#***********************************************************************************************************************
# devIdyvardhazatikA 
#
#
## Copyright (c) Mark S.G. Dyczkowski
## THIS TEXT FILE IS FOR REFERENCE PURPOSES ONLY. 
# The text is based on the following two Nepalese manuscripts and will be published in print 
# by Dr. Dyzckowski with the manuscript variations in the near future.
#
# MS K: NAK MS no 1-242; NGMPP: reel No. A161/12. 
# No. of folios: 19; size: 21 x 7 cm; material: paper; script: NevArI.
# Folios 4, 15 and 16 are missing in MS K that contained the text from 37cd to 50ab and 178 to 182. 
#Note that what is noted on the NGMPP index cards as NAK MS 1/252; NGMPP reel no, 
# A 1177/11 is MS K. The MS number has been noted wrongly. 
# MS Kh: NAK MS no. 5-5184 "Saivatantra 655; NGMPP: reel no. A 161/14. No. of folios: 9; 
# size: 27 x 9.5 cm; material: paper; script DevanAgarI. Complete 
#
# Jayaratha quotes this text (verses 170cd-174) in his comm. on TAA 4/149. He calls it the "SrIsArdhazatikA. 
#
# Encoded in Harvard-Kyoto transliteration
#*******************************************************************************************************************

devIdyvardhazatikA


oM namo mahAbhairavAya 
yA sAntakAgnikuharotthitabhAsvarUpAm 
somArkavahnitripathodaramadhyasaMsthA |

ciccetyacittaviSayAkSavilInabhAvA|
svabhAvabhAvakiparAM praNamAmi kAlIm || 1 ||

brahmapadmasukhAsInaM bhairavaM vigatAmayam|
zaktisthaM zaktirahitaM paramAnandarUpiNam || 2 ||

nirvANaM nirvikAraM ca apratarkyamanaupamam|
zAntaM guNagaNairhInaM udayAstamavarjitam || 3 ||

khecarI dikcarI caiva gocarI bhUcarI tathA|
yoginI zAkinI rAmA siddhasaMghairniSevitaH || 4 ||

tatrAsti na bhayaM kiJcinna jarA na ca vyAdhayaH|
na vighno na ca vai mRtyurna kAlaM kalayet tataH || 5 ||

tatrasthA bhairavI bhImA bhairavArAdhane ratA|
pAdau jagrAha devasya idaM vAkyamudIrayet || 6 ||


zrIdevyuvAca


devadeva mahezAna bhavabhaGganiSUdana|
svacchanda lalitoddhAma paramAnandasundara || 7 ||

zrutaM sarvamazeSeNa kulakaulakramAgatam|
paJcaviMzatibhedena kAlibhedaM mayA zrutam || 8 ||

adyApi saMzayo me'sti na tuSTiH paramAtmanA |
kathaM kAlI samutpannA kiM vA kAlIti cocyate || 9 ||

uttamaM kIdRzaM nAtha zAstraM zAstreSu gIyate|
tamupAsyaM kathaM nAtha vidyA vA tasya kIdRzI || 10 ||

tad vadasva mahAdeva yena me yogyatA bhavet|

zrIbhairava uvAca


nAyaM kAlaH priye vaktuM kiMcid tava zAsane || 11 ||

yasyedaM siddhisaMghAtaM saMsthitaM ca kRzodari|
vaktrAd vaktreNa taM sthAnaM kAlikAkhyaM pratiSThitam || 12 ||


zrIdevyuvAca


kimahaM devadeveza bhAgyahInA ca durbhagA|
ajJAnatamasAndhA ca jJAnayogavivarjitA || 13 ||

 na yogyAsmi na bhavyAsmi kulakaulakrame hara|
bASpakaNThanirodhena rudamAnA tu bhairavI || 14 ||

avanIM vIkSyamANA tu alaMkRtvA tu saMsthitA|
provAca bhagavAn devaH protphullamuditAnanaH || 15 ||


zrIbhairava uvAca


mA rudasva mahezAni ahaM tat kathayAmi te|
idaM praznavaraM ghoraM yaduktaM tava zobhane || 16 ||

tacchRNu tvaM mahAguhyaM kAlikAkhyaM yathAkramam|
AsIdidaM tamobhUtamaprajJAtamalakSaNam || 17 ||

naSTacandrArkapavanaM grahanakSatramaNDalam|
 tadAhaM hRdayAviSTAM cintayAmi parAM kalAm || 18 ||

yayA vyAptamidaM vizvaM bhUtasaMghaM varAnane|
tadA mayA zrutA vANI azarIrAt parAcchivAt || 19 ||

