***************************************************************************
*
* cidgaganacandrikA by kAlidAsa edited by Swami Trivikrama Tirtha
*Arthur Avalon Tantrik Text Series (John Woodroffe), Calcutta 1937.
*
*Data entered by the staff of Muktabodha
*
*   Copyright (c) Muktabodha Indological Research Institute                                                                                       
*   THIS TEXT FILE IS FOR REFERENCE PURPOSES ONLY.    
* 
*Encoded in Harvard-Kyoto transliteration                                                                                                                                                         
****************************************************************************

kSIrodaM paurNamAsIzazadhara iva yaH prasphurannistaraGgaM
cidvyoma sphAranAdaM rucivisaralasadbinduvakrormimAlam |
AdyaspandasvarUpaH prathayati sakRdoGkArazuNDaH kriyAdRg 
dantyAsyo'yaM haThAdyaH zamayatu duritaM zaktijanmA gaNezaH || 1 ||

sthUlaM sUkSmaM paraM ca trividhamiha tagad yatprathAvezasiddhyA
yuktaM sattA yadIyA sphurati ca parataH svaprathaikasvabhAvA |
bhAmUrti yaM vimarzakriyamanupatitA lakSyate lokavRttiH 
sanmArgAlokanAya vyapanayatu sa vastAmasIM vRttimIzaH || 2 ||

iha kAlidAsacandraprasUtirAnandinI stutirvyAjAt |
cidgaganacandrikAbdheH zamayatu saMsAradAvadavathuM vaH || 3 ||

cillocanena satataM zivamIkSitumanvaye ca sadbhAvam |
labdhuM ca pUrNabhAvaM yadi cetaH samupAdhvamimAm || 4 ||

hRdguhAmabhilaSannahantayA dRkkriyAvapuradRkkriyApadam |
santamemi samabhAvadaM zivaM sakhyahAniramunA hi sUyate || 5 ||

yA'hamityuditavAk parA ca sA yaH prakAzalulitAtmavigrahaH |
yau mithaH samuditAvihonmukhau tau SaDadhvapitarau zraye zivau || 6 ||

zaktinetrapariNaddhamAsthitaM pUrNabhAmayapayodhimanthatAm
devi tarpaNasudhAkalAzrayaM rudramandaramahaM sphuTaM bhaje || 7 ||

yo'bhavad bhavati yastathetaro yo bhaviSyati pRthakkriyo janaH |
tatra yo'dharamahantayaikayA santamasmi hRdirandhra AnataH || 8 ||

vizvasadmani sadAtmanIzvare pUraNAt puruSatAmupeyuSi |
ye manaH praNidadhurmaharSayastAn pataJjalimukhAnupAsmahe || 9 ||

khecarImukhamarIcijAlakaM vyomazaktitanu saMzraye sadA |
zambhudakSatanujAvabhAsayA yatra vizvamanukartumIhate || 10 ||

khaNDasatprasaragarbhayA yayA lakSitaM sphuravipUrNasattayA |
tattvamaizvaramakhaNDamambikAM tvAM praNaumyakhilatattvanAyikAm || 11 ||

yaH kilAsa sa kilAsa IzvaraH khyAtasattvalulitordhvamUrdhani |
pratyahaM janani yatra tiSThati tvaM sa sattvavapuradrirasya yaH || 12 ||

kalpanAtigamatIndriyaM ca yallakSyamujjhati bahirmukhaM tathA |
antarAlagamabhAvabhAvayostannato'smi sadahaM nirAkRti || 13 ||

amba yadbhavati tattdAtmanA svairitAmajahadadvayodayam |
tAvakaM padamapAkRtakramaM brahma tatsaditi vA zrutaM bhaje || 14 ||

dezakAlakalanA vizeSato yad bhavAni bihitaM nigadyate |
vyaktijAti tanusaMzritakramaM taddhitaM tava bahirvijRmbhaNam || 15 ||

sattvamamba ! vihitasya vastunstatprasAditadayodayaM vapuH |
syAt tamazca yadidaM niSiddhyate dve rajo sadasadanyarUpataH || 16 ||

yat tamo'nyadiha tat kSitervapuH sattvamanyadiha tejasaH zive |
mizraNotthamitaradrajastayostvatkasattvajamato guNatrayam || 17 ||

Izvarasya tava bhartturakSayaizvaryarUpamasi tattvamambike |
jJAnamasya zuci karma vA phalaM te virAgamayapUrNatAphale || 18 ||

jyotiramba hRdi vidyayekSitaM yallagh prasRtamarghamaNDape |
dhUmalakSmaguru yacca taccyutaM te tu sattvatamasI vapustava || 19 ||

tvaM hi rudrajakaTAkSavartinI jAyamAnamavalokya caNDike |
sAMkhyayogapathadezikadvayaM jAtasaMmatisamAdhikaM yathA || 20 ||

saprakAzakRtamajjanaM jagat kurvatI bhavasi pUrNimA zive |
pUrNameva tava rUpamanyathA kurvatI kila kuhUH pratIyase || 21 ||

pUrNatAkRzatayoryadantaraM tatra kAli vijahatkrame sthitA |
darzitakramavibhAgasaMbhramaM kAlamadyatanamattumIhase || 22 ||

mAtRmeyamitisAdhanAtmikA tvatkRtonmiSati yA vikalpadhIH |
tvatsvarUpamakalaGkitaM tayA kasya devi viduSo na muktatA || 23 ||

akramakramavimarzalakSaNaM yA kramAkramamayI kramAkramam |
akramaM zivamavekSya madhyagaM tvAM ca satkulamidaM tavAnanam || 24 ||

vedyavedya(da)kavibhedadakSayA mAyayA kramavadaGgagAminI |
yA sthitAmba bahirakSakAGkSiNI tAM jahi tvamaNutAM mayi sthitAm || 25 ||

karma yad vividhavAsanAtmakaM mAyayA saha kRtANubhAvayA |
vRttibhistava vilApyate hi tad devi ! bhAnurucibhiryathA tamaH || 26 ||

cinmayIkRtamato(')kSadRzyayA guhyayA'mba viparItacaryayA |
labhyate samarasIkRtAkhiladvaitavRtti tava ghasmaraM vapuH || 27 ||

yAzcaranti tava khe cidAtmake zaktayaH karaNalakSaNAH zive |
muktabAhyapadajRmbhaNodyamAH tvaM hi tiSThasi tadUrdhvage pathi || 28 ||

saptadhA vamasi yA tvamIzvari vyomazAntamukhacidguNAspadam |
AzritAn nayasi nAparaM zivaM dvandvayA'dvayapadAtilaGkinI || 29 ||

yA pramAtari niSeduSI parA pratyagAtmani vimarzavigrahA |
vAgiyaM trividhabhAvabhAsitA tvAM sa vakti kimutAmba vaikharI || 30 ||

nAdabindulipivigrahA girastisra UrdhvagavimarzazIkarAH |
saMhRtisthitivisRSTidhAmasu vyAhRtAstvadadha Izavallabhe || 31 ||

dRkkriyAtmazazibhAnumadhyagaM khe caratyanalavat sudhAma yat |
yattadUrdhvazikhare paraM nabhastatra darzaya zivaM tvamambike || 32 ||

vaikharIprabhRtivAktrayaM pare meyamAnamiti kartRlakSaNam |
udbhavasthitilayAtmakaM vapurbhUribhedamaparaM smaranti te || 33 ||

vizvamUrti yadadRSTavigrahaM tvatprazAntipadamaizvaraM vapuH |
tatra te ya udayaH kulezi ! taM sRSTirAzrayati paJcavAhatA || 34 ||

yA parA sphurati zaktirambike tatra hi tvayi payodhivIcivat |
ziJjikAvayavakArthapaJcakaM vartate vividhasUkSmavigraham || 35 ||

tvanmukhaM tripathanetri ! bhAtmakaM zaktivRndamiha turyathAgamam (yad yathAgamam ) |
dvAdaza kramapadaM padAdibhirjRmbhitaM jagati taccatustrikaiH || 36 ||

mAnameyamitinetralakSaNAH somasUryadahanAstridhAmagAH |
rAzirAjividhibhaJjitaiH svarairlakSitAstava hi vipruSo'mbike || 37 ||

