##################################################################################################
##################################################################################################
## MUKTABODHA INDOLOGICAL RESEARCH INSTITUTE
## www.muktabodha.org
##
## tattvaprakAzaH
##
## From the ASTaprakaraNam edited by kRSNa zAstrI
## 
## First published in DevasAlapuri, 1928
##
## Data entered by the staff of Muktabodha
## under the supervision of Dr. Mark S.G. Dyczkowski
## 
##
## Harvard-Kyoto transliteration
## Revision 0 December 12, 2007
##
## Copyright (c) Muktabodha Indological Research Institute
## THIS TEXT FILE IS FOR REFERENCE PURPOSES ONLY
##################################################################################################
##################################################################################################

tattvaprakAzaH

zrIkumArakRtayA tAtparyadIpikayA

zrImadaghorazivAcAryapraNItayA vRttyA ca sahitaH |

cidghana eko vyApI nityaH satatoditaH prabhuH zAntaH |
jayati jagadekabIjaM sarvAnugrAhakaH zambhuH || 1 ||

tAtparyadIpikA

namaH zarvAya devAya kAraNatrayahetave |
     nirmalAya sadAnandacitsvarUpAya zambhave ||
zaktiM sadAzivaM cezaM natvA devIM sarasvatIm |
     tattvaprakAzatAtparyadIpikA kriyate mayA ||

	prAripsitasyAsya zAstrasyAvighnena parisamAptipracayagamanAdyarthaM iSTadevatAstutiM 
karoti- ciddhana iti |
	nanviSTadevatAstutinamaskArAdeH zAstraparisamAptipracayagamanAdihetutA 
kuto'vagamyate ? ziSTAcArAnumitAdAgamAditi brUmaH | zAstrAdyArambhe 
ziSTairiSTadevatAstutinamaskArAdeH kriyamANasya tadiSTaparisamAptyAdihetutAM vinA na 
sambhavaH | tenAsya taddhetutvam taccAgamAdevAvagamyate, anyasya 
pramANasyAtrAsambhavAt | tathA- maGgalAcArayuktAnAM vinipAto na vidyate iti smRtezca 
tadavagamaH | tathA parisamApteH kAdAcitkatayA kAraNApekSA | 
taccAnyasyAsambhavAnnamaskArAdijanito dharmavizeSa iti kalpyate | kathaM tasya taddhetutvamiti 
cet, ucyate- namaskArAdiH kAyiko vAciko mAnaso vA dharmavizeSaM sampAdayan 
vighnahetubhUtamadharmaM paryasya parisamAptyAdihetutAmadhigacchati, tasyeSTatvAdiSTa - 
hetutvAcca dharmasyeti | kathaM tarhi kvacit kRte namaskAre parisamAptyabhAva iti cet, 
tadvaiguNyAditi brUmaH | yathA kArIryAdau vRSTyAdisAdhane'nuSthite vRSTyAdyabhAvAt 
tadvaiguNyakalpanA pratibandhakAdharmaprAcuryakalpanA vA, evamatrApIti na virodhaH | kathaM 
tarhi namaskArAdyabhAve kvacit parisamAptiH, kAraNAbhAve kAryotpattyasambhavA-diti cet, 
naivam | tatra vAcikanamaskArAbhAve'pi kAyikamAnasAderanumeyatvAt, anyathA 
parisamApterasambhava iti | nanu tarhi sa evAstvatrApi, kiM vAcikena 
granthaprAcuryasampAdakeneti cet, naivam | vAcike prayojanAntarasambhavena tadupAdAnAt | 
tathA hi - yastu vismRtyeSTadevatAstutinamaskArAdiM zravaNe pravartate, 
tenApyAdyazlokatrayapAThamAtrAdeva namaskAraH kRto bhavatIti prayojanAntarasambhavAt 
tadupAdAnamiti na kazcid virodhaH |

     athapadArthaH - cidghana iti caitanyaghanaH, caitanyasAraH, cinmAtra iti yAvat | athaiSa 
eva paramAnando'nantaro'pAro vijJAnaghanaH ityAdizrUteH, AdyantarahitaM zuddhaM 
cidAnandamayaM zivam ityAdismRtezca bhagavataH zambhozcidrUpatvaM siddham | tathA 
zivena sUtrakartrA - caitanyamAtmA (1|1) ityanena 
prathamasUtreNAtmanazcaitanyarUpatvamupavarNitamityupapannaM cidghana iti |
	eka iti | advitIya ityarthaH | ekamevAdvitIyam (chA0 u0 6|3|1), ahamekaH 
prathamamAsaM vartAmi ca bhaviSyAmi ca nAnyaH kazcinmatto vyatiriktaH (atha0 u0 1) 
ityAdizruteH | tathA - eko rudro na dvitIyAya tasthe (3|2) iti zvetAzvatare | eka eva rudro na 
dvitIyAya tasthe (tai0 saM0 1|8|6|1) iti traiyambakAdhyAye | nIlarudre ca - sarvo rudrastasmai 
rudrAya namo'stu (tai0 A0 10|16|1) ityAdinA'dvitIyatvapratipAdanAdupapannaM 
zivAdvitIyatvamiti | na ca pratyakSAdipramANairanekArthAvabhAsAdanupapannaM 
zivAdvitIyatvamiti vAcyam, ekasyApyavasthAnabhedenAnekadhA bhAsanopapatteH | yathaikasyaiva 
mRtpiNDasya ghaTazarAvakumbhakuDyamRdaGgAdyAtmanA'vasthAnabheda-vazenAnekadhA 
bhAsanam, suvarNapiNDasyaikasyaivAGgulIyakarucakakaTakamu-kuTAdyavasthAnabhedavazena, 
evamekasyaiva sato rudrasya ghaTaH san paTaH san kusUlaH san astItyAdi 
pratyakSato'khilarUpatayA'vabhAsasya ekaM sad viprA bahudhA vadanti (R0 1|164|46), ekaM 
santaM bahudhA kalpayanti (R0 10|114|5) ityAdizrutitazcAvasthAnabhedavazenAnekadhA 
bhAsanamupapadyata iti na pratyakSAdivirodhasambhavaH, apauruSeyatayA'sambhavaddoSeNa 
svataHpra-mANabhUtena prabalena vedarAzinA zivAdvitIyatvasya siddhatvAt, 
tadviparItadurbalapratyakSAdisiddhAnekatvasya bAdhyatvAcca | tathA hi veda-
vAkyAnAmapauruSeyatvaM pratipAdyate | tenAprAmANyakAraNAnAma-
jJAnarAgadveSAdInAM vedavAkye'sambhavAdaprAmANyAsambhavaH | nahi zabde svato 
doSaH sambhavati, AptAnAptavAkyayoH prAmANyAprAmANya-niyamasambhAvanAt | nahi 
vaktRgatadoSadabhAvAnusAraM vinA svato doSaguNAbhyAM 
prAmANyAprAmANyayorabhyupagame tanniyamaH sambhavati, AptyanAptyostadakAraNatvAt | 
nityasya vedarAzeranAptakRtatvA-bhAvenAprAmANyAsambhavAt, svataH pramANatve sati 
tatsiddhazivAdvitIyatvasya prabalapramANasiddhatvAnna pratyakSAdivirodhasambhavaH | na ca 
kartrabhAvena guNasyApyabhAvAt prAmANyasyApyabhAva iti vAcyam, 
vyutpannapadapadArthasya tadvAkyazravaNasamantarameva tadarthaviSayapramotpatterupalambhAt | 
guNasadbhAvazca na prAmANyakAraNam, aprAmANyakAraNabhUtadoSaparihArArthatvAditi | 
tathA tatparavedasiddhatvAcca zivAdvitIyatApratipAdakasya vAkyasya tatra tAtparyaM 
SaDvidhaliGgasadbhA-vAdavagamyate | taduktaM nyAyavidbhiH - 
AdimadhyAntasaGgAnamabhyAso'pUrvatA phalam | arthavAdopapattI ca liGgaM 
tAtparyanirNaye || iti | etAni liGgAni rudrAdvitIyatApratipAdakazrutau santyeva |

	tathA hi - zarvo vai rudraH (ma0 nA0 u0 10|11), puruSo vai rudraH (ma0 nA0 u0 
10|11), sarvo hyeSa rudraH (tai0 A0 10|16||1) ityAdimadhyAntasaGgAnAkhyaM 
tAtparyaliGgamupalabhyate | tathA sarvo vai rudraH (tai0 A0 10|16|1), sarvo hyeSa rudraH (tai0 
A0 10|16|1) ityasakRdupadezAdabhyAsalakSaNaM ca tAtparyaliGgaM siddham |

tathA - vizvaM bhUtaM bhuvanaM citraM bahudhA jAtaM jAyamAnaM ca yat (ma0 nA0 u0 
10|11), sarvo hyeSa rudraH (tai0 A0 10|16|1) ityAdizrutArtha-svarUpaM ca tAtparyaliGgaM 
sidhyati | tathA tamevaM vidvAnamRta iha bhavati (tai0 A0 3|1|3), vidyayA vindate'mRtam (ke0 
u0 2|4), AtmA jJAtavyaH, tarati zokamAtmavit (chA0 u0 7|1|3), na ca punarAvartate (chA0 
u0 8|15|1), bhUyazcAnte vizvamAyAnivRttiH (zve0 u0 1|10), ya evaika udbhave sambhave ca 
(zve0 u0 3|1), ya etaM viduramRtAste bhavanti (zve0 u0 3|1) ityAdibhiH zivAtmaikatvajJAnasya 
phalazravaNAt tatpratipAdakazrutInAM tatra tAtparyasiddhiH | tatra ko mohaH kaH zoka 
ekatvamanupazyataH (I0 u0 7) iti stutyarthavAdasadbhAvAdekatve tacchrutestAtparyaM sidhyati | 
tathA - ya etasminnudaramantaraM kurute, atha tasya bhayaM bhavati, aviduSastvatha tasya 
bhayaM bhavati (tai0 u0 2|7) ityAdinindArthavAdasadbhAvAcca tatsiddhiH | tathA - sarvo vai 
rudraH (tai0 A0 10|16|1) ityAdivAkyasiddhaM rudrasya sarvAtmakatvaM vAkyAntareNa puruSa 
evedaM sarvaM yadbhUtaM yacca bhavyam (zve0 u0 3|15; R0 8|4|17) ityanena virudhyeta | tatra 
puruSo vai rudraH  (ma0 nA0 10|11) ityavirodhopapAdanAdupapattyAkhyaM ca tAtparyaliGgaM 
sidhyati | tathA sadeva somyedamagra AsIt (chA0 u0 6|2|1) 
ityAdivAkyAntarasiddhasadadvitIyatvavirodhaM ca pariharad rudraH san (mahAnA0 13|2) iti 
vAkyamupapAdakam | tathA vedAhametaM puruSaM mahAntam (zve0 u0 3|7) ityAdinA 
nAnyaH panthA ayanAya vidyate (zve0 u0 3|7) ityantena zrutivAkyena 
siddhamahApuruSAdvayatvavirodhaM ca rudraH san mahaH (mahAnA0 13|2) iti vAkyaM 
pariharadupapAdakam | tena sutarAM rudrAdvitIyatve'syAH zrutestAtparyasiddhiH | 
tadetadanuvAdasiddhaM zivAdvitIyatvamAzrayaNIyam, anyathA tadAnarthakyAditi | 
taduktamAryAkAreNa - 

ajJAto'rthaH phalavAnasakRt sambhAvitazca dRSTAntaiH |
paurvAparyAnugataH zrutaH kathaM kathyate tathA neti || iti |

     tasmAnna pratyakSAdinA durbalena bAdhAvakAza iti | pradhAna iti vA, na vA ojIyo 
rudra ! tvadasti (R0 2|33|10; tai0 A0 4|5|7), bhISAsmAd vAtaH pavate bhISodeti sUryaH | 
bhISAsmAdagnicendrazca mRtyurdhAvati paJcamaH || (tai0 u0 2|7 - 8) ityAditaittirIyAt 
zvetAzvatarAcca sarvaprAdhAnyaM bhagavato mahezvarasya rudrasyAvagamyate | tathAhi - ya 
evaiko jAlavAnIzata IzanIbhiH sarvAn lokAnIzata IzanIbhiH (zve0 u0 3|1) ityAdi | 
sarvasmAdadhikatvaM ye na vadanti pinAkinaH | sAdhAraNaM smarantyenaM sadArastvaM 
samAviza || (2|6|58-59) ityuktaM laiGge purANe | tasmAt tatprAdhAnyaM zraddhAtavyamiti |
	vyApo'syAstIti vyApI, sarvagata ityarthaH | agatvA sarvamUrtasaMyogitvaM 
sarvagatatvaM | agamanaM ca sarvatra sadbhAvAd gaganavaditi, AkAzavat sarvagatazca nityaH 
ityAdizruteH | sa hi sarveSu bhUteSu sthAvareSu careSu ca | vasatyeko mahAvIryo 
nAnAbhAvasamanvitaH || ityAdismRtezca | na cAkAzavadevAsya jaDatvamiti vAcyam, 
cidrUpatApratipAdakazrutivirodhAt | athavA vyApitvaM sarvasvarUpatvamekatve hetutayoktam | 
tacca - 

sa ijjyotiH sa yajamAna AsIt so mAtarizvA sa udeti sUryaH | sa candramAH sa pRthvI 
jalASaH sa AkAzo vizvA bhuvanA viveza || iti mUrtyaSTakapratipAdakaliGgasUktizrutisiddham 
|
	nitya iti avinAzItyarthaH | kSaraM pradhAnamamRtAkSaraM haraH (1|10) iti 
zvetAzvatarazruteH | kAlatrayavyApitvaM vA nityatvaM tadrAhityaM vA, sarveSu 
kAleSvanusantatAtmA ityAdi-zruteH, parastrikAlAdakalo hi dRSTaH (6|5) 
ityAdizvetAzvatarazrutezca tadavagamaH | 
     satatodita iti | satataM sarvadA udayaH prakAzo yasyAsau tathoktaH | 
anuditAstamitaprakAzaH, svayaMprakAza ityarthaH | atrAyaM puruSaH svayaMjyotiH (bR0 u0 
4|3|9) iti zruteH, sarvagaH puruSaH paraH (2|2|17) itIzvaragItAsmRtezca tadavagamaH | prabhuriti 
| kartRkarmakaraNAdisakalakArakArthavAhitvarUpApratihataizvaryaM prabhutvam | tacca - 
yathorNanAbhiH sRjatyevamevAsau sRjati (mu0 u0 1|1|7) iti zruteH, saMsArahetuH saMsArI 
mokSahetuzca nirvRtaH, prajAyase janayasi janyase muhuH ityAdismRtitazca siddham | karaNAdiM 
vinA sakalakAryajanakatvaM vA tacca- AtmA vA idamekamevAgra AsInnAnyat kiJcana miSat 
| sa IkSata lokAnnu sRjA iti | sa imA|llokAnasRjata (ai0 u0 1|1) ityAdizrutyavagatam | 
niSkriyakartRtvaM vA | yathA maNirayaskAntasAnnidhyAdupakArakaH | 
ayasazcalatastadvacchivo'pyasyeti sUrayaH || (zi0 pu0 7|1|31|89), yathA sannidhimAtreNa gandhaH 
kSobhAya jAyate | manaso nopakartRtvAt tahAsau paramezvaraH || 
ityAdipurANAgamAdavagataM tasya tatprabhutvam, zramAdyasambhavAt | 
savyApArakartRtvasyAprabhutva-rUpatA ca zramAdiyogAt |
	tatra hetumAha - zAnta iti | sarvavyApArarahitaH zivo yataH, ato'sau prabhuriti | 
athavA jagatsRSTisthitidhvaMsAdikarmasambandhavazAt karmavazyazarIrAdiprasaGgena yA 
saMsAritvaprasaktirbhagavataH, sA ca niSidhyate - zAnta iti | 
sarvakriyArahitatayodAsInasvabhAvasya paramezvarasya sarvajJasya na paragatakriyayA 
saMsArasaMbhava iti, niSkalaM niSkriyaM zAntaM nirguNaM taM niraJjanam (zve0 u0 6|19) 
ityAdizrutestadavagamAt | tathA - pazyanti RSayo muktAH svAtmAnaM paramArthataH | 
vikArahInaM nirduHkhAnandamAtmAnamavyayam || (2|2|13) itIzvaragItAsmRtezca | mukta iti vA, 
tadekamajamavyaktaM nityaluptamaluptadRk ityAdizruteH, ahaM brahmAvyayaH zAnto nirmalo 
niSkriyo'vyayaH | ekAkI bhagavAn muktaH kevalaH paramezvaraH || (I0 gI0 2|8|2) 
ityAdismRtezca tadavagamaH |

	jayatIti | sarvotkarSeNa vartata ityarthaH | yasmAt paraM nAparamasti kiJcit (zve0 u0 
3|9), aNoraNIyAn mahato mahIyAn (kaTho0 2|20) ityAdizrutestadavagamAt | sarvendriyebhyaH 
paramaM mana AhurmanISiNaH | manasazcApyahaGkAramahaGkArAnmahAn paraH || mahataH 
paramavyaktamavyaktAt puruSaH paraH | puruSAd bhagavAn prANastasya sarvamidaM jagat || 
prANAt parataraM vyoma vyomAtIto'gnirIzvaraH | IzvarAnna paraM kiJcit (I0 gI0 2|3|18-20) 
ityAdismRtezca | svopAsakAnAM zravaNAdyupajAtaparamArthadarzane 
jJAnAderabhibhavAdabhibhavo vA jayaterarthaH | tathA sarvamAtmano vaze kRtvA vartata iti 
vazIkAro vA | tathA layodaye nikhilakAryajAlaM svAtmanyeva svIkRtyAsta iti svIkAro vA |

     jagadekabIjamiti | jagataH kAlAdeH kAryajAtasya ekaM pradhAnaM bIjaM kAraNam, 
mUlakAraNamiti yAvat | athavA jagatAmekaH kartA ca bIjamupAdAnaM ceti jagadekabIjam, 
nimittopAdAnabhUta iti yAvat | yato vA imAni bhUtAni jAyante yat prayantyabhisaMvizanti 
(tai0 u0 3|1), eko rudro mRtyuravyaktamekaM bIjaM vizvaM deva ekaH sa eva (I0 gI0 2|8|16) 
ityAdizruteH, asmAddhi jAyate sarvamatraiva pravilIyate (2|2|6) itIzvaragItAsmRtezca 
paramezvarasya jagadupAdAnabhAvo gamyate | tathA - dyAvAbhUmI janayan deva ekaH (R0 
10|81|3), bhuvanasya pitaraM gIrbhirAbhiH (R0 6|49|10), sa vizvakRd vizvavidAtmayoniH (zve0 u0 
6|16) ityAdizruteH, sargakAle ca karoti sargam ityAdismRtezca tasya nimittabhAvo'vagamya iti 
mAyAzarIrasya paramezvarasya jagannimittatvopAdAnatve sambhavata iti na vikAritvAdiprasaGgaH 
|
	sarvAnugrAhaka iti | sarveSAM cetanAnAmacetanAnAM cAnugrahaM mokSA 
(dyaM?khyaM) karotIti tathoktaH | vakSyati ca - muktimaNUnAm (zlo0 35) iti | nanu yadi 
svaprayojanArthamanugrahakaraNam, tarhi sarvAnandatvahAniH, tatsAdhyasukhasya tadutpatteH 
prAgasattvAt | svaprayojanAbhAve tu pravRttyasaMbhavaH | taduktaM nyAyavidbhiH - 
prayojanamanuddizya na mando'pi pravartate | yadi prayojanoddezo hIyetAnandarUpatA || iti | 
naivam, karuNayA svabhAvato vA pravRttyupapatteH | nanu yadi karuNayA'nugrahakaraNam, tarhi 
mokSamevAsau sRjet, na saMsArAtmakaM jagatsarjanam, tasyAnyAyyatvAt | tathA hi - 
duHkhadarzanapUrvakaM karuNayA pravartamAnAnAM tadduHkhasaMprahANAyaiva 
pravRttirucitA, na tadduHkhasampAdanAya | ato na yuktaM duHkhAtmakaM jagatsarjanam | 
naivam, ajJAnanivRttyAtmakasyApavargasya jJAnatatkAraNAdyapekSatvena jagatsarjanopapatteH | 
tathA hi - jJAnaM tAvadaparokSabhUtamapavargakAraNam | AparokSyaM ca 
nididhyAsanenAvidyAsaMskAratiraskAre satyudbhavati | nididhyAsanaM ca 
zravaNamananAbhyAM zivAtmajJAne saMjAte sambhavati | te cAntaHkaraNazuddhitaH 
saMjAyete | sA kAmyapratiSiddhakarmaparihAreNa nityanaimittikakarmAnuSThAnAd bhavati | 
tadanuSThAnaM pazusasyarAjarakSAdipUrvakam | ato yadidaM tat sarvaM mokSazeSamiti na 
vyarthaM jagatsarjanam | kAmanAzrutayazcaihikaphalAH citrayA yajeta pazukAmaH (tai0 saM0 
2|4|6|1) ityAdaya aihikaphalaniviSTacittAn viprAn vaidikamArge pravartayituM pravRttAH, 
svargaphalAzca tadutsukAniti | ye ca zatrunAzotsukAstAn vaidikamArge pravartayituM zyenA 
(ci?ji) rAdyabhicArakarmavidhayazceti | tatazca vihitasnAnapApakSayakarmA-
nuSThAnAnvAdhAnAgnihotrAdinA kramAt manazzuddhisambhave sati kAmanAnivRttau 
nityanaimittikakarmAnuSThAnAd AtmavividiSArUpAntaHkaraNazuddhyudbhave 
zravaNamananAbhyAM zivAtmajJAne saMjAte nididhyAsanAbhyAsAd 
avidyAtatsaMskArApanayanAntaraM zivAtmAparokSye sati mokSa iti | taduktaM 
mokSadharmAdau - sarvatra vihito dharmaH svargaH satyaphalodayaH | bahudvArasya dharmasya 
nehAsti viphalA kriyA || (ma0 bhA0 12|174|2) iti | atra ye mahezvaraniyukte zraute smArte vA 
karmaNi pravartante, te mucyante; ye tu na pravartante, te saMsaranti | 
taduktamaitareyopaniSadAdau - eSa panthA etatkarma tasmAnna pramAdyeta nAtIyAd na 
hyatyAyat pUrve ye'tyAyaMste parAbabhUvuH (1|1|1) ityAdi | anugrahasvabhAvatvAdvA 
pravRttiH | tadA ca tasya kAraNApekSitayA na sakalajaganmokSaprasaGgaH |

taduktaM zrIvAyavIye - anugrahasvabhAvatve na sarvAn mocayecchivaH | svabhAvo'pi hi 
bhAvAnAM bhAvino'rthasya kAraNam || nahi svabhAvato'santamarthaM kartaiva sAdhayet | 
yathA vikAsayatyeva raviH padmAni bhAnubhiH || samaM na vikasantyeva 
svasvabhAvAnurodhataH | evaM pakkamalAneva mocayenna zivaH parAn || (zi0 vA0 1|31|55-57) 
ityAdi |
	zambhuriti | zaMsukhaM tasmin bhavatItizambhuH, svayamAnandarUpa ityarthaH | 
vijJAnamAnandaM brahma (bR0 u0 3|9|28) ityAdizruteH, AnandamajamavyaktaM niSkalaM 
tadudAhRtam ityAdIzvaragItAsmRtezca tadavagamaH | nanu zivasyAnandamayatve 
prItyAtmakasattvaguNarUpatvena saguNatvAt pariNAmAdidoSaprasaGgaH | tathA hi 
sAMkhyAcAryairuktam - prItyaprItiviSAdAtmakAH prakAzapravRttiniyamArthAH | 
anyonyAbhibhavAzrayajananamithunavRttayazca guNAH || (sAM0 kA0 12) iti | naivam | 
prItyAnandazabdayorbhinnArthatvAt | tathAhi - viSayendriyasamprayogajanyAnityasAtizayasukhaM 
prItizabdenocyate, satataikarUpanityaniratizayAtmasvabhAvasukhamAnandazabdavAcyamiti 
noktadoSAvakAza ityeke | anye tu sattvaguNe nirmale puNyahetunA viSayendriyasaMprayogeNa 
pariNate nityasukhameva pratibimbitaM prItizabdenopadiSTam, etasyaivAnandasyAnyAni bhUtAni 
mAtrAmupajIvanti (bR0 u0 4|3|32) iti zruteH sattvaguNasya na sukhAtmatA, 
sukhapratibimbAzrayatayA sukharUpatvAbhidhAnamiti manyate || 1 ||


vRttiH

     zivaM praNamya SaTtriMzattattvAtItaM sazaktikam |
     vyAkhyAM tattvaprakAzasya sphuTAM laghvIM karomyaham ||
     advaitavAsanAviSTaiH siddhAntajJAnavarjitaiH |
     vyAkhyAto'trAnyathA'nyairyat sa tato'smAkamudyamaH ||