AyAtaM kAlikAkhyasya yathAvat kathayAmi te|
yo'sAvanAdinidhanaH zivaH paramakAraNaH || 20 ||

atIndriyo nirAlambaH svacchando vigatAmayaH|
niraJjanaparAkAzo vyomAtIto nirAzrayaH || 21 ||

sadasadvyaktisadbhAvo lakSalakSaNavarjitaH|
tasyecchAtaH parAzaktirutpannA bhAsvarUpiNI || 22 ||

taddharmadharmiNI zuddhA khamUrtiryA parA kalA|
bahudhA sA ca devezi svarUpA vizvarUpiNI || 23 ||

bhAvAbhAvAntamadhyasthA prabhavApyayahetukA |
nispandAnandamadhyasthA parAnandAbhilASiNI || 24 ||

 kalAkalApamadhyasthA kAlasya kalanI kalA|
brahmAdistambhaparyantA azeSAdhAravigrahA || 25 ||

carAcaraM jagat sarvaM yat kiJciccetanAtmakam|
kalate sarvadehasthA tena kAlI zivodbhavA || 26 ||

svayaMbhUtA zivodbhUtA mahAzivapadAnugA|
 adRSTavigrahA devI udayAstamavarjitA || 27 ||

tasyA bhedaM pravakSyAmi caturdhA zRNu bhAgini|
sRSTikramaM tu prathamamavatAraM dvitIyakam || 28 ||

saMhArAkhyaM tRtIyaM syAdanAkhyeyaM caturthakam|
kramAkramAd gatAgataM mukhAgamaM tamojjhitam || 29 ||

mukhAgamamidaM devi khecarINAM hRdi sthitam|
na lekhyaM pustake devi zAstreSvapi sugopitam || 30 ||

 brahmAdidevatAnAM ca duSprApyaM kAlikAkramam|
martyAnAM kA kathA devi chadmamAyAsamanvitAm || 31 ||

anekajanmakoTibhiH saMcaranti malAvRtAH|
na vindanti paraM sAraM saMsArabhayanAzanam || 32 ||

kadAcit kAlaparyAye parAzaktyA pracoditA|
citpade uditA devi preritA paramezvarI || 33 ||

labhyate paramezAni kAlikAkhyaM varAnane|
yAvanna sAdhako mantrI kAlIkulapade sthitaH || 34 ||

yAvannAnugraho devi kRzodaryA svayaMkRtaH |
athavA bhairaveNaiva guruvaktramukhAgamAt || 35 ||

tAvanmuktiH kutastasya kAlikAkhye surezvari|

zrIdevyuvAca


zrutaM mayA tvadAsyAbjAnnirgataM zAstramuttamam || 36 ||

nirNayaM na mayA jJAtaM kAlikAkhyasya bhairava |
yena jJAnena devezi bhavAmi kulabhAjanam || 37 ||

mAtsaryaM tyaja deveza nirvighnaM vada bhairava|

zrIbhairava uvAca


zRNu bhairavi tathyena vAkyaM paramadurlabham || 38 ||

dambhamAtsaryarahitamanAkhyeyaM paraM tataH|
tat sAraM saMprakSyAmi samAsAt surapUjite || 39 ||

Adau tAvat surezAni lakSaNaM vIrayoginAm|
 tantrAcAraratAnAM ca siddhAntAdikriyAnvitAm || 40 ||

vedoktAdikriyArUDhAM vaiSNavAnAM vizeSataH|
kaulikAnAM kriyAyuktAM tebhyo rakSyaM mahAkramam || 41 ||

deyaM vIravratInAM ca nityaM pramuditAtmAnAm |
yogimelApakAsaktAM yogAbhyAsaikatatparAm || 42 ||

varadAnAM ca gambhIrAM dvaitAdvaitavivarjitAm|
laulyadambharahitAM pazubhAvatiraskRtAm || 43 ||

parAnandarasonmattAM sadbhAjAM ca kule ratAm|
satyavatAM sthiradhiyAM bhayadainyaparAGmukhAm || 44 ||

IdRGmadhye tu ekasya koTimadhye tanUdari|
anugrahaM tu kartavyaM guruNA muditAtmanA || 45 ||

tacchRNuSva samAsena sArabhUtaM mRgekSaNe|
nAtra pUjA namaskAraM na japo dhyAnameva ca || 46 ||

na mudrA na ca uccAraM na cAhvAnavisarjanam|
kaulikaM kalpanAmAtraM vijJAnaM yoginImayam || 47 ||

hartA kartA ca kAryANAM saMhartA punareva ca|
etat svarUpavijJAnaM vyaktAvyaktasya bhedakam || 48 ||

sa siddhayoginIyogaH kaSTayogaM parityajet|
zaktirodhaM na kartavyaM kalAghAtaM na kArayet || 49 ||

ata UrdhvaM na ghaTTeta na nicairgatirodhanA |
 niSprapaJcaM nirAdhAraM niraupamyaM nirAkRti || 50 ||