AhatetaraduruttarAzrayastvatpadAdudayate zivAtmike |
advayAdviSayacitprathAtanurdRgvimarza iha vAcakaH svaraH || 38 ||

amba ! dhAmakaraNaprayatnajo vaikharaH sphurati zabda AhataH |
mAnasaH punarasAvanAhato vAsitastvadupalakSya uttaraH || 39 ||

SaSThavarjamahimadyuteH kalAH sargabindurahitAzca ye zubhe |
sarva eva zazinaH kalAH zive yonayo vidhRtabIjatatsvarAH || 40 ||

bIjayonividhibhedabheditA mAtRkAsukRtamAtRlakSaNA |
zaktiramba bhavati kriyAmayI tvattanurjayati pAramezvarI || 41 ||

bindurakSaramayaM kriyAmayaM yo niyantrayati buddhilakSaNaH |
nAda iSTatanurasya kAraNaM | tvaM pare ! tritayadharmarUpiNI || 42 ||

udyamaH prathama Urmiruttaro nistaraGgazivacitpayonidheH |
prAgacitpadaparigrahAttava vyomanIzvari tanurmahodayaH || 43 ||

sphAritA janati seyameSaNA khecaratvasamupAzritA dizi |
akSacakramanujagmuSI gavi prAptagocarapadA bhava svayam || 44 ||

khecarIprabhRti yaccatuSTayaM sAMzamamba ! tava tad bahirvapuH |
yad dvayAdvayavibhAgaghasmaraM tanniraMzamabahirna vAkpadam || 45 ||

paJcavRttitanuramba ! nirgatA zaktirarpitakulaprabhAsanA |
tvaM zivAdakulataH sameyuSI tena tatra punareSi vizramam || 46 ||

yuktito'mba ! tava vRttipaJcakaM paJcabhUtaguNavRtti lakSyate |
gharmivRttikRtasiddhanAmakaM dharmavRttikRtazaktinAma te || 47 ||

brahmaNaH prabhRti siddhapaJcakaM bhAratIprabhRti zaktipaJcakam |
unmanIM smarati yastavAkRtiM siddhavartmani jayatyasau janaH || 48 ||

tvaM prakAzayasi yaM sa sRjyate dharmidharmatanurartha Izvare |
yaH prakAza iha sa tvayA kRtaH tattadAkRtirUpaiti sRSTitAm || 49 ||

tvaM hi cittanurato na cittatA svena te viSayacittatAM vinA |
ziSyase yadi vinArthamaNDalaM sargasImani kuto'sti cittatA || 50 ||

vAsanA ca na vicitratApadaM tatprasUstvamiha kevalaiva cet |
zaktilakSaNajagadbhRtodarI mAnasaindriyakavastusUrasi || 51 ||

sArvakAlikamidaM jagat tvayA bhAsyate vidhRtazabdarUpayA |
AntaraM janani buddhidarpaNe bAhyamadyatanamakSarUpayA || 52 ||

yAvadamba ! puruSasya zAntatA saptamI sakalabhAvavartinaH |
tAvadadvayavimarzabhinnatA sArvakAlikavimarzabhAvitA || 53 ||

amba tajjaDamuzanti bhedibhiryad guNaiH sphuradapohyate kramAt |
cittadAkRtinirAkRtiH svato bhAti yA sakRdasau tvameva sA || 54 ||

jADyamamba ! jagato nisargato yatparAprabhRti bhAti bhedataH |
tvaM tu jADyaparipanthinI smRtA yA vibhAsi sakRdarthamaNDale || 55 ||

vizvametaditi yA'hamityasau nAmarUpaviraheNa nizcitA |
sA tvamamba ! na bibharSi bhAsyatAM bhAtmano yadasi dharma IzituH || 56 ||

bhAvadRk smUtiviyuktamIzvare zUnyaratnamavalambya pudgalam |
nirniruktikamidaM jagat sthitaM cillayordhvagapathAnna tattathA || 57 ||

zAntatAM bhajadanAzritaM padaM zaktimAtrajagadekasadma yat |
nirmalajvalanazaucavajjagat tatra hi tviSi nimajjitaM tvayA || 58 ||

siddhazaktimayabhAtRbhAsanavyAptibhAva upayukprakAzatAm |
yo'yamarthanikarastvadantike tvatpramAtrabhimukhaM tanoSyasau || 59 ||

draSTTatA jagati yatprakAzane yazca nizcayavidhau pramAtRtA |
grAhakatvamapi nizcitagrahe vettyataH sa tava vRttipoSitaH || 60 ||

AsthitaH sadasadarthamaNDalaM ghImano'kSavapurasmitAmayaH |
yastrayodazavidhaH svatantratA taddvayo'hamasau tavAMzakaH || 61 ||

tattadarthamayabhogyalakSaNAnandamUrtirayamuttamaH pumAn |
arpaNena jagatazcidambare bhAti saMhRtimayaH zive tava || 62 ||

aSTadhA sphurati yA purI zive sUkSmabhAvamupagamya laiGgikam |
tajjapauSTakRtacittavRttayo vAsanAstvadudarasthite pazau || 63 ||

sargasaMvRtizarIrayordvayorbhakSyabhakSakapadasthayostayoH |
antarevamahamAsthitaH zive dhImano'kSavapurarpitaM tvayA || 64 ||

rAjanAt prakRtiraJjanAcca mAM rAjasaMjJamanu bodhakarmaNoH |
SaT tvayA pRthagamI pravartakAH putrabhAvamadhiropitAH zive || 65 ||

UrdhvavAhamayabindulakSaNaH prANasUrya iha ciddviSaTkalaH |
tatkalAdharatanurgurukrame tvaM prakAzatanu siddhamaNDalam || 66 ||

yastvadhovahananAdalakSaNo'pAnasoma iha bhogyavigrahaH |
tasya SoDazakalAH kRtAstvayA''nandacakratanavo gurukrame || 67 ||

vAsarezarajanIzayoH kalAzcaNDi yAvadudayaM vitanvate |
tAvadeva divasakSapodayastvatkRtaH prakaTaguptavigrahaH || 68 ||

devi taddvayakalAvimizraNAt sAmarasyapadameti yA sthitiH |
bindunAdasamavedyavedakA'ntargatA hi tava mUrtiratra sA || 69 ||

lIDhabhAnuzazimaNDalA sthitirlambhitA pralayavahninA tvayA |
prANadhAmni dazasaptadhA satI mUrtirAzritagurukramA zive || 70 ||

iSTabodhakRtazaktayastvayA saMhRtisthitivisRSTisadmasu |
turyacitpadamayuH prasAritAH suptitaH prabhRti dhAmasu triSu || 71 ||

meyamAtRmitilakSaNaM kulaM prAntato vrajati yatra vizramam |
tatpadaM tava turIyamambike yanmahadbhiranupAkhyamiSyate || 72 ||

cArarAvacarubhirvibheditairmudrayA ca yadupAsanaM tava |
tadvazena bhajate paramparAM tAvakI kramatayA sphuTAkRtiH || 73 ||

maGgale tvamasi vAkcatuSTaye yA parA sphurati mUrtimaNDale |
sA prakAza-sukha-vRndacakragA nAdabindulipimUrtirijyase || 74 ||

AdyacitprasaramUrtirambike pItatAM vrajati yatkRtAspadA |
akSayaM zivamupAsya tajjanaH zakticakrajanitaH pramucyate || 75 ||

amba ! zaktivapuSA tvayonmiSadrUpayA samarasaH zivo yadA |
yattadollasati vIryamUrjitaM pITha eSa hi mahAMstvadutthitaH || 76 ||

yA zive sphuraNazaktirakSayA kSmAdipaJcakaniviSTabhAtanuH |
sA mahad bhavati vIryamagrimaM yanmayI tvamasi pIThacakrasUH || 77 ||

pIThacakranikaraikadharmiNI tvaM sthitA ca satataM samantataH |
sadbhirudyamanirantarAtmabhirlakSyase'mba niravagrahodayA || 78 ||