     tatra tAvadAcAryaH prAripsitasya prakaraNasyAvighnaparisamAptyarthaM 
sidhAntazAstrapravRttinimittaM sakalatattvAtItaM niSkalaM paramazivamAdyayA''ryayA stauti - 
cidghana iti |
	cicchabdenAtra jJAnakriye vakSyete | taduktaM zrImanmRgendre - caitanyaM 
dRkkriyArUpam (vi0 2|5) iti | cideva ghanaM deho yasya sa cidghanaH | na tu 
karmakAlAdIzvaravAdinAmiva jaDaH, acetanasya cetanAdhiSThAnaM vinA pravRttyayogAt | na 
cAsya baindavazarIrAdyupagamoyuktaH, anIzvaratvaprasaGgAt | tasya ca kartrantarApekSAyAM 
svakartRkatve'nyakartRkatve vA'navasthAprasaGgAcca | ekaH advitIyaH | na 
tvanekezvarapakSo'pi yuktaH, rathAdInAmapyanekakartRkANAmekecchAnuvartanaM 
vinA'nutpatteH | yaduktam - bahavo yatra netAraH sarva paNDitamAninaH | tathA 
mahattvamicchanti dadvyaktamavasIdati || iti | anena pravAhezvarapakSo'pi nirastaH, aizvaryasya 
svarUpavyaktilAbhAtmakatvena vinAzAnupapatteH | vyApI sarvagataH na tu 
kSapaNakAdInAmiva zarIraparimitaH, saGkocavikAsadharmI vA, 
tAdRzasyAcetanatvAnityatvAdidoSaprasaGgAt | nityaH AdyantarahitaH | na tu bauddhAdInAmiva 
kSaNikaH, utpattikAla eva nazyatastasya jagatkartRkatvAsaMbhavAt | nanu 
muktAtmAno'pyevaMbhUtA evAta Aha - satatoditaH | nityamuktaH | na tu muktAtmAna 
ivezvarAntaraprasAdamuktaH, anavasthAprasaGgAt | prabhuH prabhavanazIlaH | na 
tvIzvarAntaraprerya ityarthaH | prAguktAdeva hetoH |

     nApyakartA, jagatkartRtvenaivAsya siddheH | zAntaH rAgadveSAdirahitaH, moho 
madazca rAgazca viSAdaH zoSa eva ca | vaicitryaM caiva harSazca saptaite sahajA malAH 
|| (ma0 pA0, vi0 6|103-104) tatkAraNasya malAderasaMbhavAt | kiM 
punarevaMbhUtasyezvarasya sadbhAve pramANamiti cedata Aha- jagadekabIjamiti | jagataH 
nimittakartA | ayamabhiprAyaH - sannivezAdimattvena jagataH kAryatvaM buddhvA tasya 
nimittaM kAraNamIzvarAkhyaM kAryatvena hetunA'numIyate | yadyat sAvayavaM tattat 
kAryam, yadyat kAryaM tattat sakartRkamiti nyAyAt | yacchrUyate - (pauSkarAgamasya 
zloko'yamiti lu0 saM0, bhA0 2, pR0, 120 ityato'vasIyate) vivAdAdhyAsitaM vizvaM 
vizvavitkartRpUrvakam | kAryatvAdAvayoH siddhaM kAryaM kumbhAdikaM yathA || iti | 
zrImanmataGge'pi - nimittakAraNaM tvIzaH (vi0 6|99) iti | ayaM 
cezvaravAdo'smAbhirmRgendravRttidIpikAyAmuktastata evAvadhAryaH |
	sarvAnugrAhakaH | anugrahazcAtropalakSaNaM sRSTyAderapi | atazca 
sRSTisthitisaMhAratirobhAvAnugrahAkhyaiH paJcabhiH kRtyaiH sarveSAmAtmanAM 
bhogamokSaprada ityarthaH | sarvakartRtvAdeva cAsya sarvajJatvaM siddham, ajJAtasya 
kAraNAsaMbhavAt | uktaM ca - sarvajJaH sarvakartRtvAt sAdhanAGgaphalaiH saha | yo 
yajjAnAti kurute sa tadeveti susthitam || (mR0 vi0 5|13) iti | evaMbhUtaH zambhuH paramezvaro 
jayati sarvotkarSeNa vartate, proktaireva hetubhiriti || 1 ||

nodayati yanna nazyati nirvAti na nirvRtiM prayacchati ca |
jJAnakriyAsvabhAvaM tattejaH zAmbhavaM jayati || 2 ||
     
     tAtparyadIpikA

	asya prathamazlokasya sakalazAstrArthasaMgraharUpatvAd 
etatsUcitAmiSTadevatAstutimuttarazlokena vivRNoti | athavA iSTadevatAstuticchalena niSkalaM 
prApyaM zivatattvamabhidhAya tatprAptyupAyabhUtaM sakalaniSkalAtmakaM tejo 
jyotirliGgAdirUpeNAvasthitaM stauti - nodayatIti |
	ayamarthaH - yat tejo nodayati nAvirbhavatyAdityAdivat | na ca nazyati nAstaM gacchati 
| nirvAti na, na mucyate | ajJAnatanmUlarAgadveSatatprayuktapravRttidharmAdharmatadvazya-
zarIrendriyAdyabhAvena saMsArAbhAvAt | ajJAnAbhAvazca sarvajJatvAt | 
apakSayalakSaNavinAzapratiSedho vA nirvANam, nitarAM vAnam apakSayo nyUnatvam, 
tannAsti, satataikarUpatvAt | tacca nityatvAt | nirvRtiM prayacchati ceti | nirvRtirmuktiH, tAM 
prayacchati pradadAti svopAsakAnAmiti | jJAnakriyAsvabhAvaM jJaptRkartRsvabhAvaM 
tacchAmbhavaM zambhoridaM zAmbhavaM tejaH, itaratejonikarebhya uktaiH kAraNairutkRSTamiti | 
athavA zAmbhavam tejorUpaM mantrAtmakaM vigraham, tatprAptyupAyabhUtaM sakalamiti 
yAvat | jayatIti | sarvasmAdupari vartate ityarthaH | kutaH ? asya 
vigrahasyottaravigrahavadutpattinAzAdyabhAvAt | tacca vedamayatvAd vedasya ca nityatvAditi || 2 
||

bRttiH
	
	evaM dharmizvarUpaM zivaM prastutya dharmasvarUpasya tatsAmarthyasya 
layAvasthAM stutivyAjena darzayati- nodayatIti |
	utpattivinAzazUnyamityanena tadyogino bauddhajJAnAccaitanyAtmanaH zivatejaso 
vizeSaM darzayati | yadyevam- caitanyaM dRkkriyArUpaM tadasyAtmani sarvadA (vi0 2|5) iti 
zruterAtmasAmarthyAcchivasAmarthyasya (mRgendrAgamo'tra zrutitvena nirdiSTaH |) ko vizeSa 
ityata Aha - nirvAti na nirvRtiM prayacchatIti | ayamasya pazusAmarthyAdvizeSo darzitaH, 
yadidaM kenApi na macyate tattvanena pAzavimocanena prakaTIkriyata iti | kiM tataH ? ityata 
Aha - jJAnakriyAsvabhAvaM tattejaH zAmbhavaM jayatIti | ciddharmatvAdevedamapi 
cidAtmakamityarthaH | yacchrUyate? - zaktirnAcetanA citaH (mR0 vi0 3|4) iti || 2 ||

zakto yayA sa zambhurbhuMktau muktau ca pazugaNasyAsya |
tAmekAM cidrUpAmAdyAM sarvAtmanA'smi nataH || 3 ||

tAtparyadIpikA

	evaM mahezvaraM stutvA mahezvarIM mahAdevavallabhAmakhilabhuvanajananIM 
nityasahitAm- eSa te rudrabhAgaH saha svasrA'mbikayA taM juSasva (vA0 saM0 3|57; tai0 
saM0 1|8|6|12) ityAdizrutisiddhapUjAstutyAdisAhityapradarzanAya phalAptaye ca stauti- zakta iti 
| 
	ayamarthaH- yayA zaktyA bhagavAn mahezvaraH pazugaNasyAsya bhuktipradAne 
muktipradAne ca zaktaH samartho bhavati, tAM nato'smIti mahezvarIstutikartavyatA pratipAditA, 
tayA vinA bhagavato'nugrAhakatvAsaMbhavAt | tathAhi- zivasya sarvagatasya kevalasya 
niSkriyasyodAsInatanoH pazusamudAyaM prati bhuktimuktipradAnAsaMbhavAcchaktimata eva 
tatpradAnopapattiH | ataH zaktisahitasyaivAnugrAhakatvamiti | ekAmiti | advitIyAmityarthaH | nanu 
ziva eva sarvamiti pUrvaM zivAdvitIyatvaM pratipAditam, ataH kathamihAdvitIyatAvAcoyuktiriti 
cet, sarvasyApi vastuno devIdevAtmakatvasadbhAvenobhayAdvitIyatAvacanopapatteriti brUmaH | 
tathAhi- kevalAtmAvasthAnalakSaNasyApavargasya tAvaccidAnandarUpatayA devIdevAtmatA 
vidyate | mokSasyAnandarUpatvAbhAve puruSArthatA hIyeta, sukhasyaiva mukhyapuruSArthatvAt 
| na ca duHkhAbhAvasyApi puruSArthatayA'pavargasyAnandarUpatvAbhAve'pi 
duHkhasaMsparzaviraheNa puruSArthatvasaMbhava iti vAcyam, duHkhAbhAvasya 
sukhAnuguNatayA puruSairarthyamAnatvena mukhyapuruSArthatvAbhAvAt | tasmAt sukhasyaiva 
mukhyapuruSArthatvenAnandarUpatA'pavargasyAzrayaNIyA | sA cAnanubhUyamAnA na 
puruSArthatAM bhajata iti tadanubhavo'pyAzrayaNIya iti sukhacidAtmako mokSa iti tasya 
devIdevAtmakatvasiddhiH | tatra paramAnandasaMvid devI saMvidAnando deva iti, eSA vidyA 
hyahaM vedyaH iti purANAgamAt tadavagamaH | tathA devImantrakalpe coktam- AdinAtha 
RSizchando devI gAyatri ucyate | devatA paramAnandasaMvidatropadizyate ||

     iti | bhuvanezvarIkalpe ca- bodhasvarUpavAcI saMvit proktA ca devatA gurubhiH iti | 
tathA- vijJAnamAnandaM vrahma (bR0 u0 3|9|28) ityAdizrutezca tadavagamaH | 
yA'nubhUtirajAmeyAnantAtmAnandavigrahA | mahadAdijagan-mAyAcitrabhitiM namAmi tAm || 
ityabhiyuktavacanAcca tadavagamaH | na ca saMvitsukhe parasparamAtmanazca bhinne 
AtmaguNarUpe iti vAcyam, cidAnandAtmakaH zivaH ityAdizrutivirodhAt, bhedAbhyupagame 
tadguNatvAsaMbhavaprasaGgAcca | nanu cidAnandayorabhede'nyatastadanubhavAsaMbhavAt 
svayaMprakAzatayA mokSasaMsArayoravizeSaprasaGgaH ? naivam,  saMsArAvasthAyAM 
japAsannihitasvayamprabhasphaTikavadAtmano'satkalpatayA''nandAnu-bhavAsaMbhavenAvirodhAditi 
| tadidam AnandaM (AnandaM brahmaNo rUpaM tatra mokSe pratiSThitam iti 
prAmANikavacanaM yoginIhRdayadIpikAyAM (3|108) dRzyate | kulArNave'pi (5|80) vacanamidaM 
vartate |) brahmaNo rUpaM tacca mokSe'bhivyajyate iti zrutisiddham | 
     nanvastu zuddhatattvasya devIdevAtmatA | kAraNatattvasya mAyAzabalitasya kathaM 
devIdevAtmateti cet, nimittopAdAnabhAvenAvasthAnAditi brUmaH | taduktaM laiGge- 
asyASTamUrteH zarvasya zivasya gRhamedhinaH | gRhiNI prakRtirdivyA prajAzca mahadAdayaH 
|| iti | kAryatattvasya cAta eva cidacidAtmatayA devIdevarUpatvam | tathA ca bhUtAnAM 
caturdazavidhAnAM dehadehyAtmanA dvairUpyAd devIdevAtmatA | nanu bhUtAnAM kathaM 
devIdevAtmakatvam ? tadvibhUtitvAditi brUmaH | tathA ca bRhadAraNyakazrutiH- ekAkI na 
ramate | sa dvitIyamaicchat | sa haitAvAnAsa | puMstvaM strItvaM cApAtayat | patanAt patiH 
patnI ca | sA gaurabhavat | RSabha itaraH | tAbhyAM gAvaH | sA vaDavA'bhavada-zva 
itaraH | tAbhyAmazvAH (bR0 u0 1|4|3-4) ityAdivAkyairakhilajantvAtmanA 
devadevyorjagatkAraNayoravasthAnAvabhAsAdakhilasya tadvibhUtitvasiddhiH | mAnave ca-
     
     dvidhA kRtvAtmano dehamardhena puruSo'bhavat |
     ardhena nArI tasyAM ca virAjamasRjat prabhuH || (ma0 smR0 1|32)
     
     pu|lliGgamakhilaM devaH strIliGgaM paramezvarI
     
     iti laiGgavacanAcca tatsiddhiriti | 
mahezvarImahezvarayorbhedAbhAvenobhayAdvitIyatvavacanam | tathA hi- ekameva zivatattvaM 
puMlliGgastrIliGga-napuMsakaliGgazabdairvyavahriyate, bhAvAnAM tattraividhyadarzanenAsyApi 
bhAvatayA'nyatamarUpaprasaktau tanniyAmakAsaMbhavAt | tathA hi- zivatattvasya 
strItvanapuMsakatvayorabhAvena ghaTasya ghaTazabdeneva mahezvarazabdena pu|lliGgena 
vyavahAraH | na ca puMstvasadbhAvAd ghaTasya ghaTazabdena vyavahAra iti vAcyam, 
puMstvasyAtyantamatrAnupalambhAt | tathApi tasya sattvAbhyupagame zazaviSANAderapi 
sattvaprasaGgaH | tathA puMstvanapuMsa-katvayorapyabhAvAcchiveti strIliGgazabdena vyavahAraH 
| na ca tasya strItvasadbhAvAditi vAcyam, zAlAmAlAdizabdAnAM tadabhAvena svArthe 
vRttyabhAvaprasaGgAt | na ca ghaTAdau strIliGgazabdasyApi pravRttiprasaGga iti vAcyam, 
paGkajazabdasyeva kvacideva pravRtteriSTatvAt | evaM puMstvastrItvayorapyabhAvAcchivatattvasya

     napuMsakaliGgena brahmetyanena zabdena vyavahAraH, na ca napuMsakatvasadbhAvAt, 
kuNDamitrAdizabdAnAM tadabhAvena svArthe vRttyabhAvaprasaGgAt | tathA 
puruSAdizabdAnAmitararUpAsattvAd nimittAt pravRttirjJeyA, lAghavasya sadbhAvAdAtmani ca 
puMstvarahite vRttisadbhAvAcceti | 
tasmAnmahezvarImahezvarayorbhedAbhAvAdupapannamubhayAdvitIyatvavacanamiti | taduktaM 
bRMhaNyAm-
	
	zivo devaH zivA devI zivaM jyotiriti tridhA |
	aliGgamapi yattattvaM liGgabhedena kathyate || iti ||
	
	bhagavatA zrIbAdarAyaNena sanatsujAte coktam- sA pratiSThA tadamRtaM lokAste 
brahma tad yazaH | bhUtAni jajJire tasmAt pralayaM yAnti tatra ca || (ma0 bhA0 5|44|30) iti 
| puMstvAdyabhAvazca, naiva strI na pumAneSa naiva cAyaM napuMsakaH (5|10) 
ityAdizvetAzvatarazruteH, na ca strI na pumAneSa na caivedaM napuMsakam (zi0 vA0 1|5|48) 
ityAdizrIvAyavIyAgamAcca siddhaH | kathaM tarhi bhedena namaskAra iti cet, 
zivopalakSitazakteH zaktyupalakSitazivAd bhedopapatteriti brUmaH | 
zaktizaktimatorabhedAdadvitIyatopapattiH | na ca dharmadharmibhAvena 
zaktitadvatorabhedAsaMbhava iti vAcyam, kevalabhedAbhyu-pagame'syAyaM dharma iti 
vyapadezAbhAvaprasaGgAt | na ca sambandhasadbhAvAt tadupapattiriti vAcyam, 
sambandhasyApi sambandhAntarAbhyupagame'navasthAprasaGgAt | anAzrayaNe ca 
sambandhasya sarvasAdhAraNyenAsyAyamiti vyapadezAbhAvaH | tasmAd 
dharmadharmiNorabhedo'bhyupagantavya iti | kathaJcid bhedasyApi sadbhAvena bhedavyavahAro 
mukhodarAdibhedavyavahAravaditi | zivazaktyorabhede hetumAha- cidrUpAmiti | zivazcidghanaH, 
iyaM ca cidrUpA citsvarUpA cinmAtreti na tayorbheda iti | ayamarthaH zaivarahasye coktaH- 
agnyauSN-yavadadvaidhaM dvaidhaM ca mithaH kathaJcana dadhAte | zaktizivau vastvaikyaM 
maNiprabhAvad yato yuktam || iti | AdyAmiti | akhilakAraNatayA prathamodbhUtAmityarthaH | 
vakSyati ca- cidacidanugrahahetoH (zlo0 27) iti | siddhAntahRdaye coktam- sisRkSorAdya unmeSaH 
zaktisAmyAtmako'sya yaH | tadupAdhiH zivaH zaktitattvamityabhidhIyate || iti | sarvAtmanAsmi 
nata iti | manasA vAcA karmaNA prapanno'smItyarthaH || 3 ||

vRttiH

	idAnomadhikArAvasthAyAmapi zivasya zaktireva kAraNamityAha - zakta iti |
	zaktyAtmanaiva karaNenAtmanAM bhogamokSasiddhaye zivaH paJcavidhakRtyakaraNe 
zaktaH samartho bhavati, na tadvyatiriktena karaNAntareNa | nanu dehendriyarahitasya kartRtvaM na 
dRzyate ? iti cenna, tadrahitasyAtmanaH zaktimAtrAdeva svadehaspandAdau sAmarthyadarzanAt 
| uktaM ca- kAraNaM tu na zaktyanyat (mR0 vi0 3|4) iti | ekAmityanenAsyA icchAdibhedo 
vAmAdibhedazca jJeyakAryAdyupAdhibhedenopacArAnna tu paramArthata iti darzayati, 
ekaivAnekatAM yAti zivazaktirupAdhitaH iti zruteH | cidrUpAmityanena kAryabhedo'pi 
mAyAdivannAsyAH pariNAma iti darzayati, tasya jaDadharmatvAt | AdyAM 
pradhAnabhUtAm, samavetAm | anena parigrahazaktisvarUpaM bindumAyAtmakamapyasya 
bAhyaM zaktidvayamastIti

     sUcayati, upAdAnaM vinA jagadutpattyayogAt | vakSyati cAtra- kartrA vinA na 
kAryaM na tathopAdAnakaraNAbhyAm (zlo0 37) iti || 3 ||

	lokAnugrahahetoH karuNArasanirbhareNa cittena |
	tattvaprakAza eSo'smAbhiH kriyate samAsena || 4 ||

tAtparyadIpikA

	evamiSTadevatAstutyAdinA nirastasamastAntarAyaH zAstrakartA 
viSayasambandhaprayojanavacchAstraM kartuM pratijAnIte- lokAnugrahahetoriti |
	lokAnAM pazUnAmanugraho'pavargaH, tadarthamiti prayojananirdezaH | tadanabhidhAne 
zAstrasyAgrahaNaM syAditi | taduktaM bhagavatA bhaTTapAdena- sarvasyaiva hi zAstrasya 
karmaNo vA'pi kasyacit | yAvat prayojanaM noktaM tAvat tat kena gRhyate || (zlo0 vA0 1|12) 
iti | vakSyati ca- cidanugrahastvayaM kila (zlo0 36) iti | lokAnugrahahetoreSa tattvaprakAza 
ityukteH zAstraprayojanayoH sAdhyasAdhanabhAvasambandhasiddhiH, anyathA 
tAdarthyAsambhavAt | tattvAni prakAzyante pradarzyante yena zAstreNa sa tattvaprakAza 
ityanenAsya zAstrasya viSayaH pratipAditaH, tattvAnAmatra pratipAdyamAnatayA viSayatvAt |
	nanu ca zAstrAt pratipAdyamAnatattvaviSayajJAnamutpadyate | ataH 
kathamasyApavargasAdhanatvamiti ceducyate, tattvajJAnasyAvAntaravyApAratvena zAstrasya 
tatsAdhanatvopapatteH | tathAhi- zAstrazravaNAt tattvajJAnaM zAstraviSayamutpadyate | 
tasmin satyajJAnAnyathAjJAnayornivRttiH | tatastanmUlarAgAdyabhAvaH | tatastatkAryA 
pravittirnivartate | tato dharmAdharmayoranutpattiH | pUrvotpannayoH saMcitayoH dIkSAkarmaNA 
vinAzaH | arabdhakAryayostayorastazaravad viniyuktvAdupabhogAdeva prakSayaH | tataH 
zarIrAdyupAdhivirahAjjIvAtmanaH zivasvabhAvasya ghaTAkAzasya tadupAdhighaTavinAze 
paramAkAza iva paramezvare zive layo'pavargAkhyo bhavatIti | etaduktaM zrIkaurme 
(kAzIrAjanyAsamudrite kUrmapurANe zlokArdhasUcyAM vacanametannopalabhyate |)- 
ghaTAkAzamivAkAze sarittoyamivArNave | jIvo me vilayaM yAtu zivAkhye paramAtmani || iti 
| zivadharmottare ca- jagatastattvasaMbodhAdajJAnaM vinivartate | ajJAnavinivRttau ca rAgAdI-
nAmasambhavaH || rAgAdyupazamAt puMsAM puNyapApaparikSayaH | tatkSayAcca zarIreNa 
na punaH samprayujyate || azarIraM ca saMklezaiH sarvaireva na bAdhyate | klezamuktaH 
prasannAtmA mukta ityabhidhIyate || ityAdi | tasmAt zAstrAt tattvajJAnadvAreNApavargo 
bhavatIti siddham |
	nanu ca yadyasmAdeva zAstrAt tattvajJAnotpattiH, tarhi zAstrakar-
tustattvajJAnAbhAvaprasaGgaH, prAkzAstrAbhAvAt | na ca zAstraka-raNAnantaraM 
tacchravaNAt tasya tattvajJAnamiti vAcyam, tajjJAnA-bhAve 
tattvapratipAdakazAstrakartRtvasyaivAsambhavAt | nahyajJAte'rthe zabdaprayogo ghaTata iti | 
naitadevam, kiraNamAparamezvarAdiSu tattvAnAM pratipAditatvena tacchravaNAt tasya 
tattvajJAnopapatteH | na cAsmadAdInAmapi tathA tattvajJAnopapatteranArambhaNIyamidaM

     zAstramiti vAcyam, asmadAdInAM tathAvidhaprajJAsAmarthyA-bhAvena 
viprakIrNatayA vistareNa ca pratipAdyamAnatattvaviSayajJA-nasyAzakyasampAdanatvAt | atha 
tattvajJAnasyApavargasAdhanatve samutpannatattvajJAnAstvanantarameva mucyanta iti 
zAstrakaraNatad-vyAkhyAnAdyasambhavAd asmadAdInAM tattvajJAnAsambhavaH | atha 
zAstrakartA tadarthamavatiSThata eveti cet, na tarhi tattvajJAnamapavarge sAdhanam, 
tajjJAnasadbhAve'pyapavargAbhAvAditi | naiSa doSaH, 
zivAtmajJAnasyAparokSabhUtasyApavargajanakatvAbhyupagamAt | tathA hi- zraute 
tattvajJAne saMjAte'pi na bhavatyapavargaH, nididhyAsanasambha-vasya jJAnAparokSyasya 
tadAnImabhAvAt | zraute hi tattvajJAne saMjAte 
mananasApekSapunarnididhyAsanasaMbhavaM zivAtmaikatvaviSayamaparo-kSajJAnaM 
dehAdiviSayAparokSabhUtAjJAnanirasanAtmakamapavarga-mupajanayati, (taccA?a) 
parokSabhramasya parokSajJAnena nivRttyasaMbha-vAt | sa codIcyAmudita Aditya 
ityaparokSadigbhramasya tadudayapUrvaka-pUrvadiktvAnumAnena nivRttyadarzanAdanugamyate | 
punazcAbhyAsa-vazAdaparokSajJAnodbhave nivRttidarzanAcceti |
	tathA hi zrutayaH zrutizirasi vartamAnA ekamevArthamupapAdayanti | tathA ca- are 
AtmA draSTavyaH (bR0 u0 2|4|5) iti nirdvAreNApavarga-sAdhanaM zivAtmadarzanameva vihitam 
| tadupAyatvena zravaNamananani-didhyAsanAni vidhIyante- zrotavyo mantavyo nididhyAsitavyaH 
(bR0 u0 2|4|5) iti | tena na zravaNamAtrajanitaM vijJAnamapavargasAdhanam, kintu 
nididhyAsanasambhavaM zivAtmadarzanamiti gamyate | eSAM zravaNA-dInAM sadvAreNa 
nirdvAreNa cAtmadarzanaM pratyaGgatvam, zrotavyaH zrutivAkyebhyo mantavyazcopapattibhiH | 
jJAtvA ca satataM dhyeyaH iti, ete darzanahetavaH iti siddhaM ca | ato na 
zAstrakaraNatadvyAkhyAnAdya-saMbhavaH, tattvajJAninAM 
yAvadAparokSyamavasthAnAbhyupagamAditi | na ca 
zarIrAdivyatiriktAtmAsattvenAdhikAryabhAvAt svargApavargaphalada-midaM 
zAstramanArambhaNIyamiti vAcyam, zarIrAdivyatiriktasya nityasya jIvAtmanaH sadbhAvasya 
vakSyamANatvAt | na ca mokSatatsAdhanaprati-
pAdakazAstrAntarasambhAvanAdanArambhaNIyamidaM zAstramiti vAcyam, zAstrAntarANAM 
zivatattvApratipAdakAnAm- yadA carmavadA-kAzaM veSTayiSyanti mAnavAH | tadA 
zivamavijJAya duHkhasyAnto bhaviSyati || (zve0 u0 6|20) ityAraNavAkyena 
zvetAzvatareNApavargahetutA-pratikSepAcchivapratipAdakAnAM 
cetaratattvavyAvRttyAtmakazivajJAna-vidhAyakavAkyairapavargahetutA pratikSiptA | tathA hi- 
dvividhamiha zivajJAnamapavargakAraNam- itaravyAvRttyA, svarUpatazceti, zrutismRtyostathA 
vidhAnAt | AtmA jJAtavyaH prakRtito vivektavyaH, anyadeva tadviditAd atho aviditAt (keno0 
1|4) ityAdyAH zrutaya itaravyAvRttyA, satyaM jJAnamanantam (tai0 u0 2|1) Anandam (tai0 u0 
3|6), prajJAnaM brahma (ai0 u0 5|3) ityAdayaH svarUpato'pi vijJAnaM pratipAdayanti | 
nAyaM pRthvI na salilaM na tejaH pavano nabhaH | na prANo na mano'vyaktaM na zabdaH 
sparza eva vA || na rUparasagandhAzca nAhaMkartA na vAgapi | na pANipAdau no 
pAyurna copasthaM dvijottamAH || na kartA na ca bhoktA vA na ca prakRtipUruSau | na 
mAyA naiva ca prANazcaitanyaM paramArthataH || (I0 gI0 2|3|7-9) ityAdyAH smRtaya 
itaravyAvRttyA, AtmAyaM kevalaH svacchaH zAntaH sUkSmaH sanAtanaH | asti sarvAntaraH 
sAkSI cinmAtrastamasaH paraH || 

