##################################################################################################
##################################################################################################
## MUKTABODHA INDOLOGICAL RESEARCH INSTITUTE
## www.muktabodha.org
##
## anuttaraprakAzapaJcAzikA
##
## by AdyanAtha
##
## edited by pt mukunda rAma zAstrI 
## from Kashmir Series of Texts and Studies vol. 14, Srinagar, 1918
##
## Data entered by the staff of Muktabodha
## under the supervision of Dr. Mark S.G. Dyczkowski
##
##
## Harvard-Kyoto transliteration
## Revision 0 October 18, 2007
##
## Copyright (c) Muktabodha Indological Research Institute
## THIS TEXT FILE IS FOR REFERENCE PURPOSES ONLY
##################################################################################################
##################################################################################################


zrI AdyanAthaviracitA

[sarvasaMvinnadIbhedabhinnavizrAntibhUmaye |
namaH pramAtRvapuSe zivacaitanyasindhave ||]

akRtrimAhamAmarzaprakAzaikaghanaH zivaH |
zaktyA vimarzavapuSA svAtmano'nanyarUpayA || 1 ||
zivAdikSitiparyantaM vizvaM vapurudaJcayan |
paJcakRtyamahAnATyarasikaH krIDati prabhuH || 2 ||
na pArthyagA(rthakyA)tmavArtA'pi vizvazaktizarIrayoH |
na vizvavizvavapuSorbhinnatA kApi tAttvikI || 3 ||
bhede sattAsphurattAbhyAM bhinnaM kiM nu jagad bhavet |
sattAsphurattAsambandhAt sattAbhAnaM tu tatra cet || 4 ||
asataH kiM satastAbhyAM sambandhaH so'yamiSyate |
svarUpalAbhasulAbhaH sambandho nahyavastunaH || 5 ||
na labdharUpasambandhastAbhyAM kiJcidapekSate |
apekSAyAmavasthAnaM na syAdetasya kiJcana || 6 ||
svabhAvataH sphurattA ca sattA ca na vinAzinI |
vinAzAnabhyupagame jaDatA'pi nivartate || 7 ||
tato gatyantarAbhAvAccideva pariziSyate |
tatazcidaikyaM prakRtaM jagato na nivartate || 8 ||
prakAzAdanyatAbhAsaH svAtantryollAsakevalaH |
paricchinatti kaH zaktiM zambhorvizvAtizAyinaH || 9 ||
svaprakAzAtmakaM sarvaM tamaHkevalatAM gatam |
yacca kiJcijjagatyasmin prakAzAnnAtiricyate || 10 ||
vimarzasaraNIM prAptamityeSA tAttvikI gatiH |
avadhAnaikatAnAnAM matirevAtra sAkSiNI || 11 ||
kiM pramANairvarAkaistaizcidanuprANitAtmabhiH |
nahi vaikartanaM jyotirdIpAlokamapekSate || 12 ||
zaktipAtapavitre'smin dhItattve ca parIkSyatAm |
Adarze vimalAbhoge nanu sarvaM prakAzate || 13 ||
itthaM cidAtmakaM sarvaM SaTtriMzadbhedamudritam |
Adau zuddhAtmakaM tattvaM paJcadhA tamasaH param || 14 ||
zivaH zaktizca sAdAkhyamIzo vidyeti bhidyate |
akSAdizAntavarNAtmA niraNAyi zivena tu || 15 ||
kalAvidye rAgakAlau niyatirbandha ucyate |
mAyApUrvovakArAdiyakArAntAkSarAtmakaH || 16 ||
pumAn zaktirmano buddhirahaGkRnmAdipaJcakam |
zrotrAdipaJcakaM nAdi NAdi vAgAdipaJcakam || 17 ||
tanmAtrapaJcakaM JAdi GAdi vyomAdipaJcakam |
sisRkSoH prathamaspandaH zivatattvaM prabhoH smRtam || 18 ||
icchaivA'sya parimlAnA zaktitattvamiti smRtam |
svecchayA racitaM vizvamAcchAdyA'hantayA sthitam || 19 ||
tadeva tattvaM sAdAkhyaM sarvAnugrahaNonmukham |
tadevezvaratattvaM syAt pazyad vizvamidantayA || 20 ||
ahantedantayoraikyamitirvidyA nigadyate |
svAGgakalpeSu bhAveSu mAyAtattvaM vibhedadhIH || 21 ||
mAyAgRhItasaMkocaH zivaH puMstattvamucyate |
ayameva hi saMsArI jIvo bhokteti gadyate || 22 ||