IraNena vividhena vIratAM yo'yamakSaragaNaH prapadyate |
antyamIzamasi taM tridhAmakaM varNazaktipadavI ca citkalA || 79 ||

yA'nalArkazazivigrahA kalAnAhatAmbaravisarpiNI zive |
pIThataH prabhRti yAvadarcyate tAvadunmiSati tanmayI satI || 80 ||

nirjanasthitilayaprathAtmike'grAsanityaniravagrahodayaH |
jRmbhitastvadanupAkSadIpito dvyaSTakaM manurume ! tavAsanam || 81 ||

nityabhAtaruci vizvaghasmaraM durnirIkSamapi sanniketanam |
tvaM zmazAnamasi vIrahRdgataM kSINavRtti karavIramijyase || 82 ||

vizvasaMharaNalIlayotkaTaM vyomni zazvaduditaM nirAzraye |
kSetrapAlamanupAdhikollasat tvadvimarzamabhinandatIzvare || 83 ||

khecarIprabhRtiramba zAkinIprAnta eSa tava yo gurukramaH |
sRSTitazca yadanAkhyavikramaM cakrametadakhilaM tavodgamaH || 84 ||

taddvayollasitamamba ! vartate yatra nityamiha sAmarasyataH |
sanniketapadanityajRmbhitollAsa eSa tava me purassaraH || 85 ||

bhogyabhoktRrucighasmaraM manaH paJcavAhamayamucyate tamaH |
nirniketapadameti yatra te ko'pyasau satatamadhvarotsavaH || 86 ||

pUrNasattvaraja-AdihRdgatAdhiSThitA tvakhilalokavAhinI |
paJcadhA vahasi zAzvatodayA siddhasindhuriva siddhasevitA || 87 ||

vyomayAnamatimatpurassaraH paJcadhA prasara eSa tAvakaH |
jRmbhamANaguruvaktracitpathollAsimUrtirayamAsthito jagat || 88 ||

spandamAdyamanu kurvatI zive nirniketanapathotthitA guNaiH |
zUnyadhAma vasasi tvamiSTitaH prAgadhiSThitaravA vijRmbhase || 89 ||

ciccamatkaraNarUDhanirbharA tvaM purA sphurasi saiva khecarI |
rUpasaMgrahadarzitaiSaNA tejasA svarasavAhinA'mbike || 90 ||

devi naikaviSayodyamasphuTArohiNI bhavasi saiva bhUcarI |
sparzasaMgrahaNanityasammukhI svairitAmajahatI svabhAvajAm || 91 ||

pratyagAtmani dRzo'vakuJcanA vizvamannamudare vitanvatI |
grasya saMhRtimukhena dikcarI saiva devi rasacarvaNonmukhI || 92 ||

prAptacittamukhato'dhitasthuSI svasvarUpamaniketamaJjasA |
raudrabhAvakRtabAhyajRmbhaNA gocarI tvamasi gandhahAriNI || 93 ||

brahmavigrahakalAdhirohiNI paJcavAhavapuSaH kalA tava |
sAmarasyaghaTitodayA zive zazvadullasati siddhamaNDale || 94 ||

bhAnuzItakaravahnikuNDalIbindusUtritaparAvarasthalA |
rudrazaktiriha kAlakarSiNI tvatkapaJcavidhavRttisUcinI || 95 ||

ghoSavADavazikhAstaduttaraM bindunAdayugalaM ca yatpadam |
saprasAdamiha paJcabhiH zive tvAM kalAbhiranuklRptamomapi || 96 ||

induzUlavRSaTaGkamAtRkAkAlabIjadhRtapaJcabhUmikaH |
lopasandhivihitadhruvodayazcinmayazca tava devi darzitaH || 97 ||

yajjvarAdipadamamba vAyunA yA zikhA madhusapannagAspadA |
yA nizA madhuniviSTasRSTikA paGktirapyanukaroti te sthitim || 98 ||

yannabhaH sphurati yo marut tvayAdhiSThito vidhRtasargarUpayA |
yA zikhA yaduta vAri yajJasUryAmba paGktirapi taistathAvidhaH || 99 ||

bhUcarI vahasi daNDataH kramaM muNDato'paracatuSTayI ca sA |
bhogyabhoktRkalanormisaMkSaye sAmarasyarasarohiNI zive || 100 ||

yastvanAhatadhRtordhvapAragastryazramUlagaganasthitaH svaraH |
tatra devi viyadagnipArzvayormadhyagA vahasi paJcadhA kramaiH || 101 ||

paJcavargamayapiNDagAminI maJcapaJcakatanustvamamba yA |
devi varNa iva bhAsi niSkramA sAmarasyakRtapaJcavRttikA || 102 ||

zUnyamamba mahamucyase tu yA yat tvamatra gagane sadoditA |
divyamoghamata udgirantyasau sparzamujjhasi hi vAmavigrahA || 103 ||

ambarasya paramAgatA zive saiva cittamanaghA svabhAvataH |
spandametya paramaM virAjate khecari praNatakhecarastvayA || 104 ||

vyaktamakramavijRmbhitA zive tvaM visRSTabhuvanadvayodayA |
saiva saMcarasi saMzritA yadA bhUcarI bhavasi saMjJayA tadA || 105 ||

svaM vapuH sphuraNazaktilakSaNaM tattadarthamayamambike kSaNAt |
saiva cennijapadAntavartinI saMharasyatha tadAsi dikcarI || 106 ||

pratyagarpitamukhI bhidAkSayAdaikarasyamaghiropitaM tridhA |
svaM kramaM grasasi saiva cedasau gocarI khalu mahAmbarAntagA || 107 ||

paJcasu sphurati devi vRttisu tvanmayISu yadi kAcana svataH |
zazvadAzu nikhilAstadaiva tAH sAmarasyamadhiruhya bhAntyamUH || 108 ||

nirNiketanatayA'mba khecarI sphAritA gaganakAmayA tvayA |
nAdasarganihitasvavaibhavA dikcarI sphuTamadhiSThitA yayA || 109 ||

kSobhamamba ! tava tAvadiSTato dvyaSTarazmitanunAdavigrahA |
bindubhUmimadhitasthuSI sphuTAnandacakravibhavAsi bhUcarI || 110 ||

dikcarI tvamasi bindubhAskarA jRmbhitA bahirihAmba nirgatA |
arthapaJcakamalaM grasantyasau bhUcarIM nayasi nirvibhAgatAm || 111 ||

tad dvipaJcakalavahnivigrahaM saptatacchikhamazeSaghasmaram |
mUrticakramadhiruhya dikcarI tvaM parAM vizasi vAcamadvayAm || 112 ||

cetasaH kRtamadA svajRmbhayA tvaM nijaM viyadabhUmi jagmuSI
gRhNatI paramamamba citpadaM maGgalAsi vidhutAhRtiH parA || 113 ||

asvarAgrimavikAsadharmiNI vizvacakraparimelanodyamA |
bhAvanAdikalanAtivartinI paJcavaktramadhipITha ijyase || 114 ||

bindunAdazazipIThabhAsvarA jvAlarAjabhagakAlavigrahA |
asvarAkhyaparamAmbarAtmikA maGgalA tvamasi vAktrayAtigA || 115 ||

dvyaSTadhAmanilayA citiH zive sphArayantyanizamAtmano balam |
nirniketanapadA tanoSyasau jJAnarazmivisaraM sadoditam || 116 ||

antaramba bahirapyamI karA ye tavAkSatanavo'Gka eSa yaH |
vigrahadvitayamapyataH paraM cinnabho nayasi naH karaGkiNI || 117 ||

yatprakRtyavadhitattvamaNDalaM kSmAmukhaM parimitagrahAsSadam |
krodhanI tvamasi tajjihIrSayA mantramUrtiriha te vijRmbhate || 118 ||

devi kAryakaraNAhvayaM vapustvaM trizaktivisaradguNAtmakam |
mAntramugrarasasaMkulaM paraM vIryamAnayasi tajjihIrSayA || 119 ||

