchrayApi ca bhavennAlaM ca vedAGgulam |
vistAreNa SaDaGgulocchritasamaM pAtraM praNItAmbhasAM
syAdaSTAGgulavistRtocchrayasamA nAlAnvitA prokSaNI || 7-20 ||


atra pauSkare –

sarvatra svarNarajatatAmramRnmayAni pAtrANi uttamamadhyamAdhamaphalAni bhavanti iti |


aSTAbhiH kuDubaiH prapUritacaruH sthAlI smRtA cAdhamA
madhyArkairvasuyugmakaiH parimitA syAduttamA tAmrajA |
zreSThAdyAstvadhamAstrisaptakamitA darvyaGgulAnAM bhaved 
dairghyAt saptazarAGgulairiha zirovRttaM tu pucchaM dvayAt || 7-21 ||

zAlInAM sitataNDulAH sakalamA nIvArajAH SASTikAH
saMzuddhAstuSazarkarAdirahitAH zuklArjitAH syuzcaroH |
zreSThaM yat svapazornavaM ghRtamatha krItaM navaM madhyamaM
krItAjyaM yadanUtanaM tadadhamaM gavyaM bhaved gAlitam || 7-22 ||

kSaudraM gandharasAdyadUSitamapi krItaM punargAlitaM 
grAhyaM krItasitopalAdyabhinavaM khaNDaM gulaM caikSavam |
pUrvaM pUrvamiha prazastamakhilaM zuddhaM ca zuklArjitaM 
homAdezca tilAdidhAnyamakhilaM saMzodhya tu kSAlitam || 7-23 ||

yaccAnyat phalamUlavastu surasaM grAhyaM vizuddhaM navaM 
tatrAGguSThamitAhutistu kathitA hyannasya zAlyAdiSu |
syAt paJcAGgulibhirdhRtaM dravaraseSUktaM sruvApUritaM
lAjAnAM khalu muSTireva kusumeSvekaikamabjAdiSu || 7-24 ||

vallInAM caturaGgulaM kaNatile saktuSvapi syAnmRgI
sAGguSThA khalu madhyamAGguliyutA nAmnA mRgIsaMjJitA |
gandhAnAM caNakImitaM tu badarIbIjopamaM guggulo-
rbhakSyANAM ca mahAphalAdiSu bhavedakSapramANAhutiH || 7-25 ||

kharjUreGgudagostanIbadarikAjambUphalAnAM tathA 
patrANAM pRthagekamekamuditA parvaikamikSorapi |
nAnAbhakSyavimizrahomaviSaye paJcAGgulIbhirdhRtaM
dUrvAgratritayaM tathaiva samidhAmekaikamevAhutiH || 7-26 ||

AhutipramANam |

syAd vardhanyapi pUrNabhArasalilA kuMbhazca khAryambubhRd
droNAmbhaHparipUritastu kalazaH pUrNaM zivAt karkarI |
pUrNA syAd ghaTikADhakena kuDubadvandvaM zarAvaM bhave-
dApUrNaM kuDubena vA prasarataH zaGkhazca dIpastathA || 7-27 ||

pAtramAnam |

vakSye zuddhimapIha pAtraviSayAM dravyAdikAnAM tathA
yAvad gandhavilepanAdyapagamastAvajjalaiH kSAlayet |
cUrNairapyavagharSayet punarapi prakSAlya coSNairjalaiH
pAtrANAM bhavatIha zuddhiradhunA zuddhirviziSTocyate || 7-28 ||

sauvarNaM salilena zudhyati yathA lepApanodo bhavet 
pAtraM zulbamayaM tathAmlasalilaistArodbhavaM gomayAt |
kAMsyaM bhasmajalaistathA maNimayaM sUryAMzubhirvAmbhasA
mRtpAtraM dahanena cedabhinavaM tattakSaNAd dAravam || 7-29 ||

dAhAdAyasazuddhirevamuditA lauhAni tatkartRbhiH
sparzAd vA turagAnanAbhigamanAcchudhyantyanatyAhatau |
zuddhizcarmasu rajjuvastraviSaye cet kSAravAriplavAt
syAccAlAbukavaiNave'mbupavanaM gopAlakAgharSaNAt || 7-30 ||

zuddhiH sodakabhAjaneSvapi bhavet paryagni kRtvA tathA 
dhAnyAnAM phaladarbhamUlasamidhAM saMprokSaNAdhAvanaiH |
kauzeyAdidukUlapaTTavasanAnyAlabdharaGgAni yA-
nyambhaHsekavirAgakANi dhavalaiH zudhyanti siddhArthakaiH || 7-31 ||

tyAjyaM dAravavaiNavAdikamatho bhANDaM tathA mArttikaM
zleSmocchiSTamalAdiduSTamathavA nirmAlyasandUSitam |
snehAnAmapi zuddhiratyupahatirnocedabhidyotanA-
cchudhyedambujalAzayAdiSu nizAsvagneH zikhAdarzanAt || 7-32 ||

gobhirvAdhyuSitA nikhAnitatalAkRSTAthavA sUdghRtA 
bhUH zudhyed bhavanAdikaM ca salilaiH sadgomayAlepitam |
puNyAhAd dvijabhojanairapi tathA collekhanAd vA sthalaM
zudhyet pAtakInAbhibhASya vacasAM zuddhirdvijAbhASaNAt || 7-33 ||

prANAyAmaiH zudhyati dehaH samanaskaH 
spRSTvAspRzyAnapsu nimagnaH sahacelaH |
jagdhvA yattad vA kSutaniSThIvanajRmbhA-
svAcamyAdbhizcAntyajazUdrAdyavaloke || 7-34 ||

niH sAryAmbhaH kUpajalAdermahadarNo-
vegAt spRSTaM vAMzubhiraMzoriha zudhyet |
sAmAnyAgniH prokSaNato'nyatra gato vA 
prAyazcittAd cAgnimukhAccAhitavahniH || 7-35 ||

gandhAdInAM mantrajalaiH prokSaNataH syAc-
chuddhiH kSIre cAndhasi vAjyaM tvabhidhArya |
darbhodyotAcchudhyati nAtiprahatizce-
cchiSTAnAmapyevamivohyA parizuddhiH || 7-36 ||

sAmAnyeyaM sarvaguNAnAmapi hetuH 
karmadravyasvAtmasu suddhirmanaso yA |
zuddhiH sA sAdyasya tu rAgAdyaviduSTA
ceccatvAro'pyasya karasthAH puruSArthAH || 7-37 ||

iti zrImadIzAnazivagurudevapaddhatau tantrasAre sruksuvAdilakSaNaM nAma saptamaH paTalaH |

athASTamaH paTalaH

atha mantrAtmabhUtAnAM devatAnAM yathocitA |
pUjA siddhikarI jJeyA dRSTAdRSTaphalapradA || 8-1 ||

tayA syurdevatAstuSTAH puruSArthaphalapradAH |
pUjA sA trividhA jJeyA zreSThamadhyAdhamakramAt || 8-2 ||

pUjottamA bhavati SoDazadhopacArairyA madhyamA prabhavatIha dazopacArA |
paJcopacAravidhinA tvadhamA saparyetyAsAM yathA vibhavamarcanamAzrayIta || 8-3 ||

kalpatantraguruproktA yasya mantrasya yAdRzI |
pUjA zreSThAdibhedena tayArAdhyaiSa sAdhayet || 8-4 ||

AsanAvAhanArghyAdi pAdyamAcamanIyakam |
sAGgopAGga tathA snAnaM vAsanAbharaNAni ca || 8-5 ||

gandhaH puSpaM tathA dhUpo dIpazcarunivedanam |
agnikAryaM namaskAro japapUjAsamarpaNam || 8-6 ||

iti SoDazadhoddiSTA hyupacArAH samAsataH |
arghyaM pAdyaM tathAcAmaH snAnaM gandhazca puSpakam || 8-7 ||

dhUpadIpanivedyAni namaskArazca te daza |
madhyamAyAM tu pUjAyAmupacArAH prakIrtitAH || 8-8 ||

gandhaH pUSpaM dhUpadIpau nivedyaM paJcaivaM syustUpacArAH kaniSThe |
apyeteSAM lakSaNAnAM prabhedAH saMlikhyante sAdhakAnAM hitAya || 8-9 ||

zaktyAdisvAGgazaktyantaM pIThAbjaM vAbjameva vA |
yat tanmatravidhAnoktamAsanaM tat pracakSate || 8-10 ||

