#************************************************************************************* # # mahAnayaprakAza. by arNasiMha edited by Mark S. G. Dyczkowski # ## Copyright (c) Mark S.G. Dyczkowski ## THIS TEXT FILE IS FOR REFERENCE PURPOSES ONLY. # # NAK MS no. 5-5183 (called kAlikAkulapaJcazatakam) zaivatantra 157 # NGMPP: A 150/6 # Number of leaves: 35 (of which folios 26-33 are the mahAnayaprakAza ) # Size in cms: 32 1/2 x12 1/2 # Paper devanAgarI # Dr. Dyzckowski will be publishing this text in print with the manuscript variations # in the near future. # # Harvard-Kyoto encoding # #************************************************************************************* mahAnayaprakAzaH sarvottIrNasvarUpApi kAcidekAnapAyinI | vibhAti sarvagA saMvinnAnAtvena sadoditA || 1 || tattvatastu na nAnArtharUpA nApyekavigrahA | yAniketA nirAtaGkA khasvabhAvA namAmi tAm || 2 || yat pIThacakrArcitapaJcavAhaprakAzamAnandakhamUrticakram | aSTASTacakraM pravirAjate tad gurukramaughazca catuSTayArthaH || 3 || iti siddhamukhAyAtaM mUlasUtramidaM param | pIThoditaM mahAmnAyaM saMpradAyopabRMhitam || 4 || yat tat sadgurupAdAbjaprasAdAvagataM sphuTam | dhAmAditritayeneha cakrabhaGgabhayAnmanAk || 5 || prakAzyate mayA samyag vAkyairaviSamAzayaiH | kudezikamatenaiva bhraMzinAM bhaktizAlinAm || 6 || mahAmelApasaMbhUtayuktijJasya pracodanAt | ekAyanaujakAkhyasya svIkRtyoddhartumudyamam || 7 || zivazaktyubhayonmeSasAmarasyodbhavaM mahat | vIryaM tasmAd deha eva mahApIThe samudgatam || 8 || AdyasaMvitsamullAsaH pIThe pIThe kRtAspadaH | anantazakticakraughasvAminI tatra mokSadA || 9 || pRthivyAdimahAbhUtapaJcake sA virAjate | akRtrimamahAvIryasphurattaikasvarUpiNI || 10 || yA saMvit saiva satataM pIThacakraikadharmiNI | AsthitApi satAM gamyA niravagrahavigrahA || 11 || vIrezasya sthitAH paJca kalA yAH satatoditAH | tA eva sarvavarNAkhyazaktInAM pIThatAM gatAH || 12 || asvarAnAhatakalA vahnyarkazazirUpiNI | pIThazmazAnakSetrezamelApayajanAtmikAH || 13 || visargasthitisaMhAraprathAgrAsaikaghasmaraH | nirupAkhyamahAdIptisamullAsanatatparaH || 14 || yo'dhyuSTakalanodrekasvabhAvaH praNavAbhidhaH | pIThAdhipastamevAhaM nAmAmyAgamasiddhaye || 15 || nirvikalpavikalpAtmarUpA niHzeSasaMvidaH | yatrAsaMketadurdarze svabhAve karavIrake || 16 || nityoditamahAgrAsacitau yAnti layaM sadA | tacchmazAne mahAvIraM hRdghaTanarataM namaH || 17 || mahAsaMhAravisphArabalenotkaTamUrtimAn | AvaTaTAGkasaMketo nirAvaraNadhAmagaH || 18 || nirniketAsvarollAsasvarUpaH satatoditaH | zrImatpIThavare nityaM kSetrapAlo jayatyajaH || 19 || khecaryAdisphuradrUpaH zAkinyanto gurukramaH | sRSTyAdyAnAkhyaparyantastathA devInayaH smRtaH || 20 || itthaM sthito'dvayollAsaH sAmarasyeNa vartate | anizaM yatra melApaH so'niketo jayet paraH || 21|| grAhyagrAhakavisphAragrasanaikaparAyaNaH | paro'pi paJcavAhaughazcakrarUpeNa niSThitaH || 22 || yatra nirUpanirdhAma vibhAtyeko'nirodhataH || sa ko'pi rAjate nityaM mahAyAgamahotsavaH || 23 || itthamAdhArarUpo'yaM paJcadhA yaH sa eva ca | ekasyaiva svarUpasya kAlikAkhyasya vistaraH || 24 || vyomavAmAdipaJcAtmasvarUpasphurito yathA | guruvaktracidullAsavikAsena tathocyate || 25 || prathamaspandavisphAradharmiNI nirniketanA | vyomezvarI tvanicchAtaH zabdAdhiSThAtrirUpiNI || 26 || khecaryAkhyasamArUDhA