granthayo'pi SaDume yayA dhRtA sA nirAvaraNacinnabhaHpadA |
spandamUrtidhRtabhedaDambarA bhairavi tvamasi vizvabhedinI || 120 ||

aSTapuryuditabIjavAsanAsaMhRtipravaNarazmipuJjayA |
lIDhamAtramukhabheditA tvayA bhUyase janani lelihAnayA || 121 ||

tvaM parAprabhRtivaikharAntimollekhavistaravilApanonmukhI |
devyanAvaraNazambhusadmagA khecarI bhavasi cidvikAsinI || 122 ||

vahnisUryazazidhAmaghasmarI kuNDalI taDidivotpatantyasau |
zAmbhavaM janani bindumadhvanA madhyamena ca gatAsi khecarI || 123 ||

mudritasvakRtatattvamaNDalA jRmbhase svajaThare sadoditA |
vRndacakragatapaJcabhedagA tvaM zive dizasi yogajAM zriyam || 124 ||

jJAnamamba tava bheditaiH svaraistaistu yoga iha SaNDavarjitaiH |
vyaJjanairudayate mahAntikairmantrazaktiyugalaM kahAdibhiH || 125 ||

binducakrazazikuNDalI zikhA mUrtirambaragatA caturvidhA |
zaktiratra kRtazambhubhedanA SaSTirambaragatAzcatuSparAH || 126 ||

AdihAntanijadehanirgatAH SaSTiratra caturuttarA rucaH |
khecarIjaTharaniSThitAstvayA maGgale paramabhedataH kRtAH || 127 ||

jJAnadIdhitiSu raudradIdhitermantradIdhitiSu vAmayoditam |
yogadIdhitiSu jRmbhate'mbikA jyeSThayaivamatha zaktidIdhiteH || 128 ||

devyabheditakalAcatuSTayA zambhudIdhitiSu dIpyate svaraH |
tatsthitistvamapi varNabhedinI maGgale vahasi yatpradhAnatAm || 129 ||

sarvadaiva sakRdAsthitodayAH sarvataH kSapitakalpanAbhidAH |
itthamekavapuSA tvayA nijAH sphAritA mahati lakSmacittviSaH || 130 ||

udyamaprathanacarvaNAtmakaM jAgarAdipadamamba yatkriyA |
yatturIyamapi tadvilApanaM bhAtanustvamakhile'tra jRmbhase || 131 ||

yo vikalparahito'kSamaNDalArUDha ullasati mAturambike |
prAgvimarza iha tanmukhI prathA jJAnamarthavidhRtA tanustava || 132 ||

IdRgetaditi tatprathAsthiteryo vimarza udito'ntarakSataH |
mantra eSa tava vRndacakrago yanmukhI bhavati tAvakI kriyA || 133 ||

bhogyabhoktRparighaTTanollasannirmalapramadanirbharodayA
lolitAkhilahRSIkavRttikA yuktiramba ! tava vizvamelinI || 134 ||

jJaptimAtramapanItavAsanaM nirvikalpamadhiruhya cittviSA |
sAmarasyakRtazAzvatodayA tvaM hi zaktiradhitiSThasIzvare || 135 ||

zUnyamamba gaganaM hi yA mahat spandabIjamaniketamIyuSI |
lIyase jhaTiti cittayA tvayA zambhurazmivapuSA'tra bhUyate || 136 ||

jJAnamamba zamapUrNacitpayorAzilambilaharI tvamucyase |
tadvimarzatadupAzritakramadhvaMsamUrtizatamUrdhvamaNDalA || 137 ||

styAyamAnazivacidrasAtmakaM bhAvavRndamadhiruhya bhAmayI |
khAnilAgnijalabhUmibhAsinI zambhutaH prabhRti jRmbhase zive || 138 ||

sphAratAvakavimarzapAvakabhrAmyamANadhanasArabhAtmikAH |
paJcadivyakulabIjavigrahAH tvattviSo'mba ! zivacinnabhaHpradAH || 139 ||

paJcacakratanureSa jRmbhate nirvikalpazivabodhasatphalaH |
paJcasu kramamahIruhaH zive tvanmarIciSu nirastavaibhavam || 140 ||

bIjamamba ! tava paJcadhoditasphAritapraguNadevatAkramaH |
siddhido'yamaparItajRmbhaNo yaH prakAza iha so'ntacakragaH || 141 ||

zambhudhAmni patitAmbarezvarI zaktidhAmani tato'nu khecarI |
bhUcarI tvamanu yogadhAmnyato dikcarI tadanu mantradhAmani || 142 ||

paJcamaM jhaTiti pAtukakramAdIyuSI sphurasi raudravaibhavAt |
jJAnadhAmni nikhilezi gocarI na kramastava nirAzraye pade || 143 ||

jJAnataH prabhRti paJcamaM zive yat tvamatra paracinnabhastanuH |
paJcavAhamayazaktigarbhiNI bhAsase prathanaketaghasmarI || 144 ||

tvaM nirantaracidambarAtmikA velayA'mba tulitA dayAmbugheH |
tvayyamUrjhaTiti saMvidApagAH pUrNatAM dadhati nirniketanAH || 145 ||

paJcadhA prabhRtavaibhavaM zive cakrametadiha gocarIkRtam |
vizvabhakSanirupAkhyacinmayAt tvatpadAd galati naiva jAtucit || 146 ||

dhAma yad bhavati mudrayA samaM yA ca saMvidaniketanAzraye |
yA'NubhAvakalitA kalA ca tat sarvamamba tava bRndacakragam || 147 ||

asvarollasanabIjamagrimo kSINato'vapurapAkRtakramaH |
nAda eSa tava vizvadaizikaH ko'pi saMvidi vimarza IzvaraH || 148 ||

granthipaJcakavibhedinI citiH paJcatAralipivRttisUcitA |
yeyamamba paradhAmni te tanuryonipaJcakamayI nirAkRtiH || 149 ||

sparzavarNamayapaJcavargajairvistarairjanani mudritA tvayA |
vyaktibhedaracanA samantato vyaktidhAmasahitA jaganmayI || 150 ||

AditaH kramamayIbhiramba yaH paJcabhirbhavati yonibhiH svataH |
akramaH kramamayastvadAzrayAt sakramaH sphurati sRSTilakSaNaH || 151 ||

kevalaM jagati yonirakramA yogamUrtiriha te satAM matA |
yoniratra mahatI taduttarA sA yadetadavabhAsanaM tava || 152 ||

zaGkhayonirata uttarA dhRtA vRttiramba tava yattu cavarNam |
kAlavigrahavilAsanaM punaH padmayonirapi te vikasvarA || 153 ||

nistaraGgajaladhikramA sthitA kAli dhAmni tava bhedaghasmare |
divyayoniriha svasvarUpiNI niHsvabhAva udayaH parastava || 154 ||

svasvarUpamayavizvamUrtidRksiddhagADhaSarirabdhavigrahAH |
sparzamUrtimadhiruhya paJca te yonayo vidhRtasRSTimaNDalAH || 155 ||

jAgarAmukhacatuHpadA'dvayonmeSasaMsphuritamAtRlakSaNA |
nirdvayAdvayagatirmahAkhage drAk tavAmba patisiddhamaNDalI || 156 ||

kuNDahRtsvaracatuSTaye sthito vyaktitaH prabhRti yo jagatkramaH |
tasya gopaka udagravaibhavo yo'vatAra iha sAmba te prathA || 157 ||

spandamUrtimavinazvaraM khagaM sparzazUnya iha haMsamAsthitaH |
IzvarastripathabhakSyadhAmago yastamamba bhajate khagendratA || 158 ||

prAtibhaH prathama udyamo'mba yazcitravizvaracanAdaro'dvayaH |
kUrmavRttimanukRtya kUrmatAM yAtyasau tava nivezitaH pathi || 159 ||

meSa eSa udayaH paro mama chandatokSatanutAM vahatyume |
nityaturyamahimA grasannibhaM meSa eti tava dhAmni saMsthitim || 160 ||

chandato mama nirAzraye pade muktabAhyapadasiddhikalpanAH |
saMvido vasata yUyamityamUH zAstyasau tava nirargalaH zive || 161 ||