AdhAro vetyAsanaM devatAyAH svAsInAsmin pUjyate devateSTA |
dhAtorAsetyasya caivopavezaH siddhaM tasmAdAsanaM prAk prazastam || 8-11 ||

vyomAmbujAdatho bindorhRdayAdvArkamaNDalAt |
yat tattvamAnayItAasmin tadAvAhanasaMjJitam || 8-12 ||

svata evAbhipUrNasya tattvasyehArcanAdiSu |
sAdaraM saMmukhIbhAvastadAvAhanamiSyate || 8-13 ||

puSpairaJjalimApUrya hRdayAdisthitaM vibhum |
sauSunnamArgeNAdAya bindorabhyuditaM smaran || 8-14 ||

tAvaduccArayenmantraM yAvanniSkalagocaram |
tasmAdAdAya visrabdhaH sthiradhIH purataH sthite || 8-15 ||

bimbe vA sthaNDile vApi nyasedAvAhanaM tu tat |
AvAhanAGgabhUtAni sthApanaM sannidhApanam || 8-16 ||

saMnnirodhAmRtIkArAvavakuNThanameva ca |
sAkArasyeSTadevasya pUjArthaM kalpitAsane || 8-17 ||

upavezanamuddiSTaM sthApanaM nAma bhaktitaH |
AkarmakANDaparyantaM sannidhyaH daivatasya tu || 8-18 ||

avicchedena pUjAyAM sannirodhaH sa kathyate |
avibhinnasvabhAvAnAM yadabhinnaM  prayojanam || 8-19 ||

aGgAnAmaGginA sArdhamamRtIkaraNaM  hi tat |
AnandAyatanaM tattvaM saccidAnandavigraham || 8-20 ||

tadetanmUrtagaM dhyeyaM yat tat syAdavakuNThanam |
avakuNThanavat tejo rucirAGgapravardhanam || 8-21 ||

lAvaNyAmRtapUrADhyaM yattaduktaM prarocanam |
pUjAM prayujyamAnAM tu gRhItvAnugrahAdikam || 8-22 ||

kartuM sAmarthyamasyAsti yat tat syAt saMnidhApanam |

AsanAvahAnAdhikAraH 

arghyaM nAmArhaNaM proktaM tadarhAyAgatAya yat || 8-23 ||

kalpitaM dIyate tat tadvidhAnAdarcanAdiSu |
taccAsya trividhaM jJeyaM zaivaM zAktaM ca vaiSNavam || 8-24 ||

zaivamarghyaM SaDaGgaM cApyaSTAGgaM ca dvidhA bhavet |
gandhapuSpAkSatakuzA dUvArgraM ca tathodakam || 8-25 ||

bhojendrabrahmazambhUktaM SaDaGgArghyamudAhRdam |
kuzAkSatatilA dUrvA gandhaH puSpaM yavAstathA || 8-26 ||

kSIraM cASTAGgamarghyAmbhaH zaivaM syAd vijayoditam |
gandhapuSpAkSatayavAH kuzadUrvAgrasarSapAH || 8-27 ||

ApazcetyaSTabhirdravyaiH zAktamarghyamudIritam |
siddhArthAkSatadarbhAgragandhapuSpayavAH phalam || 8-28 ||

tilAzcetyaSTabhiryuktamambho'rghyaM vaiSNavaM smRtam |
hairaNyaM rAjataM tAmramalAbhe vAtha dAravam || 8-29 ||

pAtraM trikuDuvaiH pUrNamarghye zaGkhastu vA bhavet |
ApUryArghyaM tu mUlAGgairabhimantryAmRtIkRtam || 8-30 ||

dhyAtvA tu sakalopAdhivigrahaM saMmukhaM vibhum |
paramAmRtaniHSyandadhavalIkRtadiGmukham || 8-31 ||

samutkSipya vizeSArghyabhAjanaM vAmapANinA |
pazcAnnivedayedarghyaM dakSiNena kareNa tu || 8-32 ||

arghyavidhiH |

pAdyaM tu sarvasAmAnyaM dUrvAzyAmAkapaGkajaiH |
lakSmyAmbhasA samApUrya pAdyaM dadyAt tu pAdayoH || 8-33 ||

sajAtIphalatakkolalavaGkaM zItalaM jalam |
prapaJcAdiSu yat proktaM sAmAnyAcamanIyakam || 8-34 ||

dadhimadhvAjyadugdhAmbhAMsyekIkRtya vidhAya tu |
sahemaM kAMsyapAtreNa kUrcAbhyAM parigRhya ca || 8-35 ||

madhuparkaM tu tad dadyAt sAmAnyaM tacca mantrataH |

na nityayajaneSviSTaM madhuparkanivedanam |
naimittikeSu tacchastaM pratiSThAsnApanAadiSu ||

iti pauSkare |

punarAcamanIye ca zastamambhaH sugandhi ca || 8-36 ||

namaH svadhA tathA svAhA vaSaDjAtiyujA hRdA |
arghyAdikacatuSkaM tu dadyAdevaM yathAkramam || 8-37 ||

arghyasya trINi pAtrANi pAdyasyApi trayaM bhavet |
SaDAcamanapAtrANi tathaikaM madhuparkake || 8-38 ||

arghyamAdau tathA snAne pUjAnte ca pradIyate |
Adau snAne vibhUSAnte pAdyaM kAleSu vai triSu || 8-39 ||

pAdyAnte madhuparkAnte snAnAdyantAmbarAdiSu |
nivedyAnte ca SaTsveSu dadyAdAcamanIyakam || 8-40 ||

dhUpe dIpe ca naivedye tAmbUlaM vA phalAdikam |
nivedyAcamanaM  dattvA kartavyaM karma cottaram || 8-41 ||

prathamAcamanIyAnte madhuparkaM pradAya tu |
sakRdAcamanaM dattvA tato gandhAdinArcayet || 8-42 ||

pAdyAcamanamadhuparkAdhikAraH |

apanIya tu nirmAlyaM gandhapuSpAdinArcayet |
mUrdhni dUrvAkSatAn dattvA tataH snAnaM samArabhet || 8-43 ||

ni(rmatsa?majja)naM tu devasya prathamaM kArayet tataH |
sugandhatailenAbhyajya tathA tailApanuttaye || 8-44 ||

yavagodhUmamASAdicUrNairudvartayedapi |
ISaduSNAmbuzItAdbhiH sekAllepApanodanam || 8-45 ||

samUlAGgamanornyAsaH puSpadhUpasamarpaNam |
phalApUpAdinaivedyaM gItavAdyAdimaGgalam || 8-46 ||

paJcagavyAmRtasnAnaM punarlepApanodanam |
gandhAmalakahAridrakuGkumodvartanAni ca || 8-47 ||

mUlAGgavaidikairmantraiH sugandhAmbhobhiSecanam |
yathopapattikalazairabhiSekazca saMbhavet || 8-48 ||

mAGgalyapiSTadIpAdyairnIrAjanavidhistathA |
vizuddhavAsasA bimbasthitatoyApamArjanam || 8-49 ||

hemapuSpAdinA zazvadazUnyaM mastakaM yathA |
itthaM hi viMzatyaGgaM tu snAnaM sAmAnyamIritam || 8-50 ||

eteSAM yadalabhyaM syAnmanasA tat prakalpayet |

snAnAdhikAraH 

tato vAsAMsi zuddhAni sUkSmANyabhinavAni tu || 8-51 ||

dukUlapaTTakArpAsadevAGgAdIni yAni ha |
anyatrAnupayuktAni vikezAnyahatAni ca || 8-52 ||

bhaktyA yathopapannAni zastAnyatra pradApayet |
bhUSaNAni ca haimAni nAnAratnojjvalAni tu || 8-53 ||

pAdAdyAkezayogyAni yathAvibhavasArataH |
alAbhe manasA vApi taM tu samyag vibhUSayet || 8-54 ||

darpaNaM nirmalaM cAtra sthApayet purataH prabhoH ||

vastrabhUSaNavidhiH |

gandhazca trividho jJeyaH zaivaH zAktazca vaiSNavaH || 8-55 ||

candanaM kuGkumaM kuSThaM dalozIraM tathAgaru |
karpUraM hiriberaM ca zaivaM gandhaM pracakSate || 8-56 ||

candanAgarukarpUramAMsIkuGkumarocanAH |
kaccoravAnarAbhyAM ca zAkto gandha udAhRtAH || 8-57 ||

candanozIratoyAhvairmAMsIkuSThaM murAgarU |
kuGkumaM ceti vai gandhamaSTAGgaM vaiSNavaM viduH || 8-58 ||

puSpANi caiva kathyante prAgvacchaivAdibhedataH |
tAnyAgneyAni saumyAni saumyAgneyAni ca tridhA || 8-59 ||

sAttvikAnIha zuklAni rAjasAnyaruNAni tu |
kRSNAni tAmasAni syuH pItaM rAjasasAttvikam || 8-60 ||

zyAmaM tamorajomizraM patreSvapyevameva hi |
sAttvikAdyaistu kusumaiH phalaM syAt sAttvikAdikam || 8-61 ||