      (I0 gI0 2|2|4) ityAdyAH svarUpataH zivAtmajJAnaM pratipAdayantItyubhayathA 
vijJAnasyAzrayaNIyatvAt | tathAvidha-vijJAnasAdhanamidaM zAstramArambhaNIyamiti 
siddham | karuNArasanirbhareNa citteneti | karuNAyAH saMjAto rasaH karuNArasaH 
anujighRkSA | athavA karuNA cAsau rasazceti | tena nirbharaM vizRGkhalaM yat tat 
karuNArasanirbharam, tena | cittena manasA | na khyAtilAbhapUjArthaM zAstrakaraNam, kintu 
kevalaM karuNAnunnamAnasairasmAbhiH kriyata ityarthaH | Atmani guruSu 
bahuvacanavidhAnAdasmAbhiriti bahuvacana-nirdezaH | samAseneti zaivAgameSu viprakIrNatayA 
vistareNa coktAnAM tattvAnAM mandabuddhyanugrahArthaM samAsena saMzleSaNena, 
saMkSepeNa vetyarthaH || 4 ||

vRttiH

	adhunA prakaraNe pratipAdyamarthaM pratijAnIte- loketi | tattvAnAM 
pRthivyAdizivAntatattvAnAM tatkartuH zivasya tadupakAryANAM cAtmanAM prakAzaH 
kriyata ityarthaH || 4 ||

zaivAgameSu mukhyaM patipazupAzA iti kramAt tritayam |
tatra patiH ziva uktaH pazavo hyaNavo'rthapaJcakaM pAzaH || 5 ||

tAtparyadIpikA

	tattvaprakAzaH kriyata ityuktam | tatredamAzaGkate- kAni tAni  tattvAni, kiyanti ceti | 
ekAdiSaTtriMzAntaM bahubhirAcAryairbahudhA tattvAnAM 
pratipAditatvAdAzaGkAsamudbhavaH | tAmAzaGkAmapanetu-mAha- zaiveti |
	ayamabhiprAyaH- ekAdiSaTtriMzAnteSu tattvapakSavizeSeSu sarveSvapi 
mukhyatvAdanabhyupagame doSaprasaGgAcca patipazupAzA-tmakatraividhyamAzrayaNIyam | 
tathA hi- pazoH saMsAriNo'nabhyupagame 
dharmAdharmajanmamaraNasukhaduHkhAnubhavalakSaNasya saMsArasya tannivRttilakSaNasya 
cAzrayAbhAvAdasattvam, tatpratipAdakazrutismRtIti-hAsapurANAdezca 
nirviSayatayA'prAmANyaprasaGgazca syAt | tathA pAzAnAM saMsArahetubhUtAnAM 
malakarmamAyAkhyAnAmabhAve zarIrAderabhAve 
svarganarakagamanajanmamaraNAderabhAvaprasaGgaH, Atmano niSkriyasya tadakhilAsaMbhavAt | 
tathA patyuH paramezvarasyA-bhAve 
jagatsRSTisthitidhvaMsadharmAdharmabandhamokSavicArAderasaM-bhavaH, 
jIvAnAmasarvajJAnAM zarIrarahitAnAM tadasaMbhavAt | tasmAt tattvatraividhyaM sarveSvapi 
pakSavizeSeSvabhyupeyamiti | nanu 
tattvaikatvadvitvapakSayostadAzrayaNamupAdhibhedakRtabhedasadbhAvAditi brUmaH | tathAhi- 
ekameva jalatattvamupAdhivazAt taraGgaphenabudbudAt-manA'pracyutasvabhAvaM yathA 
traividhyabhAgavagamyate, tathA'yaM zivo'pyapracyutasvasvabhAvastraividhyaM 
patipazupAzAtmakamanubhavati | taduktaM zaivarahasye- anubhavati hi pazubhAvaM ziva 
evANavatirohitAtma-guNaH | so'pi malo yaH kazcana zaktilavaH sarvathA zArvaH || iti | 
prakRtipuruSAtmanA dvaividhye prakRtitadupahitAnupahitAtmanA traividhyasambhava iti 
SaTtriMzAnteSu catuSTayAdiSu cetaratattvAnAma-traivAntarbhAvAt tattraividhyopapattiH | 
tathAhi- patyau zuddhAnAM tattvAnAmantarbhAvaH | mAyAkAryANAM 
zuddhAzuddhAnAM pazAvantarbhAvaH | avyaktAdipRthivyantAnAM

     kevalAzuddhAnAM pAza iti | taduktaM zaivarahasye- patyau zivasvabhAvAH sarve 
sarvAtmanA prakAzante | kecana pAzeSu pazuSu cAntardadhate niravazeSam || iti | ata 
evAsya tritayasya mukhyatvam, anyeSAmatraivAntarbhAvAt | athavA kramAnmukhyatvamiti |
	nanu kathametadavagamyata ityata Aha- zaivAgameSviti | te ca- kAmikaM yogajaM 
cintyaM kAraNaM tvajitaM param | dIptaM sUkSmaM sahasraM ca aMzumAn suprabhedakam 
|| vijayaM caiva niHzvAsaM svAyambhuvamataH param || vIraM ca rauravaM caiva mukuTaM 
vimalaM tathA || candrajJAnaM ca bimbaM ca prodgItaM lalitaM tathA | siddhaM 
santAnasarvoktaM pAramezvarameva ca || kiraNaM vAtulaM caiva tvaSTAviMzatisaMhitAH | 
mUlabhedamiti khyAtamasaMkhyamupabhedakaM || iti | eSUktatvAditi | tathA hi pAramezvare 
tAvat- pAzyaH pAzayitA pAzAstrayametad vyavasthitam (vi0 6|2) iti | kiraNe ca- 
pazupAzapatijJAnavicArapratipAdakam | kiraNAkhyaM mahat tantram (vi0 1|13) ityAdi | 
zrIvAyavIye ca- ajaDaM ca jaDaM caiva niyantR ca tayorapi | pazuH pAzaH patizceti kathyate 
tritayaM kramAt || (zi0 vA0 1|5|12)
	zaiveti zivapraNItatvavizeSaNenAgamAnAM prAmANyaM sUcitam | tathAhi- zivasya 
sarvajJatayA jJAnAnyathAjJAnarAgadveSAdera-prAmANyavAkyaracanAhetorabhAvAt 
tadracitAnAmAgamA-nAM siddhyatyeva prAmANyam | nahi sarvajJasyAjJAnaM saMbhavatI-
tyajJAnAdapramANavAkyaracaneti vaktuM zakyate | ajJAnAbhAvA-deva 
tanmUlarAgadveSAderabhAvAt tanmUlApramANavAkyaracanA-sambhavaH | tasmAt 
kSINadoSatayAptena mahezvareNa racitAnAM prAmANyasadbhAvAt 
taduktaprameyatathAtvamabhyupeyamiti | taduktaM zivadharmottarAdau- vidhivAkyamidaM zaivaM 
nArthavAdaH zivAtmakam | lokAnugrahakartA yaH sa mRSArthaM kathaM vadet || 
sarvajJaparipUrNatvAdanyathA kena hetunA | brUyAd vAkyaM zivaH zAntaH 
sarvadoSavivarjitaH || yad yathAvasthitaM vastu guNadoSaiH svabhAvataH | yAvatphalaM ca yat 
puNyaM sarvajJastat tathA vadet || rAgAjJAnAdibhirdoSairgrastatvAdanRtaM vadet | te 
cezvare na vidyante brUyAt sa kathamanyathA || apAstAzeSadoSeNa sarvajJena zivena yat | 
praNItamamalaM vAkyaM tat pramANaM na saMzayaH || tasmAdIzvara-vAkyAni zraddheyAni 
vipazcitA | yathArthaM puNyapApeSu tadazraddho vrajatyadhaH || iti |
	nanvIzvarapraNItatAgamAnAM kuto'vagamyate ? tadAgamaireveti cet, 
tadetaretarAzrayatA | athAgamasya pramANabhUtasyAptakartrape-kSAyAM 
tadanyasyAtIndriyArthadarzinaH kartRtvAsaMbhavAcca sarve-zvarasya sarvakartuH 
sarvajJasyAgamakartRtvaM nizcIyata iti cet, naivam | AgamaprAmANyAnizcayAdevaM 
kalpanAnupapatteH | tathA AptAnta-rApraNItatve pramANAbhAvAdatIndriyArthadarzinaH 
kartRtvAvirodhA-cca na zivapraNItatvavizeSaNasyArthavattvamiti | naitadevam, Agamasya 
pratipattisAmarthyAtmakAt pramANAntarAt prAmANyasiddheH |
	tathA hi- dvividho hyAgamaH, dRSTArtho'dRSTArthazceti | tatra dRSTArthAnAM 
citrAyAgavidhAyakavAkyasadRzAnAM taduktakar-mAnuSThAnena taduktaphalasaMbhavadarzanAt 
prAmANyamanumAya tatkarturatIndriyArthadarzitvena paramAptatvanizcaye'nyeSAmadRSTAr-
thAnAmapi tatkartRkatayA dRSTArthavAkyavat prAmANyamanumIyata iti | na ca 
pUjAjapAdiviziSTakarmaNAM viziSTatattatphalasAdhanatAma-dhyakSato'vagacchannAgamakartA 
bhavedasarvajJaH, etaddarzino hyadRzyatastvantarAbhAvAt |

na cAnumAnAdimamarthamupalabhya tatra vAkyaracaneti vAcyam, 
vyAptigrahaNaliGgAderasambhavAt | anumAnaM hi liGgaliGginoH pratyakSato vyAptigrahaNe sati 
liGgamAtradarzanAdupajAyamAnaM liGgivijJAnamAha | tathAhi- pratyakSato mahAnasAdau 
dhUmAgnyor-liGgaliGginoravinAbhAve gRhIte dezAntare parvatAdau 
dhUmadarzanAdagnyanumAnaM pravartamAnaM dRSTam | tadatra phalakarmaNoH 
sAdhyasAdhanabhAvasya liGgaliGginoH pratyakSatayA liGgAnupalambhAcca 
vyAptigrahaNAsaMbhavAnnAnumAnasaMbhava ityanumAnamUlatA nAgamAnAm | 
nApyAgamAntaramUlatA, tasyApi 
pauruSeyatvenAgamAntaramUlatAbhyupagame'navasthAprasaGgAt | na ca 
vedavyatiriktamapauruSeyaM vAkyaM pazyAmaH, yena tanmUlatA kalpyeta | 
tasmAnnAgamAntaramUlatA AgamAnAm | na ca 
yoginAmatIndriyArthadarzinAmAgamakartRtvamiti vAcyam, teSAM 
mahezvaraprasAdApekSasarvajJatayA tadupAyadIkSApUrvakapUjAdyAvedakAgamAnAM 
sadbhAvasya prAgevAzrayaNIyatvAt, jagatkartuH zivAdanyasyAgamakartRtvakalpa-nAnAM 
gauravApAtAcca sa evAgamAnAmapi karteti kalpyate | na ca 
parasparaviruddhadharmapratipAdakAgamAnAmekAptakartrabhyupagamA-
saMbhavAdanekAptakartrabhyupagamaprasaGga iti vAcyam, varNAzra-mAdyadhikAribhedavazena 
vedyasya caikasyaiva zivasya karuNAnidhervi-ruddhadharmopadezopapatteriti 
netaretarAzrayatvAdidoSaH | na ca lokapari-grahe syAdanyonyAzrayatvamiti vAcyam, tasya 
prAmANyaparijJAna-mUlatvAbhAvAt | tathAhi- prathamaM tAvadAgamAn viracayya 
brahmANaM svasutaM mahezvaro grAhayAmAma | tataH svasutAn brahmA, tataste'pi 
svasutAniti vedaparigrahavadAgamaparigrahopapatterno-ktadoSAvakAzaH | 
	nanu zivapraNItatayA''gamaprAmANyaM pUrvamupavarNitam | samprati 
pratipattisAmarthyAditi pUrvAparavirodha iti cenna, utpattijJapt-yapekSayA ubhayorapyupapatteH | 
tathAhi- zivapraNItatayAgamAnAM prAmANyamupajAtaM tatpratipattisAmarthyenAvagamyata iti 
na kazcidvi-rodhaH | vedamUlatvAdvA''gamaprAmANyam | tadAnImapi zivapraNI-
tatvAdAgamaprAmANyaM draDhayati, zivadRSTasya vedArthasyAbAdh-yatvAditi | sa cAgamo 
dvedhA- pratyakSazrutimUlo'numeyazrutimUlaz-ceti | tatra pratyakSazrutimUlAnAmAgamAnAM 
pratyakSazrutimUlavat prAmANyam, anumeyazrutimUlAnAmaSTakAdizrutimUlavadityAga-meSu 
pratipAdyamAnAnAmarthAnAM zrutiSUpalambhAt tanmUlatA-gamAnAmavagamyate | tathAhi- 
rudro'vazyaM yaSTavyaH iti zrutivAk-yAd rudrayAgakartavyatA'vabhAsate | tatra karaNAdikaM 
mantrArthavA-dAvagatamAgamaiH pratipAdyata iti tanmUlatAgamAnAm | tathAhi- tamuSTuhi 
yaH sviSuH sudhanvA yaH (R0 5|42|11) ityatra pUjAstutinamas-kArAde rudragocarasya 
mahatsaukhyanAmakApavargaM prati hetutA'va-gamyate | antaricchanti (R0 8|72|3) ityatra 
dhyAnajapau rudraviSayau kartavyAvityavagamyate | yajJaM rudrAya mIDhuSe (R0 1|122|1) ityatra 
pAntaM pAnIyaM somAkhyamandhohavI rudrAya haradhvamityavagam-yate | evaM 
zatarudrIyanIlarudrasUktazvetAzvatarezAvAsyAtharvazi-
rastacchikhAraudrasUktAraNAdiSvAgamapratipAdyamAnAnAmarthA-nAM sadbhAvo draSTavya 
iti |
	atra prayogAH- vivAdapadaM tantrazAstraM pramANam, yathArtha-tvAt, 
sampratipannavAkyavat | tathA tantrazAstraM pramANam, Aptok-tatvAt, yadyadAptoktaM 
tattatpramANam, yathA purANAdi, tathedamAp-toktam, tasmAt pramANam | tathAgamAH 
zivapraNItAH, tadanyAjanya-kAryatvAt, tadyat tadanyAjanyakAryaM tattacchivapraNItam, yathA 
prapaJcaH, tathA caite, tasmAcchiva praNItAH |

     tantrazAstraM kAryam, vedAnyavAkyatvAt, yadyad vedavyatiriktaM vAkyaM tattajjanyaM 
dRSTama, yathA bhAratAdi | na ca prapaJcasya zivapraNItatvAsiddheH sAdhyavikalo dRSTAnta 
iti vAcyam, tasyopariSTA-dupapAdyamAnatvAt | tathA tantrazAstraM pramANam, 
vedamUlatvAt, manvAdismRtivat | tad vedamUlaM ca, taduktArthapratipAdakatvAt, 
manvAdismRtivaditi | atha zAstramapramANam, anAptakRtatvAt, sampratipannavaditi 
pratyanumAnabAdhAdoSaprasaGga iti cet, naivam, vikalpAnupapatteH | tathAhi- 
anAptakRtatvAdityasya ko'rthaH ? yadyAptenAkRtatvam, AhosvidanAptena kRtatvam | yadyAdyaH 
pakSaH, tarhi vedavAkyairvyabhicAraH, teSAM pramANabhUtAnAmevAptenAkRtatva-hetoH 
sadbhAvAt | asiddhazcAyaM hetuH, AptakRtatvasya sAdhitatvAt | yadyuttaraH pakSaH, tadA 
cAptakRtatvAdevAsiddhatA | na cAnAptaracitA AgamAH, vedaviruddhatvAt, 
bauddhAdyAgamavaditi sadhayituM zakyatvAnnAsiddhateti vAcyam, vedArthapratipAdakatayA 
vedamUlA-nAmAgamAnAM vedaviruddhatvasyApyasiddhatvAt | tasmAcchaivAga-
meSUktatraividhyAdikaM mArkaNyeyAgastyarAmadadhIcAdisakalaziS-TajanaiH 
parigRhItatvAccAdaraNIyamiti | 
	patipazupAzA iti | patizca pazavazca pAzAzceti tathoktAH | ke ta 
ityAkAGkSAyAmAha- tatra patiH ziva uktaH pazavo hyaNavo'rthapaJcakaM pAza iti | tatra 
teSAM madhye pazUnAM pAlanAt patizabdena ziva ukto'bhihitaH | pazavo hyaNavaH 
aNutvasampAdakamalAdi-sambandhinaH | zivasvabhAvA jIvAH pazavo na catuSpAda eva, 
dvipadAM ca pazutvazravaNAt | tathAhi- etAvanto vai pazavo dvipAdazcatuSpAdazca | yo 
vAmindrAvaruNA dvipAtsu pazuSu yo vA catuSpAtsu pazuSu (tai0 saM0 2|3|13|1) 
ityAdizruteH | teSAmIzvaratvAd bhagavataH zivasya pazupatitvam, yeSAmIze pazupatiH 
pazUnAM catuSpadAmuta ca dvipadAm (tai0 saM0 3|1|4|1) iti zruteH | laiGgoparibhAge ca - 
brahmAdyAH sthAvarAntAzca devadevasya dhImataH | pazavaH parikIrtyante 
saMsAravazavartinaH || teSAM patitvAd bhagavAn rudraH pazupatiH smRtaH | (li0 pu0 2|9|11-
12) iti | nanu kena kAraNena jIvAtmanAM zivasvabhAvAnAM malAdipAzasambandha iti 
ceducyate- malapAzasambandhAt karmapAzasambandhaH | tatsambandhAn-
mAyApAzasambandhaH | malapAzasambandhasya asya tvanAditvAnna kAraNApekSeti | 
taduktaM kiraNe- anAdimalasambandhAnmalinatvamaNau sthitam | anAdimalamuktatvAnnirmalatvaM 
sthitaM zive | AdimattvaM yadA siddhaM nimittaM kathyate tadA | IdRgrUpaM smRtaM 
tAbhyAM zuddhAzuddhaM yathArthataH | vizuddhaH sphaTikastasmAt tAmraM tAvat 
sakAlikam || yathAsminna nimittaM syAt tathA na syAcchivAtmanoH || (vio 3|3-5) iti | nanu 
tarhi pazUnAM zivatvAbhAvaprasaGga iti cet, naivam, teSAM zivasvabhAvatve 
zrutyAdipramANasadbhAvasya vakSyamANatvAt | ata eva pAzabaddhatvAt pazutvam | tena 
kiJcit kartRtvAdinA'Nutvam, na paramANuvadavasthAnAt teSAmavyApakatvena, 
tadasaMbhavAditi |
	arthapaJcakaM pAza iti | arthAnAM malakarmasUkSmasthUlamAyA-
pAzAnugrAhakazivazaktInAM paJcakamarthapaJcakam, tatpAzAkhyaM tattvamiti | taduktam-
malaM karma ca mAyA ca mAyotthamakhilaM jagat | tirodhAnakarI zaktirarthapaJcakamucyate || 
iti | nanvarthapaJcakaM pAza itIha pratipAditam, 

     zAstrAntare tu pAzAnAM traividhyamuktamiti virodhaH | tathA hi zaivarahasye tAvat- 
sahajamanAdi malaM syAt pAzeSu triSvapi pradhAnatamam | karma ca mAyA ca male sati 
pAzatayA pravartete || iti | prayogamaJjaryAM ca- pAzAstrayo nigalayanti iti | naivam, 
IzvarazakteH pAzAnugrAhitayaiva pAzatvAbhidhAnAnmAyApAzasya sthUla-sUkSmAtmanA 
dvaividhyena ca paJcadhA bhedAbhidhAnAditi |
	adhvapaJcakaM pAza iti kecit paThanti | tadAdhvanAM SaNNAM 
tattvavarNamantrabhuvanapadakalAnAM paJcakamadhvapaJcakaM pAza iti | taduktaM 
siddhAntahRdaye-

	zivaH pazupatiH proktaH pazavo hyaNavo matAH |
	te pAzabaddhAH pazavaH pAzaH syAdadhvapaJcakam ||
	adhvAnastattvabhuvanakalArNapadamantrakAH |
	yairamI puruSA baddhAH saMsaranti bhavAd bhavam ||
	malAdijAH SaDadhvAnastattvAdyAste ca paJcadhA |
	nivRttyAdivibhAgena taduktaM hyadhvapaJcakam || iti |

gurudevapaddhatau ca-

	athAdhvanAM kramAdeSAM vyAptiH samyaG nigadyate |
	pRthvItattvaM kSavarNazca mantrau hRdayasadyakau ||
	kAlAgnirapi kuSmANDahATakau brahmavaiSNave |
	raudraM ca bhuvanAnyantarbrahmANDasya bhavanti SaT ||
	aNDAd bahiH zataM rudrA dazadikSu vyavasthitAH |
	kapAlIzo hyajo buddho vajradehaH pramardanaH ||
	vibhUtiravyayaH zAstA pinAkI tridazAdhipaH |
	
prAcyAM dizi |

	agnI rudro hutAzazca piGgalaH khAdako haraH |
	jvalano dahano babhrurbhasmAntazca kSayAtmakaH ||