nistaraGgaparamAdvayaprathAmbhonidhau pratinivartitakramaH |
vizvamannamudaraM nayatyume mIna utkaTavimarzavaktragaH || 162 ||

nirniketamahimA nirAkRtistAvako'yamavabhAsanakramaH |
svasthazaktivisaratsamAhito yatra zaktinivaho'mba jRmbhate || 163 ||

kSAnta AdikalitAkSacakrago dhInirAsakRtatadvicAraNaH |
khaNDacakra udito'mba te kramo rudrasaMkhya iha saMhRtikramaH || 164 ||

nizcitagrahanidezavarjito yuktyayuktyatigato'kramaH paraH |
satpathoditakhadhAmagaH zive khaNDacakravisarastavotkaTaH || 165 ||

vyaktimattaditarakramaprathAguptikRt kSatabahirjagatkramaH |
nirgatAdhamamahArthajRmbhitaH saMbhRtau janani te'nvayakramaH || 166 ||

grAhyatadgrahavidhAtRsaMbhramo nAdayugma iha vizramonmukhaH |
rudrasaMkhya imamattumIhate tAvake tava marIcirambike || 167 ||

yo dazendriyaniviSTa uddhRto'tyarthamAtmajaDabhedaviplutaH |
tat kSayAya vata kAlakarSiNI tvatsamullasati tAvakI ruciH || 168 ||

akSacakranivaho'rkasaMkhyayA svaM svamarthamiha yo grasatyume |
ciccamatkaraNanirbharaH sa te pratyagullasati tatpadaM gataH || 169 ||

tatpadaM jhaTiti nItasantatiH prekSya devi tava turyadhAmagaH |
nistaraGgaparamAmbarAtmagAH sAmarasyamupayanti dIptayaH || 170 ||

AdisargasamakhaNDavarjitasvasvarAtmarucicakragAmini |
vyaktatatparatayA sthitaM bahistAvakArtharucicakramambike || 171 ||

nirvikalpaparamAmbarAzrayAH ujjhitetarapadAstviSastava |
sphAritA hi yadi pUrNatAmadhuH saMbhramaM jagati bAhyamIzvare || 172 ||

caJcalA taTidivAkramaM parA spandavRttilaharI tavAmba yA |
sodayAt prabhRti kalpanAM vinA vRttibhistisRbhirujjhitA sakRt || 173 ||

amba tatra kalanA pRthakkriyA sRSTitaH svapathage krame ca yA |
tadvirUpamamalaM tanukramodyogamukhyacaturUrmisaJcitam || 174 ||

ekamamba tava bhAtyanAvRto dvAdazakramacidUrmiDambaraH |
sRSTikAlyudayameti yanmukhe yaH sphuTo niravadhirnirAzrayaH || 175 ||

tasya devi harasaMbhRtervazAd durnirIkSyatanurucchritAzrayaH |
svasvabhAvavihitakramAkrame dvaidha eSa tava cittviSAM cayaH || 176 ||

yo manonmanamanonmanItaraH svasvarUpacaturAtmabhAvataH |
dvAdazaikyatanurakramakramo bhairavastvamasi devi te sthitiH || 177 ||

brahmaviSNuharamUrtitAM yato'bhyeti tattava turIyamAspadam |
vyoma yat kramamayI tvadIraNA dhUyate layakhacakragA zive || 178 ||

bindugarbhanihitaM tridhAmagaM tadviziSTamupari prasarpati |
bhedanAnidhanamoM yadambike tattvameva paratattvadarzanam || 179 ||

sattvajAzrutakalAvadhi tvayA kAlavahnibhuvanA marIcayaH |
bhakSaNAya jagataH prasAritA yallayAnnRbhiraNutvamujjhyate || 180 ||

varNamantrapadajRmbhayA sama yAH kalAstadanu tattvamaNDalam |
yAni tatra bhuvanAni caNDike tatra kRtsnamapi gRhyate sthitau || 181 ||

tvaM nirAvaNayuktimAsthitaistAvakAdvayavimarzasAdhitA |
antarAhitaSaDadhvamaNDapairyogibhirjanani zazvadIDyase || 182 ||

mUlataH prabhRti pAvakAzrayaM dvAdazAntanidhanaM zive jagat |
vAhatatprathanayorniSeduSI majjayasva tava dhAmni citpade || 183 ||

ye nirAvaraNayuktizAlinastAn prati sphurati tatparaM nabhaH |
yatra meyamitimAtRghasmare vAsanApi na jagadvibhedagA || 184 ||

vRttisaMharaNameva mAtari vyajyate na khalu saMstutikSayaH |
taddvayaM ca tava dhAmni saMbhRtaM caNDi keyamiti caNDimA tvayi || 185 ||

bhUtayantranilayAstavAmbike zaktayo'kSarakavRndamAsthitAH |
tvatpadaM hi viSayAmRtAsavaiH svasvavRttikusumairyajantyamUH || 186 ||

gocarIprabhRti zUnyapazcimaM bhUtaSaTkamavamajya dhAmni te |
svaprabhe pramadanirbharAH paraM zaktayo dadhati darpamIzvare || 187 ||

dvAdazAmba ! kiraNAtmano ravermAtRvahnividite tvadambare |
vizvametya sahasA marIcayo'znanti cinmukurabimbitaM jagat || 188 ||

bAhyamIzvari vinA sudarpaNo bimbametadanukAriNI tanuH |
vyAptatAmupeyuSI tvadambare yuktimarhati na bimbabAhyatAm || 189 ||

asti bAhyamiti tatpratheta cet tAdRzaprathanagarbhitaM hi tat |
na pravedayati niSpramANakam mAnamamba khalu sAdhayet prathAm || 190 ||

IdRgetaditi caiva mA phalaM tattatheti hi vimarza AntaraH |
nirvibAdha upadhAnazabdavat karma sA tvayi puTatrayI sthitA || 191 ||

mAyayAntaramapi sthitaM jagad vartamAnamavabhAti bAhyavat |
bhUtabhAviyugalaM yathApuraM vidyayAmba tava vRttirUpayA || 192 ||

tvaM guhA nikhilabhAvagUhanI bhAmayena vapuSA'vatiSThase |
yacca yastava patirguhAzayaH prANicakramakhilaM ca yasya pUH || 193 ||

bhAsitaM janani mAyayA bahirbimbametadanukAri mAnasam |
mAturetadubhayaM ca bimbitaM tAvake vapuSi yad dvayaM sthitam || 194 ||

vArivahnimukurAdiSu sphuTA svacchavastuSu kumAri bimbatA |
mantritA saha paricchadena yat tena bimbamanavekSitaM tava || 195 ||

yatsmRtau sphurati vastu bimbitaM svapnasaMprathanakalpayozca yat |
bimbavarjamiha tannidarzanAt tvannimagnamuditaM jagat tvayA || 196 ||

svapnadRSTamasadityasadvaco divya eSa yadiha pramANitaH |
kalpanApi na mRSA phalaM zive yat sthitaM garuDabhAvanAdijam || 197 ||

khyAtiramba ! yadi yAti pUrNatAmIdRgetaditi kalpanAmayI |
tattatheti hi vimarza uttaro nAntareti parimardayogyatAm || 198 ||

asti tadyadi dhRtaM jalasthale devi ! tadvadanalArkasomayoH |
mArute nabhasi vA tadAkRtistatkRtiM ca kurute hi pUruSaH || 199 ||

kalpanA yadi mRSeti bhASitA dhAraNA phalati kena hetunA |
devi ! saMkalanabodhajIvitA devatA kimiti kairna hIyase || 200 ||

tanna jagmurudadhau svayauktito viSNurAtmajamadarzayaccitaH |
tAtamamba tanayasya zaGkaro dagdha eSa hi bahiHkramastava || 201 ||

rUpameSyati hayAnanaM harirgopasaMjJamagamad bahiH puraH |
tad dvayaM ca bhajatAM bahiH phalaM bhAvi cenna sadatItamamba yat || 202 ||

akSare'mba parame viyadRco yatra yatra sakalA ca devatA |
tanna vedayati cedRcAM phalaM tadvidAM taditi hi sphuTA zrutiH || 203 ||