ciccamatkAranirbharA | svarasena tu saiveha rUpasvIkAratatparA || 27 || nAnAviSayasaMrambhapAtinI bhUcarI smRtA | pratyAvRttitayA nityaM vizvagrAsaikaghasmarI || 28 || saMhArabhakSaNI saiva rasasaMcarvaNotthitA | svarUpaprAntacitvattaH samArUDhA nirAzrayA || 29 || saiva raudrezvarI jJeyA surabhigrahaNodyatA | itthaM devInaye samyag vyomavAmAdipaJcakam || 30 || daNDamuNDakrameNoktaM mahAnirvANasiddhidam | grAhyagrAhakabhedotthakalpanAkSobhasaMkhyayA || 31 || sAmarasyamahAlhAdadhAmnyetA bhAnti devatAH | avarNapaJcapiNDArNarUpayoradvayI gatiH || 32 || yatastasmAducyate'laM devInAM saMsthitaH vapuH | yo'nAhatahatottIrNarAvarUpo'svaraH smRtaH || 33 || suvarNamUladhAmotthavyomapaJcaniketabhRt | tadgatAH paramezvaryo vyomavAmAdisaMjJikAH || 34 || viSayagrAso vyAkhyatastadanyavyomamadhyagaH | makArAdisvarUpo yaH paJcapiNDakramoditaH || 35 || tatraiva vyomavAmAdidevyaH samyag vyavasthitAH | akramodrekavibhavAH paramAdvayavigrahAH || 36 || itthaM devyo nirAvezamahAvarNakramoditAH | tattvataH sparzasaMvittilaharyAmantare sphuTam || 37 || sAmarasyena bhAntIha vAmAdyA devatAH sadA | tAsAmeveha vakSyAmi devInAmapi vistarAt || 38 || paJcAnAmapi bhAgena saMdezikadRzAgatam | mahAzUnyAtizUnyatvAt samyakzAntatarApi yA || 39 || sarvavyomAni vAmantI vyomavAmezvarI tu sA | mahAsaMhAragagane vAmA teSAmathoditA || 40 || divyaughamudgirantItthaM tAM stuve sparzavigrahAm | tasyAmanicchayodeti zazvattaddharmadharmiNI || 41 || yAlakSyaspandalaharI tAmahaM khecarIM stuve | svAtantryeNa sadA saiva carantI sve pare'mbare || 42 || prathamaspandamAzritya rAjate cicca khecarI | saivAkramavisargAkhyA bhUmau yA carati sphuTam || 43 || tasmAd bhUcarizabdAkhyA tAmeva praNamAmyaham | saiva tattvasphurattAtmavapuH saMharati kSaNAt || 44 || svatantrA svapadAnte tAM vande saMhArabhakSaNIm rabhakSaNIM | pratyAvRttitayA nityaM svarUpatrayabhakSaNI || 45 || mahAvyomAntaniSThAtvAt saiva raudrezvarI smRtA | AsAM madhye tu devInAM pAdukA sphurati svataH || 46 || sarvAstatraiva satataM sAmarasyena yAntyalam | iti sadguruvaktrotthayuktyA yo hyanirodhitaH || 47 || samAdhisevitaH zazvat sa mahAmnAyapAragaH | kramAkramobhayottIrNadRzeha prakaTIkRtam || 48 || vaktrAd vaktre samAyAtaM paJcavAhamanargalam | itthamekaiva paJcAtmarUpeNa sphurati svataH || 49 || svabhAvaM prakaTIkartuM yA devI tAmahaM zraye | nirNiketatayA samyak cakraM visphAritaM mahat || 50 || vyomezvaryAvibhedena khecaryAkhyaM sadoditam | dviSaTkadhAmavapuSA devIbhirnityamAzritaH || 51 || svakhakalAkalApotthavibhavo vigatAgrahaH | tathA cAvyaktarUpA ye nirvibhAgaikavigrahAH || 52 || svarA dvAdazasaMkhyAkAH pazyantIgarbhaniSThitAH | paraprakAzavibhavasvabhAvatvAd gurUttamAH || 53 || tA eva prathayantIha dikcarIcakravartinaH | nirAvaraNacidvyomarUpA dvAdazadhAvyayAH || 54 || saMvidullAsanArUDhAH svaprakAzaikavigrahAH | yA haMsahaMsamatyAdi nAmataH satatoditAH || 55 || tA eveha samAkhyatAH khecaryAdhiSThitAH sadA | dikcarIcakrarUpiNyo niyatAgrahavarjitAH || 56 || jayantyakramasadbhAvadarzayantyo nirAvilAH | itthaM prakAzacakrasya saMsthitiH susthitA parA || 57 || nirvitarkanirAbhAsasvarUpA satatoditA | indoH SoDazasaMkhyAkAH kalA amRtavigrahAH || 58 || yAstA eva samAzritya koGkaNAmbAdinAmataH | prodito razmivibhavaH svasvarUpaikagocaraH || 59 || icchAvikSobhaparyante rAjate