AdimadhyAntarahitamAdimadhyAntavarjitam|
ekAkI kevalaM zAntaM yena sarvaM pratiSThitam || 51 ||

SoDazAdhAranirmuktaM trilakSaparivarjitam|
na bindurna ca vai nAdaM na candrArkanirodhakam || 52 ||


zrIdevyuvAca


Adau sarvamidaM zUnyaM prasaraM nAsti kasyacit|
ekaH sa tiSThate devo nirAkAro nirindriyaH || 53 ||

 niraJjano nirAbhAsaH sarvajJo jJAnabhAskaraH|
tasyAvabodhA paramA parAzaktiH samutthitA || 54 ||

sUryakoTikarAbhAsA candrakoTyayutaprabhA|
taDidbhUrimahAtejA bhAskarAkArarUpiNI || 55 ||

tayA jvalitasAmarthyAt prasaraH kAraNAdayaH|
devAzca dAnavAH sarve manuSyAzcANDajAstathA || 56 ||

 caturdazavidhaM sargaM yat kiJcit sacarAcaram|
sarve stuvanti paramAM hakArArdhArdharUpiNIm || 57 ||

sRjate saMharate sA tu sthityutpattikarI ca sA|
sarvaM saMharate sA tu kAlAntakaraNI priye || 58 ||

sarvasaMhArabhUtaM ca kramaM kAlikramaM sthitam|
yA sA sarvahitau zAntA nispandAnandamadhyagA || 59 ||

mahAviSayasaMlInA saMvidAnandadAyinI|
nAzanI vighnamatulamekarudrasamopamA || 60 ||

bhedayet duSkRtAn ghorAn merutulyamayopamAn|
cAlayed vasudhAM sarvAM * * * * * * * * || 61 ||

dadantI yoginImArgaM yatra devo niraJjanaH|
harantI pApasaMghAtaM dadantI yogasaMcayam || 62 ||

zravantI jJAnakallolaM brUvantI ziva ziveti ca|
 sphoTayantI pazugranthiM nazyantI janmabhUmikAm || 63 ||

sarvAdhArotthitA sA hi ekAratrayabhedinI|
prasuptA kulavezme tu vyAlakuNDalikAkRtiH || 64 ||

prabuddhA daNDavajjJeyA suSumnAmArgamAzritA|
gatA dvAdazasaMsthAnaM cakrakramapadojjhitam || 65 ||

tatra sA varSate divyamamRtaM jantujIvitam|
rAtrIzasya pravAheNa sthitA sA sRSTikAriNI || 66 ||

bhUyaH sUryapravAheNa sthitA saMhArabhairavI | 
madhyavRttisamArUDhA padamavyaktadAyinI || 67 || 

 grasantI sarvatattvAni sarvendriyavimohanI|
 vAcyavAcakahInA sA lInA sA parame pade || 68 ||

tayA vyAptamidaM vizvaM nimeSonmeSamAtrataH|
sarvaM tatra kule vyaktaM dehe sarvAGgamadhyagA || 69 ||

bhAvayet paramAM kASThAM bhAvAbhAvAntamadhyagAm|
na ca grahA na candrArkau na rudro na sadAzivaH || 70 ||

na bhAvo na dhvanizcaiva na rAvakaraNaM tathA |
na nAdo na ca vai bindurna sthAnaM na ca dhAriNI || 71 ||

na dhyAtA na ca vA dhyeyaM na samAdhirna zAntatA|
pUrakaM kumbhakaM naiva recakaM na dviSaTkakam (?) || 72 || 

na cakrakramaNaM vApi na ca mantrapadaM bhavet|
 kevalaM cinnabhaM vindyAd nirAdhAraM cidoditam || 73 ||

evaM nirAzrayaM sthAnaM yo vetti sa kulI bhavet|
khecaryastasya sarvAstA dadanti ca svakaM carum || 74 || 

yena prAzitamAtreNa sadyotpatati khe tale|
pUjyate yoginIvRndaiH stUyate ca surAsuraiH || 75 ||

evaM kAlikramaM jJAtvA kSitau kastiSThate priye | 


zrIdevyuvAca


devadeva mahAdeva ajJAnatamanAzana || 76 ||

vadasva paramAM vidyAM kAlasyAntakarIM tathA |
yasyA nAsti samA kAcid vidyA vA mantranAyikA || 77 ||

tanmamAkhyAhi tattvena bhavabhaGgaharakSama | 


zrIbhairava uvAca


atiguhyamidaM bhadre gopitavyaM prayatnataH || 78 ||

samAsAt kathayiSyAmi vidyAM paramasiddhidAm |
sakRtsmaraNamAtreNa tathyavijJAnasiddhidAm || 79 ||

mahApitRvanaM gatvA rAtrau kRSNacaturdazI|
kaGkAlaghRSTavasudhAM mahAdhUpopadhUpitAm || 80 ||