vahnibhAnuzazividyudAtapaM jyotiriGgaNanabhazcarAdayaH |
yAH sphuranti hRdaye'pi sAravAH taistadambaragatairhi bhUyate || 204 ||

dezakAlamavabhAsi yAdRzaM yattayA'nubhaviturvibhedinaH |
tattayA sakalamIkSyate smRtau matkRtasmRtimavekSate kSaNam || 205 ||

yadyanaGkSyadanubhUtirIzvare sA smRtistaditinA pratiSyate |
saMstavo hyanubhavasmRtau sthitastatkSaye'nubhava eva na smRtiH || 206 ||

saMsmRtiH sadRzavastubodhikA dRSTa eva viSayaH smRtetaraH |
dRk zive viSayabhAnavigrahA tatprathA smRtiriyaM yadAhRtA || 207 ||

draSTRdRzyadRzilakSaNaM jagat prAksmRtestvayi tadamba saMhRtam |
unmiSatyapi punastadudgame tallaye nimiSati tvadicchayA || 208 ||

sA pramAturiha jIvitaM smRtiryatnatAM prakaTayatyamuSya yA |
yA ca dRg janani nihnutena te apyubhe saha punarvirUpatAm || 209 ||

dRg vidhatta iha vizvamambike tatpunaH sthirayati smRtistava |
tanmithopanihitA niSIdasi tvaM tu yogatamasItyanAzritA || 210 ||

sRSTipAlananirodhalakSaNA rUpatAM vahasi bindulakSaNA |
tadvilakSaNapadA tvamambike cinmayI punararUpamucyase || 211 ||

bhogyabhoktRmayagA vimarzagA devi mAM cidudare dRDhAM dazAm |
ArpayadanalasomamizraNastvadvimarza iha bhAnujRmbhaNaH || 212 ||

dRSTirUpamidamamba bhAvitaM sthemarUpakaraNAMzubhirjagat |
syAdanAkhyamaniketayuktitastatpunarlayamanena cAtmanA || 213 ||

akSamUlapazubhedavigrahA nyAyasaMbhRtihRtArdharUpiNI |
tvatpade glapitakalpane layAd bhAti binduriti kiM nu mudrayA || 214 ||

yA dazAsu nikhilAsu sarvathA sarvataH sphurati citparA sakRt |
guptabhASitajagadvijRmbhaNA mantratAM bhajasi tattvamamba sA || 215 ||

akSimAtravisaracchikhaM zive vahnimugramudare vitanvatI |
grastakAlatanubhAnumatkalA svodaye dizasi zaktijRmbhaNam || 216 ||

tatra te sadasadarthazUnyatA nirvRtirjayati yatra vizramaH |
mAtRtatkaraNagocarojjhitA kAlyakAlamanu tallayo'stu me || 217 ||

kSepamamba vitanoti saMkhyayA tadgrahazca sahasA paratraye |
akramaH sa khalu kAla Izvare pratyamuSya bhavatI ca kAlyasau || 218 ||

khe bahirghanavRte rucistamohAriNI vahasi hAsyarUpatAm |
tvaM ca cinnabhasi mAyayA vRte taddhi kAlyasi paraistvamIkSitA || 219 ||

dvAdazazAtmaravikAlaghasmarI kAlakAlizivabhUmikA varA |
yAdRzI bhavasi caNDi ! tAdRzIM tvAM viduH kalitakalpanAparAm || 220 ||

yatkulaM trividhamamba tadbhavo yaH prakAza upalakSyate mahAn |
tatra yo nikhilakalpito'rNavastvaM yadUrmirasi kRtyalAlasA || 221 ||

unmiSannimiSadapyuta dvayaM vizvametadudare dhRtaM yayA |
sA tvamamba laharI zivAmbudheH kSepasaMprakaTanagrahonmukhI || 222 ||

yaH paro nirupasargataH paraH syAnmahAnapi ca kevalaH zive |
uttaraM ca viSayotsavastadAnanda ullasati cidghanAsi yat || 223 ||

vizvasaMhRtipade layojjhite lIyase yadi niraMzataH zive |
sRSTikAlyasi yayA bahiHpade kSiptamamba jagadAzu gRhyate || 224 ||

labdhasAmyapavanadvayAhRtaM vAtacakramadhitasthuSI zive |
nirgamAgamamapojjhitAntare tvaM sthitaM grasasi hi sthitAmbike || 225 ||

yA zikhAntarahutAzanirgatA dhAmacakramavabhindatI kramAt |
UrdhvasomarasapAnadIpitA sA'pi devi kalaye bahiH sthitaH || 226 ||

barhiNo'NDarasavad yadantare zabdataH prabhRti citritAsanam |
arthapaJcakamasau tvamunmanI sandhipUrvapadakalpaghasmarI || 227 ||

AtmabhAvamakhilasya jagmuSI tvaM zive niravadhiH sadoditA |
bhAvasaMhRtinimeSavigrahA saMhRtaM kalayasi hyanAvRtiH || 228 ||

svairakhelananivezitAH zive AtmanA'kSarucayastrayodaza |
arthapaJcakamayAzca vedakAstvaM vinItaghanasAramUrcchitA || 229 ||

bhakSayantyakhilamakSajaiH zive zaktirazmibhirimAzca mAtRbhiH |
tAzca saMsmRtimahAlaye pare rajyatI harasi vizvavigraham || 230 ||

kAlapAlakamukhaM zivAntakaM vizvamabdhipatitodabinduvat |
pUrNatAM vahati yatra dIpticid ghasmarI tvamiha sAdhyakAlyasi || 231 ||

etadamba sadidaM tu neti naH zaGkayA hRdi vikalpalakSaNaH |
yo yamaH sa khalu kAlyate tvayA bhUtasaMyamanakelikovidaH || 232 ||

amba kAryakaraNe niyacchataH pUrNacitpadamahotsavadviSaH |
jambitasya hRdaye svazaGkayA tvaM yamasya vapuSA'si bhISaNA || 233 ||

vittadAramukhabhogyagAminI yA mametyabhimatirmadoddhatA |
yA'pyahaGkRtiranAtmani sthitA mRtyurUpamubhyaM tavAsanam || 234 ||

vizvamamba kuruSe zavAsanaM mRtyusecanamakhaNDitodayA |
cidvikalpamayamantarudyamaM kAlamohitajagattrayam prati || 235 ||

zAzvataprasarayA cidarciSA dIpitAkhilahRSIkamArgayA |
arthapaJcakamidaM tvayA jagad bhadramamba gamitaM tavAntaram || 236 ||

vAsanA sthitimayI bhavAspadA tvaM niyojya kRtavizvasaMhRtA |
tvadbhruvA kuTilayA zive kSaNAt saMhRtaH khalu bhavaH savAsanaH || 237 ||

kurvatI janani sRSTicitratAM yA kalA bhramati vedyamaNDale |
brUhi sA tava kalonmukhI yadA tvaM kriyotkuTilayAttyamU tadA || 238 ||

unmiSannimiSadarkavimbayA'nantayAmba paramArthamadhyataH |
agnimUrtiriha sRjyate tvayA bhakSyate'pi ca sakRtprabhAtayA || 239 ||

bharganAmna iha bhAraveH zikhA zaktiramba viSayendhanonmukhI |
zAntidhAmajuSi yAti nirvRtiM tvayyasau khalu zivaikapAvake || 240 ||

yo'mRtANDanibhamarthapaJcakaM prANinaH sphurati bhAmayo raviH |
saMhRtArdhamanu antarAhitaM tadvahiH sRjati cArthapaJcakam || 241 ||

saMhatordhvanikarasmRtAvadhirvyaktamaNDatanuramba bhAsvaram |
kAlalakSaNakalApradIptaye tvaM hi vizvarasabhakSamAsthitA || 242 ||

bhUtacakramadhukozasambhRtaM tattadarthamadhu pAtumutsukaH |
yanmarIciviSayaH sabhAskarastvadrucau zalabhavat pralIyate || 243 ||