zvetArkaM karavIrakaM ca kamalaM durdhUrakAra *?dhe
rAjArkaM ca sitAmbujaM ca tulasIsAzokasaccampakaiH |
kalhAraM bakapATale vakulakaM dve mallike mAlatI-
pAlAzasthalapadmadarbhadama(ne? nai) rmArgacchadaM dUrvayA || 8-62 ||

tadvad granthizamIbRhanmaruvakaiH punnAganAgAsanai-
rnandyAvartatamAlakubjavijayAmandArakAzmIrakaiH |
zastAnyutpalakarNikArakusumaiH kAdambabailvAnyatho
nIlaM cotpalamityamUni kusumAnyuktAni zaivAnyalam || 8-63 ||

zaste dve tulasI sitAmbujamatho raktAbjapAlAzake
jAtIkubjakamAdhavIdamanakaiH punnAganAgAsanaiH |
nandyAvartazamIsthalAbjavijayAsanmallikAcampakai-
rbilvaM cotpalaketakAdyabhinavaM kundaM tathA pATalam || 8-64 ||

lakSmIdevisahAH sabhRGgamusalIbhItendravallyastathA 
bhadrA zrIpatilaGghitA ca dazamI dUrvAtha jambUcchadam |
kalhAraM karavIramekadalakaM padmaM kuzAH kairavaM 
raktaM ceti vilomato'dhikaphalaM puSpaM bhaved vaiSNavam || 8-65 ||

ambhojotpalabandhujIvavijayAH punnAganAgAnyatho 
jAtIkundakaraNDacampakajapAyUthIramApATalaiH |
bilvAzokahayArikubjadamanairmandAradUrvAdalai-
rnandyAhvApyaparAjiteti kusumAnyuktAni zAktAmyalam || 8-66 ||

nirgandhAni tathogragandhakaTukAnyaspRzyaduSTAni cA-
pyanyAyopahRtAni vA nakhakRmIcihnAni tunnAni vA |
UrNAsUtraziroruhAdyupagatairmlAyatpurANAni vA 
kAlAtItavilaGghitAni ca tathA puSpANyatho varjayet || 8-67 ||

tredhA coditapuSpajAtiSu na ceduktAni varjyAni tAnya-
nyonyapratiSedhadarzanamapi syAd yatra coktaM vinA |
anyasmai parikalpitAni ca tathA varjyAni tad yuktito
yadyasyAtra vizeSatastu vihitaM taddaivataM toSayet || 8-78 ||

sUryAgnyostrividhaistathaiva kusumairiSTaM hi vighnezituH
zAktAnyapyatha zAmbhavAni ca tathA skandAryacaNDAdiSu |
zAktAnyeva manojavAggirisutAdurgASTamAtRpriyA-
NyambhojAsanadevarAjakamalAH pUjyAstathA vaiSNavaiH || 8-69 ||

nandyAvartairardharAtre ca kAlye prAg rAtreH syAnmAlatImallikAbhiH |
ahvyevAbjairutpalaiH sarvadA vA haimaiH prAtaH kesarairardharAtre || 8-70 ||

A vaivarNyAt kesarANAM sarojaM bailvaM patraM dAmanaM ca trirAtram |
pUjAyogyaM kArNikAraM tu pakSaM na syAjjIrNaM mAsaSaTkaM bakAkhyam || 8-71 ||

puSpAdhikAraH

dhUpadravyeSu sarveSu zreSThaH kRSNAgarurbhavet |
karpUramadhikazreSThamagarUpahitaM tathA || 8-72 ||

gugguluzca tathozIracandane madhyame smRte |
zrIvAsasarjAvadhamau tadvallAkSA dhRtaM madhu || 8-73 ||

sarvairetaiH sitopetairdhUpa ukto dazAGgikaH |
nirdhUmasphuradaGgAre nirjvAle ca nirindhane || 8-74 ||

dhUpaM dadyAdadhaH kiJcid ghaNTAM vAmena vAdayet |
vizuddhasitasUtreNa syurvarttyo vAtha tUlajAH || 8-75 ||

dIpArthaM goghRtaM mukhyaM madhyAntye tailamAhiSe |
sakarpUradazo dIpaH phalaM dadyAcchatAdhikam || 8-76 ||

dIpaH kevalakarpUraH sahasraguNa ucyate |
prabhUtasnehasaMpUrNairdazabhirvA navASTakaiH || 8-77 ||

dIpaiH pratinavairArAd bhrAmyamArAtrikaM bhavet |
na dagdhazeSavartyA tu punardIpaM pravartayet || 8-78 ||

nocchiSTAzucitailAdyairnAnyatailaghRtAdinA |

dhUpadIpavidhiH |

vrIheH paJcazataM talaM dviguNitaM te dve prakuJcaM smRtaM
te dve'tha prasaraM tathaiva kuDubaM prasthArdhakaM taddvayam |
prasthaM pAtramathADhakaM zivamatho droNaM ca khAriH kramAt
khArINAM tritayaM hi bhAra udito mAnaM yathAzAstrataH || 8-79 ||

nityaM naimittikaM ceti naivedyaM dvividhaM matam |
taccottamottamAdyaM tu navabhedena vakSyate || 8-80 ||

taNDulAH zAlijAH zastAH kalamA rAjazAlijAH |
nIvArajAstvatho madhyA vrIhijA vaiNavAstathA || 8-81 ||

priyaGguyavagodhUmazyAmAkAstvadhamAH kramAt |
taNDulebhyo'STamAMzAH syurupadaMzAstathA dadhi || 8-82 ||

dvAtriMzadaMzamAjyaM syAccharkarAmadhunI tathA |
tatra nityavidheraSTadroNazAlijataNDulaiH || 8-83 ||

sArdharAtraM catuSkAlaM pUjAyAM vinivedayet |
pAyasaM kRsaraM gaulamannaM tacca caturvidham || 8-84 ||

yathocitopadaMzAjyadadhyapUparasottaram |
sagItanRttavAditraM sabhUtabalimaGgalam || 8-85 ||

tatra paJcazataM dIpAstvevaM syAduttamottamam |
SaDbhirdroNaizcatuSkAlamabhyarcya vinivedayet || 8-86 ||

sahomaM dvizataM dIpAH syurgItabalinartanaiH |
kuryAt pUrvAnusAreNa tat syAduttamamadhyamam || 8-87 ||

paJcadroNaizcatuSkAlaM nivedyaM pUjanaM tathA |
aSTottarazataM dIpairgItavAdyabalikriyAH || 8-88 ||

agnikAryaM ca kurvIta syAdevaM tUttamAdhamam |
sacaturdroNanaivedyaM catuSkAlocitArcanam || 8-89 ||

gItAdyaM balihomau ca pradIpAH syuzca saptatiH |
madhyamottamamevaM syAnmadhyamadhyemathocyate || 8-90 ||

bhArArdhataNDulaiH prAgvannaivedyaM cArcanAdikam |
madhyAhna eva homaH syAd dvikAlaM nartanAdikam || 8-91 ||

catvAriMzat pradIpAH syurmadhyamadhye balistathA |
khAritaNDulanaivedyaM catuSkAlArcanA baliH || 8-92 ||

homo dvAdaza dIpAH syurgItAdyaM madhyamAdhamam |

sAyaMprAtastvADhakAbhyAM zivaM tanmadhyAhne syAdahni vedapradIpAH |
rAtrAvaSTau syustrikAlaM ca pUjA paJcAtodyaiH syAt kaniSThottamAkhye || 8-93 ||

prAtaH pAtraM sAyamapyatra pAtraM syAnmadhyAhne tvADhakaM cAhni dIpau |
tatvAro vai rAtridIpAstrikAlaM pUjetyuktaM madhyamaM yat kaniSThe || 8-94 ||

sAyaMprAtaH pratiprasthadvayanaivedyamarcanam || 8-95 ||

dIpo'hni nizi dIpAvityuktaM syAdadhamAdhamam |

nityanaivedyaprakaraNam |

aSTadroNaM samArabhya yAvad dvAdazabhArakam || 8-96 ||

naimittikaM syAnaivedyaM navadhAtrApi pUrvavat |
uttamottamapUrvaM tu pUjAM caivaM samUhayet || 8-97 ||

syAt kAmyamapi naivedyaM yAvad vA prArthitaM bhavet |
na kAlaniyamastatra sAGgaM pUjA prazasyate || 8-98 ||

naimittikakAmyavidhiH |

kSIraM tribhAgaM bhAgastu taNDulAH pAyasasya tu |
kSIrAjyataNDulatilAH samAH syuH kRsarAnnake || 8-99 ||

bhinnamudgaiH zubhAstaNDulAH syuH samAstasya cArdhaM ghRtaM syAd ghRtArdhaM gulam |
taNDulebhyastathA yopayaH SaDguNaM syAd gulAnnaM tu tad yuktarambhAphalam || 8-100 ||