mahAkSata u * reNa (?) tatsthAnamupalepayet | 

dizASTau maNDalaM dadyAd dIpaM telairnarotthitaiH || 81 ||

 tatra saMpUjyA yatnena zivAdigurupaMktayaH|
paraM zAntaM samAlokya yena bhraMzo na jAyate || 82 ||

mahAphalguSakenaiva mahAraktena bhairavi|
mahAmInAdicarukaiH pAnakairbahubhistathA || 83 ||

guruzcAdvaitasaMyukto varacaNDAlisaMyutaH |
ghUrNamAno mahApAnaistRptaH saMtarpya bhairavIm || 84 ||

kulAcAravidhAnena zaktiM caiva tathA yajet|
AtmAnaM zavamArUDhaM zaktyutsaMgavibhUSitam || 85 ||

khaTikAsthimayIM kRtvA tato vidyAM samuddharet|
 varAGgavihagaM sUraM puJjaM puruSameva ca || 86 || 

kAlaM sarvagataM caiva dAruNAkrAntasundarI|
tRtIyArghaM turaGgaM ca DAkinImarmasaMyutam || 87 ||

pavanaM navame yuktaM tejastejaHsamanvitam |
lakSmIvezaM tu udadhirekatra samayI japet || 88 ||

somasaptakamuddhRtya navavarNAH kulezvari|
navadvAre pure yojyA vedhakarmaNi sarvadA || 89 ||

kule sA navadhA yojyA kaule saptadazAkSarA|
navavarNavibhedena jJeyA sA SoDazAdhikA || 90 ||

eSA vidyA mahAdevi trailokyasya vimohanI|
smRtamAtrA ca kaulezi trailokyamapi karSayet || 91 ||

navatattvA surezAni navagranthividAriNI|
navanAbhoditA devi navadvAropabhogadA || 92 ||

navapraNavasaMbhinnA navayogavidhau sthitA|
navAntA navadA nityaM navAmRtacarupriyA || 93 ||

 navazaktivibhAgasthA ekAzItipadordhvagA|
ekAnekavibhedena jJeyA devI navAkSarA || 94 ||

ajasya jananI yA sA niSkalAjJeyavigrahA|
cintayet sarvasiddhyarthaM yathAvacchRNu bhairavi || 95 ||

guhyacakre jvaladrUpA paratejopabRMhitA|
 vijJAnAmRtasaMpUrNA jJeyA devI navAkSarA || 96 ||

kandacakre taDitprakhyA suptanAgendrasannibhA|
cinmarIciH zubhAkIrNA jJeyA devI navAkSarA || 97 ||

hRdvyomAmRtamadhyasthA nirvANadhvanilakSaNA|
zaziprakhyaiva vimalA jJeyA devI navAkSarI || 98 ||

kaNThakUpagatA sA tu jyotirUpA tamo'pahA|
tarpayedakhilaM vizvaM jJeyA devI navAkSarA || 99 ||

tAlusthAnasthitA sUkSmA lambikAkRtirbhairavI |
sravantI cAmRtaM divyaM jJeyA devI navAkSarA || 100 ||

bindurUpA bhruvormadhye supradIptA nirAmayA |
 samastamantrajananI jJeyA devI navAkSarA || 101 ||

brahmarandhrordhvapathagA zivacakrAvabhAsakI|
tridhAmadIpanI jyotirjJeyA devI navAkSarA || 102 ||

parA divyoditA sA tu jJaptirUpA manonmanI|
anaGgA dvAdazAntasthA jJeyA devI navAkSarA || 103 ||

tatrasthAnagatA zaktirjvalanI UrdhvagAminI|
tatra cordhvamukhI bhUtvA dvAdazAnte vyavasthitA || 104 ||

tadA cakraM mahAdRzyaM yoginIkoTibhirvRtam|
tatpRSThe dhAmagamanaM gacchet padamanAmayam || 105 ||

evaM te paramaM guhyamaprakAzyaM surairapi |
zaktisvarUpalAbho'yaM sadyonirvANabhogadam || 106 ||

mahAvijJAnamelApaM kAlasyaiva tu vaJcanam|
uttamAdhamakarmeSu upAyeSu varAnane || 107 ||

eSA navAkSarI devI jJeyA sA niSkalA zivA|
adhunA zRNu tattvAGgi vidyA saptadazAkSarA || 108 ||

yathA samyak prayoktavyA tathA tat kathayAmyaham |
 kaivalyapadamArgasthA karandhrapathamadhyagA || 109 ||

kalAkalaGkanirmuktA vidyA saptadazAkSarA|
 khahInA kakubhe lInA kodaNDadvayamadhyagA || 110 ||

kharAve ramate nityaM vidyA saptadazAkSarA |
khakalA khamUlAntasthA kharUpA khecarIkalA || 111 ||