nirNiketanaH | adRSTadharmiNaH zAntAH svarAH SoDazarUpiNaH || 60 || AsphAlya madhyamArUDhAstAbhireva samAzritAH | dvipaJcakendriyadvAraiH paravyomaikavigrahAH || 61 || bahirvinirgatA devyo haThamelApakena yAH | tAbhireva samAzritya samyag rUpAdipaJcakam || 62 || nirvikalpaciduddAmabhairavasyAmitadyuteH | AnandavapuSo rUpamarcyate nirvibhAgataH || 63 || itthaM dviraSTavisphAravibhavaH kalpanojjhitaH | niruttaracamatkArapradatvAt prathito'nizam || 64 || AnandacakramahimA bhUcaryA sphAritA sadA | yatastasmAt tu nirdiSTA bhUcarIcakranAmataH || 65 || tameva praNamAmIha jJaptigarbhAntaroditam | vahnirdvipaJcavisphArarUpo nityavikasvaraH || 66 || kharandhravyomamArgeNa zikhAsaptakasaMyutaH | azaktatIkSNadharmo'sau lelihAno nirantaraH || 67 || prodito vizvasaMrambhagrasanAya nirAvilaH | evaM saptadazAkhyaM tu mUrticakraM nirAzrayam || 68 || nistaraGgamahAvyomadhAmasthaM bhAti nityazaH | prazAntarUpavibhavAH svarAH SoDazasaMjJikAH || 69 || visargasahitA bhAnti parAvAggarbhaniSThitAH | varNabhedakrameNetthaM samAzrityeha tAnadhaH || 70 || bhAti zazvaccakravaraM mUrtyAkhyaM vigatagraham | Anandacakratanavo razmayo ye nirantarAH || 71 || asmAbhiH kathitAH pUrvaM gurucakrakramoditAH | tA eva SoDazAkArAH saMvidullAsavigrahAH || 72 || yugapad yAnti yatrAzu sAmarasyaM viyatpade | nistaraGge nirAbhAse pare saptadazAbhidhe || 73 || itthaM visphArayantIdaM yoginIcakramuttamam | saMhArabhakSiNI devI bhAti saptadazAtmataH || 74 || tadeva vande satataM vimalaM sarvadoditam | dhyAnAdikalanAtItarUpatvAdakulAtmikAm || 75 || ambaraughavikAsaikadharmiNIM maGgalAM zraye | mAyAto gAlayatyAzu maGgaleha tataH smRtA || 76 || vIrapaJcAnanArUDhA mahAmelApatatparA | paraviddharasaughena madanaM cetasi bhRzam || 77 || gamanAt paramAkAze sRSTyAdikalanojjhite | sAnAkhyAcakravapuSaH paratattvasya sarvadA || 78 || maGgaleha tataH khyAtA nirAvaraNadharmiNI | asyAH svarUparUpo yaH khakArAdivivarjitaH || 79 || paJcapiNDamayo mantro vAktrayojjhitavigrahaH | avarNasvararUpazca vyomezIbhiH prapiNDitaH || 80 || paJcabhiH sAmarasyena vAcako nAma yaH sthitaH | SoDazAdhArasaMsthAnasaMsthitA yA citiH sadA || 81 || sphurantI svabalodrekAniyatagrahamudritA | tasyA vigatya yugapad vibhedollAsavigraham || 82 || nirniketamahAjJAnarazmayaH khe sadoditAH | sAmarasyamayaM cakraM darzayantyavibhedataH || 83 || bhAvAbhAvapadottIrNaviyadvAmapade sthitA | antarbahIrUpatayA ye tiSThantIndriyAtmakAH || 84 || karAstAneva sahasA tathA svadehavistaram | nayati svabalonmeSAd nirniketacidambaram || 85 || yA saiva kathitA sadbhiH parA mudrA karaGkiNI | eSAM jJAnAkhyarUpANAM siddhAnAM saMsthitA kalA || 86 || mudrayitvA pRthagbhedaM mudreyaM karaNojjhitA | pRthivyAdiprakRtyantatattvavistAravibhramaH || 87 || dviSaTkadviguNAtmA yaH pArimityagrahAnvitaH | tameva nigalantyuccaiH krodhAnmantramarIcayaH || 88 || mantrasiddhA yatastasyA vyomadhAmakramoditAH | krodhena tattvavibhavaM nayatyugranirAkulA || 89 || yA mAntraM paramaM vIryaM sA mudrA krodhinI smRtA | eSAM mantrAkhyarUpANAM siddhAnAM saMvyavasthitA || 90 || mudrayitvA vibhedotthaM dehe mudreyamuttamA | dviSaTkarUpabhedena granthayo ye vyavasthitAH || 91 || tAneva bhedayitvemAH zaktayaH proditAH parAH | mahAmelApadharmiNyaH sAmarasyaikavigrahAH || 92 || nirAvaraNacidvyomadhAmasthA bhAnti nityazaH | ApUrya svabalodrekasamutthaM bhedaDambaram || 93 || yA sthitA pUrNavibhavA nirAvaraNavigrahA | bhairavI saiva vikhyAtA mudrA sadasadujjhitA || 94 || nistaraGgavikAsAtmasAmarasyaikanirbharA | eSAM melApasiddhAnAM mudreyaM bhairavyAtmikA || 95 || puryaSTakasya gaditA vAsanAbIjavigrahAH | zaktayo yAH sUkSmatarAstAsAM saMharaNodyatAH || 96 || dIptayo yAstIkSNatamA vigatagrahadhAmagAH | tA eva kathitAH samyak zAktasiddhA nirAmayAH || 97 || sarvasaMhArasaMhArarUpA vRttirnirargalA | yA saiva kathitA mudrA lelihAnAtighasmarA || 98 || AsAM zAktAkhyasiddhAnAM devInAM proditAnizam | mudrayitvA dvidhAbhAvaM mudreyaM paradhAmagA || 99 || parAdivaikharItyantaM vAgullekhacatuSTayam | yatastasyaiva niratA bhedagrAsAya dIptayaH || 100 || sAmarasyapadaprAptidAyinyo yA vikasvarAH | khyAtAstA eva zAmbhavyo devyo nirdvayadhAmagAH || 101 || yA sparzA sparzagagane carantI nirniketanA | sarvAvaraNanirmuktA mudrA sA khecarI smRtA || 102 || taDillekhaiva yA vyomni yAntI sarvojjhite pade | svaprakazavikAsaikarUpA sA khecarI smRtA || 103 || AsAM zAmbhavasiddhAnAM devInAM prathitA sadA | mudraNAyAzu nAnAtvaM mudreyaM kalpanojjhitA || 104 || * * yathAsmitAcakre mudrApaJcasvarUpiNI | tathaiva paJca devyastu vartante satatoditAH || 105 || cakrapaJcasamAyuktA saMsthitApi samantataH | vijJeyA guruvaktrotthayuktyA sadbhiravigrahA || 106 || akArAdivisargAntAH svarAH SoDazarUpiNaH | vAcyAstA jJAnasiddhAkhyAH vijJeyAH paradhAmajAH || 107 || kakArAdibhakArAntA varNavyaJjanarUpiNaH | dviSaTkadviguNAkrAntAH siddhA vAcakavigrahAH || 108 || dvAdazAkhyAstathA proktA mAtrAstA eva saMsmRtAH | melApasiddhAH satataM sAmarasyapradAH sadA || 109 || yakArAdihakArAntAH aSTau varNA vyavasthitAH | zAktasiddhAstu tA jJeyA jagaddyotanodyatAH || 110 || akArasyeha yAH proktAzcatasraH zaktayo'mitAH | zAmbhavAkhyAH siddhavarAH saMsmRtAstAH sadoditAH || 111 || itthamAdyakSarasyeha catuHSaSTistu razmayaH | nijadehAdullasitAH samAzcezvarigarbhagAH || 112 || tathA ca saMstutA devyaH kathaM kasmAditi sphuTam | procyate'tra mayA samyaGmukhAmnAyadazAbhidaH || 113 || sphuTA ye jJAnasiddhAkhyA raudrIzRGgATakAkRte | kalpanAzaktayo dIptAH parabodhopabRMhitAH || 114 || mandrasiddhAstu vAmAyAH sakAzAduditAH parAH | zaktayo rAvabimbAzca sudIptA amitAH || 115 || melApasiddhAH satataM prathitA niravagrahAH | ambikAyAH parAnandanirbharAH zaktayo'mitAH || 116 || devyaH saMsphuritA nityaM jyeSThAyAH satatotthitAH | zAktasiddhA mahattejobalenotkaTavigrahAH || 117 || spandAkhyA nAdacidvattA varNA nityavikasvarAH | kalAzcatasraH paramAH khyAtAH svAtmaprakAzikAH || 118 || kalAcaTuSTamidaM sAmarasyasvarUpatAm | yAtaM yatrAdyavarNe'smin tadrUpAH zAmbhavAH smRtAH || 119 || itthamekasya yugapat sarvadehoditAstviSaH | sarvakalpanakalanAnivahavibhramavarjitAH || 120 || makArarUpamAzritya bhAtyanugrahatatparA | maGgalAkhyA mahAlakSamI vRndacakraikanAyikA || 121 || varNabhedakrameNetthaM yadyapi prathitAH sphuTam | tathApyavarNamAhAtmyaM na tyajanti kadAcana || 122 || ekA devIti vA bhAti tisro dvAdazadhoditA | udyogAdikrameNoccairekaikA paJcadhotthitA || 123 || tRtIyenAdyakAreNa vRndacakrakramodayaH | AdyanAthoktabhASAyAM laghUktyA prakaTIkRtaH || 124 || jhaTityunmiSitAkhyasya grAhyA samadRgAtmanaH | yehodeti prathA saiva mahAjJAnaikarUpiNI || 125 || tasyAH