dhautadantA dvijAH snAtazuklAmbarA vajrapUtairjalairmauninastaNDulAn |
kSAlayeyustathA saptakRtvo'GgakairjvAlayeyustathAgniM dhavitrAdinA || 8-101 ||

dhyAtvA culliM zaktimagniM ca rudraM vahnerbIjAt tArakAd vAbhipUjya |
tasminnagnau taddhaviH sAdhayeyuroGkArAjyaM cAbhidhAryAhareyuH || 8-102 ||

bRhatyaH kadalyastathA kuNDahAlyaH sakUzmANDamuktaM bhavet karkarI ca |
tathA kAravellaM ca cUtArdrakAkhye bRhanmudgamudgAstathA nAlikeram || 8-103 ||

sazimbAzca mASAstathA cidbhaTAkhyaH kulasthAzca zastAH prakRSTopadaMzAH |
kadalyAdipakvaiH sitApyoSaloNairyutaH syAd yavAnIdadhikvAthasUpaH || 8-104 ||

tathA modakAMzcopadaMzAMzca kuryAd ghRtavyoSaloNairyavAnISTapiSTaiH |
tataH pAtravargaM bahiH zodhayitvA sazaGkhadhvajacchatramutthApayecca || 8-105 ||

hiraNyAdyamantraM hRdA dhautamadbhiH kadalyAdipatrANi vAtrAbhighArya |
havistatra dattvA yutaM copadaMzaiH kadalyAdipakvaiH phalairmodakaizca || 8-106 ||

sitAkSaudradugdhe'tha dadhnA tu gavyaM ghRtaM cArugandhaM navaM rAgabhAgam |
nivedyAt pradeyaM tu puSpArpite'smiMstato dhenumudrAmRtaiH plAvayitvA || 8-107 ||

samprokSya mUlamantreNa dattvAmbho'gnipriyAntikam |
sapuSpadakSiNakaro haviH spRSTvA nivedayet || 8-108 ||

dhyAyet tanmanasA divyamannAjyaM tRptikArakam |
pAnIyaM ca nivedyAsmai hRdyaM zItaM sugandhi ca || 8-109 ||

bahirnirgatya taccheSamannaM hutvAnale'pi ca |
mUlAGgAdividhAnena tattanmantreNa sAdhakaH || 8-110 ||

tatra kiJcid baliM dattvA vahniM bhaktyA kSamApayet |
pradakSiNanamaskArastutibhiH saMprasAdayet || 8-111 ||

prakSAlya caraNau samyagAcAnto'ntaH pravizya tu |
sutRptaM daivataM smRtvA dadyAdAcamanIyakam || 8-112 ||

tato lavaGkakarpUratakkolakramukAnvitam |
nivedayecca tAmbUlaM gandhapuSpArcitaM tataH || 8-113 ||

dhUpayitvA namaskRtya japenmUlaM tu zaktitaH ||

naivedyAdhikAraH |

aGgAni caiva parivAragaNAMzca sarvAn paJcopacAravidhinA tu yathopapattyA |
saMpUjayedanupapannamihArcaneyaM tatkalpayecca manasaiva samahitAtmA || 8-114 ||

atropacArabhedena pUjAbhedAMstathApare || 8-115 ||

vadanti tAMzca vakSyAmaH kiJcidbhedAt puroditAt |
dazopacArAH kathitA nivedyAnte tu pUjane || 8-116 ||

homAntake tu kathitA hyupacArAstu SoDaza |
balyante cApi te khyAtAH paJcaviMzatisaMkhyayA || 8-117 ||

nRttAnte cApi SaTtriMzadupacArAH prakIrtitAH |
uttamottamapUjAyAmuttame vA bhavantyuta || 8-118 ||

AsanAvAhanArghyANi pAdyamAcamanIyakam |
sAGgaM snAnaM tathA vastramupavItaM ca bhUSaNam || 8-119 ||

aJjanaM gandhapuSpe ca dhUpo dIpazca darpaNam |
nIrAjanaM ca naivedyamagnikAryaM pradakSiNam || 8-120 ||

namaskAraH stutirvAdyagIte nityabalistathA |
pUjAsamarpaNaM ceti paJcaviMzaticoditA || 8-121 ||

athAsanAdayaH paJca paJcagavyAbhiSecanam |
dugdhena dadhnA cAjyena madhunakSurasana ca || 8-122 ||

abhiSekastu tatsnAnaM cakravartyupacArataH |
vastropavItAbharaNAnyaJjanaM gandhapuSpake || 8-123 ||

dhUpadIpau ca mukuraM nIrAjanavidhistataH |
mudrANAM darzanaM tadvannaivedyaM pustakArcanam || 8-124 ||

homakarma ca tAmbulaM pAduke cAmaradhvajau |
chatraM ca nityayAtrA ca balidAnamataH param || 8-125 ||

pradakSiNanamaskArastotrANyAtodyameva ca |
gItaM nRttaM ca pUjAdeH samarpaNamataH param || 8-126 ||

SaTtriMzadupacArAH syurevamuktAH kramAt kvacit |
vyatyastakramato vA syustattattantroditAstvamI || 8-127 ||

trividhopacArAdhikAraH |

baliyAtrotsavAH zastAH sthiraliGgAdipUjane |
na calasthaNDilavidhau maNDalakSaNikAdiSu || 8-128 ||

iti nigaditamArgAstUpacArAH pradiSTAH
pRthagiha paripATyA tantrabhedeSu dRSTAH |
vividhamanusurANAM ye ca sAmAnyakalpAH
svabhimataphalasiddhiH sAdhakAnAM yathA syAt || 8-129 ||

iti zrImadIzAnagurudevapaddhatau tantrasAre upacArapaTalo'STamaH ||

atha navamaH paTalaH

athocyate naityakamatra karma sAmAnyataH siddhikaraM manUnAm |
samastavarNAzramaliGgabhAjAmAvazyakaM yat karaNIyamekam || 9-1 ||

prabhAvatISveva hi tArakAsu kaulaM tu sUryodayadarzanAt prAk |
vadanti sandhyAM munayaH prabhAtAM tasyAM vinidraH zayanaM ca jahyAt || 9-2 ||

atra pitAmahaH: -

nakSatrajyotirArabhya A sUryodayadarzanAt |
prAtaHsandhyeti tAM prAhurmunayo vedapAragAH || iti |

smaran hRdambhoruhakoTarasthaM zaivaM paraM jyotirathAtmasaMjJam |
vrajet samutthAya dizaM vizuddhAmambhaH prabhUtaM sulabhaM ca yasyAm || 9-3 ||

atra smRtiH: -

nivItaM dakSiNe karNe samAsajyAmbareNa tu |
avakuNThya ziro maunI malotsargamathAcaret || iti |

vidUrato mArgajalAzayAdezchanne tRNairbhUmitale nivItI |
udaGmukho yAmyamukho'hni rAtrau tyaktvA malaM cAtha gRhItaziznaH || 9-4 ||

jalAntikaM prApya mRdaM vizuddhAmAdaya cASTAGgulakhAtalabdhAm |
nidhAya tAM dakSiNato dhRtAbhiradbhistu zaucaM vidhivat prakuryAt || 9-5 ||

ekaiva liGge karayostu tisrastathA gude paJca mRdaH prayojyAH |
vAme kare sapta dazaiva pANyoH kaniSThakalpaM khalu zaucametat || 9-6 ||

dve cApi liGge karayozcatasro gude daza syurdaza vAmapANau |
hastadvaye dvAdaza ceti mRtsnAH zauceSvayaM madhyavidhiH pradiSTaH || 9-7 ||

tisro'tha liGge karayozca paJca tripaJcasaMkhyAstu gude mRdaH syuH |
vAme kare dvAdaza tatprasaMkhyAH pANyorayaM zaucavidhirhi mukhyaH || 9-8 ||

utthAya vAsaH paridhAya samyagAjAnusandhezcaraNau karau ca |
prakSAlya mRtsnAsalilairvizuddhairvaktraM ca gaNDUSajalairvizodhya || 9-9 ||

plakSAmrajambUkakubhAzvakarNamAlUrakAzokalavaGkajAdyam |
vaikaGakatodumbaracampakaM vA zastaM bubhukSoH khalu dantakASTham || 9-10 ||

svairaGgulairdvAdazabhirmitaM tatkaniSThikAnAhasamaM savalkam |
pUrvAmukho'dyAdupavizya maunI pradakSiNaM vAmaradAdadhaH prAk || 9-11 ||

mokSArthinAM kaNTakinastu zastAstadvacchirISArjunanaktamAlaH |
zasto hyapAmArga itIha teSAmaSTAGgulaM dantavizodhanaM tat || 9-12 ||

p. 82) sanimbadhAtrIdhavazeluzigruvAnIrakairaNDatRNaiH kuzairvA |
sthitaH prajalpan zayito'thavAdyAt tailAvasikto'pi na dantakASTham || 9-13 ||