AgneyyAM dizi |

	yamo mRtyurharo dhAtA vidhAtA ca tathAparaH |
	kartA caiva ca saMyoktA niyoktA dharma eva ca ||
	tadvad dharmapatistatra dazamo dakSiNe sthitAH |
	nirRtirmAraNo hantA krUradRSTirbhayAnakaH |
	Urdhvakezo virUpAkSo dhUmralohitadaMSTriNaH ||

nairRtyAm |

	balo hyatibalazcaiva pAzahasto mahAbalaH |
	zveto'tha jayabhadrazca dIrghahasto balAntakaH ||
	vAruNyAM meghanAdazca sunAdazca prakIrtitaH |
	zIghro vAyurvAyuvegaH sUkSmastIkSNaH kSayAntakaH ||
	paJcAntakaH paJcazikhaH kapardI meghavAhanaH |

     vAyavyAm |

	nidhIzo rUpavAn dhanyaH saumyadeho jaTAdharaH ||
	lakSmIdharo ratnadharaH zrIdharazca prasAdhanaH |
	prakAmo dazamazceti kauberyAM dizi saMsthitAH ||
	vidyAdhipezasarvajJA jJAnabhug vedapAragaH |
	surezazarvajyeSThAzca bhUtapAlo balipriyaH ||

aizAnyAm |

	viSo viSadharo'nantaH krodhano mArutAzanaH |
	nyagrodhodumbarIzazca phaNIndro vajradaMSTriNau ||

adhobhAge |

	zambhurvibhurgaNAdhyakSastriyakSastridazezvaraH |
	saMvAhazca vivAhazca nabholipsustrilocanaH ||
	teSAmupari rudrANAM vIrabhadro vyavasthitaH |
	bhadrakAlyAzca bhuvanamevamaSTAdhikaM zatam ||
	bhuvanAni kramoktAni rudrANAM svAkhyayA pRthak |
	mantrAvasAnikapandAnmahAdevapadAvadhi ||
	vilomataH padAni syuraSTAviMzatisaMkhyayA |
	ityadhvapaJcakaM SaSThyA nivRttikalayA samam ||
	vyAptaM saMcintanIyaM syAdadhvaSaTkaM vibhAgataH |
	Apo'gnirvAyurAkAzo gandhazca rasarUpake ||
	sparzaH zabdazca vAkpANI pAdapAyubhagAni ca |
	zrotraM tvak cakSuSI jihvA ghrANazcetIndriyANi ca ||
	mano'haGkArabuddhyantamantaHkaraNakatrayam |
	sarveSAM triguNA'tha syAt prakRtiH kAraNaM parA ||
	trayoviMzatitattvAni vilomAditi saMkhyayA |
	hAdiTAntAstato varNAstrayoviMzatisaMkhyakAH ||
	zirazca vAmadevAkhyo mantrau tadvat purANi tu |
	SaTpaJcAzat krameNa syuramarezAdinAmabhiH ||
	amarezaM prabhAsaM ca naimiSaM puSkarASaDhI |
	DiNDimuNDirbhArabhUtirityaSTAvambutattvake ||
	harizcandrazca zrIzailo jalpIzAmrAtakezvarau |
	madhyamezo mahAkAlaH kedAro bhairavastathA ||
	bhuvanASTakamityetat tejastattve vyavasthitam |
	gayA caiva kurukSetraM nokhalaM kanakhalaM tathA ||
	vimalezo'TTahAsazca mahendraM bhImakezvaram |
	ityaSTau bhuvanAni syurvAyutattvagatAni tu ||

     vastrApado rudrakoTiravimukto mahAlayaH |
	gokarNo bhadrakarNazca svarNAkSaH sthANurityapi ||
	bhuvanASTakamAkAzasaMjJatattve vyavasthitam |
	chagalaNDo dviraNDazca mArko gomaNDalezvaraH ||
	kAlaJjaraM dAruvanaM zaGkukarNaM sthalezvaram |
	prArabhya gandhatanmAtramahaGkArAntamadhvani ||
	sthitAni bhuvanAnyaSTAvetAni tu yathAkramam |
paizAcaM rAkSasaM yAkSaM gAndharvaM caindrasomyake ||
	prAjezaM brAhmamityetad devayonyaSTakaM dhiyi |
	akRtaM ca kRtaM caiva bhairavaM brAhmavaiSNave ||
	kaumAramaumaM zrIkaNThamiti yonyaSTakaM smRtam |
	guNaprakRtitattve tu sthirametat tu bhauvanam ||
	aSTakaiH saptabhistvevaM SaTpaJcAzad yathAkramam |
	bhuvanAni sthitAnyevaM padAnyapyekaviMzatiH ||
	mahezvarAkhyAt prArabhya syAdarUpinpadAvadhi |
	evaM paJcavidhAdhvA syAt pratiSThAkalayA samam ||
SaSThyA vyAptaM vicintyaM syAt SoDhAdhvavyAptirIdRzI |
	atha vidyAkalAyAM tu puruSo rAga eva ca ||
	azuddhavidyA ca kalA niyatiH kAla eva ca |
	mAyA ca sapta tattvAni varNasaptakasaMyutam ||
	JakArAdi ghakArAntaM zikhAghorau ca mantrakau |
	vAmAdibhuvanAni syuH saptaviMzatisaMkhyayA ||
	vAmo bhImastathaivogro bhavazcezAna eva ca |
	ekavIrazca puruSaH SaDete bhuvanezvarAH ||
	pracaNDomApatizcAjo hyanantazcaikarudrakaH |
	rAgatattve sthitaM tvetad bhuvanAnAM tu paJcakam ||
	krodhacaNDAvazuddhAyAM vidyAyAM tu vyavasthitau |
	niyatyAM jyotisaMvartau tataH sUkarasaMjJitaH ||
	paJcAntakaikavIrau ca zivadazca kalAgatAH |
	mahAdevo vAmadeva udbhavazcaikapiGgalaH ||
	ekanetrastathezAno bhuvanezastataH paraH |
	aGguSThamAtra iti cApyaSTAvete sthalezvarAH ||
	kAlatattve ca mAyAyAM bhauvanI saptaviMzatiH |
	vyApinniti samArabhya dhyAnAhArapadAvadhi ||
	padAnAM viMzatizcAtra syAd vidyAkalayA'khilam |
	vyAptaM saJcintayedevaM SaDvidhAdhvavyavasthitiH ||

     atha zAntikalAyAM syAcchuddhavidyezvarAvadhi |
	sadAzivazca tattvAni trINi tasyAM sthitAni hi ||
	varNAstrayaH syurgakhakA mantrau kavacapUruSau |
	aSTAdazaiva bhuvanAnyatra vAmAdisaMjJayA ||
	vAmA jyeSThA ca raudrI ca kAlI kalavikAriNI |
	balavikaraNI caiva balapramathinI tathA ||
	sarvabhUtadamanyekA navamI tu manonmanI |
	zuddhavidyAhvaye tattve sthitAnyevamanukramAt ||
	anantezazca sUkSmazca tatazcApi zivottamaH |
	ekanetrazcaikarudrastrimUrtistu tathA'paraH ||
	zrIkaNThazca zikhaNDI ca bhuvanAnIzvarAhvayam |
	sadAzivAkhyaM bhuvanaM sthitaM tattve sadAzive ||
	padAnyekAdazA'traiva nityayogina AditaH |
	vyomavyApipadAntAni sthitAnyevaM tu paJcadhA ||
	SaSThyA tu zAntikalayA vyAptAnyevaM vicakSaNaiH |
	SaDvidhAdhvamayI vyAptirboddhavyA kramazo bhavet ||
	tathaiva zAntyatItAyAM zivatattvaM vyavasthitam |
	varNAH SoDaza sargAdyAH svarAH syuste vilomataH ||
	astrezAnau tathA mUlamantrA mantrA bhavanti hi |
	nivRttyAdIni bhuvanAnyatra paJcadazaiva hi ||
	nivRttizca pratiSThA ca vidyA zAntistathaiva ca |
	zAntyatIteti hi kalAH syurbindau bhuvanAni hi ||
	indhikA dIpikA rocirmocikA cordhvagA tathA |
	bhuvanAnIti paJca syustAni nAdakalAH khalu ||
	vyApinI vyomarUpA cApyanantA cApyanAthayA |
	anAzritA ceti kalAH zaktAH syurbhuvanAnyapi ||
	mantrAdyaM praNavaM yat tad vilomenAntakaM tu tat |
	padamekaM bhavedevamadhvAyaM paJcadhoditaH ||
	zAntyatItakalAvyAptaM vidyAdityadhvanAM kramAt |
	SaDvidhA vyAptiruddiSTA zaivAgamavinirNayAt ||
	SaDadhvajJAnavAn mucyenmocayecca bhavArNavAt |

     ekatrAdhvA SaDvidhaikAdaza syu-
     rmantrAstvekaM cApyazItiH padAni |
     SaDtriMzaccApyatra tattvAni varNAH 
     paJcAzat syuH paJcasaMkhyA kaleti ||

     atha padoddhAraH-

	prAkpadaM praNavaM tat syAdekavarNaM zivAtmakam |
	vyomavyApi caturthyantaM dvitIyaM paJcavarNakam ||
	tRtIyaM vyomarUpAya paJcArNamaparaM tathA |
	sarvavyApi caturthyantaM zivAyetyatha paJcamam ||
	tryakSaraM ca vijAnIyAt paJcAGgAni zivasya tu |
	anantAyetyanantasya vAcakaM caturakSaram ||
	anAthAyeti sUkSmasya padaM syAccaturakSaram |
	anAzritAya paJcArNaM padaM zivatamasya tu ||
	dhruvAyeti padaM tryarNamekanetrasya kIrtitam |
	zAzvatAyaikarudrasya padaM syAccaturakSaram ||
	yogapIThasaMsthitAya cASTArNaM tu trimUrtinaH |
	zrIkaNThasya padaM nityayogine paJcavarNakam ||
	dhyAnAhArAya paJcArNaM padametacchikhaNDinaH |
	namaH zivAyeti padaM SaDvarNaM praNavAdikam ||
	sarvaprabhuzcaturthyantaM paJcArNaM padasantatau |
	zivAya padamanyacca caturthyantaM trivarNakam ||
	padamIzAnamUrdhAya SaDvarNaM munisattama |
	tadIzAnasya boddhavyaM saptArNaM puruSasya tu ||
	syAt tatpuruSavaktrAya aghorahRdayAya ca |
	saptArNaM bahurUpasya tadvad vAmasya kIrtitam ||
	syAd vAmadevaguhyAya sadyasyApyatha kathyate |
	sadyojAtamUrtayeti saptavarNamudIritam ||
	praNavAdi prayoktavyaM paJcArNaM ca namo namaH |
	guhyAtiguhyAya padaM SaDvarNaM dvyarNakaM param ||
	goptrepadaM caturvarNaM mAtaGge nidhanAya tat |
	akArapUrvaM paJcArNaM candrajJAne prakIrtitam ||
	sarvavidyAdhipAyeti padaM syAt saptavarNakam |
	sarvayogAdhipUrvaM tu gatAyetyaSTavarNakam ||
	jyotIrUpAya paJcArNaM padametat suzobhanam |
	paramezvarapUrvaM tu parAyetyaSTavarNakam ||
	acetanAcetaneti saptavarNaM padaM viduH |
	vyominvyomiMzcaturvarNaM vyApinvyApiMstathA padam ||
	arUpiMzca dvirabhyasya SaDvarNaM padamIritam |
	prathameti dvirabhyastaM SaDvarNamaparaM tathA ||

     tejastena iti proktaM caturvarNaM padaM vibhoH |
jyotirjyotiH padaM tadvad vijJeyaM caturakSaram ||
tryarNaM padamarUpAkhyaM tathAnagnepadaM zubham |
trivarNaM syAdadhUmAkhyamabhasmAkhyaM tathA padam ||
anAde tryarNamuddiSTaM nAtrayaM dhUtrayaM tathA |
oMbhUstad dvyakSaraM jJeyamoMbhuvazca triyakSaram ||
oM svo varNadvayaM cAnidhanAkhyaM caturakSaram |
nidhanAkhyaM trivarNaM syAt paJcArNaM nidhanodbhavam ||
dvyakSaraM syAcchivapadaM dvyarNaM zarvapadaM vibhoH |
paramAtmaMzcaturvaNaM mahezvarapadaM tathA ||
caturvaNaM samuddiSTaM mahAdevapadaM hi yat |
sadbhAvezvarasaMjJaM tu paJcArNaM munisattama ||
mahAteja iti proktaM padaM varNacatuSTayam |
padaM paJcArNamuddiSTaM yogAdhipatisaMjJakam ||
muJca muJca caturvarNaM SaDvarNaM pramathAtmakam |
zarvazarvapadaM cAtra boddhavyaM caturakSaram ||
bhavayugmaM tathA tadvad bhavodbhavapadaM punaH |
padamaSTAkSaraM cAnyat sarvabhUtasukhapradam ||
sarvasAnnidhyapUrvaM tu karAntaM saptavarNakam |
padamaSTAkSaraM brahmaviSNurudraparamparam ||
anarcitaM dvirabhyastamaSTArNe padamucyate |
asaMskRtapadaM tadvat pUrvasthitapadaM tathA ||
sAkSiMstu rUpade tadvaccaturvarNaM dviruktitaH |
SaT pataGgapade varNAzcatvAraH piGgasaMjJake ||
tadvajjJAnapadaM zabdasUkSmAkhye caturakSare |
dvyakSaraM syAcchivapadaM tathA zarvapadaM vibhoH ||
tryakSaraM sarvadapadaM praNavAdi namo namaH |
paJcavarNaM zivAyeti triyakSaramudIritam ||
natiyugmaM paJcavarNaM satAraM padamuttamam || iti || 5 ||

vRttiH

	tAnyeva prakAzAnyuddizati- zaivAgameSviti |
	padArthAnAmiti zeSaH | taduktaM tantralakSaNe- tripadArthaM catuSpAdaM 
mahAtantram (mR0 vi0 2|2) iti | atazca teSvevAnyeSAM vastUnAmantarbhAva iti lakSaNena 
darzayati- tatra patiriti | tatra teSu tripadArtheSu madhye patipadArthaH ziva ityuktaH | 
zivazabdenAtra jAtyekavacanena zivatvayoginAM mantramantrazvaramantramahezvaramu-
ktAtmazaktizivAnAM savAcakAnAM 

     zivatvaprAptisAdhanena dIkSAdinopAyakalApena saha patipadAr-the saMgrahaH kathyate 
| aNavazcAtmAnaH preryAH | anena ca pazutva-yoginAM vijJAnakalAdibhedabhinnAnAM 
baddhAtmanAM pazupadA-rthatvamucyate | arthapaJcakamityanena 
malarodhazaktikarmamAyAbinda-vaH procyante | tatasteSAM paJcAnAM bindumAyodbhUtaiH 
zuddhA-zuddharUpaistattvabhuvanabhUtabhAvaiH saha pAzapadArthe saMgra-haH | nanu 
kathamekasyA eva zivazakteH patipadArthe pAzapadArthe ca saMgraha ucyate ? satyam, 
paramArthataH patipadArtha eva zakterantar-bhAvaH | pAzatvaM tu tasyAH 
pAzadharmAnuvartanenopacArAt | taduktaM zrImanmRgendre- tAsAM mAhezvarI zaktiH 
sarvAnugrAhi-kA zivA | dharmAnuvartanAdeva pAza ityupacaryate || (vi0 7|11) iti || 5 ||

muktAtmAno'pi zivAH kintvete tatprasAdato muktAH |
so'nAdimukta eko vijJeyaH paJcamantratanuH || 6 ||

tAtparyadIpikA

	nanu pazUnAM zivasvabhAvatayA pativyatirekAsambhavAt (tattad ? kathaM tad) 
dvaividhyaprasaGga ityAzaGkyAha- mukteti |
	ayamabhiprAyaH- muktAtmanAmeva zivasvabhAvatvam | kintu teSAmapi mukteH prAg 
na zivAtmatA, tAmrAdeH svarNasvabhAvA-
cchAdakakAlimAkalpamalAdipAzapracchAditazivasvabhAvatayA pazu-tvAt | ata eva te 
tatprasAdato muktAH | sa zivastvanAdimuktaH | eka iti | eka eva nityamukta ityarthaH, 
kAlatraye'pi malAdisambandharahitatvAt | taduktaM zrIvAyavIye-

	anAdimalasaMzleSaprAgabhAvAt svabhAvataH |
	atyantaparizuddhAtmetyato'yaM ziva ucyate || iti |
						(zi0 vA0 1|32|29)

	paJcamantratanuriti | nAdabindupadavarNavAkyAtmanA paJcAt-makasakalamantrazarIra 
ityarthaH | mantrasvarUpa iti vA | tasyoSNiglomA-ni tvag gAyatrI triSTummAMsamanuSTup 
snAyurasthi jagatI paGktirmaj-jA prANo bRhatI (ai0 u0 1|6|1) ityAdizrutervaidikAdimantrANAM 
dhAtumayatvapratipAdanAcchivasya mantrazarIratvAvagamaH | athavA praNavavedacatuSkAtmanA 
paJcAtmakamantratanuriti | taduktaM laiGgAdau-

oGkArarUpamRgvaktraM sAmajihvAsamanvitam |
yajurvedamahAgrIvamatharvoSThamajaM vibhum || (1|1|30-21) iti |

	bIjabindunAdazaktizAntAtmanA paJcAtmakapraNavatanuriti vA, omiti brahma, omityatho 
yo'sau tapati ityAdizruteH | paJcAkSaratanuriti vA, nivRttyAdipaJcatattvatanuriti vA, 
paJcabrahmatanuriti vA | taduktaM liGgodbhave-

atha (AdyaM zlokadvayaM liGgapurANe (1|17|89-90) dRzyate |) 
dRSTvA kalAvarNamRgyajussAmarUpiNam |
IzAnamIzamakuTaM puruSAkhyaM purAtanam ||

     aghorahRdayaM hRdyaM vAmaguhyaM sadAzivam |
	sadyaHpAdaM mahAdevaM mahAyogIndrabhUSaNam ||
	niSkalaM sUkSmamavyaktaM sakalaM ca mahezvaram |
	sargapratiSThAsaMhAralIlArthaM liGgarUpiNam ||
	pradhAnaM liGgamAkhyAtaM liGgI ca paramezvaraH | ityAdi |

     pAramezvare ca-

	paJcamantratanuH zrImAn sakalaH paripaThyate |.....
	yogayogIzvaraH svAmI svatantraH pazupAzahA ||
							(vi0 3|18, 19)
	
     IzAnamUrdhA puMvaktro hyaghorahRdayaH prabhuH |
     ucyate vAmaguhyo'yaM sadyomUrtirmahezvaraH ||
     evaM mantrAstu paJcaite yairnibaddhA tanuH zivA | ityAdi |
(vi0 4|14-15, 30)

	tasmAdevaM vijJeyaM vizeSeNa bhedena pazubhyo jJeyaH ziva iti | na ca 
paramezvaravAcakasya vedamantrAdervAcyAd bhedasadbhAvena tasya vedamayatvAbhAva iti 
vAcyam, tayorbhede vAcyavAcakaniyamA-bhAvaprasaGgAt | na ca sambandhAt tanniyamaH, 
sambandhasya samban-dhAntarAzrayaNAdanavasthAdidoSasyoktatvAt | na ca vAcakatvazaktirni-
yAmiketi vAcyam, tasyAzca vAcyAd bhedasadbhAve'nyazaktivadaniyA-makatvAt | 
zaktervAcyAsAdhAraNyamapyabhedavyatiriktaM na saMbhavatIti 
vAcyavAcakayorevAbhedo'bhyupagantavyaH, kimanayA zaktikalpanayA | na ca 
vAcyavAcakabhAvasya bhinnaniSThatayA tayora-bhedo'saMbhava iti vAcyam, guNaguNibhedavad 
bhedasyApyatra sadbhAvAt | na ca bhedAbhedayorvidhipratiSedharUpatvena virodhAdeka-
trAsambhavaH, vAcyavAcakabhAvAnyathAnupapattipramANasiddhatvAt | tathA ghaTo'yaM 
paTo'yaM zabdo'yamiti vAcakasaMpRktArthaprati-bhAsAd 
ghaTazabdo'yamityasaMpRktazabdapratibhAsAcca zabdArtha-yoraikyamAzrayaNIyam | ata eva 
tattvAdivAcakamantravinyAsAt tattvAdisAnnidhyamiti sarvamavadAtam || 6 ||

vRttiH

	astu tarhi muktAnAM pAzasaMsargarahitatvAcchivatvam, vidyezva-rAdInAM tu 
baindavazarIrayoge'pi kathaM pazutvAbhAvo'ta Aha- muktAtmeti |
	muktAtmAnaH saMprAptazivasAmyAH | apizabdAd vidyezvarA-dayazca zivA eva, 
pazutvAkhyena malena virahAt | tadyoginAM hi pazut-vam, pazuH pazutvasaMyogAt iti zruteH 
| ata eSAM zivatvena sarvajJa-tvAdinA yogAt zivatvameva | baindavazarIrayogastu 
adhikAramalAM-zAvazeSato'dhikAranibandhana eva | ata eva mAyottIrNatvAd malarahita-tvAcca 
vidyAvidyezvaraprApteraparamuktitvam | kathaM punarmantrezva-rANAM kalAdiyoge'pi zivatvam, 
sAkSAt zivAnugRhItatvena sarvajJa-tvAdinA yogAnmalarahitatvAcca | kalAdInAM yogastu 
mAyAgarbhAdhi-kAramalAMzAvazeSato'dhikAranibandhanatvena, teSAmAvazyakat-vAcca |

yaduktam- kalAyoge'pi no vazyAH kalAnAM pazusaMghavat (mo0 kA0 82) iti | yadyevaM 
zivatve samAne'pi muktAtmAdibhyo'sya paramezvarasya ko vizeSo'ta Aha- kintvete 
tatprasAdato muktA iti | ete pUrvoktA vidyezvarAdayaH, tasya paramezvarasya prasAdataH | 
so'nA-dimukta iti | anAdimuktaH svabhAvasiddhanityanirmalaniratizayArtha-jJAnakriyAzaktiyukta 
ityarthaH | nanu IzvarasyApi paJcavaktraH tripaJcadRk ityAdinA''gameSu zarIrendriyayogaH 
zrUyata ityata Aha- paJcamantratanuH | ayamabhiprAyaH- dhyAnArthamevezvarasya 
paJcavaktrAdyAkAraH zrUyate, nirAkAre dhyAnapUjAdyayogAt | yadAhuH- 
AkAravAMstvaM niyamAdupAsyo na vastvanAkAramupaiti buddhiH iti | zrImatpauSkare'pi- 
sAdhakasya tu lakSyArthaM tasya rUpamudAhRtam iti | zrImanmRgendre'pi- 
vapuSo'vidyamAnatvAd yad yat kRtyaM karoti saH | tatra tatrAsya tatkartRvapuSA'nukRtaM 
vapuH || (mR0 kri0 3|41) iti | ataH paJcamantrAtmikAH paJcakRtyopayoginya IzAnAdyAH 
zaktaya eva zarIrakArya kurvANAstanurityupacArAd-ucyante | taduktam- tadvapuH 
paJcabhirmantraiH paJcakRtyopayogibhiH | IzatatpuruSAghoravAmAjairmastakAdikam || (mR0 vi0 
3|8-9) iti || 6 ||

paJcavidhaM tatkRtyaM sRSTisthitisaMhRtitirobhAvAH |
tadvadanugrahakaraNaM proktaM satatoditasyAsya || 7 ||

tAtparyadIpikA

	nanu patisadbhAve prAmANAbhAvAt tattvatraividhyAsaMbhava ityAzaGkyAha- paJceti 
| 
	ayamarthaH- sargasthitisaMhAratirobhAvAnugrahAtmanA paJcavidhaM paJcaprakAraM 
tatkRtyaM mahezvarakAryaM tasmin pramANam, tasyaiva kartuM zakyatvAditi | na cAnyo jIvo 
mAyA vA jagatsRSTyAdikaM kartuM zaknoti, pazorupAdAnopakaraNaviniyoga-
kramajJAnAbhAvAt, mAyAyAzcAcetanatayA tadasambhavAditi | sa sargaH paJcavidhaH, 
bhAvatattvabhuvanabhUtapratyayAtmasRjyasya paJcavidhatvAt | taduktaM zaivarahasye-

	bhogena pariNamayituM karmANi ghRNAnidhiH patiH sRjati |
	bhAvaM tattvaM bhuvanaM bhUtaM prAtyayikamapi sargam || iti |

	vistarata upariSTAdupapAdyate | sthitiH pAlanam | saMhRtirvinA-zaH, sveSu 
sveSvasAdhAraNakAraNeSu kAryasya layaH, sUkSmarUpeNAvasthAnamiti yAvat | AtmanAM 
pAzaiH pracchAdanaM tirobhAvaH | anugrahakaraNaM mokSAdi | nanu viruddhamidamuktaM 
pAzairAtmapracchAdanadvAreNa saMsArahetutvam, 
AtmapracchAdanamalAdipAzanirasanenApavarga-pradAnaM ceti cet, naivam, 
viSayabhedenAnayoravirodhAt | yeSAM sAdhanacatuSTayasaMpattiH, tAn pratyanugrahakaraNam | 
yeSAM tannAsti, tAn prati saMsArahetutvamiti | proktaM satatoditasyAsyeti | kartrA vinA 
kAryotpattyasaMbhavAd anyasya kartRtvAsambhavAccAsya mahezvarasya satatoditasya 
svayaMprakAzacaitanyamAtrasya paripUrNa-sya nirvyApArasyodAsInasyApi sAkSiNaH 
paramezvarasya sRSTyAdiSu kartRtvaM proktam, abhihitamityarthaH | taduktam-

     yathA hyavikriyo vahnirjalataNDulavikriyAm |
	tathA karotyudAsInaH zambhurmAyAdivikriyAm || iti || 7 ||

vRttiH

	ata evAha- paJcavidhamiti |
	etatkRtyapaJcakaM zuddhAdhvaviSaye sAkSAcchivakartRkam, azuddhAdhvaviSaye 
tvanantAdidvAreNetyuktam | tathA zrImatkiraNe- zuddhe'dhvani zivaH kartA prokto'nanto'site 
prabhuH (vi0 3|27) iti | tatra zivasya sAkSAt 
sRSTirbindvAtmakAdupAdAnAcchuddhatattvabhuvanAdyutpAdana-pUrvakaM tadbhu?vanavAsinAM 
vidyAvidyezvarANAM ca baindavazarIrayojanam, nAdAdikrameNa vidyotpAdanaM ca | anantAdi-
dvArA tu mAyAdyupAdAnAdazuddhatattvabhuvanAdyutpAdana-pUrvakaM pazusaMghAnAM 
sUkSmeNa tAttvikazarIreNa svakarmAnuguNabhauvanazarIreNa ca yojanam, mantrezvarANAm-
adhikAranibandhazarIrotpAdanaM ca | sthitiH svazaktyA niruddhasya sarvasya jagataH 
svaviSaye'vasthApanam | saMhRtistu zuddhAzuddhayoH 
kAryavargayorbindumAyayorupasaMhAraH | tirobhAvazca pAzAnugrahaNenAtmanAM 
yathAnuguNabhogabhojanam | anugraho'pi pAzatirodhAnenAtmanAM parAparamokSadAnamiti | 
nanu- sRSTisaMrakSaNAdAnabhAvAnugrahakAriNaH (1|15) iti 
zrImadrauravAdizrutervidyAvidyezAnAmapi paJcakRtyAdhikAritvAt kathaM satatoditasyAsyeti 
niyamaH ? ucyate- teSAmapi zivapreraNayaiva paJcavidhakRtyakartRtvAt tathoktamityavirodhaH || 7 
||

pazavastrividhA jJeyA vijJAnapralayakevalau sakalaH |
malayuktastatrAdyo malakarmayuto dvitIyaH syAt || 8 ||