kharavA ca ravAntasthA vidyA saptadazAkSarA |
khecarIcakramadhyasthA khavyomAmRtasyandinI || 112 || 

 khasthAstamoditA yA sA vidyA saptadazAkSarI|
haMsarUpA hakArAkSA hAnadAnapadojjhitA || 113 ||

hatAnAhatavicchinnA vidyA saptadazAkSarA|
akSarAkSararakSezI kalAkamalamandire || 114 ||

amoghA cAkSayA sUkSmA vidyA saptadazAkSarA |
bhArUpA bharitAkArA bhramadbhrAntivinAzanI || 115 ||

bhAcakrodayavicchinnA vidyA saptadazAkSarA |
pretAsanasamArUDhA mAnujodaravAhinI || 116 ||

tadantapadasaMlInA vidyA saptadazAkSarA|
ekAkinI ekavIrA ekA sAnekarUpiNI || 117 ||

ekAratrayamadhyasthA vidyA saptadazAkSarA|
jhaMkAravarNamadhyasthA jhaMkArapadarUpiNI || 118 ||

mahAjhaMkAranAdotthA vidyA saptadazAkSarA|
yA sA cidAntasaMrUDhA sarvamantraprabodhanI || 119 ||

nAdAntasyandavizrAntA vidyA saptadazAkSarA|
muNDapAdanamaskAra - aMgAsanavivarjitA (?) || 120 || 

parabrahmamayI sA tu vijJAnAmRtavAhinI|
evaM yo vetti devezi dazadhA varavarNini || 121 ||

sa melakaM labhed devi yoginInAM sudurlabham|
tatsakAzAccaruM prApya yenotpatati khe tale || 122 ||

aNimAdikasiddhIzca prApnoti bhairavo yathA | 

ataH kramasamudbhUtaM kAlikAkhyaM caturvidham || 123 || 

vibhAgena pravakSyAmi saMkSepAnna tu vistarAt|
akathyaM vA kramAtItamakulaM ca kuloditam|
spandanAntaramadhyasthamAtmAgataM subhAvitam || 124 ||

kAlagnirudrAt prasRtaM ca tejo bhUrirmahAdIptitaraM vicintya|
UrdhvasthitA candrakalA prazAntA pUrNAmRtAnandarasena devi || 125 ||

tadubhayorvahnivizeSayogAt tejazca candradravitaM ca yasmAt|
tejazca candrazca vimizritaM ca bhavet tadarkamavatArarUpam || 126 ||

tasmAt sakAzAt prabhavApyayau tau asmAdidaM vizvasamagrabhUtam|
etad viditvA viditAnubhAvaM dhyAyeta yuktyAtmacidarkarUpam || 127 ||

yAvanna taM kevalaM cidrasasya cittaM vilInaM parataH samantAt|
tAvad bhaved vahnivizeSayogAt sRSTiM ca saMhAraM pRthak krameNa || 128 ||

atazca devi zRNu ghorarUpaM yogaM ca deveSvapi durlabhaM ca|
kalAgrasantIM cidamaprameyAM samastabhAvAntare kAlarUpAm || 129 ||

nairAtmikAM zUnyapadena yAtAM dviSaTkavizrAmapade praviSTAm|
kaivalyamArgeSu vizuddhadehe dhyAyeta saMhArakarIM tu kAlIm || 130 ||

bhAnusthitA sRSTiniruddhamArge pravarSamANA amRtaughasAram|
saMpUrNatAzUnyazazAMkacakraM yenaiva devA hyajarAmarAzca || 131 ||

pItvA tu tatpUrakavRttirUDhAM niyojya lolAntaratAlumUle|
dhyAyenAnenaiva carAcaro'yaM vizvaM bhavedakSayamRtyujicca || 132 || ?

etat kramaM sRSTipadAnubhUtaM sarvAtmanA gopayate hyavazyam |
kAlikramaM devi sunizcayaM ca vyAkhyAyate bhairavapAnamantam || 133 ||

marIcibhiH siddhakrameNa pUjyaM kRtvA tadAkhyAya hi devadevi | 

mAMsaM mahAphalguSakaM ca mInaM madyaM surAsIdhurasAzca sarve || 134 ||

puSpaizca mAndArarasopayuktairdravyaiH sugandhaiH saha yojitairvai |
anyAnyanekAni vizeSabhakSyAnyAdau ca bhuGktvA suzubhe ca cakre || 135 ||

pazcAcchRNuSvaiva mahopadezaM vaktrAgame yat sthitaM khecarISu|
saMrodhya madhye sadasatpravAhaM vizrAmyate rUpamarUpamadhye || 136 ||

saMdhyAyate sakalatattvavihInabhAvaM cinmAtramekamamalaM malanirmalAkhyam |
yAvat svarUpapadavItritayaM niruddhaM no vetti vedyakalahaM viditArthabhAvam || 137 || 