jJatva-kartRtva-pUrNatva-nityatvAdyAzca zaktayaH |
tatsaMkocAt saMkucitAH kalAdyAtmatayA matAH || 23 ||
mAyAtmanaH kalA nAma kiJcitkartRtvakAraNam |
vidyA kiJcijjJatAhetU rAgo'bhiSvaGgakAraNam || 24 ||
kAlaH pariccheda karo niyatizcedameva me |
kartavyaM nAnyadityeSA vyavasthA yantraNAkRtiH || 25 ||
prakRtirguNasAmyaM syAdahaGkArAdijanmabhUH |
ahaM mamedamityetadbuddhiheturahaGkRtiH || 26 ||
buddhiradhyavasAyasya kAraNaM nizcayAtmanaH |
saMkalpasya vikalpasya bIjaM mana udIryate || 27 ||
vacanAdezca zabdAdervAgAdizravaNAdikam |
kAraNaM zravaNAdInAM grAhyaM tanmAtrapaJcakam || 28 ||
prakAzAdyavakAzAdikAraNaM bhUtapaJcakam |
parAparAzaktimayaM zuddhavidyAdipaJcakam || 29 ||
tadanyadaparA zaktirityetat tattvamIritam |
iyaM devI parA zaktiH zuddhAzuddhAdhvagarbhiNI || 30 ||
pRthivyAdIni tattvAni yadA lInAni kAraNe |
tadA kAraNamAtrANi bahirudvamate vibhuH || 31 ||
anuttarecche unmeSa AnandezanamUnatA |
kriyecchAjJAnazaktInAM sattA cocchUnatA ca SaT || 32 ||
icchezanAntarArUDhAH sphuTAsphuTajaganmayAH |
catvAraH parato varNAH SaNDhAtmAnaH pracoditAH || 33 ||
anuttarAnandacitI icchAzakti niyojite |
trikoNamatha SaTkoNamicchAyAM rUDhimAgate || 34 ||
anuttarAnandazaktitrikoNadvitvayogataH |
tathaivonmeSayogena kriyAzakteH sphuTaM vapuH || 35 ||
ukta trizaktisaMghaTTa trizUlaM dvaitaghasmaram |
parasparA virodhena kAryeSu prasare gate || 36 ||
na kathaJcidupAdeyamAsAM rUpamidaM bhavet |
bindurvedyasya saMskAro vimarzaH sarga ityasau || 37 ||
kalASoDazakAkArA zaktirviyate parA |
tithayaH pratipatpUrvAH paJcadazyantimA yathA || 38 ||
sUryAcandramasorantazcaratni sthitihetavaH |
tathA vimarzavapuSaH sargasyAdyAH kalAH smRtAH || 39 ||
dvidheyaM mAtRkA devI bIjayonyAtmanA sthitA |
nityapravRttA zRGgATavapurvizvasya janmabhUH || 40 ||
hRdayaM bIjametasyAM sAraM yattatparaM mahaH |
baTabIje yathA vRkSastathAtra nihitaM jagat || 41 ||
vicAryamANe naivedaM kAraNAdatiricyate |
mRdAdeH kalazAdInAM tattvaM nAnyannirUpaNe || 42 ||
ityAhustattvavAdinyaH zrutInAmantimA giraH |
iha sarvaM sadevAgra AsIditi vinizcayAt || 43 ||
sattAvAcini bIje'smin bhAti mAyAntimaM jagat |
viluptapratyayAkAramevaitat pariziSyate || 44 ||
tato jJAnakriyAsArA vidyezvarasadAzivAH |
zaktizUle vilIyante caturdazakalAtmani || 45 ||
UrdhvAdhaH sRSTivapuSi sarvaM lInamataH param |
itthaM parasyAM saMvittau sarvaM saMkucitaM kramAt || 46 ||
atha vAGmanasAtIte yatra kvApi niraJjane |
SaTtriMzattattvalaharIkalahAtItagocare ||
vizvAtmani mahAmantrasvabhAve sA vilIyate || 47 ||

 [zuddhavidyAdikaM sarvaM sAdAkhye pakSasaMgrahAt ||
madhyazaktiparAmarza iti vApi layakramaH |
anyaH pakSo'pi yaH kazcit pramANaM cennabAdhate ||]

kutazcinmathite dhAmni dIpte kenApi hetunA |
sarvaM haviridaM juhvanna dAridryeNa pIDyate || 48 ||
paJcapaJcAtmakaM vizvaM paJcaspandavijRmbhitam |
saMkocayan parAmarzAt sAmAnyaspandakevalaH || 49 ||
ahami pralayaM kurvannidamaH pratiyoginaH |
parAkramaparo bhuGkte svabhAvamazivApaham || 50 ||

iti SaDadhikatriMzadbheda prasaktajagattanuH
prasarati mahAzaktyullekhavicitramahApaTI |
jayati bahuzaH spandAkArA parA cidanuttarA
vimRzata janAH kiM no bhUyaH svabhAvavijRmbhitam || 51 ||

iti zrImadAdyanAthaviracitA anuttaraprakAzapaJcAzikA

samAptA ||