tAtparyadIpikA

	evamuddezakrameNa patitattvasya lakSaNaM parIkSAM ca 
kRtvA'nantaraprAptapazutattvanirNayArthamAha- pazava ityAdi |
	pAzAH kathyante, tairye baddhAste pazava iti | atha 
zarIrAdivyatiriktasyehalokaparalokasaMcAriNaH saMsAryAtmanaH pazoH sadbhAve 
pramANAbhAvAdAzrayAsiddhamidaM pazulakSaNamiti cet, naivam, zarIravyatiriktasya 
nityasyAtmano jAtismRtyAdibhiH pramANaiH sadbhAvAvagamAt | tathA hi pUrvajanmani nihitaM 
nidhyAdikamaparasmin janmani mayedamatra nihitaM pUrvamityupAdIyamAnamupalabhyate | ato 
dehAtiriktasyaikasya nityasya nidhivinyAsakartuH pazoH sadbhAvaH, anyathA 
tadupAdAnAsambhavAt | na cAnyanihitamanyenopAdIyata iti vAcyam, anyAnubhUte'nyasya 
smaraNAsambhavena tatpUrvakopAdA-nAsambhavAt | na cAsau bhrAntimUleti vAcyam, 
bAdhakAbhAvAt, pratyakSatastadupalambhena saMvAdataH prAmANyasiddhezceti | tathA 
yonimanye prapadyante (ka0 u0 5|7) ityAdyAgamAcca pUrvazarIraparit-yAgena 
zarIrAntaraprApterupalambhAt zarIravyatiriktAtmasiddhiH | na ca prANa AtmA, vAyurUpatvAd 
bAhyavAyuvat,

     mama prANA iti prANAtmanormama vastramitivad bhedopalam-bhAcca | 
ArhataikadezIyoktamindriyAtmatvaM tattadindriyAnubhUtAr-theSu tattadindriyavinAze'pi 
smRtidarzanAt pratyastam, anyAnubhUte'-nyasya smaraNAsaMbhavAt | tathA 
niyataviSayagrAhakANAmindri-yANAmaniyataviSayAvagantrAtmatvAsambhavAt | tacca yo'haM 
cakSuSA rUpamanvabhavam, so'hamidAnIM zrotreNa zabdamanubhavAmItyanu-
sandhAnasiddhamiti | nApi mana AtmA, karaNatvAt kuThAravat, tathA parimitatvAt kAryatvAcca 
ghaTAdivat | tathAtmani siddhe yugapadindriyAr-theSu yugapajjJAnAnutpattyA manasaH punaH 
sadbhAvasiddhernAtmA mana iti | tathAntaHkaraNavRttirUpabuddhyAtmatvaM bauddheH kalpitaM 
smaraNAsaMbhavaprasaGgena nirasanIyam | tathAhi- pUrvabuddhyanu-bhUte'rthe 
buddhyantarasyAnyatvenAnubhavAbhAvAt smaraNAsaMbha-vaH | na cAnanubhUte'rthe smRtiH 
saMbhavati, anupalambhAt | na ca sA buddhiravatiSThata eveti vAcyam, buddheH 
pratikSaNavinAzasya sarvavAdisammatatvAt | ekasantAnatvena vAsanAnugamAt tadupapattiriti 
cenna, vAsanAsantAnayorapi kSaNikatve pUrvoktadoSApAtAt | tathA tayor-jJAnAdavyatirekeNa 
parihAraH | akSaNikatve vyatireke ca svasiddhAnta-virodhaH | taduktaM nyAyavidbhiH-

     athApi nityaM paramArthasantaM 
     santAnanAmAnamupaiSi bhAvam |
     uttiSTha bhikSo ! phalitAstavAzAH 
     so'yaM samAptaH kSaNabhaGgavAdaH || iti |

	viSayAnanda AtmA, ananyArthatvAd atyantapriyabuddhiviSayatvA-cceti kecit | tadapi 
viSayendriyamanobuddhyAtmasaMbandhenotpadyamA-naM buddhikalpamityupekSaNIyameveti | tasmAd 
buddhIndriyazarIrebhyo vyatirikta AtmA pAzabaddhatvAt pazuriti siddham | taduktaM zrIvAya-
vIye-

	buddhIndriyazarIrebhyo vyatirikto vibhurdhruvaH |
	astyeva kalpitAtmeti hetustatra sudurgamaH ||
	buddhIndriyazarIrANAM nAtmatA sadbhiriSyate |
	smRteraniyatajJAnAdayAddehavedanAt || ityAdi |
					(zi0 pu0 vA0 1|5|43-44)

	tadevaM pratipAditAnAM pazUnAM vibhAgamAha- trividhA jJeyA iti | triprakArA 
jJAtavyA ityarthaH | kathamityata Aha- vijJAna-pralayAkalAH sakalA iti | teSAM teSAM 
krameNa lakSaNamAha- malayuktaH malapAzasaMbaddhaH | tatra teSAM madhye | Adyo 
vijJA-nakalaH | malakarmayutaH malakarmAtmakapAzadvaya-sambaddho dvitIyaH || 8 ||

vRttiH

	itthaM patipadArthabhedamuktvA pazupadArthabhedamAha- pazava iti |
	tatreti teSAM madhye, AdyaH vijJAnakevalAkhyo vargaH | 
vijJAnayogasaMnyAsairbhogAdvA karmaNaH kSayAt (pa0 mo0 kA0 55) iti karmakSayataH 
karmabhogArthasya kalAdibandhasyApyabhAvAt kevalaM malamAtrayuktaH syAt | dvitIyastu 
pralayakevalAkhyo vargaH pralaye kalAderupasaMhArAt malakarmayukto bhavati || 8 ||

     malamAyAkarmayutaH sakalasteSu dvidhA bhavedAdyaH |
     AdyaH samAptakaluSo'samAptakaluSo dvitIyaH syAt || 9 ||

tAtparyadIpikA

	sakala iti sakalalakSaNapUrvakaM vijJAnakalavibhAgamAha- maleti |
	malazca mAyA ca karma ca malamAyAkarmANi, tairyuktaH sambandhaH sakala iti | 
teSu triSu, Adyo vijJAnakalo dvividho bhavati- samAptakaluSo'samAptakaluSazceti | tatrAdyaH 
prathamaH, aNUnAM prathamatvAt | samAptakaluSa iti | malazaktiH kAluSyam, tat samAptaM  
naSTaM yasya sa samAptakaluSaH | asamAptakaluSo dvitIyaH | tenAsau 
pracchannajJAnakriyAzaktirbhavatIti || 9 ||

vRttiH

	sakalastu bandhatrayayuktaH | tatra ca mAyAyAH sAkSAt saMban-dhAbhAvAd 
mAyAzabdena tatkAryabhUtAH kalAdayaH kathyante | tadyuktatvAdeva cAsya sakalatvam | 
atazca vijJAnAdinA karmakSaye'pi kiJcitkAlaM saMskAravazena zarIrasthitiH saMbhavatIti 
malamAyAyu-kte'pi sakalabhedaH zAstreSu zrUyate | uktaM ca sAMkhyaiH-

	samyagjJAnadhigamAddharmAdInAmakAraNaprAptau |
	tiSThati saMskAravazAccakrabhramivaddhRtazarIraH || (sAM0 kA0 67) iti |
	kiJca, teSviti | Adyo vijJAnakevalaH punardvidhA bhidyate | kau tau bhedAvityata Aha-
Adya iti | malasya dravyatve sati jaDatvAccakSuSaH paTalAderiva pAkaH saMbhavatIti | Adyo 
vijJAnakevalaH pakvamalApa-kvamalabhedena dvividho bhavatIti bhAvaH || 9 ||

     AdyAnanugRhya zivo vidyezatve niyojayatyaSTau |
     mantrAMzca karotyaparAn te coktAH koTayaH sapta || 10 ||

tAtparyadIpikA

	nanu vijJAnakalasya dvividhasyApi malapAzasambandhasadbhA-vAt tannivRttyAtmakaM 
na zivasAyujyam, nApi svarganarakamadhya-sthAneSu devAdibhedenAvasthAnam, dIkSayA 
karmavinAze sati zravaNAdinA'nAtmanyAtmabuddhirapAkRtAvidyAkRtamAyA-
sambandhAbhAvAt | ataH kutrAsyAvasthAnamityAzaGkyAha- AdyAniti |
	AdyAn samAptakaluSAn vijJAnakalAn anuhRhya dIkSA-
pUrvakazravaNamananAbhyAM parokSajJAnapradAnAtmakamanu-grahaM kRtvA | 
nAparokSajJAnapradAnAtmakam, tasya nididhyAsana-madhye 
karmakSayAntarAyanipAtenotpAtAsaMbhavAt | vidyezatve vidyezvarapadezatve muktikalpe 
niyojayatyaSTau vijJAnakalAn | itarAn mantrAn mantradevatArUpAn karoti bhagavAn ziva iti | 
taduktaM siddhAntahRdaye-

     vidyezvarAn karotyaSTAvIzo'nyAn manudevatAH iti |
	
     kati mantrA ityAkAGkSAyAmAha- te coktAH koTayaH sapteti | te ca mahAmantrAH 
saptakoTisaMkhyayA saMkhyAtA iti || 10 ||

vRttiH

	tayostu- AdyAniti | AdyAn pakvamalAn pAkatAratamyApekSayA-
'dhikArayogyAnanugRhya malApohanena sarvajJatvAdinA yuktAn baindavazarIrayoginazca kRtvA 
teSu viziSTamalapAkavato'STau vidye-zatve yojayati | ananta- sUkSma- zivottama- ekanetra- 
ekarudra- trimUrti- zrIkaNThazikhaNDisaMjJAn paJcakRtyAdhikAriNaH zuddhAdhvA-
dhiSThAtRRnIzvaratattvanivAsinazca karotItyarthaH | aparAMstu saptako-TisaMkhyAtAn 
mantrAnanugrahakAraNabhUtAn vidyAtattvanivAsinazca karotItyarthaH | teSu cArdhaM 
sakalaviSaye gurvadhikaraNasya zivasyAnu-grahakarmaNi karaNatvena sthitvA mahApralaye 
mokSaM yAti | anyat tvardhaM niradhikaraNasya zivasya vijJAnakalAdiviSaye mantrezvara-
mAyAgarbhAdhikAriviSaye ca karaNatvaM prApyAdhikAravairAgyAt 
sRSTyanantaramevApAvRttaM bhavati | taduktaM zrImanmRgendre-

	prayoktRdehasApekSaM tadardhamakhile'dhvani |
	kRtvAdhikAraM sthityante zivaM vizati sezvaram ||
	vinAdhikaraNenAnyat pradhAnavikRteradhaH |
	kRtvA'dhikAramIzeSTamupaiti svAdhvasaMhRtau || (vi0 4|78) iti |

	te tvatrAtyantamalapAkavanto'dhikArAnapekSAstAn pare pade yojayati | ye 
tvapakvamalAsteSAM malapAkAntaM vijJAnakalatvamevetyuktaM zrImadrauravAdau || 10 ||

pralayAkaleSu yeSAM pakve malakarmaNI vrajantyanye |
puryaSTakadehayutA yoniSu nikhilAsu karmavazAt || 11 ||
syAt puryaSTakamantaHkaraNaM dhIkarmakaraNAni |
kAMzcidanuhRhya vitarati bhuvanapatitvaM mahezvarasteSAm (zrIkumAravyAkhyAyAM 
zlokasya pUrvottarArdhayorvaiparItyaM dRzyate |) || 12 ||
     zeSA bhavanti sakalAH kalAdiyogAdaharmukhe kAle |
     zatamaSTAdaza teSAM kurute svayameva mantrezAn || 13 ||

tAtparyadIpikA

	idAnIM pralayAkalasakalayoH svarUpanirNayArthaM zlokatraya-mAha- pralayAkaleSviti | 
	ayamabhiprAyaH- prakarSeNa layaM gataM kalAdidharAntatattvAt-makaM zarIraM 
yeSAM te pralayAkalAH | pralayAvasthAyAM malakarmamAtrapAzasambaddhA AtmAna iti 
yAvat | teSu yeSAM malazca karma ca malakarmaNI pakve paripAkaM gate, jJAnAgninA 
sAhacaryAt, teSAM mahezvaro

     bhuvanapatitvaM vitarati | tebhyaH prayacchati, dadAtItyarthaH | teSAM teSvapi kAMzcit 
pakvakarmakAnanugRhya gaNezAn karoti | kAMzcit pakvamalAn mantratantrezvarAn karoti 
draSTRtveneti | kati mantrezvarA ityAkAGkSAyAM zatamaSTAdazeti | svayameveti | 
brahmAdisahAyAntaramanapekSyaiveti | taduktaM laiGge-

	nAdhikAn na ca hInAMstAn mAnasAnAtmanaH samAn |
	sahasraM hi sahasrANAmasRjat kRttivAsasAm || ityAdi |

	ebhyo'nye ye pakvamalakarmANaH zeSAH ziSTAste sakalA bhavanti, kalAditattvayogAt 
| aharmukhe kAla iti | sRSTikAle sarvametat karoti bhagavAn mahezvara iti | 
puryaSTakadehayutAsta eva nikhilAsu yoniSu devamanuSyatiryagAdiSu vrajanti carantItyarthaH | 
nanvAtmanAM vyApakatvAdamUrtatvAcca kathaM nikhilayonigamanAgamanasaMbhava 
ityAzaGkyAha- puryaSTakadehayutA iti | sUkSmazarIrasya puryaSTakA-khyasya jIvopAdheH 
saMbhavAt tadanusAreNa pazorapi kSetrajJasya gamanAgamane saMbhavata eva | yathA 
ghaTAkAzasya tadupAdhibhUta-ghaTagamanAgamanAbhyAM gamanAgamane, 
tathAtrApyupAdhidhar-mANAM gamanAdInAmupahite kSetrajJe saMbhava upapadyata eveti | 
karmavazAditi | karmAnurUpeNetyarthaH | nanu jIvopAdhibhUtaM puryaSTakaM 
kimityAzaGkyAha- syAt puryaSTakamantaHkaraNaM dhIkarmakaraNAnIti | puri sthUlazarIre 
vartamAnaM yadaSTakaM tat puryaSTakam | tat kimityata Aha- antaHkaraNaM 
dhImakarmakaraNAnIti | buddhyahaGkAramanAM-syantaHkaraNam, dhiyaH karma vyApAro viSaya-
nizcayo dhIkarma, tatkaraNAni tannimittAni zabdAdIni ca puryaSTakamiti kecit | taduktam-

zabdaH sparzazca rUpaM ca raso gandhazca paJcamaH |
mano buddhirahaGkAraH puryaSTakamudIritam || (kAlo0 17|4-5)

	guravastu dhIkarma ca karaNAni ca dhIkarmakaraNAnIti bruvate | tatrASTakatvaM 
zabdasparzarUparasagandhabuddhIndriyakarmendri-yAntaHkaraNAtmanA vibhAgAd bhavati | pare 
karmendriyabuddhIndri-yAntaHkaraNacatuSTaya- prANAdipaJcaka- tanmAtrApaJcaka- 
kAmakarmAvi-dyAtmanASTavidhaM puryaSTakamityAhuH | tathA coktam-

	karmendriyANi khalu paJca tathAparANi
	buddhIndriyANi mana-AdicatuSTayaM ca |
	prANAdipaJcakamatho viyadAdikaM ca
	kAmazca karma ca tamaH punaraSTamI pUH || iti || 11-13 ||

vRttiH

	pralayAkaleSu madhye yeSAM malaH padvastatpAkavazAdeva karmApi samastaM 
pakvaM te vrajantIti, mokSamiti zeSaH | malaparipA-kasya zaktipAtadvAreNa mokSahetutvAt | 
yaduktaM zrImanmRgendre-

	tamazzaktyadhikArasya nivRttestatparicyutau |
	vyanati dRkkriyAnantyaM jagadbandhuraNoH zivaH || (vi0 5|1) iti |

	zrImatsvAyaMbhuve'pi- kSINe tasmin dhiyA sA syAtparaM niHzreyasaM prati (32|17) 
iti | anye tvapakvamalAH puryaSTakadeha-yutAH santaH karmavazena tadbhogArthaM nikhilAsu 
yoniSu

     bhuvanajazarIrAtmikAsu vrajantIti pUrvakriyAnuSaGgo'trApi kartavyaH | 'ete' iti 
pAThApekSAyAM puryaSTakadehayutA yoniSu vrajan-tIti vyAcakSate | teSAM proktaH 
zrutivirodhaH, pakvamalAnAmapi punaH saMsArayogAdanirmokSaprasaGgazca doSaH || 11 ||

	atha kiM tatpuryaSTakamityata Aha- syAditi |
	tatra puryaSTakaM nAma pratipuruSaM niyataH sargAdArabhya kalpAntaM mokSAntaM 
vA'vasthitaH pRthivyAdikalAntatriMzattattvA-tmako'sAdhAraNarUpaH sUkSmadehaH | 
yacchrUyate-

	prayoktryAdimahIprAntametadaNvarthasAdhakam |
	pratyAtmaniyatam..... (mR0 vi0 12|32-33) iti |

tattvasaMgrahe'pi-

	vasudhAdyastattvagaNaH pratipuMniyataH kalAnto'yam |
	paryaTati karmavazato bhuvanajadeheSvayaM ca sarveSu || (zlo0 24-25) iti |

	atazcAyamarthaH- antaHkaraNazabdena manobuddhyahaGkAravA-cinA'nyAnyapi puMso 
bhogakriyAyAmantaraGgAni kalAkAlaniyativid-yArAgaprakRtiguNAkhyAni sapta 
tattvAnyupalakSyante | dhIkarmazabde-na buddheradhyavasitatayA grAhyANi 
pRthivyAdyAkAzAntAni paJca-bhUtAni tatkAraNAni ca zabdAdIni paJcatanmAtrAnyucyante 
| karaNa-zabdena buddhIndriyANi karmendriyANi (ca) darzayati | nanu-

	zabdaH sparzazca rUpaM ca raso gandhazca paJcamaH |
	buddhirmanastvahaGkAraH puryaSTakamudAhRtam || (17|4-5)

	iti zrImatkAlottare zrUyate | satyam- ata eva tatsUtraM tatrabhavatA rAmakaNThena 
triMzattattvaparatayA vyAkhyAtam | kathaM punarasya puryaSTakatvam ? 
bhUtatanmAtrabuddhIndriyakarmendriyAntaHkaraNa-saMjJaiH paJcabhirvargaistatkAraNena guNena 
tadApUrakeNa pradhA-nena kalAdipaJcakaJcukAtmanA vargeNArabdhatvAdityavirodhaH | atha 
teSu puryaSTakayukteSu madhye kAMzcidanugRhya mahezvaraH, mantra-mahezvara ityarthaH | 
guhyAtiguhyaguhyatarapavitrasthANvAkhyapaJcA-STakAdInAM 
bhuvanapatInAmanantaniyuktatvenaiva zruteH, sAJjanat-vAcca | anugRhyeti | svAdhikArAntaM 
prakaTIkRtajJAnakriyAnaNimA-diyoginazca kAMzcid viziSTapuNyavataH kRtvetyarthaH || 12 ||

	anatipakvamalatvena saMsArayogibhyazca ye zeSAH pakvamalAH santo'pi 
tatpAkamAndyAnmAyAgarbhAdhikArayogyAste'pi sargaprAra-mbhe'dhikAranibandhanena 
kalAdinA yogAt sakalA bhavanti | tadyoge'pi te malarahitatvAt zeSA ityuktAH | kriyantaste 
kena niyuktA ityata Aha- zatamaSTAdazeti | teSAmaSTAdazAdhikazataM svayameva zivo 
hyapa-nItamalAn kRtvA mantrezapade yojayati | na tu te'nantaniyuktA ityarthaH | kalAdiyogastu 
teSAmanantakartRka eva, ananto'site prabhuH (ki0 vi0 3|27) ityuktatvAt || 13 ||

tatrASTau maNDalinaH krodhAdyAstatsamAzca vIrezaH |
zrIkaNThaH zatarudrAH zatamityaSTAdazAbhyadhikam || 14 ||

tAtparyadIpikA

	zatamaSTAdaza mantrezvarA ityuktam | ke ta ityAkAGkSAyA-mAha- tatrASTau iti |
	tatra mantrezvarANAM madhye'STau maNDalinaH, krodhAdyAH tatsamAH, 
aSTAvityarthaH | ziSTA vIrezAdaya iti | etaduktaM siddhAntahRdaye-

	trividhAste ca vijJAnakalAzca pralayAkalAH |
	sakalAzceti teSvAdyA malamAtrayutAH pare ||
	malakarmayutA mAyAmalakarmasamAyutAH |
	sakalA iti teSvAdyA dvividhAH pakvakalmaSAH ||
	apakvakalmaSAzceti atrAdyAnanugRhya tu |
	vidyezvarAn karotyaSTAvIzo'nyAn manudevatAH ||
	dvyekapakvadvipakvAH syuzcaturdhA pralayAkalAH |
	pakvobhayAn purAdhIzAn gaNezAn pakvakarmagAn ||
	rudrAn pakvamalAnanyAnaSTAdazazatAdhikAn |
	sakalastvaSTadhA tridvyekapakvAzca tryapakvakAH ||
	hiraNyagarbhaH + + + sanakAdyAzca yoginaH |
	AcAryAMzcaiva devAMzca kramAt teSvakarot prabhuH || ityAdi |

zaivarahasye ca-

vijJAnakalasaMjJaH pralayAkalasaMjJako'tha sakalAkhyaH |
trividho'yaM puruSaH syAdekottarabandhasaMbandhAt ||
vijJAnakalasaMjJAn samAptakaluSAn karoti vidyezAn |
aSTAvanugRhya zivo mantrAnapi saptakoTibhidAn ||
pralayAkalAzca kecid bhuvanezAH pakvakaluSakarmANaH |
karmavazAdavaziSTA nikhilAsvapi yoniSu caranti ||
sakalAH kalAdiyogAt sRSTidazAyAM ta eva nirdiSTAH |
zatamaSTAdaza teSvapi mantrANAmIzitAraH syuH ||
zatarudrAH krodhAdikamaSTamaGguSThamAtrapUrvamapi |
vIrezazrIkaNThau mantrezatvena vartante || ityAdi || 14 ||

vRttiH

	tAneva vibhajati- tatrASTau iti |

	atra maNDalino'STau kalAmastakavAsino gahanezAdayaH krodhAdayazca 
guNamastakasthA aSTAveva | vIrezo vIrabhadraH zataru-drAdhiSThAtA | zrIkaNTho 
guNatattvanilayo'dhastanabhuvanA-dezca kartA | zatarudrAstu brahmANDadhArakA iti || 14 ||

     paripakvamalA ye tAnutsAdanahetuzaktipAtena |
     yojayati pare tattve sa dIkSayA''cAryamUrtisthaH || 15 ||

tAtparyadIpikA

	nanvevaM saMsaratAM pazUnAM tarhi mokSamArge'vatAro na syAdityAzaGkyAha- 
paripakvamalA ye tAniti |
	dvividhA hi paramezvarasya zaktiH, bandhakarI mocikA ceti | tayo-rAdyA'nAdikAlameva 
pravRttA pazUn pAzajAlairbadhnAti | tasyAM kAlavazAt karmasAmyena 
virodhAduparatavyApArAyaM mocikA zaktiH svapatanakAlamanveSayantI mahezvare vartamAnA 
teSu pazuSu nipatati | tatazca saMsArotsAdanahetubhUtazaktyAM nipatitAyAM 
bhagavAnAcAryamUrtimAsthAya dIkSAM kRtvA malAdipAkaM vidhAya paramezvaratattve 
saMyojayatIti nAsaMpAdyo mokSamArge'vatAra iti | taduktam-

	same karmaNi saMjAte kAlAntaravazAt punaH ||
	tIvrazaktinipAtena guruNA dIkSito yadA |
	sarvajJaH sa zivoyadvat kiJcijjJatvavivarjitaH ||
	zivatvavyaktisampUrNaH saMsArI na punastadA | ityAdi |
     (ki0 vi0 1|20-22)

	zaktidvayaM ca bhagavatA'vadhUtapAdenoktam-

	badhnAti kAcidapi zaktiraluptazakteH
		kSetrajJamapratihatA tava pAzajAlaiH |
	jJAnAsinA ca vinikRtya guNAnazeSA-
		nanyA krotyabhimukhaM puruSaM vimuktau || iti || 15 ||
     (bha0 sto0 17)

vRttiH

	atha tribandhanabaddheSu sakaleSu madhye saH zivaH | paritaH samantAdAdhikyena 
pakvamalAn sakalAn tirodhAnazaktyupasaMhAre-NAnugrahazaktyA pAzanirodhanAdikyA 
spRSTAn gurumadhiSThAya dIkSayA pare pade zivasAmyarUpe yojayati | mandamalapAkAMstu 
mandatarAdizaktipAtena vidvezvarAdipade yojayati | yacchruyate-

rudramantrapatIzAnapadabhAjo bhavanti te |
sthitau yAnanugRhNAti gurumAsthAya cidvataH || (mR0 vi0 5|3) iti |
yo yatrAbhilaSed bhogAn sa tatraiva niyojitaH | 
siddhibhAGmantrasAmarthyAt (saMpUrNaH zlokaH sArdhatrizaktikAlottaravRttau (1|5) 
samuddhRtaH |) (svAa0 39|2) iti ca |

     ata eva vijJAnapralayakevalayorniradhikaraNa eva zivasyAnugrahaH siddhaH | ata eva 
malasya dravyatvAccakSuSaH paTalAderiva dIkSAkhye-naivezvaravyApAreNa nivRttiH, na tu 
jJAnamAtrAditi bhAvaH || 15 ||