nopoSitaH pAraNapUrvakAlaM na janmabhe parvaNi nAsitAhe |
nApyaSTamIzrAddhadineSu dantAn pradhAvayedaGgulibhirnakhairvA || 9-14 ||

apica sArdhatrizatikAyAmatra kAlottare -

pratipatparvaSaSThISu navamyAmapi vA guha! |
dantAnAM kASThasaMyoge mahAn doSo'bhidhIyate || it |

tadvat tu jihvAmapi mArjayitvA taddantakASThAdi visRjya dUre |
gaNDUSakadvAdazakena pazcAdAcamya tu snAnamupakramet || 9-15 ||

saritsu gaGgAdiSu mukhyamukhyaM tIrtheSu cAnyAsu nadISu mukhyam |
sarastaTAkAdiSu madhyamaM syAt snAnaM tu kUpeSu gRheSu nIcam || 9-16 ||

snAyAt tu kUpAdiSu zuddhapAtraiH snAtairdvijaireva samAhRtAdbhiH |
snAyAt tu noSNAmbhasi karmayogyaM naitad yato rogiSu sammataM tat || 9-17 ||

bhuvamaSTAGgulAM khAtvA tyaktvAdho mRdamasnataH |
khAtAM mRdaM samAdAya tat khAtaM paripUrya ca || 9-18 ||

zirasA payasastIre dhaute saMsthApya tAM punaH |
zikhayA zodhayitvA tu varmaNA vibhajet tridhA || 9-19 ||

liptvaikabhAgamA nAbheH prakSAlyAcamya vAgyataH |
dvitIyenAsnayuktena dIptenAGgAni lepayet || 9-20 ||

dvijazceduddhRtAsIti mantreNa prArthayed bhuvam |
itaro vakSyamANena * * * * * * * * || 9-21 ||

dhAraNaM poSaNaM tvatto bhUtAnAM devi! sarvadA! ||
tena satyena mAM pApaM pApAnmocaya dhAriNi! || it |

* * * * *  * * * tato'kSANi nirudhya tu |
prANAnAyamya salile nimajjyAsnamanusmaran || 9-22 ||

kAlAnalapratIkAzamathopataTamambhasi |
upaviSTo hyanudite sUrye sandhyAM bhajed dvijaH || 9-23 ||

brAhmIM pUrvaM tato'strAkhyAM mantrasandhyAM tathetaraH |
upAsyordhvaM jalaM kSiptvA vidhisnAnaM samAcaret || 9-24 ||

svamantrasannaddhatanuH smRtvAtmAnaM hRdambuje |
tRtIyaM pUrvamRdbhAgamAdAyAnAbhi vAriNi || 9-25 ||

sthitvA vAmakare kRtvA tridhA tAM vibhajet punaH |
dakSiNaM bhAgamastreNa prAk svamUlena tUttaram || 9-26 ||

aGgamantreNAbhimantrya gRhItvAstreNa dakSiNam |
huMphaDantena rakSAyai dazadikSu kSipet sudhIH || 9-27 ||

mUlAbhyastena pUrveNa jale dakSiNapANinA |
nikSipya bhrAmayed vAri zivatIrthamanusmaran || 9-28 ||

aGgAbhyastArkadIptena ziSTabhAgena vigraham |
sarvamAlipya tattIrthaM svanAmnAvAhya pUjayet || 9-29 ||

gandhapuSpairyathAlAbhaM manasA vA samAhitaH |
mukhyanadyabdhitIrtheSu nAnyatIrthAni kIrtayet || 9-30 ||

kIrtanAnniSphalaM tat syAt krudhyeccAto na kIrtayet |
kevalAmbhassu gaGgAditIrthAnAM kIrtanaM smRtam || 9-31 ||

tattatphalapradaM tasmAt tatra tIrthAni kIrtayet |
tataH prANAn samAyamya trirnimajjya samAhitaH || 9-32 ||

nimagna eva sAGgaM svaM mUlaM zaktyA japeddhRdA |

apica dvijazcet -

hiraNyazRGgaM varuNaM prapadya ityathAditaH sUktamudIrayan hRdA |
nimagna evAmbhasi zaktito'khilAn haratyaghaughAnaghamarSaNe sthitaH || 9-33 ||

yathA jalaughe lavaNasya saJcayaH prayAti sadyo vilayaM mahAnapi |
tathA mahAnapyaghamarSaNeM'hasAM cayo'pi nAzaM vrajatIti nizcayaH || 9-34 ||

tataH sthito vAriNi vAmadakSiNau karau zazAGkArkazivadvayAtmakau |
vibhAvya mUlena ca kumbhamudrayA zirasyathAGgairapi vAbhiSecayet || 9-35 ||

dvijastu sUktaiH pavamAnapUruSazriyAM yathAzaktyabhiSicya tajjalAt |
taTaM gataH sve paridhAya vAsasI vizuddhazukle kSatidoSavarjite || 9-36 ||

snAto nAGgAni nirmRjyAt pANinA vArdravAsasA || 9-37 ||

tathA nekSeta pASaNDipAtakizvAntyajAzucIn |
citiM ca citikASThaM ca yUpaM caNDAlameva ca || 9-38 ||

spRSTvA devalakaM cApi sacelo jalamAvizet |
naimittikeSu kRtyeSu grahaNendukSayAdiSu || 9-39 ||

ayanadvayatIrthAdau sacelaH snAtumarhati |
sandhyAsu vamane zuklaviNmUtrocchiSTakuSThinAm || 9-40 ||

saMparke vapane cAbdheH sparzane cApyaparvaNi |
vRSalapratilomAnAM mArjArasparzane'pi ca || 9-41 ||

zmazrukarmaNi cottIrya nadIM vAruNamAcaret |
dAnAdau snAnajapyAdau tarpaNe havane'pi vA || 9-42 ||

sarvatra sapavitraH syAdanyathA syAt tadAsuram |
yadvA muktazikho nagnaH pralapan vAvakuNThitaH || 9-43 ||

karoti kRtyaM daivAdyaM sarvaM vidyAt tadAsuram |
pAdaprakSAlane mRt syAt sakRt pANyozca sarvadA || 9-44 ||

snAnAdisarvakRtyAdau bhojanAdau ca saMvizet |
mUtrAdizaucasyAnte ca hastapAdau pradhAvayet || 9-45 ||

athAcamanakalpo'tra sAmAnyasmRticoditaH |
kathyate vaidikI sandhyA tathAstrAkhyA ca tAntrikI || 9-46 ||

aGgulyagre daivamaGguSThamUle brAhmaM tIrthaM parvasandhiSvathArSam |
prAjApatyaM syAt kaniSThAmatho'tha pitryaM tarjAmUladeze dvijAnAm || 9-47 ||

haste tUktaM dakSiNe tattale syAdAgneyAkhyaM tIrthamanyatra saumyam |
daivAdyaM yat karma kuryAt svatIrthAdAcAmet tu brahmatIrthena toyaiH || 9-48 ||

jyeSThAgre'gnistarjanImUrdhni vAyurmadhyAgre'rko'nAmikAgre surendraH |
prajApatyA syAt kaniSTheti devairaGgulyaH syurdarkSiNe viprapANau || 9-49 ||

prAgvaktro vodaGmukhaH sopavIto baddhvA cUDAM jAnumadhyasthavAhuH |
toyotkSepI sUpaviSTo'tha maunI syAdAprahvastvekadhIrAcamiSyan || 9-50 ||

aduSTarasagandhAdyairakITAphenabudbudaiH |
anuSNairambubhiH zuddhairAcAmedabhivIkSitaiH || 9-51 ||

hRtkaNThAsyagatAH punanti vidhinaivApo dvijAtIn kramAt 
triH pItA vRSalastriyAvapi tathA kuNDAnulomAdikAn |
Acamya trirapastrivedapuruSAn prINAti nirmArSTi yad 
dviH sAtharvaSaDaGgayajJapuruSAH prItAH syurapyagnayaH || 9-52 ||

prINAtyarkamanAmikAnayanayoH sparzAt tathAGguSThayuk
sAGguSThA tvatha tarjanIsamamitA ghrANadvaye mArutAn |
aGguSThena kaniSThikAzravaNayorAzAzca nAbhervasU-
nAtmAnaM tu hRdoM'sayordivamRSIn mUrdhnaH samastAGgulaiH || 9-53 ||

AcamyetthaM dvirvizudhyeta sarveSUcchiSTeSu kSAlane pAdayozca |
kakSyAmokSe vA zikhAbandhamokSe niSThIvyAtho jRmbhikAyAM kSute ca || 9-54 ||