* * * * * * * * * * * * * * * * * * * * * * * * * * * * * *|
tad brahmamevamamalaM paramArthasAraM kAlaM kalAkalitakalpamanAmakAlI || 138 || 

ityetat kAlikAbhedaM khyAtaM kramacatuSTayam|
prayatnena tu devezi gopanIyaM surezvari || 139 ||

anena jJAtamAtreNa sarvavyAptistu sundari|
kramabhedaM pravakSyAmi AtmA yena vyavasthitaH || 140 ||

yo'sau sarvagato devaH sarvavyApI hyavigrahaH|
ajo'nantaH zivo dhAtA cinmAtrapuruSo'vyayaH || 141 ||

nAmajAtiguNairhInamapratarkyamanAmayam |
caitanyaM sargAvasthaM vizvarUpaM samantataH || 142 ||

tasyecchAto varArohe zaktistaddharmadharmiNI|
tayA sRSTaM jagat sarvaM zivAdyavanigocaram || 143 ||

saptadazI tu sA mAtrA parAparavimarzinI |
prasUtAnekarUpeNa zaktiH sRSTikarI smRtA || 144 ||

yayA grAsIkRtaM vizvaM kAlAgnyAdizivAntakam|
sAdhusaMhAraNI proktA saktiH sarvagatA priye || 145 ||

bIjadvayaM tu saMhRtya madhye sanAtanI smRtA | 

vyomarUpA parA zAntA parabrahmasvarUpiNI || 146 ||

zaktireSA samAkhyAtA kalAkhyA kAlarUpiNI|
bindunAdamayI zaktiH prasUtAnandarUpiNI || 147 ||

ekA sAnaikarUpeNa sthitirUpA prakAzyate|
kramacakroditA sA tu kramavikramayogataH || 148 ||

kramaM kramagataM buddhvA vyutkrameNaiva siddhyati|
kramaM sarvagataM devi iti jJAtvA varAnane || 149 ||

kramaM caiva pravakSyAmi vibhAgena yathA sthitam|
zivAdi pArthivaM yAvadUtpannaM zaktivigraham || 150 ||

zaktInAJcaiva nAmAni kathayAmi samAsataH|
yonistu prathamA devI mahAyonistathaiva ca || 151 ||

divyayonistathA zaMkhI padmayoniH prakIrtitA |
etAH sRSTikarA devyaH siddhaistu saha saMyutAH || 152 ||

siddhAJcaiva varArohe kathayAmi samAsataH|
siddhastu prathamo devi mahAsiddho dvitIyakaH || 153 ||

divyasiddhastathA zaGkhaH padmasiddhazca paJcamaH |
siddhAzcaiva samAkhyAtAH zaktInAM varavarNini || 154 ||

zivAdibrahmaparyantaM veditavyaM varAnane|
pUjayeta yathAzaktiH kramapUjAyutena ca || 155 ||

kulabIjena devezi hrIM - zrIM - nAmAGkitena tu|
pAdayuktena subhage paMktiyuktakrameNa tu || 156 ||

sRSTikramaM tu kathitaM sthitirUpamataH zRNu|
avatAraM tato devi kathayAmi vizeSataH || 157 ||

khagendraH kUrmameSau tu mInazcaiva caturthakaH |
eSAM vai dUtayo devyaH kathayAmi krameNa tu || 158 ||

vizvAmbA maGgalA caiva kAmamaGgalA koMkaNA |
dUtyazcaiva samAkhyAtAH rAjaputrAn tataH zRNu || 159 ||

bhaTTazcaiva mahendrazca valkalazcApyahIndrakaH|
gajendro mahIdharazcaiva amaro varadevakaH || 160 ||

vicitro alinAthazca vindhyazca guDikastathA|
ebhiH saha kRtaM devi avatAraM yuge yuge || 161 ||

kulezvarI tathA devI kSetrapAlaM tathaiva ca|
pUjayet tu yathA devImUrdhvavaktraM hi pUjakaH || 162 ||

avatAraM mayAkhyAtaM saMhAramadhunA zRNu|
mahAbhakSabhakSaNI tu mahAsaMhArakAriNI || 163 ||

mahAraktezvarI caiva mahAkRtAntanAzanI |
mahAkAlI kAlarAtrI kAlasaMhArakAriNI || 164 ||

mahAyamabhakSaNI ca paJcamI parikIrtitA|
mahAcaNDezvarI devI mahAvIrezvarezvarI || 165 ||

mahAvIrA raktavarNA citaizvarI tathaiva ca|
mahAkAlAgnirudrezI saMhAraharaNI parA || 166 ||

mahAbhairavazabdazca saMhAriNI tathA punaH|
ekAdaza samAkhyAtAH zaktayaH paramezvari || 167 ||