     baddhAn zeSAnakhilAn viniyukte bhogamuktaye puMsaH |
     tatkarmaNAmanugamAdityevaM kIrtitAH pazavaH || 16 ||

tAtparyadIpikA

	itaraviniyogapUrvamupasaMharati- baddhAn iti |
	sUkSmadehena ca puryaSTakAkhyena baddhAn zeSAn sakalAn bhogamuktaye 
viSayabhuktyarthaM viniyuGkte devAdisthAneSu sthUlade-hena saMyojayatItyartha iti || 16 ||

vRttiH

	aparipakvamalAMstu- baddhAn iti |
	eSa ca prAguktAnuvAdaH | atha pazupadArthamupasaMharati- ityevaM kIrtitAH pazava 
iti || 16 ||

     pAzAzcaturvidhAH syuH puMso malakarmajau matau prathamau |
     mAyIyatirodhAyakazivazaktisamudbhavau cAnyau || 17 ||

tAtparyadIpikA

	idAnImavasaraprAptAnAM lakSaNaparIkSArthamAha- pAzA iti |
	pazUnAM bandhakAH pAzAH | te ca caturvidhAH catuSprakA-rAH syuH | puMsaH 
puruSasya pazoH | teSu prathamau Adyau | malakarma-saMjJakau malakarmAkhyau | tatrApi 
malaH prathamaH pAzaH, tatpUrvakatvAt karmAdInAm | sa tu jJAnaprAgabhAva ityeke | 
pare timirasadRzo jaDAtmako bhAvarUpo jJAnanivartya iti | guravastu avidyAsaMskArAtmaka 
ityAhuH | taduktaM jJAnaM bandhaH (1|2) iti zivasUtravArttikakRtA-

	ahaM mamedamiti yajjJAnaM bhedaprathAtmakam ||
	zabdAnuvedhato jAtaM mAyIyaM malakAraNam |

	kiraNe ca-

malo'jJAnaM pazutvaM ca tiraskArakarastamaH |
avidyA hyAkRtirmUrcchA paryAyAstasya vAcakAH || (vi0 2|20-21) iti |

     dvitIyaH karmAkhyaH pAzaH | mAyIyo mAyAjanyaH sUkSmas-
thUlAtmakazarIrAdirUpaH | sa tRtIyaH | tirodhAyakazivazaktisamud-bhavastatsvarUpazcaturtha iti 
| bandhasya saMsArasya

     janmamaraNAdilakSaNasya bandhakAbhAve'saMbhavAt pAzasadbhAvasiddhiH | 
bandhastu zrutyAdipramANasiddha iti | nanu mAyAkAryatvAd malakarmaNormAyAyAM 
pravRttAyAM tayorudbhaH, prathamabhUtayostayorudbhave mAyAyAH pravRttiriti 
itaretarAzrayaprasaGga iti cenna, bIjAGkuravadanAditvena tatparihAropapatteriti || 17 ||

vRttiH

	atha pAzapadArthabhedamAha- pAzA iti |
	nanu prAgarthapaJcakaM pAza ityuktam | atra teSAM caturvidhat-voktirviruddheti cenna, 
bindormahAmAyAtmanaH paramuktyapekSayA pAzatve'pi tadyogasya 
vidyezvarAdipadaprAptihetutvenAparamuktitvA-datra pAzatvenAnupAdAnamityavirodhaH | ata 
evAha- puMsa iti | puMst-vamalayoginaH, sakalasyetyarthaH | ata eve 
zuddhAdhvavAsinAmanantA-dInAM mahAmAyArodhazaktyAtmakameva pAzadvayaM vidyate | 
tacca mAyAdivanna mohakam, api tu bodhakameveti sarvaM susthitam | nanu yannAdAkhyaM 
paraM bIjaM sarvabhUteSvavasthitam (sA0 kA0 1|5) iti zruteH sakalasyApi bindukAryayogaH ? 
satyam, sarvajJatvAdyavinAbhUtena baindavazarIrAdinA'sya yogo nAstItyevamuktam | ke te 
ityAha- malakarmajau matau prathamAviti | malakarmarUpAvevAtra malakarmajAviti 
kAryakAraNayorabhedenopa-cArAducyete, tayorevAnantarasUtre lakSaNasya vakSyamANatvAt, 
tattatkAryakAraNayorAvaraNabhogabhojanayoH phalarUpatayA pAzatvena prasiddhezca | evaM 
mAyeyatirodhAyakazivazaktisamud-bhavAvityatrApi draSTavyam | prathamAvanAdisiddhau | tatra 
malaH puMso'nAdi kRtvA jJAnakriyAvArakaH | karmApi pravAhAnAdi, bIjAGkurAdinyAyena 
karmajazarIrasantAnasyApyanAditvena sthiteH | mAyeyastu kalAdirAgantukaH pAzaH, 
karmasadbhAva eva tasya sadbhAvAt, tadabhAve'pi pralayakevalino malakarmayogAcca | 
zivazaktestu pAzAdhiSThAnenAtmani tirodhAyakatvAdupacAreNa pAzatvamuktam, 
vakSyAmazca || 17 ||

eko hyanekazaktirdRkkriyayozchAdako malaH puMsAm |
tuSakambukavajjJeyastAmrAzritakAlimAvad vA || 18 ||

tAtparyadIpikA

	prathamoddiSTasya malasya lakSaNamAha- eka iti |
	eko'nekazaktiriti malasya lakSaNam | kArmamAyIyayoranekatvAt tannivRttyarthamuktameka 
iti | tirodhAyakazakterapi pAzatve satyekatvAd malatvaprasaGga iti tannivRttyarthamanekazaktiriti 
padam | nanvavidyAsaM-skArarUpatAyAM malasyAnekatvAdayuktameko mala iti, iti cenna, 
jalanidhinimagnAnantanadIjalavadeSAmapyanantAnAM saMsargAdevaikatvopapatterityeke | anye tu 
jAtyapekSayaikatvavacanam, avAntarAnekajAtisadbhAvAnmAyAkarmaNoranekatvam, tadabhAvAd 
vAsanAyA ekatvamiti bruvate | tathA jJAnAbhAvarUpatAyAM ca 
jAtyapekSayaivaikatvavacanam | anyathA kasyacijjJAnodaye sati jJAnaprAgabhAvanivRtteH 
sakalajaganmokSaprasaGgAditi |

     bhAvAtmakatve mukhyamevaikatvavacanam | ekasya jJAnodaye'pi 
nivRttyanivRttyostamovadupapattermalasyAnekazaktitvAccaikasya jJAnodaye taM pratyeva 
pracchAdanazaktervinAzAditareSAmapa-vargAbhAvaH saMbhavatyeva | 
tasmAdeko'nekazaktirmala iti | taduktaM kiraNe-

vibhorapi malasyAsya tacchakteH kriyate vadhaH |
upAyAcchaktisaMrodhaH kasmiMzcit kriyate male ||
zivajJAnaM tathA tasya zaktisaMrodhakArakam |
yathAgnerdAhikA zaktirmantreNAzu nirudhyate ||
tadvat tacchaktisaMrodhaH (vi0 2|28-30) ityAdi |

	dRkkriyayozchAdako malaH puMsAM tuSakambukavajjJeya iti | yathA tuSakambukau 
taNDulena sahaikIbhUtau mUlAGkurAdyutpatteH kAraNam, tathA malo'pi pazUnAM 
svarUpabhUtajJAnakriyApra-cchAdakatvena karmamAyAdimUlAGkurAdyutpattikAraNatayAtmanA 
sahaikIbhUtastiSThatIti | taduktaM kiraNe- malazcicchAdako naijo vizuddhiH zivatA svataH iti |
	tAmrAzritakAlimAvad veti | yathA tAmrAzritA kAlimA sahajA-tasya 
svarUpabhUtasvarNatAM pracchAdya tAmratAmabhivyajya cAvatiSThate, tathA malo'pyAtmano 
jJAnakriyAtmakaM svarUpaM pracchAdya pazutvaM cAbhivyaJjayannavatiSThata iti | nanu 
malasya sahajatve tatkSaye tadvato'pi vinAzaprasaGga iti cetm naivam, 
tAmrAzritakAlimAvinAze tatsvarUpAvinAzavat 
sahajamalavinAze'pyAtmasvarUpAvinAzopapatteH | taduktam-

sahajA kAlimA tAmre tatkSayAnna ca tatkSayaH ||
kSayastAmrasya yadvat syAt puruSasya malakSayaH |
yathA taNDulakambUke prakSINe na ca tatkSayaH || ityAdi || 18 ||
     (ki0 vi0 2|31-32)

vRttiH

	tatra malakSaNamAha- eka iti |
	eka eva malaH, jaDatve sati nityatvAjjaDAnAmanekAnAM ghaTAdivadanityatvaM syAt | 
yadyevaM malasyaikatvAdekasya mokSArthaM tasya nirodhe sarvamokSaprasaGgaH | ata Aha- 
anekazaktiriti | anekAtmAvAra-kAnekazaktiyuktaH, ata ekasyAH zakteH paripAkena tirodhAnena 
tadAvAryasyaiva mokSaH | tuSakambukavaditi | yathA taNDulatAmrayoranAdyAvArakatvena 
sahajaM tuSAdi kAlimA vA pazcAtpAkena rasazaktyA nivartate, evaM 
malo'pyAtmano'nAdyAvArakaH pAkavazAddIkSayA nivartate | yadi vA yathA 
zAlyAdestuSAdyaGkurotpattau nimittam, evamAtmano malaH zarIrAdyutpattau nimittam | yathA 
vA tAmrasya kAlimA rasazaktyA nivartate, tathA malaH zivazaktyA nivartata ityetAvadAtmano 
dRSTAntaH, na tu sarvasAmyeneti || 18 ||

     karmAnAdi proktaM dharmAdharmAtmakaM vicitraM ca |
     mAyA ca vasturUpA mUlaM vizvasya nityA sA || 19 ||

tAtparyadIpikA           

	malAnantaraM karmamAyAtmakaM pAzadvayamuttarazlokapUr-vAparArdhAbhyAM 
nirUpayati- karmAnAdIti |
	karmAnAdi pravAharUpeNa, na caikasyaiva karmaNaH sarvadAvas-thAnena | tathA sati 
bhAvarUpasya karmaNo'nAditvenAtmavannitya-tayA'nirmokSaprasaGgAt | nahi karmAvinAze 
saMsAranivRttiH saMbhavati | ityevaM proktaM tattvajJaiH | dharmAdharmAtmakamiti 
dharmAdharmarUpeNa dvividhamiti | vicitraM ceti vividhaphalahetutvAd vicitramityarthaH | tathAhi- 
sukhAsAdhAraNakAraNaM dharmaH, duHkhAsAdhAraNakAraNamadharma ityeke | anye tu 
codanAlakSaNo-'rtho dharmaH, tallakSaNo'nartho'dharma iti bruvate | apare dharmaH 
puruSaguNaH kartuH priyahitamokSahetuH, tadviparIto'dharma iti | ahiMsAlakSaNo dharma iti kecit 
| caityavandanAdilakSaNo dharma iti bauddhAH | pare paropakAralakSaNo dharma iti | 
tatrAntyaM trayamanupapannam, pramANAbhAvAt | na ca bauddhAdyAgamAH pramANam, 
teSAM pauruSeyatayA mUlapramANAbhAve prAmANyAbhAvAt | na caiSAM 
mUlapramANaM kiJcidu-palabhyate, pratyakSAderdharma prati prAmANyAsaMbhavasyoktatvAt | 
na copakAralakSaNasya dharmatvam, brAhmaNA dihiMsAderapi tacchatrUpakArAdinA 
dharmatvaprasaGgAt | nApi hiMsAyA adharmatvam, 
vrIhyavaghAtaduSTanigrahAgnISomIyapazuhiMsAdera-dharmatvaprasaGgAditi |
	sa dharmastrividhaH, nityanaimittikakAmyAtmanA tasya bhedAt | tatra 
yAvajjIvamagnihotraM juhuyAt, yAvajjIvaM darzapUrNamA-sAbhyAM yajeta, yAvajjIvaM 
jyotiSTomena yejeta ityevamAdivAkyair-niyamena vihitA nityAH | nimittAdupajAyamAnA 
naimittikAH | tadyathA- vaizvAnaraM dvAdazakapAlaM nirvapet putre jAte (tai0 saM0 2.2.5.3) 
aSTakA kartavyA ityevamAdivihitA jAteSTyAdayaH | kAmanApUrva-kAH kAmyAH, agnihotraM 
juhuyAt svargakAmaH (mai0 u0 6|36), darzapUrNamAsAbhyAM svargakAmo yajeta, 
jyotiSTomena svargakAmo yajet (Apa0 zrau0 10|2|1) ityevamAdivAkyavihitAH | te dvividhAH- 
savidyAH kevalAzceti | savidyA IzvarasmaraNapUrvakAH | itarAstadrahitA iti | evaMlakSaNo 
dharmo dvividhaH- iSTaH pUrtazceti | tatreSTo vaidikaH, pUrtastAntrika iti | pratiSiddho'dharmaH 
| tadyathA- brAhmaNo na hantavya, surAM na pibet, na zaGkhena pibet toyam 
ityAdivAkyaniSiddhA brAhmaNahiMsA-dayaH | apare tvadharmazca trividha ityAhuH- 
nityAkaraNam, naimittikA-karaNam, pratiSiddhakaraNaM ceti | nityanaimittikAbhyAM 
pratyavAyaparihAraH, kAmyAt svargAdiprAptiH | adharmAnnarakAdigamanamiti | etaduktaM 
siddhAntahRdaye-

	kriyAyAH sUkSmarUpaM hi karmAhurdvividhaM ca tat |
	iSTaM pUrtaM ca tatreSTaM vaidikaM tAntrikaM tathA ||
	pUrtamityucyate sadbhistat punastrividhaM matam |
	dharmo'dharmastathA citramiti dharmo vidheH padam ||

     sa punastrividhaH kAmyanityanaimittikAtmanA |
	niSiddho'dharma itaraccitraM kAmyaM punardvidhA ||
	savidyaM kevalaM ceti vidyA cezvaracintanam |
	pratyavAyahatirvA syAdupAttaduritakSayaH ||
	nityanaimittikAbhyAM syAdadharmAnnArakI gatiH |
	arvAcInA manuSyAttu pASANAntA sudustarA ||
	kAmyAt svargagatistasmAdUrdhvA brahmAvasAnikA |
	savidyA devayAnena punarAvRttivarjitA ||
	kevalA pitRyAnena gatiH saMsaraNAtmikA |
	dharmAdharmAkhyayoH sAmye mAnuSyaM labhate pumAn ||
	karmaNoH sarvagAmI syAccitrAcitraphalodayaH |
	karmAkhyo'yaM mahApAzo durmocastena jantavaH ||
	itastataH samAkRSya nIyante pazavo yathA | ityAdi |

	evaM malakarmavazAd mahezvarecchayA mAyA puNyApuNya-phalAnubhavAya 
stristhAneSu devAdizarIrendriyaviSayAtmanA punaH punaH pariNamate | taduktam-

	malAt kartRtvabhoktRtve kartRtvAt karma karmaNaH |
	bhogastadAkSepavazAnmAyAbandhastatastanuH ||
	bhogAdhikaraNaM bhogyA lokAzca karaNAni ca |
	indriyANIti jAyante bhogasiddhyai tato malaH ||
	abhilASAtmakazceti bIjAGkuraphalAdivat |
	anAdiH pAzajAlo'NUn badhnAti bhavacakrake || ityAdi |

     vicitraM cetyanena karmasadbhAve pramANamapyuktam | tathAhi - 
IzvaradaridrAdibhedabhinnaM vicitraM jagad vicitrakAraNaM vinA na saMbhavati | tacca na 
dRSTamupalabhyata ityadRSTakAraNakalpaneti tatsiddhiH | taduktaM mAtaGge-
     
jagataH suprasiddhe dve dharmAdharmau tu karmaNI |
anAdikAlasaMrUDhe tAbhyAM puM vAsitaH sadA || (vi0 8|98) ityAdi |

	
	tasyA mAyAyAzca lakSaNamAha- vizvasya mUlamiti | vizvsya vyaktajAtasya 
kalAdermUlabhUtA upAdAnabhUtA sA mAyeti | taduktam- kalAdInAM tattvAnAmaviveko 
mAyA (zi0 sU0 3|3) iti | lakSanapadenaiva tasyAM pramANamapyuktam | tathAhi- vizvaM 
jagad ekopAdAnajanyam, ekAkAratvAt, yadyadekAkAraM tattadekopAdAna-janyam, tathA 
ghaTakumbhamRdaGgazarAvakuDyavalmIkAdaya ekAkArA ekamRdupAdAnajanyAH, tathedamapi 
jaDatvAdinaikAkAram, tasmAdekopAdAnajanyamiti | yadatra sakalakalAdyavaniparyantatattvajA-
tAvivekAtmakamupAdAnam, sA mAyeti tatsiddhiH | vistareNaitadupariSTAdupapAdayiSyAmaH | 
	mAyAzabdavAcyatayA tasyAparamArthatvazaGkA syAditi tannivRttyarthamAha- 
vasturUpeti | sA mAyA vasturUpA paramArthabhUtA vizvamUlatvAdIzvaravaditi | nityA ca 
sA mAyA |

     vizvamUlatvAdIzvaravadeveti | anityatve tasyA mUlAntarA-bhyupagame 
vizvamUlatvAbhAvAt | na ca mAyA mahezvaramAyA-vyatiriktAnAmeva mUlamiti 
vizvamUlatvAbhAvastasyA iti vAcyam, janyasyaiva mUlApekSatvAdajanyatvamUlatvAbhAve 
virodhAbhAvA-diti | na ca paramezvarasya vizvamUlatve pramANAbhAvAt 
sAdhanahInamudAharaNamiti vAcyam, tasya vizvamUlatvazravaNAt | tathAhi- yato vA imAni 
bhUtAni jAyante (tai0 u0 3|1), sa imA|llokAnasRjata (ai0 u0 1|2), Atmana AkAzaH 
sambhUtaH (tai0 u0 2|1) ityAdibhirvedavAkyaiH paramezvarasya jaganmUlatvamavagamyate | tato 
na sAdhanavikalamudAharaNamiti | tathA paramarSiNA vedavyAsena sUtrakRtA paramezvarasya 
vizvamUlatvaM janmAdyasya yataH (bra0 sU0 1|1|2), zAstrayonitvAt (bra0 sU0 1|1|3) iti 
sUtradvayenopavarNitam-iti | nanu tarhi na mAyAyA vizvamUla-tvam, paramezvarasyaiva 
vizvamUlatvAditi cet, naivam, parasparasRSTayoreva mAyAmahezvarayorvizvamUlatvenobhayorapi 
tadupapatteH |
	tathAhi- mAyA tAvanna paramezvarAnadhiSThitA jaDA jagadupAdAnaM bhavati, 
mahezvarazca cetano'pi na mAyAM vinA vizvamUlatAM bhajate 
nirvyApArodAsInamAtratvAditi tayoH saMsRSTayoreva jaganmUlatvam, ayaHpiNDAgnyoriva 
kAryakAraNAdIti | mAyA ceti cazabdena mAyAkAryasya vizvasya vasturUpatvamupavarNitam | 
na ca prapaJcasya mithyAtvAdetadanupa-pannamiti vAcyam, tatra pramANAbhAvAt | nanu 
vimataH prapaJco mithyA, dRzyatvAt, yad yad dRzyaM tattanmithyA yathA zuktirajatam, 
tathAyamapi dRzyaH, tasmAnmithyetyanumAnAt prapaJcamithyAtva-siddhiriti cet, naivam, 
zuktirajatasya tadvyatiriktasyedaM rajatamiti bhrAnti-gocarasyAparamArthabhUtasya sadbhAve 
pramANAbhAvAt | nanu vimataM rajatajJAnaM rajataviSayam, rajatajJAnatvAt, samyagrajata-
jJAnavadityanumAnAt tatra zuktau rajatasadbhAvaH siddhaH | nAsau sat, tadAnIM 
bhrAntatvabAdhyatvayorasambhavAt, samyagrajatavat | nApyasat, zazaviSANa iva 
khyAtibAdhayorasaMbhavaprasaGgAt | nApi sadasat, viruddhatvAditi siddhaM tasya 
sadasadvilakSaNatvam | tadevAnirUpitarUpatvaM mithyAtvaM ceti | taduktam-

	sattve na bhrAntibAdhau stAM nAsattve khyAtibAdhakau |
	sadasadbhyAmanirvAcyA'vidyA vedyaiH saha bhramA || iti |

	tadetadasAram, alaukikasya rajatasya paramArthabhUtasya tatra prati-bhAsAt | tathA hi- 
dvividhaM hi rajataM laukikamalaukikaM ceti | tatra laukikaM valayakaraNAdisamartham, 
alaukikamatra pratibhAsamAnaM tadasamartham | tasya dvitvAdisAmyena paramArthatvAnna 
mithyAtvam | na ca nedaM rajatamiti jJAnenAsyA bAdhaH, apekSitalaukikarajata-
vivekakhyApakatvenAsyAbAdhakatvAt | athAlaukikarajatAvabodhe laukikarajatArthinastatra 
pravRttyabhAvaprasaGga iti cenna, alaukikasyApi laukikabhedA-grahaNena pravRttyupapatteH | 
athavA'laukikasya laukika-tAM manyamAnastatra pravartata iti | tathAnirvacanIyarajatAvabodhe ca 
pravRttyasambhavAd bhavatA ca maduktamArgAnusAra AzrayaNIya eva | ato nAnirvacanIyA-
paramArtharajatasadbhAva iti dRSTAntAbhAvAnna prapaJcamithyAtvasiddhiH |
	nanu bhedAgrahaNasya pravartakatve nAlaukikarajatakalpanA saMgacchate, zuktirajatayoreva 
gRhyamANasmaryamANayorbhedAgraha-NAd rajatArthinastatra pravRttyupapatteH 
kalpanAgauravaprasaGgAt |

     tathAhi- idaM rajatamityatra idamanubhavaH purovartizuktiviSayaH | rajatamiti tu 
sadRzadarzanasamudbuddhasaMskArajaM dezAntaragata-rajataviSayaM smaraNam | 
tatrAnubhUyamAnasmaryamANayoH zuktirajatayorbhedAgrahaNAdeva rajatArthinaH purovartini 
zuktirajate pravRttyupapa-tternAlaukikarajatakalpanamupapannamiti | tatra ca na mithyAbhUtaM 
kiJcidastIti prapaJcamithyAtvAnumAnasya dRSTAntAbhAvAdaprAmANyamiti | naivam, 
tacchabdollekhanazUnya-tayA rajatajJAnasya smRtirUpatvAsaMbhavAt | tasmAdatrAlaukikaM 
rajataM bhAsata iti | naitadevam, alaukikarajatagrahaNasya pravartakatvA-nupapatteH | na 
cAlaukikasya laukikatAM manyamAnaH pravartata iti vAcyam, anyathAkhyAtivA-daprasaGgAt | 
na ca laukikabhedAgrahaNAt pravRttiH, svarNabhedAgraha-Nena tadarthinastatra pravRttiprasaGgAt | 
na ca gRhyamANayorbhedAgraha-NaM pravartakamiti svarNAgrahaNena tadarthinastatra 
pravRttyabhAva iti vAcyam, laukikarajatasyApyagRhya-mANatayA tadarthinastatra 
pravRttyasaMbhavAt | na cAnena rajatajJA-nena tasyApi grahaNamiti vAcyam, 
dezAntarasthatayendriyagocaratvA-saMbhavAt | na cedaM smRtyanubhavAtmakaM 
purovartidezAntaragata-rajatadvayaviSayaM vijJAnadvayamiti vAcyam, indriyasaMprayogajanya-tvAt 
tacchabdollekhazUnyatvAcca rajata-jJAnasya smRtitvAsaMbhavAt | tasmAdatra bhAsamAnaM 
rajatamasaditi zUnyavAdino mithyAtvaM cAsadviSayatvamiti prapaJcamithyAtvAnumAnAt 
prapaJcasyApyasat-tvamiti | naitadevam, asadrajatAvabodhe rajatArthinastatra pravRttyanupa-patteH | 
athAsadrajatasya sadrajatabhedAgrahAt tadabhedagrahAdvA pravRttyupapattiriti cet, naivam, 
rajatazuktyoreva bhedAgrahaNAdabheda-grahaNAdvA pravRttyupapattau 
tadvyatiriktAsadrajatakalpanAsaMbhavAt |
	tasmAdatra rajatajJAnaM svagataM rajatAkAraM bahiH zuktimastake 
prakAzayatItyAtmakhyAtivAdinaH | asataH khyAnA-yogAt satazca dezAntarasthatvAdarajatasya 
rajatadhIgocaratvAsaMbha-vAcca jJAnagatarajatAkArasya bAhyatayA'vabhAso bhrama iti | 
jAgrajjJAnAni ca svAkAravyatiriktArthazUnyAni, jJAnatvAt, svapnajJAnavaditi 
jJAnAdvaitavAdI | jJAnamAtraM sarvaM tadanyAsattvasyAnenAnumAnenAvagatatvAditi | 
naivam, asyAnumA-nasya pakSahetudRSTAntAdigrAhakajJAnaiH svavyatiriktArthavadbhir-
vyabhicArAt | teSAmagrAhyatve'SyAnumAnasyAzrayAsiddhisva-
rUpAsiddhidharmyasiddhadRSTAntatvAdidoSaprasaGgaH | na ca svapnajJAnAnAM 
svAkAragrAhakatvam, vijJAnAnaM sAkAratve pramANAbhAvAt | na ca nIlajJAnaM 
pItajJAnamityAdipratikarma-vyavasthAnyathAnupapattyA tajjJAnAnAM nIlapItAdyAkAravattva-
siddhiH, nIlapItAdeH karmakArakatayA pramANyAt | tasmAt svAkAraM bahIrUpatayA na 
khyApayanti bhrAntaya ityAtmakhyAtya-saMbhavaH | kiM tarhi bhrAntijJAnAnAM bhrAntatvam, 
anAdivRddha-vyavahArAvagatasvaviSayaparityAgena viSayAntaropasarpaNamiti brUmaH | tatra ca 
pramANaM nedaM rajatam, api tu zuktiketi bAdhakapratyayAnantaramidaM zuktizakalaM 
rajatarUpeNa mayA pratyAkalitamityabAdhyamAnaM pratyabhijJAtmakaM pratyakSamupa-labhyata 
iti | tadviparItAnirvacanIyAlaukikakhyAtyasatkhyAtyAtmakhyA-tyAdipratipAdakAnAM 
pramANAnAmagnyanuSNatvapratipAdakakRta-katvAnumAnavadaprAmANyamiti | taduktaM 
nyAyavidbhiH-