AtmavidyAzivaistattvairIzvarAyanamontakaiH |
apaH pibet trirabhyastAstacchaivAcamanaM smRtam || 9-55 ||

oSThAvastreNa saMsRjya khAni sarvAtmanA spRzet |
evaM sandhyAprasaGgena vAruNasnAnamIritam || 9-56 ||

vAruNasnAnAcamanAdhikAraH |

AgneyAdIni cAnyAni kuryAt snAnAni saMbhave || 9-57 ||

AgneyaM bhasmanA snAnaM nikhilAghanibaharNam |
svatejaH saMbhavenaiva yena snAtaH svayaM zivaH || 9-58 ||

snAnaM prAg vAruNaM kRtvA pazcAdAgneyamAcaret |
Apadyapi tathA zaktau dehasyAgneyameva vA || 9-59 ||

sandhyAtraye ca japyAdau caryA pUrvAvasAnayoH |
bhuktvA suptvAmbu pItvA vA kRtvApyAvazyakAdikam || 9-60 ||

striyaM vApyanulomAdIn spRSTvA vA mUSikAzucIn |
Acaret snAnamAgneyaM yathaivAtharvacoditam || 9-61 ||

devAgniguru(vidyA? vRddhA)nAM samIpe'ntyajadarzane |
azuddhabhUmau mArge vA sthito noddhUlayed budhaH || 9-62 ||

kalpAnukalpopakalpabhedAt tadvadakalpakam |
caturdhA bhasma zaivoktaM pUrvaM pUrvaM guNAdhikam || 9-63 ||

arogAyAH savatsAyA bhUmAvapatitaM tu goH |
gomayaM padmapAlAzapatrAdyanyatamena tu || 9-64 ||

gRhItvA tu vizuddhAtmA gAyatryA tu dvijo'paraH |
sAGgamUlena zaivAgnau kalpaM tadbhasma kIrtitam || 9-65 ||

AraNyagomayaM dUre grAmAdeH pUtamAharet |
prAgvacchivAgninA dagdhaM yattat syAdanukalpakam || 9-66 ||

agnidagdheSvaraNyeSu gRhItvA bhasma tat punaH |
gomUtrAbaddhapiNDaM tu vizodhyAtha zivAnale || 9-67 ||

dagdhaM bhasmopakalpaM syAdakalpakamathocyate |
viziSTavipragovATajAtaM vA devatAlayAt || 9-68 ||

gRhItvA sAdhitaM prAgvat tad bhasma syAdakalpakam |
caturvidhaM ca tad bhasma jAtisaGkaravarjitam || 9-69 ||

aparigrahamanyeSAM karmasparzAdyadUSitam |
zlakSNaM pUtamarogaM ca pAtrasthaM bhasitaM sitam || 9-70 ||

AgneyasnAnayogyaM syAd yathoktaM brahmazambhunA |
tadbhasma zivamantreNa zaktyAbhyastaM surakSitam || 9-71 ||

AdAya hastenAdhArAd dakSiNenAbhimantrya tu |
vizodhya dhAraNAbhistu bhUtazuddhividhAnataH || 9-72 ||

SaDaGgenAbhimantryAdau kRtvA vAmakare punaH |
kRtvAstreNa malasnAnaM mastakaprabhRti kramAt || 9-73 ||

tatastvIzAnapuruSAghoravAmaiH sasadyakaiH |
kramAnmUrdhAsyahRdguhyajaGghAntAzeSavigraham || 9-74 ||

uddhUlayed dvijo'nye tu lalATAMsahRdAdiSu |
dhArayeyustripuNDrANi tathaiva brAhmaNAdayaH || 9-75 ||

triyAyuSaM dhArayeyurvedaprAmANyadarzanAt |

triyAyuSaM jamadagneH kazyapasyAgastyasya triyAyuSamRSINAM tryAyuSaM yad devAnAM triyAyuSaM tanme'stu triyAyuSaM zivo nAmAsI" ti sruteH ||

AgneyasnAnAdhikAraH |

anabhre pratapatyarke vRSTiM dRSTvordhvabAhunA || 9-76 ||

mAhendrasnAnamIzAnAt kAryaM saptapadAvadhi |
gavAM khurapuTotkhAtareNubhiH pavanopagaiH || 9-77 ||

gomadhyagastatpuruSaM gosUktaM vA japan dvijaH |
anyastu gostutiM gobhyo namo vetyabhyudIrayan  || 9-78 ||

vAyavyamAcaret snAnamakhilAghanibarhaNam |
snAnAnAmiha sarveSAM mUlaM zreSThaM ca vAruNam || 9-79 ||

tasmAt prAg vAruNaM kRtvA tataH snAnAntaraM vrajet |
ApohiSThAdibhirmantrairmantrasnAnaM hi vaidikam || 9-80 ||

saMprokSaNavidhAnena svAGgamUlaistu tAntrikam |
itthamutthAnakAvazyazaucadantavizodhanaiH || 9-81 ||

snAnena ca vizuddhasya sandhyopAsanamiSyate |
dvijaH prAg vaidikIM sandhyAmupAsItAtha tAntrikIm || 9-82 ||

kSatravaizyAvapi tathaivAnye kevalatAntrikIm |
upAsIrannataH pUrvaM vaidikI likhyate'dhunA || 9-83 ||

pitAmahAdismRtyuktA tAntrikI cAgamoditA |
snAtasUktaprakAreNa kSAlitAGghrikaradvayaH || 9-84 ||

svAcAntaH sapavitrastanmantravat prokSayed dvijaH |
mantrANAM tadRSicchandodevatAviniyogavat || 9-85 ||

anuSThAnaM phalAya syAdanyathA cet tadAsuram |
dadhikrAviNNa ityAdervAmadevo hyRSiH smRtaH || 9-86 ||

chando'nuSTup tathaivApo vizvedevAzca daivatam |
anayA prokSayitvAtha mantritAmbhaH pibed dvijaH || 9-87 ||

sUryazcetyAdimantrasyacchando gAyatrameva hi |
savitA devatAgastyo hyRSiragnirbhavedapi || 9-88 ||

tena pItvApa Acamya prokSayedApyadaivataiH |
dadhikrAviNNa- AdyenApyApohiSThAdibhistathA || 9-89 ||

ApohiSThAdikAnAM tu sindhudvIpa RSiH smRtaH |
Apo vai devatA chando gAyatraM prokSaNe vidhiH || 9-90 ||

tato'JjaliM samApUrya toyaiH prAgvadanaH sthitaH |
dhyAyejjyotiH paraM brahma sarvalokahRdi sthitam || 9-91 ||

AdityamaNDalAntasthaM vidyAd dehAtmakaM puram |
tAravyAhRtisAvitryA kSipedUrdhvaM yathAzruti || 9-92 ||

tA Apo ghnanti rakSAMsi vajrIbhUtAH kSaNena tu |
tataH pradakSiNIkRtya samAcamya tu tAM japet || 9-93 ||

zuddhAyAM bhuvi vAgyatastvabhimukhaH sUryaM kuzesu sthito 
gAyatrIM dazatArakAM sazirasaM savyAhRtiM triH paThan |
prANAyAmaparo bhavejjapavidherAdau yathAzaktita-
stena syAt parizuddhakalmaSatanuryogyazca japyAdiSu || 9-94 ||

praNavasya munirbrahmA chando gAyatrameva ca |
dhyAnakAle paraM brahma homakAle hutAzanaH || 9-95 ||

japakAle trayI devo vizve'nyatra tu daivatam |
viniyogastu vedAdau vAcAmudghAta eva ca || 9-96 ||

gAyatryuSNiganuSTubhazca bRhatIM paGktiM satriSTubjaga-
tyAkhyA vyAhRtisaptakasya tu punazchandAMsi tAsAmRSIn |
atriM caiva bhRguM ca kutsamaparaM prAhurvasiSThaM tata-
stadvad gautamakAzyapAvapi punastatrAGgirAH saptamaH || 9-97 ||

agnirvAyuH sUryavAgIzvarAbhyAM yAdonAtho vAsavazcAtha vizve |
sapta khyAtA devatA vyAhRtInAM sthAnAnyAhuH sapta bhUrAdilokAn || 9-98 ||

vizvAmitrastvRSirdevaH savitA bhagavAn svayam |
chandastathaiva gAyatraM sAvitryAstattrayaM smaret || 9-99 ||

seyaM caturviMzativarNavedyA tripAjjape'STArNavibhAgataH syAt |
home ca pUjAviSaye catuSpAt svavarNaSaTkapravibhaktapAdA || 9-100 ||

omApojyotirityAdergAyatrIziraso muniH |
brahmAnuSTub bhavecchandaH paramAtmAdhidaivatam || 9-101 ||

prajApatistathA daivaM ziraso'ntasya vA bhavet |

AyAtvAdervAmadevo muniH syAcchando'nuSTub daivataM saiva devI |
gAyatrItthaM samyagAvAhya vidvAn mantreNAto darbhapANirjapet  tAm || 9-102 ||