prANa eSa yamakAla ucyate madhyavAhatanuragnimamba yaH |
rudrametadupanIya khaM paraM tatra sargavimukhaM karoSyamum || 244 ||

tvatkramopahatabhAnumaNDalaH krodha eSa layavahniruddhataH |
vizvabhakSaNarasA marIcayo yasya bhImavibhavAstvayA hRtAH || 245 ||

grAhyamatra purato haranti te yat pRthag grahaNamapyasuM tataH |
grAhakAMzca varade marIcayaH tAstvadarpitajagadvijRmbhaNAH || 246 ||

yaH zmazAna iha bhUtaghasmare rajyate'mba karavIranAmani |
grAhakaM grasasi taM zrutaM mahAkAlamapyasuhutAzadurgrahA || 247 ||

dikcarI dazasu dikSu yA bahistattadindriyamayISu jRmbhate |
antaramba karaNatraye ca yA khecarI galasi te ca tvatpriye || 248 ||

tvaSTuramba ! zivabodhabhAsvataH sRSTitaH prabhRti yA marIcayaH |
dvAdazakramapadatrayordhvagAstAsu saMcarasi vA trayodazI || 249 ||

sakramAkramavimizrabhAvatastvatkramastritayacAruvIkSaNaH |
turyarazmiguNavikramaikabhUstvaM kramatriguNabhImakAlyasi || 250 ||

yatra kAli daza te karAH sthitA dve ca yAntyudayamapyamUryataH |
tannabhaH zrayasi sarvataH paraM tvaM prakAzazivacandrikA satI || 251 ||

zAntamamba yadabhinnamambaraM yat prakAzaghanamapyapohyete |
yad dvayobhayapadAtirocanAd yatra muktanikaro nilIyase || 252 ||

tvaM padatritayagarbhitodayaM nirvyapohamupaguhya zaGkaram |
aikarasyalasadakSayaprathaM nAdamudvamasi sarvataH zive || 253 ||

ye vidanti tava rUpamIdRzaM ye ca nityakRtatallayodyamAH |
eSa tAn prati bhavan sudhAmayo ye'nyathA viSamayazca tAn prati || 254 ||

yaH pramajjayati mUDhacetasaM tArayatyapi sa eSa dhImataH |
yena tadbhavasudhAmbudhiH zive yajjuSAM vahati nistaraGgatAm || 255 ||

arthapaJcakasudhAprapUrite yadbhavAmRtanidhau sukhaplave |
padyatAM vahasi saMvidindirA dhAmavastu tadume vapustava || 256 ||

tatra padmarucivedyamaNDale svAduni prakaTameyivAn layam |
mAyayA'mba puruSo nimIlitaH tvaddhiyonmiSati vidyayAvRtaH || 257 ||

tattadarthadalazobhitaM jahannidramullasitamamba vArijam |
tvadvimarzamakarandanirbharaM pIThatAM vrajati yatra cinmayam || 258 ||

tvaM malatrayavilApinI zive pUrNapIThamahamAtmakaM zritA |
zuddhabhAnutanuradvayaprathAnandasArarasavAhinI satAm || 259 ||

satsudhAbdhirasabhRt kalAntarI garbhaSoDazakalAbjaviSTaram |
pretamujjhitagamAgamaM zive smerabhUH sarasijaM tvamAzritA || 260 ||

niSkalaGkamanavekSitakSayaM yAminIdivasatUlajRmbhaNam |
svaprakAzavinimagnacijjaDaM candravarSma yadi caNDike samam || 261 ||

ye tu kuNDalazikhAkulasthitAH ye bhavantyakulabinduzAlinaH |
te vidanti nu tavAmba vaibhavaM pUrNabhAnamayavizvaghasmaram || 262 ||

jyotiSAmba ! zikhayApahanyate puMsi caitasikamuddhataM tamaH |
yatpathaprathanalakSmapuGkhitaM tattvameva zivazaktirapyasi || 263 ||

nihnutoditazatArkadIdhitizchannacandrazatalakSmacandrikam |
tvaM bibharSi vapuramba bhAtmakaM tatpravezya kuru mAmanAmayam || 264 ||

tvaM kulAkhyazazibhAnupAvake bhrAjamAnakaraNAtmanAyike |
saMsmRtAsi municittamaNDape adya me kuru tavAGghrisaMzrayam || 265 ||

paJcavAhagata zaktilakSaNaistvanmukhairakhilamarthamaNDalam |
gRhNatI mayi nivezya caNDike yA karoSi sahajaM tavAdhvaram || 266 ||

tvatpadasmRtividhUtakalmaSaM sarvataH sphuritapUrNabhAghanam |
siddhacakramiha modate zive pUrNimApyahaha me na tApahA || 267 ||

bhUtabhAvibhavadarthagarbhitaM kAlaghasmaramupAsyate vapuH |
kAlakarSiNi vahanti yoginaH kRSNataH prabhRti vizvarUpatAm || 268 ||

sparzarUparasagandharUpajaM zabdacidvalasabhA vibhindatI |
vRtti ca kramakRtAH SaDadhvano dezakAlamayamUrticakragA || 269 ||

yatprakAzatamaraJjakaM padaM tasya bhAva iha yaH sato'mbike |
induvahniravilakSaNaM kulaM tvaM turIyapadagA'pyalakSyasau || 270 ||

amba nandati samantataH zive lokanena ya udagravaibhavaH |
prajJayA vahasi sArvabhaumayA yA ca netramayamarcitA tava || 271 ||

prAptadivyanayanairvilakSaNairvIkSya kAli ! mahimA'nuvarNyate |
kevalaM tadanuvarNane'pyume tvanmude tadapi dAsajalpitam || 272 ||

na tvamamba puruSazca nAGganA citsvarUpiNi na SaNDhatApi te |
nApi bharturapi te trirUpatA tvAM vinA tadapi na sphuret trayam || 273 ||

Izvaro janani cintitapradaH ko'pyanAdinighano mahAmanAH |
tvatprathA tvamasi vizvaghasmarI tvAM tataH ka iha bhettumarhati || 274 ||

raktazuklatanuhaMsabhedinI tvaM patizca tava tatkRtAkRtiH |
bhAnuzAGkaravibhedatastava strI ca kApyasi pumAniva svayam || 275 ||

rUpamamba tava bhAsvaraM puro varNapaJcakavibheditaM punaH |
tvadvimizraNamapi hyasusthitaM citrasaMjJitamatazcaturvidham || 276 ||

bhAsanAvaraNazaktyadhiSThito jyotiraJjanamatho dvidhA tava |
vigrahAbharaNabinduzarvarIsaMjJa udbhavabhavaH sphuTodayaH || 277 ||

aJjanena rucimizraNe same raktamullasati tAvakaM vaSuH |
zyAmanIlatanutA'Jjane'ghike pItazuklatanutA ca te rucau || 278 ||

saumyatA tava sisRkSayA tanoH sA tathApyatha rirakSiSA yadA |
ghoratA punariyaM jihIrSayA saMsmRte'mba tava dhAmni zAntatA || 279 ||

bhAsvare vapuSi sarvage tava spaSTamaNDanivaho nimajjati |
kAlavahnyadhikRtau zive yathA tatsamullasati dIptipaJjare || 280 ||

tAvakaM trividharUpavarjitaM garbhitatrividharUpamambike |
cinmayaM paramarUpalakSaNaM rUpamantaravabhAti tadbabahiH || 281 ||

strIti nAma tava kApi kalpanA strItirUpamapi tAdRzI ca dhIH |
vastutastvamasi vizvavigrahA tatparA ca citireva zAGkarI || 282 ||

tvaM caturthapadavartinI zive yaddvitIyamapi tatpadaM sthitA |
yo'pi paJcamapadAzritaH zive yastRtIyamapi tatpadaM sthitaH || 283 ||

yatpadaM prathametaduttare tatpare tadapi turyagAminI |
tvaM turIyatanurAhRtatrikA paJcamaM vizasi pUritatrikam || 284 ||

ambarezvari nirAkRtestava vyajyate nikhilamAkRtitvataH |
sarvadA sphurasi yeyamadvayAnandacitprasarapIThavartinI || 285 ||