rudraistu saha devaistu saMhAraM kurute kSaNAt|
kAlAgnizivaparyantaM saMharatyakhilaM jagat || 168 ||

pUjanIyA mahAbhAge kulapUjAratena tu|
cakrAkAreNa devezi hU/ phaTkArakrameNa tu || 169 ||

saMhAra eSa vikhyAto anAkhyeyamataH zRNu|
dvAdazAraM mahAcakraM razmirUpaM prakIrtitam || 170 ||

nAma caiva pravakSyAmi zaktInAM tu yathA sthitam|
sRSTiH sthitizca saMhArI raktakAlI tathaiva ca || 171 ||

sukAlI yamakAlI ca mRtyukAlI tataH param|
bhadrakAlI paramArkA mArtaNDA ca tathaiva ca || 172 ||

kAlAgnirudrakAlI ca mahAkAlI karAlikA |
mahAzabdena sarvAstAH pUjyA dvAdazarazmayaH || 173 ||

mahAbhairavaghoraM ca caNDazabdamataH param|
kAlizabdamatazcAnte trayodaza udAhRtA || 174 ||

kAlIcakraM mahAcakraM sarvacakrottamottamam |
vaktrAd vaktragataM caiva pAramparyeNa saMsthitam || 175 ||

anAkhyeyaM mahAcakraM svasvarUpaM prakIrtitam|
pUjayet tu mahAdevIM somasUryAgnisaMbhavAm || 176 ||

bIjanyAyena parame A/ phA/ phi/ ca krameNa tu|
pAdayuktena subhage vAmAvartaparibhramAt || 177 ||

cakrAkAreNa vai pUjyA tanmadhye tridazAdhikA|
kathitA tu samAsena kramapUjA kRzodari || 178 ||

guhyametat samAkhyAtaM guhyAnte tad vyavasthitam|
cakraM caiva mahezAni tejorUpaM prakIrtitam || 179 ||

saMghaTTAnte tu devezi bhAvayet kramamuttamam|
kramabhedaM samAkhyAtaM sRSTizca sthiti - saMhRtiH || 180 ||

anAkhyeyA samutpannA sRSTirUpA varAnane|
tataH sthitezca saMhAre krameNa parikIrtitA || 181 ||

etat te kAlibhedaM tu kathitaM varavarNini|
bhairavAd bhairavyA prAptaM tasyAzcaivaM tu yoginyA || 182 ||

tatsakAzAt tu siddhena mInAkhyena varAnane|
kAmarUpe mahApIThe matsyendreNa mahAtmanA || 183 ||

prakAzitaM tu vai samyak svaziSye varadevake|
tanmukhAccaiva saMprAptamanyaizcaiva samAsataH || 184 ||

evaM te kathitaM devi kAlibhedaM sudustaram|
prayatnena tu devezi gopanIyaM surezvari || 185 ||

yena vijJAtamAtreNa tataH siddhirbhavet kSaNAt|
etasyAbhyasyamAnasya mRtyurdevi na bAdhyate || 185 ||


zrIdevyuvAca


dIkSAM vada mahAdeva mudrAM pUjAM japaM tathA|
samAsAd devadeveza nAkhyAtaM me kadAcana || 186 ||


zrIbhairava uvAca


zRNu devi samAsena rahasyaM paramaM priye|
navadvAreSu vinyasya navavarNAn kulezvari || 187 ||

SoDazAdhArabhedena caturdhA (?) SoDazAdhikA | 

dolotthagrAhasaMgrAsamabhilASaM (?) tu paJcamam || 188 || ?

kRtvA cAravicAraM tu pravizecca zanaiH zanaiH | 

naSTacchAyAM tu yogena brahmadRSTyAvalokayet || 189 ||

pravizya sarvadeheSu jalArkamiva yogirAT|
raJjikAkSarayogena pAramparyamukhAgame (?) || 190 ||

tatkSaNAt patate bhUmau chinnamUla iva drumaH|
vedhadIkSAprayogeNa saMkrAntA yasya hRdguhA || 191 ||

tatkSaNAjjAyate so'pi dIpAd dIpamivoddhRtam|
jvalate kulatejastha ApAdatalamastakam || 192 ||

tAvat saMdahyate devi pAzaM caivordhvAdhogatam |
nirAdhAraM manaH kRtvA nirmale gagane pade || 193 ||

yAvat cintayate tasya vizuddhena manA priye|
tAvat saMpatate bhUmau kASTapASANavat sthitaH || 194 ||

pazcAt tasya kalA sUkSmA citte hyamRtavarSiNI |
tatazcotthApya bhUmestu mantraM tasyaiva dApayet || 195 ||

eSA dIkSA mahezAni vedhakarmaNi yojayet|
mudrAM cAsya pravakSyAmi bhUdharANAM prapAtanIm || 196 ||

kSobhaNI sapta pAtAlAn sAgarANAM ca zoSaNI|
pAtanI ravisomAnAM yoginI siddhidAyinI || 197 ||