SaTkukSiM tripadAM ca paJcazirasaM zuklAM sarojekSaNAM 
vahnyuddyotazikhAM ca vedajananIM bhUpAdapIThAmapi |
zakrapretapanIrapArthadaharitsvordhvAdharAzodarAM 
kroDIbhUtajagattrayAmabhimukhAM paurANanAbhiM smaret || 9-103 ||

zIkSA kalpo jyotiSaM zabdazAstraM mUrdhAno'syAH syurniruktaM ca paJca |
vAyuH prANo viSNurAtmA lalATaM brahmA rudrastacchikhA vAk ca jihvA || 9-104 ||

chandasAM tu vicitistanayugmAM dharmazAstrahRdayAM ghanakezIm |
nyAyavistaramujAmanalAsyAM candrasUryanayanAmuDuhArAm || 9-105 ||

mImAMsA (cA)tharvavedazca ceSTA vedAntaH syAnmAnasaM yogasAMkhye |
zrotre ghrANaM cApi mantrAstu yajJAH sarve cAsyAH svAGgakAntiprakarSaH || 9-106 ||

evaMrUpAM sarvadA sarvasiddhyai dhyAtvA devIM sAdhayet tAM japAdyaiH |
sandhyAbhedAd dhyeyabhedAM vizaSAt saMlikhyante japyasaMsiddhihetoH || 9-107 ||

haMsArUDhAM sitAbje tvaruNamaNilasadbhUSaNAM sASTanetrAM 
vedAsyAmakSamAlAM srucamatha kalazaM daNDamapyAdadhAnAm |
dhyAyed dorbhizcaturbhistribhuvanajananIM pUrvasandhyAbhivandyAM
sAvitrImRksavitrImabhinavavayasaM maNDale caNDarazmeH || 9-108 ||

tArkSyArUDhAmbujAkSI zatamakhamaNibhA zaGkhacakre dadhAnA |
dorbhiryuktA caturbhiH sthitiriha jagatAM yA yajUMSyudgirantI |
vyAlolAnekahAradyutirucirucirA vaiSNavI madhyame'hnaH 
sAvitrI dhyeyarUpA vilasati saviturmaNDale pItavasrA || 9-109 ||

paJcAsyAM piGgavidyuttatirucirajaTAmaNDalAM candramauliM 
raGgadbhUSAbhujaGgasphuTamaNikiraNavyaktabhasmAGgarAgAm |
dhyAyet khaTvAGgazUle bhayaharavarade vyAghracarmAmbarADhyAM 
sAvitrIM satrinetrAM pariNatavayasaM sAmasUtiM dadhAnAm || 9-110 ||

RSabhavAhanAmaparasandhyAyAM dhyAyediti yAvat 


itthaM sandhyAtraye tredhA sAvitrI dhyeyavigrahA || 9-111 ||

athAsyAH prativarNaM tu daivatAni bhavanti hi |
agniH prajApatiH soma IzAnaH sUrya eva ca || 9-112 ||

vRhaspatistathaivendro bhagazcaivAryamA tathA |
sAvitA ca tatastvaSTA pUSAthendrAnalau marut || 9-113 ||

Izvaro mitrAvaruNau skando vizve'tha cakrabhRt |
vasavo maruto'rthezazcAzvinau cA pitAmahaH || 9-114 ||

p. 91) tatkArAdyakSarANAM tu devatAH kramazo matAH |

puraiva sAmAnyatayAtra tArakaH prakAzito vyAhRtisaptakakramAt |
yathArthasaGgo vidhivannirucyate sabhUrbhuvaHsvarmahasAM janastapaH || 9-115 ||

tadeva satyaM saviturhi maNDale sthitaM tu tejaH khalu bhUrhi sattayA |
bhuvazca tatkAraNakAryasattayA suvo jagatsvIritamAtmavattayA || 9-116 ||

mahaH prakAzAtmatayA mahattayA janastathA sarvajanAntarAtmatA |
tamoharaM yat tapatItyatastapaH paraM hi tat satyamanantamucyate || 9-117 ||

praNavenAtha saMbandho vyAhRtInAmihocyate || 9-118 ||

bhuH syAdakArastu bhuvo hyukAraH svaH syAnmakAro'pi maho'tha binduH |
nAdo janaH syAt tapa eva zaktirnAdAntasaMjJaM padamatra satyam || 9-119 ||

athArthapratipattyarthaM sAvitryAstannirucyate |
taditi syAd dvitIyaikavacanaM brahmavAcakam || 9-120 ||

sUryamaNDalagaM tejastad brahma paramaM hi yat |
SaSThyantaH savituHzabdo dhAtoH prasavavAcakAt || 9-121 ||

vRSTezca prANijAtAnAM sAkSAt prasaviturvibhoH |
vareNyaM varaNIyatvAccaturvargaphalArthibhiH || 9-122 ||

prathamASTAkSarasyAsya vyApyA bhUrvyAhRtiH smRtA |
bhaktigamyaM bhaved bhargaH pApabhaJjanato'pi vA || 9-123 ||

devasyeti ca SaSThyantaM vRSTyAderdAturIzituH |
dIvyamAnasya vA dIptyA svaprakAzatayAthavA || 9-124 ||

tad dhImahi dhyaicintAyAMghAtoH siddhaM hi yat padam |
tejaH sUryAtmakaM jJeyaM cintayAmaH zivAtmakam || 9-125 ||

dvitIyASTAkSarasyAsya vyApyA syAd vyAhRtirbhuvaH |
dhiyo buddhIrmanorasya cchAndasatvamudIritam || 9-126 ||

kRtazca liGgavyatyAsaH sUtrAt suptiGgupagrahAt |
ya ityatra tu yat tejo naH SaSThI yuSmadasmadoH || 9-127 ||

tasmAdasmAkamityarthaH prArthanAyAM pracodayAt |
tRtIyASTAkSarasyApi vyAhRtiH svariti smRtA || 9-128 ||

itthaM jagatprasaviturvaraNIyamarthaM pApaprabhaJjanakaraM yadabhISTadasya |
tejastadekamamalaM pravicintayAmaH prajJAM prayacchatu sa no bhagavAn mahezaH || 9-129 ||

ityukto'rtho'tra sAvitryAstacchiraH kathyate'dhunA |
Apo jyotI rasa iti somAgnyosteja ucyate || 9-130 ||

tattejo hyamRtaM brahma sUrya Atmeti codanA |
evaM jJAtvArthatastvetAn nyasyed dehe yathAkramam || 9-131 ||

zirobhrUmadhyanayanavaktrakaNTheSvatho hRdi |
nAbhau ca guhyajAnvaGghridvaye cAsyAH padairnyaset || 9-132 ||

brahmA viSNuzca rudrazcApIzvaro'pi sadAzivaH |
ete sarvAtmane jAtiyuktAGgamanavaH kramAt || 9-133 ||

itthaM vinyasya gAyatrImRSyAdInabhivandya ca |
japedAyamya tu prANAnanantaphalabhAg bhavet || 9-134 ||

praNavAntaritaM saptavyAhRtipraNavaM punaH |
sAvitrIM zirasA yuktAM japecchataguNaM phalam || 9-135 ||

aSTottarasahasraM tu japedevamananyadhIH |
tadazaktau zataM vApi dazamAtramathApi vA || 9-136 ||

pUrvaH pUrvo'tra mukhyaH syAjjapazaktiM na hApayet |
athodvAsanamantrasya tUttamezikharetyRcaH || 9-137 ||

sAvitrI devatAnuSTub vAmadeva RSirmataH |
mitrasyetyAdyupasthAnamantrANAM kauzikasttvRSiH || 9-138 ||

mitrastu devatA chando gAyatraM cApyanuSTubhAt |
pradakSiNaM parikramya dizo'tha sadigIzvarAH || 9-139 ||

abhivandya tataH paJca sandhyAdyA devatAH kramAt |
sahasrarazmimudyantamupatiSThed divAkaram || 9-140 ||