na zrutirna ca giro na cAgamAH khaNDavastu vinivezitAzayAH |
tvAM nayanti paramezi te makhA yAgayogavidhayazca nedRzIm || 286 ||

nityatAdiguNalakSite pade jJAnayogamukhakalpanApi te |
amba na tvadanubhUtidAyinI tvallayaikagurusaMzrayaM vinA || 287 ||

vyomabhAvaviniviSTacetasaH prAtibhaM jagadavekSya ninditAH |
te tvamAvizasi yAnanArataM tvannayena guruNAmba ! vIkSitAn || 288 ||

nityatA tvayi vibhutvapUrNate dRkkRye svarasagocare ca ye |
tAni tAni viyatIva zobhane rAgavedasakalAzca bhAntyatha || 289 ||

vyomavRttighaTitaikya ullasatyadvayo janani ! devatAgaNaH |
tAvakodyamapade'pi sarvago drAgvilApanapadaM vinApi te || 290 ||

itthamamba tava vRttipaJcakasyodayo'dbhutavibhAgasaMbhramaH |
sarvadA sphurati sarvataH paraM khaNDitetaranijasvarUpabhAk || 291 ||

khaNDitetarasamastagarbhago yastripaJcavisarAzrayo'kramaH |
devatAkrama udetyanArataM tasya hi tvamasi devajanmabhUH || 292 ||

divyavAhavibhavodarasthito razmimaNDalasamudgamAspadam |
avyayastava navArNavigrahe saMhRtikrama udetyakalpitaH || 293 ||

lakSyazUnyasahajAzramodayArambhapUrNanijakoTyabhedinI |
razmicakratanurazmitojjhitA tvaM ca gauri ! varapuNyavAsanA || 294 ||

adhvabhirdhvanivimizraNakramamabjabIjamaniketanaM varam |
kalpanaikyabahubhedamadvayaM mantrapIThamasi kAlyanargalam || 295 ||

spandamamba paripUrNamapyabhUH spandamu~jjhitapadaM nirAvRti |
vyomarUpamakhilakramAspadam pIThamAvadhikavidyayAmbayA || 296 ||

aSTayonidalapatrapUruSaM tvantavRttidalazaktipeTikA |
tvaM patizca tava liGgavigraho rudrasiddhamunivRndavandite ! || 297 ||

sRSTitaH prabhRti yaccatuSTayaM yatprakAzanibhamUrtivRndajam |
yacca khaNDapadamamba ! pIThagaM dehi cakranavakaM nutaM tava || 298 ||

tvaM navArNamanucakravigrahA svodarArpitasamastadevatA |
devi saptadazavarNabheditA tvaM prakAzazivacandragAminI || 299 ||

yaH zivAtprabhRtisomapazcimastvatkramaikarasiko gurukramaH |
AnanAgramiha cakrabhAnuto yattu edadubhayaM tvayA yayA || 300 ||

tattadarthapuruSo dhRtakramaH pratibhasphuritadivyavigrahaH |
akramastava varaM padaM zive yo'hamadvayavimarzalakSaNaH || 301 ||

lakSaNaM tadanu sUkSmamiSyate jyotirAtmakamavarNamAsthitA |
sthUlametadanuvarNya lakSyate bhAvyate zamayituM mano mayA || 302 ||

tatra zAntavati pauruSe male vyomavadgatamavedayA tvayA |
siddhakAryakaraNaM niraGkuzaM cinmarIcivisareNa maGgale || 303 ||

somaputramapanIya madgatastvatkramo'dya kimapi stuto mayA |
grastabhISaNabhavo'yamambike tvatpadAmbujavimarzatejasA || 304 ||

muktameva na mayA mayocitaH prerito'smi tava tartinI tayA |
siddhanAthakRtatvatkramastuteH kAlidAsaracitAM ca paJcikAm || 305 ||

yadvinizcayapadaM ca te stavaM yo'mba veda kuru tanmukhaM jagat |
kAlidAsapadavIM tavAzritaH tvatprasAdakRtavAgvijRmbhaNaH || 306 ||

tvadguNAn yadahamastu vai jagat tena mohamatiradya mucyatAm |
pUrNapIThamavagamya maGgale tvatprasAdanakRte mayA kRtaH || 307 ||

eSa cidgaganacandrikAstavaH kinnu vAJchitamasUta mAM prati |
yaH paThejjapati devi ! te stutiM yo'rthamatra vivRNoti vetti yaH || 308 ||

yo'nugAtyabhinayatyabhIpsitAM tacca tasya kuru siddhimizvari |
kAlavarSiNi zataistribhiH stutiM tAvakImiha navottaraiH kRtAm || 309 ||

traiSTubhairaharahaH parAmRzan kAlacakramatiyan prasIdati |
kartumicchati zivaM zive nRNAM jJAyate tad vicArya yA tvayA || 310 ||

kSepadhIstavana (?) gauri tatkRtA vizvarAzi (?jJi) kuru sarvamIpsitam |
kevalaM mama punastadIpsitaM sarvatastava madIkSaNaM zive ||
yena khelanasarohaNArNavaH zazvadAvizati yena mAM zivaH || 311 ||

pUrNapIThakRtaM siddhestadbhAvastavamAdarAt |
vA narArthaM mahAguhya zrIvatso vidadhe sa tu || 312 ||

iti zrIkAlIdAsamahAkaviviracitA cidgaganacandrikA sampUrNA ||

kramaprakAzikAsaMvalitA

prazastipadyAni


tantre sUrya ivaiva bodhakiraNairajJAnanAze'graNIr-
lokAlokakalAkadambavibhavairdedIpyamAno maNiH
zazvacchAntisudhAsamudralaharI dolAyate yad-hRdi
gopInAthabudhaM namAmi vibudhaM sArasvataM tanmahaH || 1 ||

mImAMsA sahasA sudheva dhavalA yebhyaH pradatte nidhiM
vedAntAmaratattvabodhavibhavo brahmeva bodhAkaraH |
tarkAgAdhapayodhilolalaharI lIlAyate yaddhRdi
zuklopAhvavibhUtibhavyabadarInAthAn sadA tAn numaH || 2 ||

vedAGgAni vibhAnti yatra vimale vidyAgurau mArgade
manye zrIraghunAthazarmavibudhe sAGgAni ratnAmbudhau |
stutyA kIrtilatA sudheva bhuvane yasyAmarA bhAsate
pUjyaM taM satataM smarAmi sukhadaM vidyAkaraMzaGkaram || 3 ||

yoge tantrabhare vibhAgakamale bAbhAti vijJo varaH
prakhyAto vrajavallabho'tra dhavale vidyAnikete'dhunA |
yasyAsImadayaiva heturaparo nAbhAti me mAnase
TIkAkarmasahAyikA navanavA taM bhAvaye prerakam || 4 ||

mAnI zrIzivapUjano mama pitA mAtA ramA mohadA
yatpArzve prabalaM manobalakulaM samprApya kRtvA'dhunA |
TIkAM cidgagane navAM navabalAmarthaprakAze parAM
vaiduSyAJcitacidbharAM matimatAM yAce dayAM bodhadAm || 5 ||

zrIrukmiNIkamrakaraM sahAyaM
samprApya nirvighnamihAsmi loke |
prakhyAtasIvAna iti pradeze
vAso madIyaH sarayAM-subhUmau || 6 ||

tatrAgame zrIraghunAthamizro
bhUrizramo yasya vibhAgatantre |
arthaprakAzAM vimalAM ca TIkAM
kamrAM sa tene'rthaprakAzikAkhyAm || 7 ||

kA paJcamI yA'rthaprakAzikAyAH
sAphalyasiddhAvupakArikaiva |
nAgAnanA saMzayanAzakArI
mohApahantrI kRtibhArahArI || 8 ||

sadA lokAloko dalayati dalaM gADhatamasAM
bhRzaM jvAlAlIlo darayati daraM vepathumatAm |
maruddhIrA dhArA dahati vipulAmuSmalaharIM
tavaivaikA dRSTiH sakalamiha mAtaH zamayati ||

|| zubhaM kulakramaM kuryAt ||
*