padArthasaMrambhaparijJAnasvarUpataH | yA vibhAti citiH saiva mahAmantrasvarUpiNI || 126 || grAhyagrAhakasaMzleSAdanalpAhlAdanirbharA | yA saMvid rAjate saiva mahAmelApavigrahaH || 127 || nirvikalpacitau yatra jJaptimAtre sadodite | sAmarasyadRzA sarvaM sthitaM zAktaH kramastu saH || 128 || mahAzUnye tu gahane niHspandAkhye'niketane | sahasA vilayaM yAti citir yatra sa zAmbhavaH || 129 || atiprazAntasaMhAravilayavyomasAgaraH | tasmAdISaccittaraGgarUpajJAnamihoditam || 130 || tadaiva parabodhaikarUpaM svaspandavigraham | mantramUrtitayA zAktaM vibhAtaM niravagraham || 131 || tatastadeva sahasA militaM paradhAmani | yatastasmAdiha khyAto melApo nirniketanaH || 132 || mahAsaMhAragagane so'pyantarlayamAgataH | zAktakramastato bhAti sadasatkramavarjitaH || 133 || punastadeva saMvittikalanAparivarjitam | niruttaraM paraM yat tat kathitaM vyomazAmbhavam || 134 || ayaM zrIvIrasiMhAkhyasvAminA saMprakAzitaH | zrIjJAnanetranAthasya vRndacakrodayaH paraH || 135 || bhAvasvabhAvarUpeNa vRndacakramahodayaH | saMdarzitastIvratarapAtaviddhadhiyAM satAm || 136 || nirdhAmaparamAkAzapadAnnityavikasvarAt | prasUtAH paJcadevyoghabIjabhUtAH sadoditAH || 137 || tenaiva paJcacakrAkhyakramasvAmI vikAsitaH | nirvikalpamahAjJAnaphalaprAptau nirantaraH || 138 || sa eva prAntacakre tu vIrAkhyaH paJcakodayaH | devatAkramavisphAramAsphArya phalataH sadA || 139 || prathitA pAtavibhavasvabhAvenAkramAkRtiH | tasyaiva saMpravakSyAmi saMpradAyaM mukhodgatam || 140 || dvandvayugmasvarUpeNa vAmezyevoditA sadA | ajasraM zAmbhavAkhyena gRhItvA pAtamAditaH || 141 || aSTAbhiH zAktarUpAbhirdevIbhiH prathitA svataH | khecaryAkhyA gRhItvAtha pAtAMzaM dvitIyakam || 142 || dvAdazAtmasvabhAvAbhiH zaktibhiH sarvadotthitA | bhUcarI sahasAzritya samyagjJAnaM tRtIyakam || 143 || caturviMzatisvabhAvAbhirdevatAbhiH sadoditA | saMhArabhakSaNyAzritya nityaM pAtaM caturthakam || 144 || dviraSTarazmirUpAbhirdevIbhiH proditAntagA | raudrezvarI samAzritya pAtaM tu paJcamaM kramAt || 145 || itthaM kramAkramollAsarUpeNa prathitAH sadA | paJcavAhasvarUpiNyo devyo'nugrahatatparAH || 146 || nirniketadRzApIha tA eva proditAH sphuTam | jJAnAdipaJcake bhAnti pratyekAsmin nirantarAH || 147 || garbhasaMkrAmitollAsaM bhakSyaikaikA virAjate | devI paJcAtmavRttisthA paramAmbaradharmiNI || 148 || tattvataH sarvasaMkalpavarjitA ye nirantarAH | bhAsante yatra tatraiva tadbhAvaM yAnti saMvidaH || 149 || evaM paJcAtmavibhavaM cakraM raudrezyadhiSThitam | nirUpAkhyamahAgrAsarUpAnna cyavate kadA || 150 || dhAmamudrAvarNakalAsaMvidbhAvasvabhAvataH | pAtAniketadRSTyAdi vRndacakraM prakAzitam || 151 || uDDIzapIThamAzrItya maGgalAnandanirbharA | sadasadbhAsanAvezavarjitA tAmahaM zraye || 152 || tataH zrImacchivAnandanAthaguruvaraM sadA | lokottaramahAjJAnacakSuSaM praNamAmyaham || 153 || zrImatkeyUravatyAkhyA pIThajajJAnapAragA | khacakracAriNI yeyaM tAmahaM naumi bhaktitaH || 154 || mahAvIravaro yo'sau zrImadvAmanasaMjJakaH | devIdhAmni sadArUDhastaM vande kramabhAskaram || 155 || tataH zrImaccakrabhAnurdevatAnayadezikaH | mahAvratadharo yastaM vande'haM paradhAmagam || 156 || zrImadIzAnikAkhyA yA paJcamudrAvibhUSitA | akramakramasantAnakovidA tAM namAmyaham || 157 || mahAnayaparajJAnavibhUtisatpradaH sadA | zrImannandakanAmo yastaM namAmi khadhAmagam || 158 || zrImatsajjananAmastaM rahasyakramanirbharam | bhedAbhedakalaGkasya varjitaM praNamAmyaham || 159 || nirmalasphaTikaprakhyahRdayaM vigatAmayam | zrImatsomezvaraM vande mahAzAsanapAragam || 160 || teneha kRpayA mahyaM saMpradatto mahAkramaH | yenAhaM navabhirvArNakalaGkairnAvRto'nizam || 161 || atraiva kathyate'smadbhirdvitIyA gurusantatiH | pIThoditamahAmnAyarahasyakramanirbharA || 162 || zrIcakrabhAnupAdaistu paramArthArthapAragaiH | kRtaprasAdo vIrendraH zrIprabodhastapodhanaH || 163 || tenAhitaprasAdastu jaiyakAkhyo mahAvratI | jJAnasaMkrAntinirbhrAntaH svAnandAnandananditaH || 164 || tenApi ca zrIpaGkAkhyaM dattaH zrIkramazAsanaH | bhavatadabhrAntivibhrAntividhvaMsoccaNDadIdhitiH || 165 || tenApi zrInAganAma dezikapravarAgraNI | kRtaprasAdaparamAhlAdodayavighUrNitaH || 166 || tenApyahaM mahAmnAyavaro'smin paramAdbhute | abhiSiktaH kRto'thAntacittenAvRttatejasA || 167 || itthaM proktA santatistu dvitIyeSA mahAnaye | nirAvezasamAvezacamatkAraughanirbharA || 168 || itthaM parasparodbhUtaH sadgurukramavistaraH | sthito'yaM divyasiddhAkhyamanujJAtakrameNa ca || 169 || saMvitpramAmahAdbhUtasamullAsamahodayaH H | abhyantaradRzA iti divyo'sau sadgurukramaH || 170 || vastutaH svasvarollAsaH prathamaH zUnyatAtmakaH | yo vibhAti mahAbhAbhistamajaM dezikaM zraye || 171 || paJcagranthisamudbhedakaraNA yoditA citiH | yatastasmAt paJcadhotthA praNavAvartarUpiNI || 172 || yeyaM tasyA niraupamyazarIrAd dIptayastu yaH | niyatagrahasaMhAranirmalA yAH samutthitAH || 173 || tA eva gaditAH paJcayonayaH paradhAmagAH | niyatagrahasaMsthAnakalpanAparivarjitAH || 174 || kavargAdipavargAntapaJcapaJcakavistaraiH | vyaktAvyaktAkhyaracanA mudriteha samantataH || 175 || AbhirakramarUpAbhiryonibhiH paJcAbhiH svataH | nirAvaraNanirdhAma vapustena nityazaH || 176 || akramakramavisphAradRzA nirNIyate'vyayaH | parahRdAntasthaH sRSTikramo'yaM sarvago'mitaH || 177 || udyogaH prathamA yonirdvitIyAbhAsa ucyate | carvaNaM zaMkhayonyAkhyA tRtIyAvartarUpiNI || 178 || caturthI padmayonistu kAlagrAsavikasvarA | vizrAntiH kathitA devI divyayonisvarUpiNI || 179 || nistaraGgodadhiprakhyakAlIdhAmnyavibhedataH | sphurantIyaM sthitA nityaM sRSTisaMvittitattvataH || 180 || svasvarUpA jagadrUpasiddhAliGgitavigrahAH | devyaH prathante satataM asparzapadamadhyagAH || 181 || anayoktadRzA proktaH sRSTicakrodayaH paraH | niHsvabhAvaniraupamyaparonmeSasvarUpabhRt || 182 || jAgratsvapnasuSuptyAkhyaturyonmeSaprathodayAH | ye sthitAH satataM proccaiH paramAdvayadharmiNaH || 183 || teSAM pramAtRvapuSA niSThitA vyomadhAmagAH | khagendrAdyAH siddhavarAH sadA bhedagrahojjhitAH || 184 || vAkcatuSTayarUpasya samullAsaikahetavaH | te saMvidrazmayo dIptA nirlakSA niravagrahAH || 185 || vyaktAvyaktAkhyaghaTanA SaNDhasvaracatuSTaye | yeyaM tadbhakSaNAyAlamutthito'yaM samantataH || 186 || parAdvayavikAsaikarUpo niravadhiH sadA | so'vatAraH samAkhyAtaH paravarNakramoditaH || 187 || khagaH paramahaMsAtmaspandadeho'vinazvaraH | tasyendro'sparzarUpo'yaM khagendraH sa nigadyate || 188 || dhAmatritayasaMhAragrAsako vimalezvaraH | yo'jasraM gacchati paraM khagendraH so'mitaH smRtaH || 189 || prathamapratibhonmeSamahimA yo'dvayaH paraH | jagadvicitraracanAM pRthagbhedaprathAtmikAm || 190 || kUrmo'GgAnIva satataM garbhe dhatte'vibhedataH | sa eva kUrmanAthAkhyaH