	vijJAnAnAM yathArthatvaM sarveSAM kecidUcire |
	tadasAdhvanyathAkhyAtirmAnasyAmIyate dhiyA || iti |

     tathA anumAnAdapyanyathAkhyAtiratrAvagamyate | tathA hi- vimatA rajatArthinAM 
purovartini zuktizakale pravRttiH svagocare rajata-jJAnapUrvikA, rajatAditsAdhInapravRttitvAt, 
samyagrajatapravRttiva-diti | zuktizakalaM vA rajatajJAnaviSayaH, rajatAditsAdhInapravRtti-
viSayatvAt, samyagrajatavaditi | tathA nedaM rajatam, api tu zuktiketi bAdhakapratyayazca 
pakSAntareSu nopapadyate, zuktau rajatarUpatA-prAptyabhAvAt | prakArAntareNa 
bAdhakapratyayaprasaGgazca- nedaM sadrajatam, api tvasadrajatamiti | nAtra sadrajatamasti, api 
tvanyatreti vAnirvacanIyakhyAtipakSe | nAtra valayakaraNasamarthaM rajatamastyapi tvanyatreti, 
nedaM valayakaraNasamarthaM rajatamapi tvalaukikamiti vA 
prAbhAkaraikadezIyamImAMsakapakSe | nedaM sadrajatamapi tvasadra-jatamiti, nAtra 
sadrajatamastyapi tvanyatreti vA'satkhyAtipakSe | nAtra rajatamastyapi 
tvAntaramityAtmakhyAtipakSe | rajatAd bhinnamidaM zuktizakalamiti bhedagrahaNapakSe bhavediti 
| tasmAdanyathAkhyAti-vyatiriktakhyAtInAmasaMbhava iti | rajatArthipravRttyasaMbhavAcca 
khyAtyantarAsaMbhavaH | anantavastubhedAgrahaNasadbhAvAt purovartini tadarthinAM 
pravRttiprasaGgaH | na ca gRhyamANayorbhedA-grahaNAt pravRttiH, 
ghaTapaTayorgRhyamANayostadAnIM bhedagrahaNAbhAvena ghaTArthinaH paTe pravRttiprasaGgAt 
| na ca dharmipratiyogigrahaNavelAyAM tadabhedagrahaNopapattiH, ubhaya-grahaNapUrvakatvAd 
bhedapravRtteriti | atha bhedasya svarUpatvAt svarUpagrahaNena bhedasyApi gRhItatvAd 
bhedAgrahaNAbhAvenApra-vRttiriti cet ? na tarhi rajatArthinaH purovartini zuktizakale pravRttiH, 
svayamprakAzamAnayorgrahaNasmaraNayoridaM rajatamiti jJAnayor-gRhyamANasmaryamANayozca 
zuktirajatayoH svarUpAgrahaNena bhedAgrahaNAsaMbhavAt | kiJca, bhedAgrahaNasya 
pravartakatve zabdArthasambandhagrahaNAsaMbhavaprasaGgaH | 
	tathAhi- gAmAnayeti prayojakavAkyazravaNasamanantaraM 
prayojyavRddhapravRttimupalabhamAno bAla evamavagacchati- asya gamanakriyAhetuH prayatno jAta 
iti, svAtmani gamanAdikriyAyAH prayatnapUrvakatvadarzanAt | prayatnakAraNatvenecchAM 
gamanAnu-mitaprayatnenAnuminoti, icchAkAraNatvena ceSTasAdhanajJAna-kAraNatvena ca 
prayojaka-vRddhavAkyaM jJAnapUrvakAlavarti, tatkAraNavastvantarAbhAvAt | tata 
anIyamAnamarthamupalabhamAno'-yamarthasamudAyo'nena zabdasamudAyAdavagata iti jAnAti | 
pazcAdAvApodvApAbhyAM vizeSato'dhyavasyati- asyArthavizeSa-syAyaM zabdavizeSo 
vAcakaH, asya padavizeSasyAyamarthavizeSo vAcya iti vA | atrAgrahaNasya 
jJAnaprAgabhAvarUpatayA'zabda-janyatvAcchabdazaktikalpanAnavakAzaH, 
jJAnadvAreNecchAprayat-nAvutpAdya zabdasya pravartakatvAditi candradvitvazaGkhapItimAdi-
bhramAdiSu na bhedagrahaNasaMbhava iti | tasmAnna bhedAgrahaNAt pravRttiH, api 
tvanyathAgrahaNAditi brUmaH | nanu zaivaiH zAstre anyathAkhyAtirAzrIyata iti kuto'vagatam, 
bhUta-zuddhitantre uktatvAt | tathAhi-

	anyathAkhyAmupAzritya sAMkhyavacchivazAsanam |
	yA anirvacanIyeti tathA siddhAntavAdataH ||
	vedAntavAdinAM dRSTimAzritaM vaiSNavaM matam | iti |

	sAMkhyAmiti ca sezvarasAMkhyaM vivakSitam, itarasyAkhyAti-vAditvAt | tathA (pyu?- 
hyu) ktaM sAMkhyAcAryaiH- viparyayo mithyA-jJAnamatadrUpapratiSTham (yo0 sU0 1|8) iti

     sUtreNAnyathAkhyAtipratipAdanAt | tasmAcchuktyavidyAsamud-bhatasya 
zuktyadhiSThitasya zuktivyatiriktasyAdhiSThAnayAthAtmya-jJAnanivartyasya mithyAbhUtasya 
rajatasyAbhAvAt prapaJcamithyA-tvAnumAnaM dharmyasiddhaduSTAntatayA na 
prAmANyasampada-madhigacchatIti | tathAtmano'pi svataH siddhasya zrutipramANadRzya-tvAd 
hetorvyabhicAraH | kiJca, prapaJcasya dharmiNo dRzyatvena hetunA yathA sAdhyate, tathA 
dRzyatvasya hetormithyAtvasya sAdhyadharmasya mithyAtvaM yadyanenaivAnumAnena sAdhyeta, 
tadA hetoH pakSaikadezatayA pakSe vRttyabhAvAdanizcitapakSavRttirasiddha ityasiddhatvam, 
prapaJcamithyAtvasya dharmiNo'nyatra prapaJcavada-siddherAzrayaikadezAsiddhatvaM ca 
prasajyate | taddvayasya mithyAtvAsAdhane tatra vartamAnatvAd dRzyatvasya vyabhicAraH | 
pramANAntareNa tanmithyAtvasAdhane tanmithyAtvasya mithyAtvA-sAdhanAt tatra 
dvayorvyabhicAraH | tasyApi mithyAtvasAdhane'nti-masya mithyAtvasya mithyAtvAsAdhanAt 
(tatra dvayorvyabhicAraH | tasyApi mithyAtvAsAdhane'ntimasya mithyAtvasya mithyAtvAsAdha-
nAt ?) tatra vartamAnatayA hetorvyabhicA-raH | tathA mithyAtvaM yadyasattvaM tadA san 
ghaTaH san paTa ityAdipratyakSabAdhaH | prapaJcasya dharmiNo mithyAtvasya dharmasya 
hetordRzyatvasya zuktirajatasya dRSTAntasya ca zazaviSANakalpatvenAzrayA-
siddhyAdidoSaprasaGgaH | teSAM sadbhAve hetorvyabhicAraH | ityubha-yathA zUnyavAdinAM 
na vAde'dhikAraH | taduktam-
	adhikAro'nupAyatvAnna vAde zUnyavAdinaH (zlo. vA., nirA0 129) iti |
	yadi jJAnanivartyatvam, tadA ca pratyakSAdivirodhaH, pratyakSA-dinA 
mudgaraprahArAdinivartyatvopalambhena kAryakalpyajJAnanivar-tanayogyatAyA asaMbhavAt | na 
ca kalpakoTizatasahasravartinAM padArthAnAM kAraNAntaravinaSTAnAmajJAnAdavinAzo 
ghaTata iti | yadi sadasadvilakSaNatvaM mithyAtvam, tadApi pratyakSAdi-virodhaH, pratyakSAdinA 
padArthAnAM sattvAsattvayorupalambhAt | tathA viruddhatvAcca sadasattvavadekasya 
padArthasya na sadasadvai-lakSaNyopapattiH | dezakAlabhedena tvarthAnAM 
sadasattvayorupapattiH | ubhayavailakSaNyaM tu na kathaJcidupapadyata iti | atha bAdhyatvamiti 
cedastu | bAdhyatvaM yadi nAzitvam, tadAMze siddhasAdhyatAMze 
dharmigrAhakapramANabAdhA ca | kAlAdyavaniparyantatattvAnAM tatkAryA-NAM ca 
vinAzitvasya siddhatvAt, mAyAyAH svagrAhakapramANena nityatvasya siddhatvAcceti 
vizvakAryakalApasya kAraNApekSAyAM tanmUlatayA mAyAsadbhAvasiddhiH | atastasyA 
nityatvam, vizvakAryakAraNatayAkAryatvenAnityatvAsambhavAt, tasyAzca kAraNAntarakal-
panAyAmanavasthAprasaGgAcca | nityatvaM kasyacidAzrayaNIyam | tat 
kalpanAgauravaparihArAya prathamabhU-tAyA mAyAyA evAbhyupagatamiti dharmigrAhakeNaiva 
pramANena tannityatvamapi siddhamapi na dharmigrAhakapramANavirodhaH | na cAnena tasya 
bAdhAsaMbhavaH, asya tanmUlatayA tadabhAve mAyA-sadbhAvaseddherAzrayAsiddhidoSa-
prasaGgAt | atha bAdhAtmaka-bodhaviSayatvaM bAdhyatvam, tasya (tacca) 
zuktirajjvAdAvupajAtara-jatasarpAdijJAne'pyastIti na sAdhyahInamudAharaNam |
	tathA hi- anAdisiddhasvaviSayarajatAdiparityAgena viSayAntare zuktyAdAvupasarpaNAd 
mithyedaM mamotpannaM rajatAdijJAnamiti bAdhAtmakabodhaviSayatA 
rajatAdijJAnAnAmupalabhyate | taddRSTAntabalAt prapaJcasyApi bodhAtmakabodhaviSayatvaM 
sAdhyata iti na kazcid doSa iti cet, naivam, siddhasAdhyatAprasaGgAt | tathA hi- sarvo vai 
rudraH

      (ma0 nA0 10|11) ityAdizruteH vicAratastu rudrasya sthUlametacca-rAcaram 
ityAdismRtezca zarIrazarIrirUpatayA sarvasya rudrAtmaka-tvAvagamAt sarveSAmapi 
padArthAnAM rudrAtmakatvAvabhAsasya bhramarUpatvam | tena nAyaM 
prapaJco'zivAtmakaH, kintu rudrAtmaka eveti bAdhAtmakabodhaviSayatvasya siddhatvAt 
siddhasAdhyatAprasaGga iti | athAzivAtmatAgocarA ye pratyayAH prapaJcaviSayAsteSAM 
mithyAtvamanyathAkhyAtirUpatvaM sAdhyata iti cet, tarhi siddhaM naH samIhitam, 
prapaJcasatyatvAvirodhAt | nahi rajjau sarpajJAnotpAdena rajjusatyatvaM virudhyata iti | tasmAd 
yuktamuktaM mAyA ca vasturUpeti | aparamArthAt paramArthavastUtpAdAsambhavAcceti |
	apare punarmAyA ca vasturUpetyetad vAkyamanyathA vyAcacakSire | tathAhi- mAyA 
vasturUpA zivarUpA, tatkAryaM ca jagacchivarUpam, zivAd bhinnasya kasyacidasaMbhavAt | 
tathAhi- jJAnasvabhAva evAyamAtmA zivo mAyAtatkAryAtmanA'vabhA-sate | tataH sa eva 
tadubhayamiti | na ca tathA sati zivasya pariNAmitvamiti cAcyam, vivartavAdAzrayaNAt | 
apracyutasvasvabhAvasya vastuno'-nyathAbhAvo vivartaH | yathA rajjoH sarpatvam | nahi rajjau 
sarpabhAva-kAle pariNAmAdi dRSTamiti mahezvarasyApi jagadrUpatve tadvadeva 
pariNAmAdikAsaMbhava iti ziva eva mAyAtatkAryAtmanA bhAsata iti | 
taduktamIzvaragItAyAm-

	sa eva mUlaprakRtiH pradhAnaH puruSo'pi ca |
	vikArA mahadAdIni devadevaH sanAtanaH || (7|31) iti |

	nahi rajatAderanyatra vidyamAnasya zuktikAdau bhramadarzanA-dasya 
prapaJcasyAnyatrAsaMbhavAd bhramarUpatvAsaMbhava iti vAcyam, pUrvadarzanamAtrasya 
bhramahetusaMskArahetutayA prayojaka-tvenAnyatra vidyamAnatayA'prayojakatvAt | tasmAt 
pUrva-pUrvadivasajanmakalpAdiSvanubhUtasyottarottaradivasajanmakalpAdiSu bhramasaMbhava iti na 
kazcid doSaH | taduktaM zatakakAreNa-

	sarvavikalpavihInaM zuddhaM zAntaM vyayodayavihInam |
	yat paratattvaM tasmin vibhAti SaTtriMzadAtma jagat ||
	darpaNabimbe yadvannagaragrAmAdi citramavibhAgi |
	bhAti vibhAgenaiva ca parasparaM darpaNAdapi ca ||
	vimalataraparamazAmbhavabodhAt tadvad vibhAgazUnyamapi |
     anyonyaM ca tato'pi ca vibhaktamAbhAti zivarUpam || iti || 19 ||
								(pa0 sA0 11-13)

vRttiH

	karmaNo'nAditvaM pravAhAnAditayetyuktam | vaicitryaM ca sAdhanabhedAt | 
sAdhanaM ca kartrAdivizeSaH, vicitrabhogabhedAt-makaphaladarzanAcca | mAyA ca tAvad 
vasturUpA | na tu vedAntavA-dinAmivAsatyarUpA | vizvasya kalAdeH sAdhAraNasya, 
bhuvanA-dyAtmano'sAdhAraNasya, sUkSmadehAtmana ubhayarUpasya, 
bhuvanajazarIrAtmanazcAzuddhasya sarvasya jagato mUlamupAdA-nam, upAdAnaM vinA 
kAryAnutpatteH | sA ca nityA, paramakAraNa-tvAt, anityatve tvanavasthAprasaGgAcca | ata 
evaikA sA jJeyA | eSa ca nyAyaH zuddhAdhvopAdAnabhUtasya bindorapi samAnaH |

     nanu tatra uddezasUtre mAyeyaH pAzatvenoddiSTaH, atra mAyAyA lakSaNamuktamiti 
virodha iti cet, satyam | mAyAyAH svato bandhakatvAbhAvAt tatra tatkAryamuddiSTam | atra tu 
tasya kAraNAdhI-natvAt kAraNasya lakSaNamuktam | kAryasya tu vistRtatvAt pazcAllakSa-
NamabhidhAsyata ityavirodhaH || 19 ||

pAzAnugrAhitvAt puruSatirodhAyikA vibhoH zaktiH |
pAzatvenAbhihitA pAzAzca caturvidhAstvevam || 20 ||

tAtparyadIpikA

	idAnIM zaktigaNaM nirUpayati- pAzeti |
	malakarmamAyAkAryANAM pAzAnAmacetanatayA paramezva-razaktyAvezaM vinA 
pazubandhanasAmarthyAbhAvAt svAvezena pAzAnugrahaM svakArye pravartanaM kurvatI 
puruSatirodhAyikA puruSAcchAdikA vibhoH paramezvarasya zaktiH pAzatayoktA tattvajJairiti | 
pAzAzca caturvidhAstvevamityupasaMharati | evamuktena prakAreNa pAzAzcaturvidhA ityarthaH 
| nanvarthapaJcakaM pAza ityupakramya pAzAzcaturvidhA ityupasaMhAre pUrvAparavirodha iti 
cennaivam, sthUlasUkSmavibhAgenoktAyA mAyAyA ekatvavivakSayA cAturvidhyAbhidhAnAditi 
| pAzAzca caturvidhAstvevamityupasaMhAra-vAkyasthena cazabdena zAstrArthopasaMhAro 
dyotitaH | evaM trividhaM tattvamiti || 20 ||
iti tattvaprakAzatAtparyadIpikAyAM patipazupAzAtmakavicA-raH prathamaH paricchedaH ||

vRttiH

	itthaM sAkSAt pAzatrayamuktvA zakterupacAreNa pAzatvamiti 
darzayannuktArthamupasaMharati- pAzeti || 20 ||

zuddhAni paJcatattvAnyAdyaM teSu smaranti zivatattvam |
zaktisadAzivatattve IzvaravidyAkhyatattve ca || 21 ||
puMso jJakartRtArthaM mAyAtastattvapaJcakaM bhavati |
kAlo niyatizca tathA kalA ca vidyA ca rAgazca || 22 ||
avyaktaM mAyAto guNatattvaM tadanu buddhyahaGkArau |
cetodhIkarmendriyatanmAtrANyanu ca paJcabhUtAni || 23 ||

tAtparyadIpikA

atha dvitIyaH paricchedaH

	atha saMkSepeNoktAnAM patipazupAzAnAM vistAramupadizati- zuddhAnIti |

     atrAdyaM paJcakaM zivasvarUpatvAcchuddham, madhyamaM saptakaM 
zuddhAzuddham, pazurUpatvAt | kathamatra saptakatva-mityata Aha- puMso jJakartRtArthaM 
mAyAtastattvapaJcakaM bhavati | puruSasya jJAnArthaM kartRtvArthaM ca mAyAtaH 
tattvapaJcaka-mutpadyate | tena kAraNabhUtA mAyA, kAryabhUtaM paJcakam, tadupahitaH 
puruSaH saptama iti saptakatvam | taduktaM zaivarahasye-

	mAyA kAlo niyatiH kalA ca vidyAbhilASakRt puruSaH | 
	klRptAni saptadhaivaM zuddhAzuddhAni tattvAni || iti |

	ziSTaM kevalAzuddhamavyaktAdipRthivyantam | avyaktasya mAyAta udbhavaH, avyaktAd 
guNatattvasya, guNatattvAd buddheH, buddhi-tattvAdahaGkArasya, ahaGkArAd 
manobuddhIndriyakarmendriya-tanmAtrANAmudbhavaH, tanmAtrebhya AkAzAdipRthivyantAnAmiti || 
1-3 ||

vRttiH

	itthaM sakalaviSayaM pAzatrayamubhayaviSayAM tirodhAna-zaktiM coktvA 
mayottIrNaviSayaM zuddhAdhvasvarUpaM pAzamAha- zuddhAnIti |
	zuddhAni zuddhatattvAni | kiM tAni nityAni, utAnityAni ? nityatve sRSTivirodhaH, 
anityatve kiM teSAmupAdAnamityata Aha- teSu madhye zivatattvaM bindvAtmakam AdyaM 
pradhAnamupAdAnaM smaranti pUrvAcAryAH | paramopAdAnatvenaiva cAsya mAyAvan-
nityatvaM siddhamityuktam | atazcAnyAni catvAri tAni tatkAryANIti bhAvaH | taduktam- 
mAyopari mahAmAyA (rau0 saM0 4|28) iti | idamatrAkUtam- vidyAditattvAnAM 
vicitrabhuvanAdisannivezAdimat-tvena zruteH kArya-tvAvyabhicArAt tattattvavAsinAM ca 
zarIrAdi-yogAt tatkAraNaM mahAmAyAtmakaM siddhamiti | yaduktam- upAdAnaM 
zarIrANAM vidyAvidyezvarAtmanAm iti | kiJca, nAdAdidvAreNa mantratantrAdyut-
pAdakatvamapyasyAH zrUyate- zakternAdo bhaved bindurakSaraM mAtRkA tataH (mR0 kri0 1|2) 
ityAdi | itthaM bindvAtmakaM zivatattvaM prasAdhya tatkAryANi catvAri tAni kinnAmAnItyata 
Aha- zaktisadAzi-veti || 21 ||
	evaM zuddhAni tattvAni saMkhyAto nAmatazcoktvA'tho'zu-ddhAnyapi tathaivoddizati- 
puMsa iti |
	puMso baddhAtmano'jJakartRtArthamajJatvakartRtvasiddhyai mAyAtaH sAkSAt 
pAramparyeNa ca kAlAditattvapaJcakaM bhavati | paJcakaJcukayuktasyAsya bhoktRtvena 
puMstvamlayogAt puruSatat-tvAkhyA bhavatIti vakSyati || 22 ||
	kiM ca- avyaktamiti |
	dhIkarmendriyeti, buddhIndriyakarmendriyANItyarthaH | avyaktA-dIni paJcaviMzatitattvAni 
mAyAtaH pAramparyeNotpannAnIti vakSyAmaH | atra lakSaNoktyavasareNa, eteSAM ca || 23 
||

     puruSasya bhogahetoH pradhAnato viMzatirbhavet tryadhikA |
     yasmAt prakRtiguNAnAM nAtyantaM vastuto bhedaH || 24 ||

tAtparyadIpikA

	kimarthameSAmutpAdaH kRto bhagavatA mahezvareNetyAzaGk-yAha- puruSasyeti |

     puruSasya pazoH svakRtapuNyApuNyaphalabhUtasukhaduHkhAnu-bhavArthameSAmutpattiH 
| bhogastu bhogAyatanaM bhUtAtmakaM zarIram, bhogasAdhanAnIndriyANi, bhogyAn 
zabdAdiviSayAn vinA na saMbhavatIti bhogArthameSAM janmeti siddham | avyaktaguNatattva-
yoratyantabhedAbhAvAnna ca tattvAdhikyamiti | etaduktaM zaivarahasye-

avyaktabuddhyahaGkRtimanAMsi catvAri zabdamAtrAdyam |
zrotrAdyaM vAgAdyaM viyadAdyaM paJcakaM ca pRthak ||
tattvacaturviMzatikaM triguNAtmatayaiva kevalAzuddham | iti || 4 ||

vRttiH

	sarveSAM caiSAM kutra kutropayogaH ? kiJca, pradhAnAt sAkSAjjAtAni kAni ? 
tattvAntaravyavadhAnena jAtAni kAnIti sarvaM darzayiSyAmaH | nanu avyaktaM mAyAtaH 
(zlo0 23) ityAdinA prakRtyadhastanatattvAnAM caturviMzateruktatvAt kathamatra tryadhikA 
viMzati-rucyate ? ata Aha- yasmAt prakRtiguNAnAmiti | guNAnAmeva prakRtitvena 
sAMkhyairabhyupagamAt tannirAsAya teSAmacaitanye satyanekatvAd ghaTAdInAmiva 
kAraNAntareNa bhavitavyamiti prakRtisiddhirasmAbhirucyate | tataH kAryakAraNayorabhedavivakSa-
yaivamuktamityavirodhaH || 24 ||

vyApakamekaM nityaM kAraNamakhilasya tattvajAtasya |
jJAnakriyAsvabhAvaM zivatattvaM jagadurAcAryAH || 25 ||

tAtparyadIpikA

	prathamoddiSTaM zivatattvaM lakSayati- vyApakamiti |
	vyApakaM vyAptaM sarvagatamityarthaH | ekamadvitIyaM sarva-
bhUtasvarUpeNAvasthitamityarthaH | nityam anazvaram | akhilatattva-jAtasya kAlAdipRthivyantasya 
kAraNamutpAdakam | jJAnakriyAsva-bhAvamiti | jJAnamAtraM kriyA vyApAraH sAkSitvaM 
svabhAvo yasya tattvasya tat zivatattvamiti tallakSaNam | jagadurAhuH | AcAryA Agamavida iti 
| athavA svavyatiriktamasti cet tadakhilaM vyApnotIti vyApakamityuktam | 
svasamAnAsamAnapuruSAntarAbhAvAdekatvam | vyAptyekatve cAkAzasyApi sta iti 
tannivRttyarthaM nityapadopAdAnam | vyAptinityatvaikatvAni pazorapi vidyanta iti tannivRttyarthaM 
kAraNama-khilasya tattvajAtasyeti padam | mAyAyAzca vyApakanityatvaikatvAkhila-
kAraNatvasadbhAvAt tannivRttyarthaM jJAnakriyAsvabhAvamutyuktam | ato yad vyApakamekaM 
nityamakhilatattvakAraNaM jJAnakriyAsvabhAvam, tacchitatattvamiti | etaduktaM zvetAzvatare-