karau tu yojayed vaktre muSTiM baddhvA varAnane|
tarjanyau daMSTrarUpau tu aMguSThau nAsikAgragau || 198 ||

niyamya karaNAn sarvAn ravisomau tu ghaTTayet|
cAlayed daMzanAn yatnAdanackAkSaM samuddharet || 199 ||

cintayet paramAM zaktiM ravikoTisamaprabhAm|
AsanaM paramaM baddhvA UrdhvavyomAnugacchati || 200 ||

mahApralayakAlAgnisadRzIM cintayan parAm|
jvAlAkalApabahulAM vaktramArgavinirgatAm || 201 ||

na deyAt sanmukhaM mudrAM pazUnAM mRtyurUpiNIm | 

japet japyAM tu paramAM kAlIM saptadazAkSarIm || 202 ||

kAlAgnirudrasantApaM cintayed ravimaNDale |
yAvad brahmabile dvAre cintayecca zikhAM parAm || 203 ||

tatrArUDho japed vidyAmaNimAdiphalapradAm|
jJAyate kIrtimahatA samastaphalavAJchayA || 204 ||

gaMgAsrotapravAheNa vAcA cAskhalitA bhavet|
yoginI tiSThate sarvAM sazailavanakAnanAm || 205 || ?

etAvad siddhiratulA yAvat prAptaM paraM padam|
tadA bhavanti tattulyAH parAH zivA yathA bhuvi || 206 ||

nAbhimeDhrAntare kande padmAdhAraH prakIrtitaH |
kAlAgnistatra bhagavAn saMsthitaH paramezvari || 207 ||

jvalantaM bhAsvaraM cintyaM yena bhUyo na bhUyate |
tadUrdhve saMsthitaM sUryaM prakAzakaraNaM zubham || 208 ||

jJAnavyAptiH prakAzAkhya Adityo nAbhimadhyataH|
sa vai prANo hi nAsAgre dRzyate malanAzakaH || 209 ||

somamApyAyanakaraM tata Urdhve vyavasthitam|
amRtaM sravate tatra paramAtmA sanAtanaH || 210 ||

somasthaM dRzyamAtmAnaM zaktigarbhe vyavasthitam|
sarveSAM vyApakI zaktiH kandadehAt samudbhavA || 211 ||

nAdAkhyA paramA sUkSmA cidAkAzapravAhiNI |
dharmAdharmau tyajet tatra zaktimadhye cidAtmake || 212 ||

nAdarUpe parAkAze vahate hyavyayA kalA|
vAyurUpA anackAkhyA unmanAmanamadhyagA || 213 ||

citkalA caJcalA sUkSmA sattAmAtrasvarUpiNI|
dahanAkArapApaghnI ravirUpA tu pAvakI || 214 ||

ApyAyanakarI saumyA AtmasthA jJAnadA zubhA |
zaktisthA nADimadhyasthA nAdasthA nAdarUpiNI || 215 ||

vAyusthA UrdhvagA zUnyA manasthA unmanA smRtA |
caitanyarUpA bhAsantI parA bhAsA hyanukramAt || 216 ||

yathA zaktiH sthitA prANe pare khAnte pade sthitA|
bhujaGgakuTilAkArA viSatantusamaprabhA || 217 ||

vyApinI sarvagA zuddhA zivasya cAnuyAyinI|
tayA vijJAtayA caiva zivatattvaM na dUrataH || 218 ||

pUjanaM kathayiSyAmi yathAvad varavarNini |
SaTtriMzAGgulamAnena raktavastraM tu Asanam || 219 ||

tatpRSThe pUjayed devIM kAlakAlakSayaMkarIm |
vaTukaM ca gaNAdhyakSyaM zrInAthaM zavarIM tathA || 220 ||

anyAJca gurupaGktiM ca pUrvameva krameNa tu|
etacchAstraM mahAdevi na dadyAd yasya kasyacit || 221 ||

kramaprastArarahitaM vaktrAd vaktre tu saMsthitam|
vaktrAd vaktragatAyAtaM na tu lekhyaM tu pustake || 222 ||

vicArayitvA dAtavyamanyathA maraNaM bhavet|
sarvasvaM cAgrato datvA pazcAdetacca grAhayet || 223 ||

dambhalobhena saMgRhya vrajed narake ghore |
vyAdhiduHkhanirAsAya bhavate nAtra saMzayaH || 224 || 



iti zrIparamahaMsasya kule kAlikAkramaM paJcaviMzatyadhikazatadvayaM zrI-uttarAnvayAgataM samAptam | iti devIdvyardhazatikA saMpUrNA ||


paramahaMsaparivrAjakauttarAnvayAcAryazrImadvimalaprabodhapAdAnAm iyamit |
devIdyvardhazatikA