kalpanAvaraNojjhitaH || 191 || svonmeSeNa svatantratvAd gRhItvendriyarUpatAm | aluptAnAkhyamahimA viSayagrAmavartmani || 192 || yo yuktAyuktaghaTanAM saMtyajya vicaret sadA | sonmeSaH satatodyuktaH sa meSAkhyaH prakIrtitaH || 193 || dvayAdvayasvarUpANAM zAstA yaH sarvasaMvidAm | samanirdhAmavapuSo mama cchedanena tiSThati || 194 || sa eva procyate zrImAnmatsyendraH kRtakaH paraH | nistaraGgaparAkAzaparamAdvayavigrahaH || 195 || pratyAvRttikrameNemAH sAmarasyaM nijAtmani | vRttIH saMprApayati yaH sa mInAkhyaH prakIrtitaH || 196 || prollAsanijavisphArazaktyabhinnaprathodayAH | vibhAnti sadasadbhedamuktAH siddhAH samantataH || 197 || anayoktadRzA prokto niravagrahavigrahaH | nirAvaraNanirdhAmamahimAbhAsavistaraH || 198 || zrotAdipaJcakagaNaH pramAtA manasAJjitaH | buddhIndriyeNa saMyuktaM tathA vAmAdipaJcakam || 199 || evaM dvAdazadhAmAkhyo yastvakSagrAmavistaraH | sa eva buddhivibhraMzAd nirvicArapadAzritaH || 200 || niyatagrahasaMsthAnavarjito'kramamUrtimAn | sarvasaMhAranirataH khaNDacakrakramaH paraH || 201 || ekAdazavidhastIkSNaH saMtyaktA kalanAvaliH | yuktAyuktadazAtIto nityoditasvadhAmagaH || 202 || pakArAdihakArantA varNAH kSakArasaMyutAH | ekAdazavidhAtmAno ye sthitAsteSu sarvadA || 203 || vyaktAvyaktakrameNeyaM kalpanA prathitA tu sA | tadbhakSaNaparaH prokto bhAvAbhAvatamojjhitaH || 204 || nirupAdhimahAbodharazmyullAsamayodayaH | etadevocyate sadbhiH saMhArAkhyo'vyayakramaH || 205 || grAhyagrAhakavisphAro dazadhA yo vyavasthitaH | pratyAvRttisvabhAvaikarUpo nAdodayAnvitaH || 206 || itthamekAdazavidhaH saMvidullAsavistaraH | tasyaiva bhedavibhavagrasanAya samutthitaH || 207 || mahAbhakSAdirUpiNyo nizitA dIptayogagAH | yAstA eveha saMhAre sahasA bhAnti nityazaH || 208 || dazendriyasamArUDho'haMkAro madadarpitaH | evamekAdazavidho bhAti yo bhedavizrutaH || 209 || tat saMhArAya satataM kAlasaMkarSaNI citiH | tasyAMzurazmivisphAraiH proditA kramataH sadA || 210 || ayaM saMhAracakrasya guruvaktrakramoditaH | saMpradAyaH paraH ko'pi sAkSAt prakaTito mayA || 211 || svaM svaM viSayamAhRtya pratyAvRttikramAgataH | ciccamatkArabharito dvAdazAkSisvaro gaNaH || 212 || yastaM saMhRtya sahasA prazAntA dIptayogagAH | nistaraGgamahAvyomarUpiNyasturyacakragAH || 213 || aprameyaniraupamyasAmarasyaikavigrahAH | nirUpAkhyamahAgrAsadhAmasthA bhAnti nityazaH || 214 || akArAdivisargAntA ye SaNDhasvaravarjitAH | teSAmevAzu yugapad vyaktAvyaktasvarUpatA || 215 || saMhartumuditA devyo nirahaMkAravigrahAH | nirvikalpamahAvyomadIptayo vigatAzrayAH || 216 || parAdyA sA udetyeva sphuritAnandaghUrNitA | yAkramaspandalaharI vidyullekhaiva caJcalA || 217 || tasyA udayasaMsthAnasaMhArodrekakalpanA | trividhA samakAlena proditA kalanojjhitA || 218 || tasyA hi triprakArAkhyA kalpanA yA samantataH | pratyekazaH svarUpo'pi sRSTyAdikramasaMjJakaH || 219 || caturthomnizitaM rUpamudyogAdivibhedataH | evaM dviSaTkasaMvittikramo bhAti nirAvRtaH || 220 || sRSTikAlyAdibhedena prathitaughodadhiH paraH | nirAlambavikAsaikamahimA satatoditaH || 221 || tasyaiva haThasaMhAravRttyA durdarzamUrtimAn | kramAkramobhayottIrNarazmipuJjAtighasmaraH || 222 || svarUpaM kartumudyukto nistaraGgo'niketanaH | sparzAsparzapadAtItarUpatvAd vigatottaraH || 223 || prazAntAtiprazAntaikamahimAvikRtaprabhaH | itthaM saMhArasaMhArarazmyoghaH