sarvAnanazirogrIvaH sarvabhUtaguhAzayaH |
sarvavyApI sa bhagavAMstasmAt sarvagataH zivaH || (3|11) iti |

	zivadharmottare ca-

	AdimadhyAntanirmuktaH svabhAvavimalaH prabhuH |
	sarvajJaH paripUrNazca zivo jJeyaH zivAgema || iti |

     siddhAntahRdaye ca-

kUTasthamamRtaM brahma satyamekamavikriyam |
niSpratyanIkaM citsaukhyaM nityatRptamaluptadRk ||
adhvAtItaM paraM vyoma vizvavyApi nirAmayam |
aNIyo'NorajaM nityamuktaM ca mahato mahat ||
apratarkyamarUpAdi niraupamyamalakSaNam |
sadAtmakaM svayaMjyotiravAGmanasagocaram ||
atanniSedhamArgeNa jJAyate yacca sUribhiH |
yacca bhrAmakavat kartR jJApakaM ca pradIpavat ||
mAyAsahAyaM tatprAhuH zivatattvaM manISiNaH | iti || 5 ||

vRttiH

	yathoddiSTeSu tattveSu prathamoddiSTaM tAvacchivatattvaM lakSayati- vyApakamiti |
	yatprAk zuddhAdhvopAdAnatvena bindvAtmakaM zivatattvaM sAdhitaM tad vyApakam, 
zuddhAzuddhAtmano jagato nijapariNati-rUpAbhirnivRttyAdibhiH kalAbhirvizvaM vyApnotItyarthaH 
| yadAhuH- kalAvasthAni tattvAni tattvastho bhuvanavrajaH (mR0 kri0 8|71) ityAdi | tacca ekam, 
paramakAraNatvAt | anekatve hi jaDatve satyaneka-tvAd ghaTAdivat kAryaM syAdityuktam | ata 
eva nityam, anityatve paramakAraNatvAbhAvAt, tasyApi copAdAnAntarApekSAyAmana-
vasthAprasaGgAcca | nikhilasya ca zuddharUpasya tattvajAtasya kAraNam upAdAnam | na 
tvazuddhasya tattvasya, tasya mAyotpannatve-noktatvAdasya ca 
zuddhatvenAzuddhakAraNatvAyogAt | kiJca, jJAnakriye svasmin sthite AtmanAM bhAvayatIti 
jJAnakriyAsva-bhAvam | ayamarthaH- tattadbhuvanezvarArAdhanAd dIkSayA vA 
svakAryabhUtazuddhAdhvabhuvanaprAptAnAM jJAnakriye prakaTayatIti | yaduktaM 
zrImanmataGge-

	zAntyatItaM paraM tattvamavinAzyavyayAtmakam |
	yenonmIlitasAmarthyAH pazavo (pazavaH zivatAM gatA iti mudritagrantapAThaH 
zuddhaH |) jIvatAM gatAH || (vi0  3|32-33) iti |

	ata evAsya bodhakatvam | nanu mAyApi kalAdidvAreNa jJAnakri-yAprakAziketyuktam, 
satyam, mayotpannasya jJAnAdeH kiJcidviSaya-tvAdanAtmAdAvAtmAdibhAvanAhetutvAcca 
sA mohikA | idaM tu sarvaviSayajJAnAdiprakAzakatvAcchAstrasiddhopAdAnadvAreNa 
zivAdizuddhavastubodhakatvAcca bodhakamityavirodhaH | yadvA jJAna-kriyAkhyaM svaM 
dhanamAtmanAM bhAvayatyabhivyanaktIti jJAnakri-yAsvabhAvam | athavA jJAnakriye asya na 
svabhAva iti naGprazleSa-NAjjaDarUpatayA vyAkhyeyam, na tu jJAnasvabhAva-tayA, 
upAdAnatvena mRdAdivadacetanatvAt, jJAnasvabhAvasyo-pAdAnatvAyogAt | taduktaM 
zrImatparAkhye- nimittamIzvarasteSA-mupAdAnaM sa bindurAT iti | anyatra'pyuktam 
(pauSkarAgamIyaM vacanamidam |)- sA ca kuNDalinI zambhoH zaktiH

     zuddhA jaDAtmikA iti | evaMbhUtamupAdAnarUpaM mahA-mAyAkhyaM 
zivatattvamAcAryA jagaduriti | na tviyamAryA parama-zivaviSayatayA tacchaktiviSayatayA vA 
vyAkhyeyA, zivAdipRthi-vyantatattvala-kSaNaprastAve tattvAtItayostayoratrAprastutvAt | tayoreva 
zivatattvarUpa-tvena zuddhAdhvopAdAnatvAbhyupagame pariNAmit-vAdacetanatvAdido-
SaprasaGgAt | na ca cidvivartAbhyupagamo yuktaH, sarvapramANasiddha-tvena 
jagato'satyatvAbhAvAt, vivartasya cAsatya-tvAbhyupagamAt | zivatattvasaMjJAyA 
bindvAtmanaH kuNDalinyAz-citsamavAyAbhAve-na parigrahazaktitvena zravaNAcca proktaiva 
vyAkhyA yuktA | taduktam-

nAtra (pauSkarAgamasya zlokA ime iti lu0 saM0, bhA0 2, pR0 121 
darzanAdavagamyate |) zaktirupAdAnaM cidrUpatvAdyathA zivaH |
	pariNAmo'citaH proktazcetanasya na yujyate ||
	cito vivarta evoktastathAtve kAryazUnyatA |
	sarvapramANasaMsiddhaM cidvivartaM kathaM jagat ||
	mAyApi nAtropAdAnaM mohakatvAt svatejasA |
	sA ca kuNDalinI zambhoH zaktiH zuddhA jaDAtmikA ||
	na tAdAtmyAt sthitA kintu vartamAnA parigrahe |
	zive kartari tAdAtmyAnneyaM kuNDalinI sthitA ||
	upAdAnaM tvato hetoH kulAle mRttikA yathA | iti |

	zabdabrahmavAdipakSeNApyAtmana eva nAdAdikrameNa bahudhA'vasthAnaM na 
yujyata ityuktaM nAdakArikAsu-

	avikAryatrAtmoktastacchaktizcApyato na yogyau tau |
	bahudhA sthAtuM yadvA caitanyavinAkRtau vikAritvAt || (19) ityAdi |

	ataH zabdopAdAnatvenApi mahAmAyA siddhyatItyevamAdi 
vistareNAsmAbhirmRgendravRttidIpikAyAM darzitamiti tato'vadhAryam || 25 ||

asminnilIya nikhilA icchAdyAH zaktayaH svakaM kAryam |
kurvanti tena tadidaM sarvAnugrAhakaM prAhuH || 26 ||

tAtparyadIpikA

	nanu niSkriyasya zivatattvasya kathaM nikhilatattvakAraNatvamityAzaGkyAha- asminniti |
	asmin paramezvaratattve nilInAstattattvamavalambya sthitA icchAdyAH zaktayaH 
svakAryaM kurvanti, na svAtantryeNa, tAsAM zivasAmarthyarUpatvAt | tenAsau zivo 
nikhilatattvakAraNam, ata eva sarvAnugrAhakazca bhavatIti | asya zivatattvasya SaDadhvavyAptiH-

	svarAH SoDaza varNAdhvA tArAdyaM navakaM padam |
	mantrau SaDvarNapaJcArNau tattvaM tatra zivAtmakam ||

     nentaM namaH parAyAdyaM tripaJcabhuvanAnyapi |
	nivRttyAdIni paJcAtra zAntyatItAdayaH kalAH ||
	sarvatrAnte padaM yojyaM syAt SaDadhvAtmane namaH || 6 ||

vRttiH

	ata eva- asminniti |
	icchAdyAH zivazaktayaH, asmin upAdAne prathamaM nilIya tadadhiSThAnena 
svakamanugrAhyAnugrAhakalakSaNaM kAryaM taccheSabhUtaM ca sRSTyAdikaM kurvanti | 
tatastadidamapi paramparayA sarvAnugrAhakatvAt sarvAnugrAhakaM prAhuH, na tu 
zaktyadhiSThA-nanairapekSyeNAsvAtantryAt, acetanasya cetanAdhiSThAnaM vinA 
kAryotpAdanAyogAt || 26 ||

	cidacidanugrahahetorasya sisRkSorya Adya unmeSaH |
	tacchaktitattvamabhihitamavibhAgApannamasyaiva || 27 ||

tAtparyadIpikA

	atha zaktitattvamAha- ciditi |
	ayamarthaH- pazupAzAnugrahArthaM sisRkSoH paramezvara-syAdyo ya unmeSaH 
unnidrabhAvaH, IkSaNamiti yAvat, tacchaktitattva-mityuktam, zivatattvAdabhinnaM ca, 
zaktitadvatorbhedAsaMbhavAditi | nanu kathaM zakteH sadbhAvAvagamaH ? kAryAnupapattyeti 
brUmaH | niSkriyasya zivasya jagatsRSTyAdikaM zaktyabhAve na saMbhavatIti tatsiddhiH | 
tathA hi- yathAgneraGgulisaMyoge vidyamAne'pi maNyAdi-pratibandhakasadbhAvadazAyAM 
sphoTakAryAnudbhavAdagnyaGguli-saMyogavyatiriktA dAhikA zaktiH kalpyate, tathAtrApi 
paJcavidhakAr-yAnyathAnupapattyA zaktisadbhAvasiddhiH | na cAgnyaGgulisaMyoga eva 
sphoTaheturiti vAcyam, tasya pratibandhApratibandhAvasthayoH sadbhAvenAvizeSeNa 
sphoTakAryodayaprazaGgAt | na ca pratibandha-kAbhAvAtmakakAraNAbhAvAt tadAnIM 
kAryAnudayo na zaktya-bhAvAditi vAcyam, pratibandhakAbhAvasyAkAraNatvAt | bhUtAnAM 
bhaviSyatAM dezAntare vartamAnAnAM ca pratibandhakAnAma-bhAvasadbhAve'pi 
sphoTakAryAnutpattestasyAkAraNatvasiddhiH | na caitasya pratibandhakAbhAvasya kAraNatvena 
tadvyatiriktAbhAvasad-bhAve'pi kAryAnudayo ghaTata iti vAcyam, etadabhAvasya kAraNatve 
pramANA-bhAvAt, viparItapramANasadbhAvAcca | tathAhi- vimato bhAvaH sphoTAjanakaH, 
pratibandhakAbhAvatvAt, tadanyAbhAvavaditi | tathaitat-pratibandhakavigamane 
etadabhAvasadbhAve'pi pratibandhakAntarasadbhAve sphoTakAryAnudayAccaitasyAkAraNatva-
siddhiH | na ca sarveSAM pratibandhakAnAmabhAvaH kAraNam, uparidIpanayanasyAGkurotpatti-
prabandhakasyApanayane bIjAdaGkurot-pattiprasaGgAt | atha na dIpanaya-napradhvaMsaH 
kAraNam, tatprAga-bhAvasya kAraNatvAt | sa cAtra nAstIti tasya tatra nItatvAditi cet, naivam, 
uparidIpanayanaprAgabhAvAntarasadbhAvenAGkurotpAdapra-saGgAt | na cAsAveva kAraNamiti 
vAcyam, uparinItadIpeSu bIjAGku-reSvetaddIpanayanaprAgabhAvasya sadbhAvAt tebhyo 
bIjebhyo'GkurotpattiprasaGgAt |

ato dIpanayanAdatIndriyaM kimapi kAraNaM naSTamityavagamyate, 
tadabhAvApratibandhAvasthAyAM kAryAnudayanapratibandhakA-bhAvasyAbhAvAditi | nanu 
zaktervinAze kAraNAbhAvAt pratibandha-kAvagame'gneH sphoTakAryAbhAvo gatistambhane ca 
sarpAderga-manAbhAvazca prasajyate, mantreNa naSTazaktitvAditi cet ? naivam, 
naSTazaktijvAlAnAze punarutpadyamAnajvAlAyAH zaktinAzA-bhAvena sphoTodayopa-patteH | 
sarpasya tu dhyAtamAravazAt gamanA-bhAvaH, na zaktinAzAdi-ti punargamanopapatteH | 
tasmAd kAryAnya-thAnupapattyA zaktisadbhA-vasiddhiH | taduktaM bhaTTapAdena-

	zaktayaH sarvabhAvAnAM kAryArthApattigocarAH iti |

	seyaM parA zaktiM paramezvarAdabhinnA | tasyA vikArA icchAyAH 
zaktayastadabhinnA iti | taduktaM mAtaGge-

	patyuH zaktiH parA sUkSmA jAgrato dyotanakSamA |
	tayA prabhuH prabuddhAtmA svatantraH sa sadAzivaH || (vi0 5|20) iti |

	asya zaktitattvasya SaDadhvavyAptiH-

	anantAyeti pUrvaM yat padAnAM tu catuSTayam |
	tattvazaktiH kalAtItA pUrvasmAttu viziSyate || 7 ||

vRttiH

	itthaM zivatattvaM prasAdhya tatkAryabhUtaM zaktitattvamAha- ciditi |
	zivo hi citAmAtmanAmanugrahaM mokSaM kartumicchusteSAM malapAkAya 
karmabhogArthaM ca sRSTyAdi kRtvA pAzAnAmacitA-manugrahaM 
svavyApArasAmarthyotpAdanaM karoti | atra pAzAnu-grahe sAdhye prathamopAdAnatvAd 
binduH sAdhanamityuktam | ato'yamarthaH paryavasannaH- sisRkSoH paramezvarasya cidacidviSayo 
yo'nugrahaH, taddhetostatsAdhanarUpasya asya bindorya Adya unmeSaH prathamaH pariNAmaH 
zAntyAdibhuvanAtmano nAdAtmakazca, tacchaktitattvamucyate | nanvetacchaktitattvaM 
bindvAdivanniravayavamuta sAvayavamata Aha- avibhAgApannamiti | vibhajyante ebhiH 
padArthAH parasparaM vivicyanta iti vibhAgA avayavAH | avibhAgApannaM 
niravayavasvarUpam, asyaiva paramakAraNasya bindormAyAyA vA zakti-rUpasyaiva 
paramakAraNatvAt | zAntyAdIni tu kAryarUpANi tattvAni vyaktatvena bhuvanAdyAdhAratvAt 
sAvayavAnyeva | nanu zivatattve'pi bhuvanAni zruyante ? satyam,- na tu sAkSAt | kintu 
zAntikalAmastaka eva tAni sthitAni, mAyAbhuvanAnIva kalAmastaka ityavirodhaH || 27 ||

jJAnakriyAkhyazaktyorapakarSotkarSayorabhAvena |
yaH prasarastaM prAhuH sadAzivAkhyaM budhAstattvam || 28 ||

tAtparyadIpikA

	athedAnIM sadAzivAdizuddhatattvAnAM svarUpaM nirUpayitumAha- jJAneti |

     ayamabhiprAyaH- parAzaktivikArabhUtajJAnecchAkriyAzaktI-nAM prasarAvasthAyAM 
jJAnakriyAtmakazaktidvayasAmye satIccho-dreko yadA vivakSyate, tadA zivatattvaM 
sadAzivAbhidhAnamiti | taduktaM siddhAntahRdaye-

	jJAnakriyAkhye nyaktulye zaktIcchodrekamaznute |
	yadA sadAzivAkhyastu tadAsau ziva ucyate || iti |

	tat tattvaM sphaTikanibham | taduktaM candrajJAne-

	sadAzivAkhyaM vimalaM zuddhasphaTikasannibham | iti |

	asya sadAzivatattvasya SaDadhvavyAptiH-

	varNAdhvAtra kakAraH syAcchAzvatAyAdikaM trikam |
	padAdhvA ca svayaM tattvabhuvane zAntireva ca || 8 ||

vTtiH

	atha sadAzivatattvamAha- jJAneti |
	sisRkSutvena prAguktasya paramazivasya jJAnakriyAzaktyoH sAmyenAdhiSThAnAt 
tasyaivopAdAnatayoktasya bondoryo dvitIyaH prasaraH pariNAmaH zaktitattvavyavadhAnena jAyate, 
tat sadAzivatattvamAhuH || 28 ||

nyagbhavati yatra zaktirjJAnAkhyodriktatAM kriyA bhajate |
IzvaratattvaM tadiha proktaM sarvArthakartR sadA || 29 ||

tAtparyadIpikA

	IzvaratattvanirUpaNArthamAha- nyagiti |
	nyagbhUtajJAnecchAtmakazaktidvayasAmye sati yadA kriyodreko bhavati, tadA 
zivatattvamIzvarAbhidhAnaM bhavati | tat sarvasattvAnAM kartRsvabhAvam, kriyodrekAt | tat 
pAvakAbham | taduktam-

ata (zloko'yaM candrajJAnasya syAt |) UrdhvaM bhavedanyadIzvarAvaraNaM mahat |
dIptapAvakavarNAbhaM vidyezAstatra saMsthitAH || iti |

nanu jJAnecchAnyagbhAvasya svaviSayaM prakAzya tuSNIm-
bhAvarUpatvenAsattvarUpatvAbhAvAt | taduktaM siddhAntahRdaye-

	jJAnecche nyaksame zaktI kriyAdhikyaM yadAznute |
	tadAsAvIzvarAkhyAM tu labhate paramezvaraH || iti |

     asya SaDadhvavyAptiH- khakAro varNAdhvA | dhyAnAhArAyet-yAdIni trINi padAni | 
naM IzAnamUrdhne, 'namaH zivAya' iti mantrau | svayaM tattvAdhvA | 
anantAdizikhaNDyantAni bhuvanAni | vidyA kalAdhvA || 9 ||

vRttiH

	tRtIye tu prasare- nyagiti |
	yatra jagatkartranantAdyadhiSThAnena kriyAzaktervyApArabAhul-yam, 
tatsAdAkhyatattvAdhastanaM prasaramIzvaratattvamAhuH | tasya ca sarvArthakartRtvaM 
kriyAzaktyadhiSThitatvAt, sarvakartRRNAmanan-tAdInAmatraivAntarbhAvasya vakSyamANatvAcca || 
29 ||

nyagbhavati kartRzaktirjJAnAkhyodrekamaznute yatra |
tattattvaM vidyAkhyaM prakAzakaM jJAnarUpatvAt || 30 ||

tAtparyadIpikA

	vidyAtattvaM varNayati- nyagiti |
	nyagbhUtecchAkriyAzaktisAmye sati yadA jJAnodreko bhavati, tadA zivatattvaM 
vidyAkhyaM bhavati | tadapyuktam-

	udricyate jJAnazaktiH kriyecche nyaksame yadA |
	tadAsau zuddhavidyAkhyaH sarvavidyAnidhiH zivaH || iti |

	prayojanamAha- prakAzakamiti | tatra hetumAha- jJAnarUpatvA-diti | 
padmarAgasamAnavarNA | taduktam-

tadbAhye (zloko'yaM candrajJAnasya syAt |) zuddhavidyA syAt koTInAM 
zatalakSakA |
sudIptA nirmalA sUkSmA padmarAgasamaprabhA || iti |

asyAH SaDadhvavyAptiH- gakAro varNaH | zivAyetyAdIni 
trINi padAni | maM tatpuruSavaktrAya iti, namaH zivAya iti mantrau | zuddhavidyA tattvam | 
vAmAdyA nava bhuvanAni | pratiSThA kalA || 10 ||

vRttiH

	tathA- nyagiti |
	yastvIzvaratattvAdhastane bindupariNAmarUpe tattve saptakoTima-hAmantrAdhiSThAnena 
jJAnazakterudreko bhavati, tattattvavAsinAM jJAnarUpatvAt sarvajJatvaprakAzahetutvAt 
prakAzakaM tad vidyAta-ttvamucyate || 30 ||

nAdo binduH sakalau sAdAkhyaM tattvamAzritau kathitau |
vidyezAH punaraize mantrA vidyAzca vidyAkhye || 31 ||

tAtparyadIpikA

	nanu nAdabindu zAstrAntare tattvamadhye kathitau, atastattvA-dhikyamanayorantarbhAvo 
vA vaktavyaH | tathAhi-

	tadUrdhvaM baindavaM tattvaM nirmalaM sarvatomukham |
	paramaM sarvatattvAnAmanantaM jyotiravyayam ||

	ityAdi | tathA vidyezvaravidyAmantrANAM sadAzive vRttimanye manyante | 
tatastannirAsArthaM tayorantabhAvArthaM cAha- nAda iti |
	ayamabhiprAyaH- nAdabindU kalAvattayA sakalau sadA sarvadA zivAkhyaM 
tattvamAzritau, tadabhinnau kathitAvityarthaH | kecit sadAzivaM tattvamAzritAvityAhuH | 
vidyezAnantAdaya Izvaratattve vartante | taduktaM siddhAntAgame-

	anantasUkSmau zivatamaikanetraikarudrakAH |
	trimUrtipUrvaM zrIkaNThaH zikhaNDI ca tato'STamaH ||
	ete vidyezvarAstvaSTAvIzvare saMprakIrtitAH || iti |

	mantrAzca vidyAzca prakAzakatayA prakAzakaM vidyAtattva-mAzritya vartanta iti | 
taduktam-

	mantrA vidyAzca vidyAyAM bIjabhUtA bhavanti hi iti || 11 ||

vRttiH

	itthaM zuddhatattvAnyabhidhAya teSveva vastvantarasyAntar-bhAvamAha- nAdo binduriti |
	tatra parabindoH zivatattvatvena tatkAryasya sUkSmanAdasya zakti-tattvAntarbhAvena 
cokta (tattvA ? tvA)t sakalo bindurakSarabin-dvAtmako nAdazca sthUladhvanirUpaH | dvau ca 
sadAzivatattvAntar-bhUtau jJeyau | vidyezAnAmanantAdInAmIzvaratattve'ntarbhAvaH | 
mantrANAM saptakoTisaMkhyAkAnAM vAcikazabdAnAM ca vyomavyApyAdInAM 
vidyAnAM ca kAmikAdyaSTAviMzatitantrANAM vidyAtattve'ntar-bhAvaH || 31 ||

     paJcAnAmapyeSAM nahi kramo'stIha kAlarahitatvAt |
     vyApAravazAdeSAM vihitA khalu kalpanA zAstre || 32 ||

tAtparyadIpikA

	nanu nityatayA vibhutvena caiSAM kramAsaMbhavAt kathaM 
tatsadbhAvapratipAdanamityAzaGkyAha- paJcAnAmiti |
	ayamabhiprAyaH- dezakAlakRtasya prathamacaramabhAvAtma-kasya kramasyAsaMbhave'pi 
zaktivyApArabhedonneyabhedavazA-deSAM tattvAnAM sadbhAva AzrIyata iti || 12 ||

vRttiH

	paJcetIti kAcidAryA keSucitpustakeSu dRzyate, tadasat, dvayorapyadhvanorevaM 
kramaprasavayoginoH | vilayaH prAtilomyena zaktitattvadvayAvadhiH || (mR0 vi0 13|179) 
ityAdibhireSAM sRSTisaM-hArakramapratipAdakaistattadbhuvanavAsinAmavasthAnabhedAbhidhA-
yibhiH zuddhAdhvanyapi zuddhakAlasadbhA(vA?va)vedibhirvAkyair-virodhAt | seyamazAstrajJaiH 
prakSiptetyupe(kSai?kSyai)va || 32 ||

     tattvaM vastuta ekaM zivasaMjJaM citrazaktizatakhacitam |
     zaktivyApRtibhedAt tasyaite kalpitA bhedAH || 33 ||

tAtparyadIpikA

	nanu kimarthaM paramezvaratattvasya svata evAmI bhedA nAbhyu-pagamyante, yena 
zaktivyApAropAdhikRtabhedAzrayaNamityAzaG-kyAha- tattvamiti |
	yataH zivatattvasya paramArthato bhedAsaMbhavastataH zaktivyA-pAropAdhikRtA evAmI 
paJca bhedAH | tadbhedAsaMbhavazca IzvarAnekatvakalpanAsaMbhavAditi, 
bhedasvarUpAsaMbhavAdvA | sa cAzrayAsaMbhavAt | tathA hi- ko'yaM bhedAzrayaH ? 
bhinno vA syAdabhinno vA ? yadyabhinne vastuni bhedasya vRttiH, tadaikapadArthA-
bhAvaprasaGgaH, bhedasamAvezAt | yadi bhinne bhedasya vRttiH, kiM tarhi bhedena prayojanam 
? vastutaH pUrvameva bhinnatvAt | astu bhedavati bhedasya vRttiH | tatra yadi bhedAntareNa 
bhinne tadvRttyabhyupagamasta-dAnavasthA, bhedAntarasyApi bhinnavRttitvAt | na ca svenaiva 
bhinne svayaM vartata iti vAcyam, AtmAzrayaprasaGgAt | tasmAdabhinna eva vastuni bhedasya 
vRttirabhyupagamanIyA | tadA ca tasya candrabhedavada-paramArthatvam, abhinnavRttitvAditi | na 
ca svarUpameva bhedaH, ayamasmAdabhinna iti sApekSasya bhedapratibhAsasyAbhAvaprasaGgAt 
| na ca ghaTa ityaghaTavyAvRtterapyavabhAsa iti vAcyam, padArtheSu vartamAna-
tAdyavabhAsenAvartamAnatAdivyAvRttyA kSaNikatvAdi-prasaGgAt | tattvaM vastutaH 
paramArthata ekam abhinnam advitIyam | kiM tadityata Aha- zivasaMjJaM zivAkhyam, 
pramAtA pramitaM ca vizvaM zivaH sadaiko bahudhA cAkazIti iti zruteH | citrazaktizata-
khacitamiti nAnArU-pazaktisahasramudritam | taduktamadhv