AtmAnaM paramAtmAnaM dhyAtvA pAdAbhivAdanam |
kRtvAtha devapUjAM ca homajapyaM samAcaret || 9-141 ||

athAto viniyogAdyaM sAvitryAH kathyate'dhunA |

pratyAhAraH zastadeze tu lakSaM tiSThan yuktAtmA sUryabimbaM japitvA |
pazyan gavyAktaistAvadagnau tilaiH syAddhutvA bhaktazcenmantrasiddho mahAtmA || 9-142 ||

ayutaM tu jale sthito japitvA nanu pApAni nihanti nAbhimAtre |
prayutAdupapAtakAni lakSAdakhilAnyeva hi pAtakAni hanyAt || 9-143 ||

dazalakSajapena kaNThamAtre sumahApAtakino'psu yAnti zuddhim |
trisahasrajapAdabhojyadoSAt parizudhyedapi vAGmanaHkRtAghaiH || 9-144 ||

apahantyapamRtyurogaduHkhAnyayutAnAM tritayaM tilAjyahomAt |
madhuratrayasiktadaurvalakSatrayahomAdapahanti kAlamRtyum || 9-145 ||

putraM zAlihutena bilvakamalairlakSmIM palAzaiH pazU-
nannAdyaM saghRtAnnatastu kumudairvAsAMsi caivotpalaiH |
vRSTiM vetasajaiH sagomayazilAmAleyagorocanA-
kaptaM? lokavazIkaraM tu lilakaM spRSTaM sahasratrayam || 9-146 ||

pAdapAMsukRtaputtalihomAnmArayet paramatItya tu vipram |
dveSayecca kalivRkSasamidbhizcATayet tadanale kalipatraiH || 9-147 ||

kundapuSpahavanena kumArIM vindate'tha karavIrahutAt syuH |
siddhayaH sa khalu koTijapAt syAt khecaraH suramunIndrasametaH || 9-148 ||

juhuyAt pAyasenAjyatiladUrvAGkurairapi || 9-149 ||

catuH kSIrasamidbhizca pratyekaM trisahasrakam |
yattaduddizya tat sarvamacireNaiva sidhyati || 9-150 ||

juhuyAt pAyasAjyAbhyAM tiladUrvAGkurairapi |
pratyakSarasahasraM tu dIrghamAyuravAmuyAt || 9-151 ||

madhuratrayasiktaraktapadmairayutaM yo juhuyAcchriyaM sa vindet |
saghRtAnnahutAdathAnnavAn syAd vidhivadvahnimukhAdikaM ca kRtvA || 9-152 ||

AdhAya vahniM vidhivat sUryamAvAhya tanmukhe |
tamapyArAdhya vidhivat sAvitrIM taddhRtambuje || 9-153 ||

samAvAhya tu mantreNa dhyAyet sandhyoktalakSaNAm |
sapUjya gandhapuSpAdyairdvAdazAntAmRtAplutAm || 9-154 ||

svakRtyaM cApi saGkalpya juhvan sa labhate phalam |
atha mAdhyandinaM karma snAnapUrvaM samAcaret || 9-155 ||

snAnaM prAgvad vizeSo'tra vaidikaH kathyate'dhunA |
prAtaHsnAnamRte'nyatra snAsyan dantAn na dhAvayet || 9-156 ||

hiraNyazRGgamityAdi punantu punarantataH |
japennimajjyAthAcamya gRhItvAJjalinA jalam || 9-157 ||

sumitrAdyena santvantaM japitvAridizaM prati |
durmitrAdyena dviSmo'ntaM prakSipyAcamya vAgyataH || 9-158 ||

yadapAMkrUramityAdi gacchatAdantamambhasi |
trirAvartya kareNAtha nimajjyAmbhastaTaM gataH || 9-159 ||

upavizya tathAcamya pANisthAmbho'bhimantrya tu |
ApaH punantvityAdyena svAhAntaM tat pibet punaH || 9-160 ||

AcAmedasya carSiH syAd brahmaNaspatisaMjJitaH |
devatApyApa eva syAcchando'nuSTup prakIrtitA || 9-161 ||

ApohiSThAditisRbhiH prokSayed darbhapANinA |
hiraNyavarNAH zucayaH pavamAnaH suvarjanaH || 9-162 ||

ityAdimantraiH saMprokSya tato'mbhomagnavigrahaH |
RtaM ca satyaM cetyAdikharityantamRcAM trayam || 9-163 ||

prANAnAyamya manasA japet triraghamarSaNam |
zaktaH sa cedimAg/stadApovaruNapUrvakaiH || 9-164 ||

suvAno-indurityantamantraiH kRtvAghamarSaNam |
uttIrya vAso niSpIDyAthAmbare zucinirmale || 9-165 ||

paridhAyAtha saMkSAlya pAdAvAcamya vAgyataH |
santarpya pUrvasandhyAvat sAvitrIM zaktito japet || 9-166 ||

tiSThaMzcedIkSamANo'rkamAsInaH prAGmukho japet |
tataH puSpAJjaliM dadyAd bhAnave kevalAmbu vA || 9-167 ||

athordhvabAhurAdityamupatiSThedimAM japan |
udvayAdimudutyAdiM citraMtaccakSurAditaH || 9-168 ||

hiraNyayUpanAmA syAdRSirAsAM prakIrtitaH |
udutyAdidvayecchandastriSTup syAd daivataM raviH || 9-169 ||

gAyatrI syAt tRtIyAyAzcaturthyA jagatI matA |
uSNik taccakSurAdyasya mantrasya savitA vidhiH || 9-170 ||

brahmayajJaM tataH kuryAt svAdhyAyaH sa udIritaH |
brahmayajJottaraM kAlaM tarpaNasyAzvalAyanaH || 9-171 ||

prAhetareSAM tu mataM tUpasthAnAdanantaram |
sAGgamUlAdibhirmantraiH svAgamoktavidhAnataH || 9-172 ||

devAn RSIn pitRRMzcAnyAn tarpayeyurhi dIkSitAH |
snAnakAle'mbhasaH kSobhaM na kuryAccaraNAdibhiH || 9-173 ||

antarmalApanayanaM vastranirNejanAdi vA |
yadi kuryAt pramAdena prAyazcittamihocyate || 9-174 ||

namo'gnaye'psumate namodbyontaM japed dvijaH |
uapatiSThed dvijAtizceditaro'dbyo namo vadet || 9-175 ||

tato'nujJAM gRhItvAdbyistArthAnudvAsya daivataiH |
RSIn pitRRnapyudvAsya tato yAgagRhaM vrajet || 9-176 ||

tatreSTAM devatAmiSTvA svAgamAcAryadarzanAt |
tattanmantraM japeddhomavaizvadevabalikriyAH || 9-177 ||

samApyAtithipoSyAdIn bhojayitvA svazaktitaH |
svayaM bhuJjIta putrAdyaiH sahito'nnamakutsayan || 9-178 ||

bhuktvAnnagandhalepAdyamapanIya ca zodhayet |
dantAnatha samAcamya mukhavAsaM bhajedapi || 9-179 ||

tato vidyAvinodAdyairdinazeSaM sukhaM nayet |
athArdhAstamite bhAnau sandhyAmAsAdya pazcimAm || 9-180 ||

upAsIta yathApUrvaM dantadhAvanavarjitam |
snAtvAcamyAtha samprokSya pItvAmbho'gnizcamantrataH || 9-181 ||

UrdhvaM tvApastathA kSiptvA gAyatrIM zaktito japet |
imaMmevaruNAdyAbhirupasthAyAtha pUrvavat || 9-182 ||

gandhAdyairdevatAmiSTvA yathApUrvaM svazaktitaH |
japitvAtha namaskRtya vaizvadevabalikriyAH || 9-183 ||

samApyAtithibhUtyAdyaiH saha bhuJjIta ced gRhI |
zayIta zayane zuddhe svAstIrNe zuklavAsasA || 9-184 ||

govipradevavahnInAM nopariSTAnna saGkaTe |
nAnuvaMzaM zayItAsau nottarAparadikzirAH || 9-185 ||

na nagno nArdrapANyaGghrirna tailAkto na cAzuciH |
vitAnadIpakalazaiH zobhite vibhave sati || 9-186 ||

mantrasannaddhadehastu rakSAgandhAdyalaGkRtaH |
svapatnIM sAdhuzIlADhyAM svanuraktAM svalaGkRtAm || 9-187 ||

aparvasvabhigacchet tu gRhI santAnakAraNAt |

sandhyopAstiprasaGgAditi vidhivihitaM naityakaM karmacakraM 
zrautasmArteSu tantroditamapi kathitaM varNinAM yat samAsAt |
dRSTAdRSTeSTasiddhipradamiha munibhiH sevitaM ceti santaH 
svIkurvantu svakIyaM dhanamiva suhRdaH satpathe vartayantaH || 9-188 1/2 ||

iti zrImadIzAnagurudevapaddhatau tantrasAre nityakarmavidhirnAma navamaH paTalaH ||


atha dazamaH paTalaH 

praNamya zambhuM zazikhaNDazekharaM bhavaM bhavacchedakaraM samAsataH |
sabhUtazuddhikramamAtmazodhanaM nigadyate yogajapAdisiddhaye || 10-10-1 ||

snAto yathAvat samupAsya sandhyAM yAgAlayaM prApya kRtAGghrizaucaH |
Acamya cAntarvidhivat praviSTaH zastAsane vAgyamavAn niviSTaH || 10-10-2 ||

AmastakAGghridvayamAtmadehe dhyAyan susUkSmaM suSiraM tadantaH |
bAhye tu vinyasya tu zaktimacchAM vyomatviSaM tAmatha dehamadhye || 10-10-3 ||

hu