parikIrtitaH || 224 || evaM dhAmAdibhedena trividhaH prakaTIkRtaH | devikAkramasadbhAvo'pyalaMgrAsaikaghasmaraH || 225 || AsAM dviSaTkadevInAM vamanagrAsatatparAm | devIM trayodazIM vande tAdAtmyapratipattaye || 226 || mahAbhairavanAmAdibhairavaM tritayaM sadA | pratyekasargarUpAdi caturdhA saMvyavasthitam || 227 || itthamugrasvarUpo'yaM bhairavezakramaH paraH | vibhAti dvAdazAtmaikasvabhAvaH kAlavarjitaH || 228 || tasyaiva satataM devI haThAt kavalanoditA | yatastasmAt samAkhyAtA devI nAmnopacArataH || 229 || vastutaH svasti naivAsyA nAmarUpaprakalpanA | mahAsaMhAracakrezyAH sarvottIrNasvarUpataH || 230 || cidAnandaparispandavibhavaH pIThatAM gataH | yasmAt seheti satataM gocaratvaM samantataH || 231 || avibhinnasvarUpatvAd vAmezvaryA nirAkRte | tatprasAdavazAt samyA vRndAntanAma visphuTaM || 232 || mahAjJAnamahAyogakaraNAdikramairapi | na tu gocaratAmeti devIyaM sarvagA satI || 233 || guruprasAdenAviSTA kecittanmayadharmiNaH | bhavanti vyomavRttyaikasvabhAvA nAtra saMzayaH || 234 || bhAvasvabhAvarUpeha sRSTyAdInAM virAjate | niSThA tadyugmavisphAravarjitApi samantataH || 235 || nirniketamahAsaMviddharmiNI vigatagrahA | itthaM mahAnaye bhAti pUjAkramamahodayaH || 236 || udyogasyaikadeze'pi devatAcakravistaraH | prasphuratyavibhAgena vyomavRttyaikatAM gataH || 237 || itthaM sadaiva sarvatra devInAmudayaH paraH | niSThito'pi satAM gamyo niravagrahavigrahaH || 238 || samastotthavyastadehaH samastavyastasvarUpabhRt | vyastAdyastu samastAntaH sthito'yaM devatAkramaH || 239 || tatraivAnArataM prodya tridhA paJcamahodayaH | bhAti divyaughavisphAravibhavAntaHsthito'vyayaH || 240 || devIcakrodaragato navasaMhAravistaraH | samsthito'pi nirAlambamahimAkalpanojjhitaH || 241 || itthaM pIThAdhipaH zAzvannavacakrodayaH paraH | cakAsti bahurUpaikarUpo nityavikasvaraH || 242 || sa eva dezikavaro rekhAkarmAdivarjitaH | paramaNDalapIThaikasvabhAvastu nirUpitaH || 243 || itthaM nAnArthasaMsthAnadhAmAditritayAtmanA | nirlakSaprathamonmeSe pUrvakoTisvarUpiNI || 244 || cakracakrezvarIrUpakrameNaikaiva kAlikA | vibhAtyanAratA samyak nirahaMkAradharmiNI || 245 || anayoktadRzA proktamekarUpavapuH param | arAvarAvavisphAraM mantrapIThamanargalam || 246 || itthaM vyAvartitApyeyaM nAnArthaikatvakalpanA | nirniketasvarUpatvAnnayottIrNaM vibhAvyate || 247 || aprameyamahAvyomavRttirUpamanAzrayam | devIpIThamajaM yat tadadhyuSTAkhyaM nirAvRtam || 248 || * * * * * niHspandasaMdhAnojjhitavigraham | sarvatrAvasthitaM vande vAcAtItamanAmayam || 249 || yadyapyayaM mukhAmnAyayuktyA samyak nirUpitaH | akramakramasadbhAvasaMgrahasyaikanirbharaH || 250 || tathApyetatsamuttIrNaM vastu vaktuM na pAryate | samayakSatibhIrutvAt vijJeyaM guruvaktrataH || 251 || vimohAdiha keSAMcid vidyoktyAbhAsavibhramaH | rAjate yena vijJAnaM na tena tattvadaM sthitam || 252 || sAkSAd mahAnayamayaH prakAzaH prakaTIkRtaH | so'yaM mayArNasiMhena saddezikamukhodgataH || 253 || tameva paramelApasaMpradAyopabRMhitam | vibudhAzcarvaNantyuccairjIvanmuktyAtmasiddhaye || 254 || abuddhaM manmataM yena madvaktrAdabudho janaH | mahAnayamayaM zAstraM svavikalpairvikalpayan || 255 || garjatyabudhabudhInAM punaH pAnAsavakSaye | namo'stu kRtine tasmai sadRSTityAgine param || 256 || paramapaNDitakulAcAryazrI arNasiMhaviracitaM mahAnayaprakAzam samAptam ||